Amos 9

¹ רָאִ֨יתִי אֶת־אֲדֹנָ֜י נִצָּ֣ב עַֽל־הַמִּזְבֵּ֗חַ וַיֹּאמֶר֩ הַ֨ךְ הַכַּפְתֹּ֜ור וְיִרְעֲשׁ֣וּ הַסִּפִּ֗ים וּבְצַ֙עַם֙ בְּרֹ֣אשׁ כֻּלָּ֔ם וְאַחֲרִיתָ֖ם בַּחֶ֣רֶב אֶהֱרֹ֑ג לֹֽא־יָנ֤וּס לָהֶם֙ נָ֔ס וְלֹֽא־יִמָּלֵ֥ט לָהֶ֖ם פָּלִֽיט׃ raʾiytiy ʾet־ʾadonay nitsav ʿal־hamizebeaḥ wayoʾmer hakhe hakafetowr weyireʿashu hasipiym uvetsaʿam beroʾsh kulam weʾaḥariytam baḥerev ʾeherog loʾ־yanus lahem nas weloʾ־yimaleṭ lahem paliyṭ׃

² אִם־יַחְתְּר֣וּ בִשְׁאֹ֔ול מִשָּׁ֖ם יָדִ֣י תִקָּחֵ֑ם וְאִֽם־יַעֲלוּ֙ הַשָּׁמַ֔יִם מִשָּׁ֖ם אֹורִידֵֽם׃ ʾim־yaḥeteru visheʾowl misham yadiy tiqaḥem weʾim־yaʿalu hashamayim misham ʾowriydem׃

³ וְאִם־יֵחָֽבְאוּ֙ בְּרֹ֣אשׁ הַכַּרְמֶ֔ל מִשָּׁ֥ם אֲחַפֵּ֖שׂ וּלְקַחְתִּ֑ים וְאִם־יִסָּ֨תְר֜וּ מִנֶּ֤גֶד עֵינַי֙ בְּקַרְקַ֣ע הַיָּ֔ם מִשָּׁ֛ם אֲצַוֶּ֥ה אֶת־הַנָּחָ֖שׁ וּנְשָׁכָֽם׃ weʾim־yeḥaveʾu beroʾsh hakaremel misham ʾaḥapes uleqaḥetiym weʾim־yisateru mineged ʿeynay beqareqaʿ hayam misham ʾatsaueh ʾet־hanaḥash uneshakham׃

⁴ וְאִם־יֵלְכ֤וּ בַשְּׁבִי֙ לִפְנֵ֣י אֹֽיבֵיהֶ֔ם מִשָּׁ֛ם אֲצַוֶּ֥ה אֶת־הַחֶ֖רֶב וַהֲרָגָ֑תַם וְשַׂמְתִּ֨י עֵינִ֧י עֲלֵיהֶ֛ם לְרָעָ֖ה וְלֹ֥א לְטֹובָֽה׃ weʾim־yelekhu vasheviy lifeney ʾoyveyhem misham ʾatsaueh ʾet־haḥerev waharagatam wesametiy ʿeyniy ʿaleyhem leraʿah weloʾ leṭowvah׃

⁵ וַאדֹנָ֨י יְהוִ֜ה הַצְּבָאֹ֗ות הַנֹּוגֵ֤עַ בָּאָ֙רֶץ֙ וַתָּמֹ֔וג וְאָבְל֖וּ כָּל־יֹ֣ושְׁבֵי בָ֑הּ וְעָלְתָ֤ה כַיְאֹר֙ כֻּלָּ֔הּ וְשָׁקְעָ֖ה כִּיאֹ֥ר מִצְרָֽיִם׃ waʾdonay yehwih hatsevaʾowt hanowgeaʿ baʾarets watamowg weʾavelu kal־yowshevey vah weʿaletah khayeʾor kulah weshaqeʿah kiyʾor mitserayim׃

⁶ הַבֹּונֶ֤ה בַשָּׁמַ֙יִם֙ [מַעֲלֹותֹו כ] (מַעֲלֹותָ֔יו ק) וַאֲגֻדָּתֹ֖ו עַל־אֶ֣רֶץ יְסָדָ֑הּ הַקֹּרֵ֣א לְמֵֽי־הַיָּ֗ם וַֽיִּשְׁפְּכֵ֛ם עַל־פְּנֵ֥י הָאָ֖רֶץ יְהוָ֥ה שְׁמֹֽו׃ habowneh vashamayim [maʿalowtow kh] (maʿalowtayw q) waʾagudatow ʿal־ʾerets yesadah haqoreʾ lemey־hayam wayishepekhem ʿal־peney haʾarets yehwah shemow׃

⁷ הֲלֹ֣וא כִבְנֵי֩ כֻשִׁיִּ֨ים אַתֶּ֥ם לִ֛י בְּנֵ֥י יִשְׂרָאֵ֖ל נְאֻם־יְהוָ֑ה הֲלֹ֣וא אֶת־יִשְׂרָאֵ֗ל הֶעֱלֵ֙יתִי֙ מֵאֶ֣רֶץ מִצְרַ֔יִם וּפְלִשְׁתִּיִּ֥ים מִכַּפְתֹּ֖ור וַאֲרָ֥ם מִקִּֽיר׃ halowʾ khiveney khushiyiym ʾatem liy beney yiseraʾel neʾum־yehwah halowʾ ʾet־yiseraʾel heʿeleytiy meʾerets mitserayim ufelishetiyiym mikafetowr waʾaram miqiyr׃

⁸ הִנֵּ֞ה עֵינֵ֣י ׀ אֲדֹנָ֣י יְהוִ֗ה בַּמַּמְלָכָה֙ הַֽחַטָּאָ֔ה וְהִשְׁמַדְתִּ֣י אֹתָ֔הּ מֵעַ֖ל פְּנֵ֣י הָאֲדָמָ֑ה אֶ֗פֶס כִּ֠י לֹ֣א הַשְׁמֵ֥יד אַשְׁמִ֛יד אֶת־בֵּ֥ית יַעֲקֹ֖ב נְאֻם־יְהוָֽה׃ hineh ʿeyney ׀ ʾadonay yehwih bamamelakhah haḥaṭaʾah wehishemadetiy ʾotah meʿal peney haʾadamah ʾefes kiy loʾ hashemeyd ʾashemiyd ʾet־beyt yaʿaqov neʾum־yehwah׃

⁹ כִּֽי־הִנֵּ֤ה אָֽנֹכִי֙ מְצַוֶּ֔ה וַהֲנִעֹ֥ותִי בְכָֽל־הַגֹּויִ֖ם אֶת־בֵּ֣ית יִשְׂרָאֵ֑ל כַּאֲשֶׁ֤ר יִנֹּ֙ועַ֙ בַּכְּבָרָ֔ה וְלֹֽא־יִפֹּ֥ול צְרֹ֖ור אָֽרֶץ׃ kiy־hineh ʾanokhiy metsaueh wahaniʿowtiy vekhal־hagowyim ʾet־beyt yiseraʾel kaʾasher yinowʿa bakevarah weloʾ־yipowl tserowr ʾarets׃

¹⁰ בַּחֶ֣רֶב יָמ֔וּתוּ כֹּ֖ל חַטָּאֵ֣י עַמִּ֑י הָאֹמְרִ֗ים לֹֽא־תַגִּ֧ישׁ וְתַקְדִּ֛ים בַּעֲדֵ֖ינוּ הָרָעָֽה׃ baḥerev yamutu kol ḥaṭaʾey ʿamiy haʾomeriym loʾ־tagiysh wetaqediym baʿadeynu haraʿah׃

¹¹ בַּיֹּ֣ום הַה֔וּא אָקִ֛ים אֶת־סֻכַּ֥ת דָּוִ֖יד הַנֹּפֶ֑לֶת וְגָדַרְתִּ֣י אֶת־פִּרְצֵיהֶ֗ן וַהֲרִֽסֹתָיו֙ אָקִ֔ים וּבְנִיתִ֖יהָ כִּימֵ֥י עֹולָֽם׃ bayowm hahuʾ ʾaqiym ʾet־sukat dawiyd hanofelet wegadaretiy ʾet־piretseyhen waharisotayw ʾaqiym uveniytiyha kiymey ʿowlam׃

¹² לְמַ֨עַן יִֽירְשׁ֜וּ אֶת־שְׁאֵרִ֤ית אֱדֹום֙ וְכָל־הַגֹּויִ֔ם אֲשֶׁר־נִקְרָ֥א שְׁמִ֖י עֲלֵיהֶ֑ם נְאֻם־יְהוָ֖ה עֹ֥שֶׂה זֹּֽאת׃ פ lemaʿan yiyreshu ʾet־sheʾeriyt ʾedowm wekhal־hagowyim ʾasher־niqeraʾ shemiy ʿaleyhem neʾum־yehwah ʿoseh zoʾt׃ f

¹³ הִנֵּ֨ה יָמִ֤ים בָּאִים֙ נְאֻם־יְהוָ֔ה וְנִגַּ֤שׁ חֹורֵשׁ֙ בַּקֹּצֵ֔ר וְדֹרֵ֥ךְ עֲנָבִ֖ים בְּמֹשֵׁ֣ךְ הַזָּ֑רַע וְהִטִּ֤יפוּ הֶֽהָרִים֙ עָסִ֔יס וְכָל־הַגְּבָעֹ֖ות תִּתְמֹוגַֽגְנָה׃ hineh yamiym baʾiym neʾum־yehwah wenigash ḥowresh baqotser wedorekhe ʿanaviym bemoshekhe hazaraʿ wehiṭiyfu hehariym ʿasiys wekhal־hagevaʿowt titemowgagenah׃

¹⁴ וְשַׁבְתִּי֮ אֶת־שְׁב֣וּת עַמִּ֣י יִשְׂרָאֵל֒ וּבָנ֞וּ עָרִ֤ים נְשַׁמֹּות֙ וְיָשָׁ֔בוּ וְנָטְע֣וּ כְרָמִ֔ים וְשָׁת֖וּ אֶת־יֵינָ֑ם וְעָשׂ֣וּ גַנֹּ֔ות וְאָכְל֖וּ אֶת־פְּרִיהֶֽם׃ weshavetiy ʾet־shevut ʿamiy yiseraʾel uvanu ʿariym neshamowt weyashavu wenaṭeʿu kheramiym weshatu ʾet־yeynam weʿasu ganowt weʾakhelu ʾet־periyhem׃

¹⁵ וּנְטַעְתִּ֖ים עַל־אַדְמָתָ֑ם וְלֹ֨א יִנָּתְשׁ֜וּ עֹ֗וד מֵעַ֤ל אַדְמָתָם֙ אֲשֶׁ֣ר נָתַ֣תִּי לָהֶ֔ם אָמַ֖ר יְהוָ֥ה אֱלֹהֶֽיךָ׃ uneṭaʿetiym ʿal־ʾadematam weloʾ yinateshu ʿowd meʿal ʾadematam ʾasher natatiy lahem ʾamar yehwah ʾeloheykha׃