Nombres 14

¹ וַתִּשָּׂא֙ כָּל־הָ֣עֵדָ֔ה וַֽיִּתְּנ֖וּ אֶת־קֹולָ֑ם וַיִּבְכּ֥וּ הָעָ֖ם בַּלַּ֥יְלָה הַהֽוּא׃ watisaʾ kal־haʿedah wayitenu ʾet־qowlam wayiveku haʿam balayelah hahuʾ׃

² וַיִּלֹּ֙נוּ֙ עַל־מֹשֶׁ֣ה וְעַֽל־אַהֲרֹ֔ן כֹּ֖ל בְּנֵ֣י יִשְׂרָאֵ֑ל וַֽיֹּאמְר֨וּ אֲלֵהֶ֜ם כָּל־הָעֵדָ֗ה לוּ־מַ֙תְנוּ֙ בְּאֶ֣רֶץ מִצְרַ֔יִם אֹ֛ו בַּמִּדְבָּ֥ר הַזֶּ֖ה לוּ־מָֽתְנוּ׃ wayilonu ʿal־mosheh weʿal־ʾaharon kol beney yiseraʾel wayoʾmeru ʾalehem kal־haʿedah lu־matenu beʾerets mitserayim ʾow bamidebar hazeh lu־matenu׃

³ וְלָמָ֣ה יְ֠הוָה מֵבִ֨יא אֹתָ֜נוּ אֶל־הָאָ֤רֶץ הַזֹּאת֙ לִנְפֹּ֣ל בַּחֶ֔רֶב נָשֵׁ֥ינוּ וְטַפֵּ֖נוּ יִהְי֣וּ לָבַ֑ז הֲלֹ֧וא טֹ֦וב לָ֖נוּ שׁ֥וּב מִצְרָֽיְמָה׃ welamah yehwah meviyʾ ʾotanu ʾel־haʾarets hazoʾt linepol baḥerev nasheynu weṭapenu yiheyu lavaz halowʾ ṭowv lanu shuv mitserayemah׃

⁴ וַיֹּאמְר֖וּ אִ֣ישׁ אֶל־אָחִ֑יו נִתְּנָ֥ה רֹ֖אשׁ וְנָשׁ֥וּבָה מִצְרָֽיְמָה׃ wayoʾmeru ʾiysh ʾel־ʾaḥiyw nitenah roʾsh wenashuvah mitserayemah׃

⁵ וַיִּפֹּ֥ל מֹשֶׁ֛ה וְאַהֲרֹ֖ן עַל־פְּנֵיהֶ֑ם לִפְנֵ֕י כָּל־קְהַ֥ל עֲדַ֖ת בְּנֵ֥י יִשְׂרָאֵֽל׃ wayipol mosheh weʾaharon ʿal־peneyhem lifeney kal־qehal ʿadat beney yiseraʾel׃

⁶ וִיהֹושֻׁ֣עַ בִּן־נ֗וּן וְכָלֵב֙ בֶּן־יְפֻנֶּ֔ה מִן־הַתָּרִ֖ים אֶת־הָאָ֑רֶץ קָרְע֖וּ בִּגְדֵיהֶֽם׃ wiyhowshuaʿ bin־nun wekhalev ben־yefuneh min־hatariym ʾet־haʾarets qareʿu bigedeyhem׃

⁷ וַיֹּ֣אמְר֔וּ אֶל־כָּל־עֲדַ֥ת בְּנֵֽי־יִשְׂרָאֵ֖ל לֵאמֹ֑ר הָאָ֗רֶץ אֲשֶׁ֨ר עָבַ֤רְנוּ בָהּ֙ לָת֣וּר אֹתָ֔הּ טֹובָ֥ה הָאָ֖רֶץ מְאֹ֥ד מְאֹֽד׃ wayoʾmeru ʾel־kal־ʿadat beney־yiseraʾel leʾmor haʾarets ʾasher ʿavarenu vah latur ʾotah ṭowvah haʾarets meʾod meʾod׃

⁸ אִם־חָפֵ֥ץ בָּ֙נוּ֙ יְהוָ֔ה וְהֵבִ֤יא אֹתָ֙נוּ֙ אֶל־הָאָ֣רֶץ הַזֹּ֔את וּנְתָנָ֖הּ לָ֑נוּ אֶ֕רֶץ אֲשֶׁר־הִ֛וא זָבַ֥ת חָלָ֖ב וּדְבָֽשׁ׃ ʾim־ḥafets banu yehwah weheviyʾ ʾotanu ʾel־haʾarets hazoʾt unetanah lanu ʾerets ʾasher־hiwʾ zavat ḥalav udevash׃

⁹ אַ֣ךְ בַּֽיהוָה֮ אַל־תִּמְרֹדוּ֒ וְאַתֶּ֗ם אַל־תִּֽירְאוּ֙ אֶת־עַ֣ם הָאָ֔רֶץ כִּ֥י לַחְמֵ֖נוּ הֵ֑ם סָ֣ר צִלָּ֧ם מֵעֲלֵיהֶ֛ם וַֽיהוָ֥ה אִתָּ֖נוּ אַל־תִּירָאֻֽם׃ ʾakhe bayhwah ʾal־timerodu weʾatem ʾal־tiyreʾu ʾet־ʿam haʾarets kiy laḥemenu hem sar tsilam meʿaleyhem wayhwah ʾitanu ʾal־tiyraʾum׃

¹⁰ וַיֹּֽאמְרוּ֙ כָּל־הָ֣עֵדָ֔ה לִרְגֹּ֥ום אֹתָ֖ם בָּאֲבָנִ֑ים וּכְבֹ֣וד יְהוָ֗ה נִרְאָה֙ בְּאֹ֣הֶל מֹועֵ֔ד אֶֽל־כָּל־בְּנֵ֖י יִשְׂרָאֵֽל׃ פ wayoʾmeru kal־haʿedah liregowm ʾotam baʾavaniym ukhevowd yehwah nireʾah beʾohel mowʿed ʾel־kal־beney yiseraʾel׃ f

¹¹ וַיֹּ֤אמֶר יְהוָה֙ אֶל־מֹשֶׁ֔ה עַד־אָ֥נָה יְנַאֲצֻ֖נִי הָעָ֣ם הַזֶּ֑ה וְעַד־אָ֙נָה֙ לֹא־יַאֲמִ֣ינוּ בִ֔י בְּכֹל֙ הָֽאֹתֹ֔ות אֲשֶׁ֥ר עָשִׂ֖יתִי בְּקִרְבֹּֽו׃ wayoʾmer yehwah ʾel־mosheh ʿad־ʾanah yenaʾatsuniy haʿam hazeh weʿad־ʾanah loʾ־yaʾamiynu viy bekhol haʾotowt ʾasher ʿasiytiy beqirebow׃

¹² אַכֶּ֥נּוּ בַדֶּ֖בֶר וְאֹורִשֶׁ֑נּוּ וְאֶֽעֱשֶׂה֙ אֹֽתְךָ֔ לְגֹוי־גָּדֹ֥ול וְעָצ֖וּם מִמֶּֽנּוּ׃ ʾakenu vadever weʾowrishenu weʾeʿeseh ʾotekha legowy־gadowl weʿatsum mimenu׃

¹³ וַיֹּ֥אמֶר מֹשֶׁ֖ה אֶל־יְהוָ֑ה וְשָׁמְע֣וּ מִצְרַ֔יִם כִּֽי־הֶעֱלִ֧יתָ בְכֹחֲךָ֛ אֶת־הָעָ֥ם הַזֶּ֖ה מִקִּרְבֹּֽו׃ wayoʾmer mosheh ʾel־yehwah weshameʿu mitserayim kiy־heʿeliyta vekhoḥakha ʾet־haʿam hazeh miqirebow׃

¹⁴ וְאָמְר֗וּ אֶל־יֹושֵׁב֮ הָאָ֣רֶץ הַזֹּאת֒ שָֽׁמְעוּ֙ כִּֽי־אַתָּ֣ה יְהוָ֔ה בְּקֶ֖רֶב הָעָ֣ם הַזֶּ֑ה אֲשֶׁר־עַ֨יִן בְּעַ֜יִן נִרְאָ֣ה ׀ אַתָּ֣ה יְהוָ֗ה וַעֲנָֽנְךָ֙ עֹמֵ֣ד עֲלֵהֶ֔ם וּבְעַמֻּ֣ד עָנָ֗ן אַתָּ֨ה הֹלֵ֤ךְ לִפְנֵיהֶם֙ יֹומָ֔ם וּבְעַמּ֥וּד אֵ֖שׁ לָֽיְלָה׃ weʾameru ʾel־yowshev haʾarets hazoʾt shameʿu kiy־ʾatah yehwah beqerev haʿam hazeh ʾasher־ʿayin beʿayin nireʾah ׀ ʾatah yehwah waʿananekha ʿomed ʿalehem uveʿamud ʿanan ʾatah holekhe lifeneyhem yowmam uveʿamud ʾesh layelah׃

¹⁵ וְהֵמַתָּ֛ה אֶת־הָעָ֥ם הַזֶּ֖ה כְּאִ֣ישׁ אֶחָ֑ד וְאָֽמְרוּ֙ הַגֹּויִ֔ם אֲשֶׁר־שָׁמְע֥וּ אֶֽת־שִׁמְעֲךָ֖ לֵאמֹֽר׃ wehematah ʾet־haʿam hazeh keʾiysh ʾeḥad weʾameru hagowyim ʾasher־shameʿu ʾet־shimeʿakha leʾmor׃

¹⁶ מִבִּלְתִּ֞י יְכֹ֣לֶת יְהוָ֗ה לְהָבִיא֙ אֶת־הָעָ֣ם הַזֶּ֔ה אֶל־הָאָ֖רֶץ אֲשֶׁר־נִשְׁבַּ֣ע לָהֶ֑ם וַיִּשְׁחָטֵ֖ם בַּמִּדְבָּֽר׃ mibiletiy yekholet yehwah lehaviyʾ ʾet־haʿam hazeh ʾel־haʾarets ʾasher־nishebaʿ lahem wayisheḥaṭem bamidebar׃

¹⁷ וְעַתָּ֕ה יִגְדַּל־נָ֖א כֹּ֣חַ אֲדֹנָ֑י כַּאֲשֶׁ֥ר דִּבַּ֖רְתָּ לֵאמֹֽר׃ weʿatah yigedal־naʾ koaḥ ʾadonay kaʾasher dibareta leʾmor׃

¹⁸ יְהוָ֗ה אֶ֤רֶךְ אַפַּ֙יִם֙ וְרַב־חֶ֔סֶד נֹשֵׂ֥א עָוֹ֖ן וָפָ֑שַׁע וְנַקֵּה֙ לֹ֣א יְנַקֶּ֔ה פֹּקֵ֞ד עֲוֹ֤ן אָבֹות֙ עַל־בָּנִ֔ים עַל־שִׁלֵּשִׁ֖ים וְעַל־רִבֵּעִֽים׃ yehwah ʾerekhe ʾapayim werav־ḥesed noseʾ ʿaon wafashaʿ wenaqeh loʾ yenaqeh poqed ʿaon ʾavowt ʿal־baniym ʿal־shileshiym weʿal־ribeʿiym׃

¹⁹ סְלַֽח־נָ֗א לַעֲוֹ֛ן הָעָ֥ם הַזֶּ֖ה כְּגֹ֣דֶל חַסְדֶּ֑ךָ וְכַאֲשֶׁ֤ר נָשָׂ֙אתָה֙ לָעָ֣ם הַזֶּ֔ה מִמִּצְרַ֖יִם וְעַד־הֵֽנָּה׃ selaḥ־naʾ laʿaon haʿam hazeh kegodel ḥasedekha wekhaʾasher nasaʾtah laʿam hazeh mimitserayim weʿad־henah׃

²⁰ וַיֹּ֣אמֶר יְהוָ֔ה סָלַ֖חְתִּי כִּדְבָרֶֽךָ׃ wayoʾmer yehwah salaḥetiy kidevarekha׃

²¹ וְאוּלָ֖ם חַי־אָ֑נִי וְיִמָּלֵ֥א כְבֹוד־יְהוָ֖ה אֶת־כָּל־הָאָֽרֶץ׃ weʾulam ḥay־ʾaniy weyimaleʾ khevowd־yehwah ʾet־kal־haʾarets׃

²² כִּ֣י כָל־הָאֲנָשִׁ֗ים הָרֹאִ֤ים אֶת־כְּבֹדִי֙ וְאֶת־אֹ֣תֹתַ֔י אֲשֶׁר־עָשִׂ֥יתִי בְמִצְרַ֖יִם וּבַמִּדְבָּ֑ר וַיְנַסּ֣וּ אֹתִ֗י זֶ֚ה עֶ֣שֶׂר פְּעָמִ֔ים וְלֹ֥א שָׁמְע֖וּ בְּקֹולִֽי׃ kiy khal־haʾanashiym haroʾiym ʾet־kevodiy weʾet־ʾototay ʾasher־ʿasiytiy vemitserayim uvamidebar wayenasu ʾotiy zeh ʿeser peʿamiym weloʾ shameʿu beqowliy׃

²³ אִם־יִרְאוּ֙ אֶת־הָאָ֔רֶץ אֲשֶׁ֥ר נִשְׁבַּ֖עְתִּי לַאֲבֹתָ֑ם וְכָל־מְנַאֲצַ֖י לֹ֥א יִרְאֽוּהָ׃ ʾim־yireʾu ʾet־haʾarets ʾasher nishebaʿetiy laʾavotam wekhal־menaʾatsay loʾ yireʾuah׃

²⁴ וְעַבְדִּ֣י כָלֵ֗ב עֵ֣קֶב הָֽיְתָ֞ה ר֤וּחַ אַחֶ֙רֶת֙ עִמֹּ֔ו וַיְמַלֵּ֖א אַחֲרָ֑י וַהֲבִֽיאֹתִ֗יו אֶל־הָאָ֙רֶץ֙ אֲשֶׁר־בָּ֣א שָׁ֔מָּה וְזַרְעֹ֖ו יֹורִשֶֽׁנָּה׃ weʿavediy khalev ʿeqev hayetah ruaḥ ʾaḥeret ʿimow wayemaleʾ ʾaḥaray wahaviyʾotiyw ʾel־haʾarets ʾasher־baʾ shamah wezareʿow yowrishenah׃

²⁵ וְהָֽעֲמָלֵקִ֥י וְהַֽכְּנַעֲנִ֖י יֹושֵׁ֣ב בָּעֵ֑מֶק מָחָ֗ר פְּנ֨וּ וּסְע֥וּ לָכֶ֛ם הַמִּדְבָּ֖ר דֶּ֥רֶךְ יַם־סֽוּף׃ פ wehaʿamaleqiy wehakenaʿaniy yowshev baʿemeq maḥar penu useʿu lakhem hamidebar derekhe yam־suf׃ f

²⁶ וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃ wayedaber yehwah ʾel־mosheh weʾel־ʾaharon leʾmor׃

²⁷ עַד־מָתַ֗י לָעֵדָ֤ה הָֽרָעָה֙ הַזֹּ֔את אֲשֶׁ֛ר הֵ֥מָּה מַלִּינִ֖ים עָלָ֑י אֶת־תְּלֻנֹּ֞ות בְּנֵ֣י יִשְׂרָאֵ֗ל אֲשֶׁ֨ר הֵ֧מָּה מַלִּינִ֛ים עָלַ֖י שָׁמָֽעְתִּי׃ ʿad־matay laʿedah haraʿah hazoʾt ʾasher hemah maliyniym ʿalay ʾet־telunowt beney yiseraʾel ʾasher hemah maliyniym ʿalay shamaʿetiy׃

²⁸ אֱמֹ֣ר אֲלֵהֶ֗ם חַי־אָ֙נִי֙ נְאֻם־יְהוָ֔ה אִם־לֹ֕א כַּאֲשֶׁ֥ר דִּבַּרְתֶּ֖ם בְּאָזְנָ֑י כֵּ֖ן אֶֽעֱשֶׂ֥ה לָכֶֽם׃ ʾemor ʾalehem ḥay־ʾaniy neʾum־yehwah ʾim־loʾ kaʾasher dibaretem beʾazenay ken ʾeʿeseh lakhem׃

²⁹ בַּמִּדְבָּ֣ר הַ֠זֶּה יִפְּל֨וּ פִגְרֵיכֶ֜ם וְכָל־פְּקֻדֵיכֶם֙ לְכָל־מִסְפַּרְכֶ֔ם מִבֶּ֛ן עֶשְׂרִ֥ים שָׁנָ֖ה וָמָ֑עְלָה אֲשֶׁ֥ר הֲלִֽינֹתֶ֖ם עָלָֽי׃ bamidebar hazeh yipelu figereykhem wekhal־pequdeykhem lekhal־miseparekhem miben ʿeseriym shanah wamaʿelah ʾasher haliynotem ʿalay׃

³⁰ אִם־אַתֶּם֙ תָּבֹ֣אוּ אֶל־הָאָ֔רֶץ אֲשֶׁ֤ר נָשָׂ֙אתִי֙ אֶת־יָדִ֔י לְשַׁכֵּ֥ן אֶתְכֶ֖ם בָּ֑הּ כִּ֚י אִם־כָּלֵ֣ב בֶּן־יְפֻנֶּ֔ה וִיהֹושֻׁ֖עַ בִּן־נֽוּן׃ ʾim־ʾatem tavoʾu ʾel־haʾarets ʾasher nasaʾtiy ʾet־yadiy leshaken ʾetekhem bah kiy ʾim־kalev ben־yefuneh wiyhowshuaʿ bin־nun׃

³¹ וְטַ֨פְּכֶ֔ם אֲשֶׁ֥ר אֲמַרְתֶּ֖ם לָבַ֣ז יִהְיֶ֑ה וְהֵבֵיאתִ֣י אֹתָ֔ם וְיָֽדְעוּ֙ אֶת־הָאָ֔רֶץ אֲשֶׁ֥ר מְאַסְתֶּ֖ם בָּֽהּ׃ weṭapekhem ʾasher ʾamaretem lavaz yiheyeh weheveyʾtiy ʾotam weyadeʿu ʾet־haʾarets ʾasher meʾasetem bah׃

³² וּפִגְרֵיכֶ֖ם אַתֶּ֑ם יִפְּל֖וּ בַּמִּדְבָּ֥ר הַזֶּֽה׃ ufigereykhem ʾatem yipelu bamidebar hazeh׃

³³ וּ֠בְנֵיכֶם יִהְי֨וּ רֹעִ֤ים בַּמִּדְבָּר֙ אַרְבָּעִ֣ים שָׁנָ֔ה וְנָשְׂא֖וּ אֶת־זְנוּתֵיכֶ֑ם עַד־תֹּ֥ם פִּגְרֵיכֶ֖ם בַּמִּדְבָּֽר׃ uveneykhem yiheyu roʿiym bamidebar ʾarebaʿiym shanah wenaseʾu ʾet־zenuteykhem ʿad־tom pigereykhem bamidebar׃

³⁴ בְּמִסְפַּ֨ר הַיָּמִ֜ים אֲשֶׁר־תַּרְתֶּ֣ם אֶת־הָאָרֶץ֮ אַרְבָּעִ֣ים יֹום֒ יֹ֣ום לַשָּׁנָ֞ה יֹ֣ום לַשָּׁנָ֗ה תִּשְׂאוּ֙ אֶת־עֲוֹנֹ֣תֵיכֶ֔ם אַרְבָּעִ֖ים שָׁנָ֑ה וִֽידַעְתֶּ֖ם אֶת־תְּנוּאָתִֽי׃ bemisepar hayamiym ʾasher־taretem ʾet־haʾarets ʾarebaʿiym yowm yowm lashanah yowm lashanah tiseʾu ʾet־ʿaonoteykhem ʾarebaʿiym shanah wiydaʿetem ʾet־tenuʾatiy׃

³⁵ אֲנִ֣י יְהוָה֮ דִּבַּרְתִּי֒ אִם־לֹ֣א ׀ זֹ֣את אֶֽעֱשֶׂ֗ה לְכָל־הָעֵדָ֤ה הָֽרָעָה֙ הַזֹּ֔את הַנֹּועָדִ֖ים עָלָ֑י בַּמִּדְבָּ֥ר הַזֶּ֛ה יִתַּ֖מּוּ וְשָׁ֥ם יָמֻֽתוּ׃ ʾaniy yehwah dibaretiy ʾim־loʾ ׀ zoʾt ʾeʿeseh lekhal־haʿedah haraʿah hazoʾt hanowʿadiym ʿalay bamidebar hazeh yitamu wesham yamutu׃

³⁶ וְהָ֣אֲנָשִׁ֔ים אֲשֶׁר־שָׁלַ֥ח מֹשֶׁ֖ה לָת֣וּר אֶת־הָאָ֑רֶץ וַיָּשֻׁ֗בוּ [וַיִּלֹּונוּ כ] (וַיַּלִּ֤ינוּ ק) עָלָיו֙ אֶת־כָּל־הָ֣עֵדָ֔ה לְהֹוצִ֥יא דִבָּ֖ה עַל־הָאָֽרֶץ׃ wehaʾanashiym ʾasher־shalaḥ mosheh latur ʾet־haʾarets wayashuvu [wayilownu kh] (wayaliynu q) ʿalayw ʾet־kal־haʿedah lehowtsiyʾ dibah ʿal־haʾarets׃

³⁷ וַיָּמֻ֙תוּ֙ הָֽאֲנָשִׁ֔ים מֹוצִאֵ֥י דִבַּת־הָאָ֖רֶץ רָעָ֑ה בַּמַּגֵּפָ֖ה לִפְנֵ֥י יְהוָֽה׃ wayamutu haʾanashiym mowtsiʾey dibat־haʾarets raʿah bamagefah lifeney yehwah׃

³⁸ וִיהֹושֻׁ֣עַ בִּן־נ֔וּן וְכָלֵ֖ב בֶּן־יְפֻנֶּ֑ה חָיוּ֙ מִן־הָאֲנָשִׁ֣ים הָהֵ֔ם הַֽהֹלְכִ֖ים לָת֥וּר אֶת־הָאָֽרֶץ׃ wiyhowshuaʿ bin־nun wekhalev ben־yefuneh ḥayu min־haʾanashiym hahem haholekhiym latur ʾet־haʾarets׃

³⁹ וַיְדַבֵּ֤ר מֹשֶׁה֙ אֶת־הַדְּבָרִ֣ים הָאֵ֔לֶּה אֶֽל־כָּל־בְּנֵ֖י יִשְׂרָאֵ֑ל וַיִּֽתְאַבְּל֥וּ הָעָ֖ם מְאֹֽד׃ wayedaber mosheh ʾet־hadevariym haʾeleh ʾel־kal־beney yiseraʾel wayiteʾabelu haʿam meʾod׃

⁴⁰ וַיַּשְׁכִּ֣מוּ בַבֹּ֔קֶר וַיַּֽעֲל֥וּ אֶל־רֹאשׁ־הָהָ֖ר לֵאמֹ֑ר הִנֶּ֗נּוּ וְעָלִ֛ינוּ אֶל־הַמָּקֹ֛ום אֲשֶׁר־אָמַ֥ר יְהוָ֖ה כִּ֥י חָטָֽאנוּ׃ wayashekimu vaboqer wayaʿalu ʾel־roʾsh־hahar leʾmor hinenu weʿaliynu ʾel־hamaqowm ʾasher־ʾamar yehwah kiy ḥaṭaʾnu׃

⁴¹ וַיֹּ֣אמֶר מֹשֶׁ֔ה לָ֥מָּה זֶּ֛ה אַתֶּ֥ם עֹבְרִ֖ים אֶת־פִּ֣י יְהוָ֑ה וְהִ֖וא לֹ֥א תִצְלָֽח׃ wayoʾmer mosheh lamah zeh ʾatem ʿoveriym ʾet־piy yehwah wehiwʾ loʾ titselaḥ׃

⁴² אַֽל־תַּעֲל֔וּ כִּ֛י אֵ֥ין יְהוָ֖ה בְּקִרְבְּכֶ֑ם וְלֹא֙ תִּנָּ֣גְפ֔וּ לִפְנֵ֖י אֹיְבֵיכֶֽם׃ ʾal־taʿalu kiy ʾeyn yehwah beqirebekhem weloʾ tinagefu lifeney ʾoyeveykhem׃

⁴³ כִּי֩ הָעֲמָלֵקִ֨י וְהַכְּנַעֲנִ֥י שָׁם֙ לִפְנֵיכֶ֔ם וּנְפַלְתֶּ֖ם בֶּחָ֑רֶב כִּֽי־עַל־כֵּ֤ן שַׁבְתֶּם֙ מֵאַחֲרֵ֣י יְהוָ֔ה וְלֹא־יִהְיֶ֥ה יְהוָ֖ה עִמָּכֶֽם׃ kiy haʿamaleqiy wehakenaʿaniy sham lifeneykhem unefaletem beḥarev kiy־ʿal־ken shavetem meʾaḥarey yehwah weloʾ־yiheyeh yehwah ʿimakhem׃

⁴⁴ וַיַּעְפִּ֕לוּ לַעֲלֹ֖ות אֶל־רֹ֣אשׁ הָהָ֑ר וַאֲרֹ֤ון בְּרִית־יְהוָה֙ וּמֹשֶׁ֔ה לֹא־מָ֖שׁוּ מִקֶּ֥רֶב הַֽמַּחֲנֶֽה׃ wayaʿepilu laʿalowt ʾel־roʾsh hahar waʾarown beriyt־yehwah umosheh loʾ־mashu miqerev hamaḥaneh׃

⁴⁵ וַיֵּ֤רֶד הָעֲמָלֵקִי֙ וְהַֽכְּנַעֲנִ֔י הַיֹּשֵׁ֖ב בָּהָ֣ר הַה֑וּא וַיַּכּ֥וּם וַֽיַּכְּת֖וּם עַד־הַֽחָרְמָֽה׃ פ wayered haʿamaleqiy wehakenaʿaniy hayoshev bahar hahuʾ wayakum wayaketum ʿad־haḥaremah׃ f