1 וַיָּ֕שָׁב הַמַּלְאָ֖ךְ הַדֹּבֵ֣ר בִּ֑י וַיְעִירֵ֕נִי כְּאִ֖ישׁ אֲשֶׁר־יֵעֹ֥ור מִשְּׁנָתֹֽו׃ wayashav hamaleʾakhe hadover biy wayeʿiyreniy keʾiysh ʾasher־yeʿowr mishenatow׃

2 וַיֹּ֣אמֶר אֵלַ֔י מָ֥ה אַתָּ֖ה רֹאֶ֑ה [וַיֹּאמֶר כ] (וָאֹמַ֡ר ק) רָאִ֣יתִי ׀ וְהִנֵּ֣ה מְנֹורַת֩ זָהָ֨ב כֻּלָּ֜הּ וְגֻלָּ֣הּ עַל־רֹאשָׁ֗הּ וְשִׁבְעָ֤ה נֵרֹתֶ֙יהָ֙ עָלֶ֔יהָ שִׁבְעָ֤ה וְשִׁבְעָה֙ מֽוּצָקֹ֔ות לַנֵּרֹ֖ות אֲשֶׁ֥ר עַל־רֹאשָֽׁהּ׃ wayoʾmer ʾelay mah ʾatah roʾeh [wayoʾmer kh] (waʾomar q) raʾiytiy ׀ wehineh menowrat zahav kulah wegulah ʿal־roʾshah weshiveʿah neroteyha ʿaleyha shiveʿah weshiveʿah mutsaqowt lanerowt ʾasher ʿal־roʾshah׃

3 וּשְׁנַ֥יִם זֵיתִ֖ים עָלֶ֑יהָ אֶחָד֙ מִימִ֣ין הַגֻּלָּ֔ה וְאֶחָ֖ד עַל־שְׂמֹאלָֽהּ׃ ushenayim zeytiym ʿaleyha ʾeḥad miymiyn hagulah weʾeḥad ʿal־semoʾlah׃

4 וָאַ֙עַן֙ וָֽאֹמַ֔ר אֶל־הַמַּלְאָ֛ךְ הַדֹּבֵ֥ר בִּ֖י לֵאמֹ֑ר מָה־אֵ֖לֶּה אֲדֹנִֽי׃ waʾaʿan waʾomar ʾel־hamaleʾakhe hadover biy leʾmor mah־ʾeleh ʾadoniy׃

5 וַ֠יַּעַן הַמַּלְאָ֞ךְ הַדֹּבֵ֥ר בִּי֙ וַיֹּ֣אמֶר אֵלַ֔י הֲלֹ֥וא יָדַ֖עְתָּ מָה־הֵ֣מָּה אֵ֑לֶּה וָאֹמַ֖ר לֹ֥א אֲדֹנִֽי׃ wayaʿan hamaleʾakhe hadover biy wayoʾmer ʾelay halowʾ yadaʿeta mah־hemah ʾeleh waʾomar loʾ ʾadoniy׃

6 וַיַּ֜עַן וַיֹּ֤אמֶר אֵלַי֙ לֵאמֹ֔ר זֶ֚ה דְּבַר־יְהוָ֔ה אֶל־זְרֻבָּבֶ֖ל לֵאמֹ֑ר לֹ֤א בְחַ֙יִל֙ וְלֹ֣א בְכֹ֔חַ כִּ֣י אִם־בְּרוּחִ֔י אָמַ֖ר יְהוָ֥ה צְבָאֹֽות׃ wayaʿan wayoʾmer ʾelay leʾmor zeh devar־yehwah ʾel־zerubavel leʾmor loʾ veḥayil weloʾ vekhoaḥ kiy ʾim־beruḥiy ʾamar yehwah tsevaʾowt׃

7 מִֽי־אַתָּ֧ה הַֽר־הַגָּדֹ֛ול לִפְנֵ֥י זְרֻבָּבֶ֖ל לְמִישֹׁ֑ר וְהֹוצִיא֙ אֶת־הָאֶ֣בֶן הָרֹאשָׁ֔ה תְּשֻׁאֹ֕ות חֵ֥ן חֵ֖ן לָֽהּ׃ פ miy־ʾatah har־hagadowl lifeney zerubavel lemiyshor wehowtsiyʾ ʾet־haʾeven haroʾshah teshuʾowt ḥen ḥen lah׃ f

8 וַיְהִ֥י דְבַר־יְהוָ֖ה אֵלַ֥י לֵאמֹֽר׃ wayehiy devar־yehwah ʾelay leʾmor׃

9 יְדֵ֣י זְרֻבָּבֶ֗ל יִסְּד֛וּ הַבַּ֥יִת הַזֶּ֖ה וְיָדָ֣יו תְּבַצַּ֑עְנָה וְיָ֣דַעְתָּ֔ כִּֽי־יְהוָ֥ה צְבָאֹ֖ות שְׁלָחַ֥נִי אֲלֵיכֶֽם׃ yedey zerubavel yisedu habayit hazeh weyadayw tevatsaʿenah weyadaʿeta kiy־yehwah tsevaʾowt shelaḥaniy ʾaleykhem׃

10 כִּ֣י מִ֣י בַז֮ לְיֹ֣ום קְטַנֹּות֒ וְשָׂמְח֗וּ וְרָא֞וּ אֶת־הָאֶ֧בֶן הַבְּדִ֛יל בְּיַ֥ד זְרֻבָּבֶ֖ל שִׁבְעָה־אֵ֑לֶּה עֵינֵ֣י יְהוָ֔ה הֵ֥מָּה מְשֹׁוטְטִ֖ים בְּכָל־הָאָֽרֶץ׃ kiy miy vaz leyowm qeṭanowt wesameḥu weraʾu ʾet־haʾeven habediyl beyad zerubavel shiveʿah־ʾeleh ʿeyney yehwah hemah meshowṭeṭiym bekhal־haʾarets׃

11 וָאַ֖עַן וָאֹמַ֣ר אֵלָ֑יו מַה־שְּׁנֵ֤י הַזֵּיתִים֙ הָאֵ֔לֶה עַל־יְמִ֥ין הַמְּנֹורָ֖ה וְעַל־שְׂמֹאולָֽהּ׃ waʾaʿan waʾomar ʾelayw mah־sheney hazeytiym haʾeleh ʿal־yemiyn hamenowrah weʿal־semoʾwlah׃

12 וָאַ֣עַן שֵׁנִ֔ית וָאֹמַ֖ר אֵלָ֑יו מַה־שְׁתֵּ֞י שִׁבֲּלֵ֣י הַזֵּיתִ֗ים אֲשֶׁר֙ בְּיַ֗ד שְׁנֵי֙ צַנְתְּרֹ֣ות הַזָּהָ֔ב הַֽמְרִיקִ֥ים מֵעֲלֵיהֶ֖ם הַזָּהָֽב׃ waʾaʿan sheniyt waʾomar ʾelayw mah־shetey shibaley hazeytiym ʾasher beyad sheney tsaneterowt hazahav hameriyqiym meʿaleyhem hazahav׃

13 וַיֹּ֤אמֶר אֵלַי֙ לֵאמֹ֔ר הֲלֹ֥וא יָדַ֖עְתָּ מָה־אֵ֑לֶּה וָאֹמַ֖ר לֹ֥א אֲדֹנִֽי׃ wayoʾmer ʾelay leʾmor halowʾ yadaʿeta mah־ʾeleh waʾomar loʾ ʾadoniy׃

14 וַיֹּ֕אמֶר אֵ֖לֶּה שְׁנֵ֣י בְנֵֽי־הַיִּצְהָ֑ר הָעֹמְדִ֖ים עַל־אֲדֹ֥ון כָּל־הָאָֽרֶץ׃ wayoʾmer ʾeleh sheney veney־hayitsehar haʿomediym ʿal־ʾadown kal־haʾarets׃