1 וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ wayedaber yehwah ʾel־mosheh leʾmor׃
2 שְׁלַח־לְךָ֣ אֲנָשִׁ֗ים וְיָתֻ֙רוּ֙ אֶת־אֶ֣רֶץ כְּנַ֔עַן אֲשֶׁר־אֲנִ֥י נֹתֵ֖ן לִבְנֵ֣י יִשְׂרָאֵ֑ל אִ֣ישׁ אֶחָד֩ אִ֨ישׁ אֶחָ֜ד לְמַטֵּ֤ה אֲבֹתָיו֙ תִּשְׁלָ֔חוּ כֹּ֖ל נָשִׂ֥יא בָהֶֽם׃ shelaḥ־lekha ʾanashiym weyaturu ʾet־ʾerets kenaʿan ʾasher־ʾaniy noten liveney yiseraʾel ʾiysh ʾeḥad ʾiysh ʾeḥad lemaṭeh ʾavotayw tishelaḥu kol nasiyʾ vahem׃
3 וַיִּשְׁלַ֨ח אֹתָ֥ם מֹשֶׁ֛ה מִמִּדְבַּ֥ר פָּארָ֖ן עַל־פִּ֣י יְהוָ֑ה כֻּלָּ֣ם אֲנָשִׁ֔ים רָאשֵׁ֥י בְנֵֽי־יִשְׂרָאֵ֖ל הֵֽמָּה׃ wayishelaḥ ʾotam mosheh mimidebar paʾran ʿal־piy yehwah kulam ʾanashiym raʾshey veney־yiseraʾel hemah׃
4 וְאֵ֖לֶּה שְׁמֹותָ֑ם לְמַטֵּ֣ה רְאוּבֵ֔ן שַׁמּ֖וּעַ בֶּן־זַכּֽוּר׃ weʾeleh shemowtam lemaṭeh reʾuven shamuaʿ ben־zakur׃
5 לְמַטֵּ֣ה שִׁמְעֹ֔ון שָׁפָ֖ט בֶּן־חֹורִֽי׃ lemaṭeh shimeʿown shafaṭ ben־ḥowriy׃
6 לְמַטֵּ֣ה יְהוּדָ֔ה כָּלֵ֖ב בֶּן־יְפֻנֶּֽה׃ lemaṭeh yehudah kalev ben־yefuneh׃
7 לְמַטֵּ֣ה יִשָּׂשכָ֔ר יִגְאָ֖ל בֶּן־יֹוסֵֽף׃ lemaṭeh yisashkhar yigeʾal ben־yowsef׃
8 לְמַטֵּ֥ה אֶפְרָ֖יִם הֹושֵׁ֥עַ בִּן־נֽוּן׃ lemaṭeh ʾeferayim howsheaʿ bin־nun׃
9 לְמַטֵּ֣ה בִנְיָמִ֔ן פַּלְטִ֖י בֶּן־רָפֽוּא׃ lemaṭeh vineyamin paleṭiy ben־rafuʾ׃
10 לְמַטֵּ֣ה זְבוּלֻ֔ן גַּדִּיאֵ֖ל בֶּן־סֹודִֽי׃ lemaṭeh zevulun gadiyʾel ben־sowdiy׃
11 לְמַטֵּ֥ה יֹוסֵ֖ף לְמַטֵּ֣ה מְנַשֶּׁ֑ה גַּדִּ֖י בֶּן־סוּסִֽי׃ lemaṭeh yowsef lemaṭeh menasheh gadiy ben־susiy׃
12 לְמַטֵּ֣ה דָ֔ן עַמִּיאֵ֖ל בֶּן־גְּמַלִּֽי׃ lemaṭeh dan ʿamiyʾel ben־gemaliy׃
13 לְמַטֵּ֣ה אָשֵׁ֔ר סְת֖וּר בֶּן־מִיכָאֵֽל׃ lemaṭeh ʾasher setur ben־miykhaʾel׃
14 לְמַטֵּ֣ה נַפְתָּלִ֔י נַחְבִּ֖י בֶּן־וָפְסִֽי׃ lemaṭeh nafetaliy naḥebiy ben־wafesiy׃
15 לְמַטֵּ֣ה גָ֔ד גְּאוּאֵ֖ל בֶּן־מָכִֽי׃ lemaṭeh gad geʾuʾel ben־makhiy׃
16 אֵ֚לֶּה שְׁמֹ֣ות הָֽאֲנָשִׁ֔ים אֲשֶׁר־שָׁלַ֥ח מֹשֶׁ֖ה לָת֣וּר אֶת־הָאָ֑רֶץ וַיִּקְרָ֥א מֹשֶׁ֛ה לְהֹושֵׁ֥עַ בִּן־נ֖וּן יְהֹושֻֽׁעַ׃ ʾeleh shemowt haʾanashiym ʾasher־shalaḥ mosheh latur ʾet־haʾarets wayiqeraʾ mosheh lehowsheaʿ bin־nun yehowshuaʿ׃
17 וַיִּשְׁלַ֤ח אֹתָם֙ מֹשֶׁ֔ה לָת֖וּר אֶת־אֶ֣רֶץ כְּנָ֑עַן וַיֹּ֣אמֶר אֲלֵהֶ֗ם עֲל֥וּ זֶה֙ בַּנֶּ֔גֶב וַעֲלִיתֶ֖ם אֶת־הָהָֽר׃ wayishelaḥ ʾotam mosheh latur ʾet־ʾerets kenaʿan wayoʾmer ʾalehem ʿalu zeh banegev waʿaliytem ʾet־hahar׃
18 וּרְאִיתֶ֥ם אֶת־הָאָ֖רֶץ מַה־הִ֑וא וְאֶת־הָעָם֙ הַיֹּשֵׁ֣ב עָלֶ֔יהָ הֶחָזָ֥ק הוּא֙ הֲרָפֶ֔ה הַמְעַ֥ט ה֖וּא אִם־רָֽב׃ ureʾiytem ʾet־haʾarets mah־hiwʾ weʾet־haʿam hayoshev ʿaleyha heḥazaq huʾ harafeh hameʿaṭ huʾ ʾim־rav׃
19 וּמָ֣ה הָאָ֗רֶץ אֲשֶׁר־הוּא֙ יֹשֵׁ֣ב בָּ֔הּ הֲטֹובָ֥ה הִ֖וא אִם־רָעָ֑ה וּמָ֣ה הֶֽעָרִ֗ים אֲשֶׁר־הוּא֙ יֹושֵׁ֣ב בָּהֵ֔נָּה הַבְּמַֽחֲנִ֖ים אִ֥ם בְּמִבְצָרִֽים׃ umah haʾarets ʾasher־huʾ yoshev bah haṭowvah hiwʾ ʾim־raʿah umah heʿariym ʾasher־huʾ yowshev bahenah habemaḥaniym ʾim bemivetsariym׃
20 וּמָ֣ה הָ֠אָרֶץ הַשְּׁמֵנָ֨ה הִ֜וא אִם־רָזָ֗ה הֲיֵֽשׁ־בָּ֥הּ עֵץ֙ אִם־אַ֔יִן וְהִ֨תְחַזַּקְתֶּ֔ם וּלְקַחְתֶּ֖ם מִפְּרִ֣י הָאָ֑רֶץ וְהַ֨יָּמִ֔ים יְמֵ֖י בִּכּוּרֵ֥י עֲנָבִֽים׃ umah haʾarets hashemenah hiwʾ ʾim־razah hayesh־bah ʿets ʾim־ʾayin wehiteḥazaqetem uleqaḥetem miperiy haʾarets wehayamiym yemey bikurey ʿanaviym׃
21 וַֽיַּעֲל֖וּ וַיָּתֻ֣רוּ אֶת־הָאָ֑רֶץ מִמִּדְבַּר־צִ֥ן עַד־רְחֹ֖ב לְבֹ֥א חֲמָֽת׃ wayaʿalu wayaturu ʾet־haʾarets mimidebar־tsin ʿad־reḥov levoʾ ḥamat׃
22 וַיַּעֲל֣וּ בַנֶּגֶב֮ וַיָּבֹ֣א עַד־חֶבְרֹון֒ וְשָׁ֤ם אֲחִימַן֙ שֵׁשַׁ֣י וְתַלְמַ֔י יְלִידֵ֖י הָעֲנָ֑ק וְחֶבְרֹ֗ון שֶׁ֤בַע שָׁנִים֙ נִבְנְתָ֔ה לִפְנֵ֖י צֹ֥עַן מִצְרָֽיִם׃ wayaʿalu vanegev wayavoʾ ʿad־ḥeverown wesham ʾaḥiyman sheshay wetalemay yeliydey haʿanaq weḥeverown shevaʿ shaniym nivenetah lifeney tsoʿan mitserayim׃
23 וַיָּבֹ֜אוּ עַד־נַ֣חַל אֶשְׁכֹּ֗ל וַיִּכְרְת֨וּ מִשָּׁ֤ם זְמֹורָה֙ וְאֶשְׁכֹּ֤ול עֲנָבִים֙ אֶחָ֔ד וַיִּשָּׂאֻ֥הוּ בַמֹּ֖וט בִּשְׁנָ֑יִם וּמִן־הָרִמֹּנִ֖ים וּמִן־הַתְּאֵנִֽים׃ wayavoʾu ʿad־naḥal ʾeshekol wayikheretu misham zemowrah weʾeshekowl ʿanaviym ʾeḥad wayisaʾuhu vamowṭ bishenayim umin־harimoniym umin־hateʾeniym׃
24 לַמָּקֹ֣ום הַה֔וּא קָרָ֖א נַ֣חַל אֶשְׁכֹּ֑ול עַ֚ל אֹדֹ֣ות הָֽאֶשְׁכֹּ֔ול אֲשֶׁר־כָּרְת֥וּ מִשָּׁ֖ם בְּנֵ֥י יִשְׂרָאֵֽל׃ lamaqowm hahuʾ qaraʾ naḥal ʾeshekowl ʿal ʾodowt haʾeshekowl ʾasher־karetu misham beney yiseraʾel׃
25 וַיָּשֻׁ֖בוּ מִתּ֣וּר הָאָ֑רֶץ מִקֵּ֖ץ אַרְבָּעִ֥ים יֹֽום׃ wayashuvu mitur haʾarets miqets ʾarebaʿiym yowm׃
26 וַיֵּלְכ֡וּ וַיָּבֹאוּ֩ אֶל־מֹשֶׁ֨ה וְאֶֽל־אַהֲרֹ֜ן וְאֶל־כָּל־עֲדַ֧ת בְּנֵֽי־יִשְׂרָאֵ֛ל אֶל־מִדְבַּ֥ר פָּארָ֖ן קָדֵ֑שָׁה וַיָּשִׁ֨יבוּ אֹותָ֤ם דָּבָר֙ וְאֶת־כָּל־הָ֣עֵדָ֔ה וַיַּרְא֖וּם אֶת־פְּרִ֥י הָאָֽרֶץ׃ wayelekhu wayavoʾu ʾel־mosheh weʾel־ʾaharon weʾel־kal־ʿadat beney־yiseraʾel ʾel־midebar paʾran qadeshah wayashiyvu ʾowtam davar weʾet־kal־haʿedah wayareʾum ʾet־periy haʾarets׃
27 וַיְסַפְּרוּ־לֹו֙ וַיֹּ֣אמְר֔וּ בָּ֕אנוּ אֶל־הָאָ֖רֶץ אֲשֶׁ֣ר שְׁלַחְתָּ֑נוּ וְ֠גַם זָבַ֨ת חָלָ֥ב וּדְבַ֛שׁ הִ֖וא וְזֶה־פִּרְיָֽהּ׃ wayesaperu־low wayoʾmeru baʾnu ʾel־haʾarets ʾasher shelaḥetanu wegam zavat ḥalav udevash hiwʾ wezeh־pireyah׃
28 אֶ֚פֶס כִּֽי־עַ֣ז הָעָ֔ם הַיֹּשֵׁ֖ב בָּאָ֑רֶץ וְהֶֽעָרִ֗ים בְּצֻרֹ֤ות גְּדֹלֹת֙ מְאֹ֔ד וְגַם־יְלִדֵ֥י הָֽעֲנָ֖ק רָאִ֥ינוּ שָֽׁם׃ ʾefes kiy־ʿaz haʿam hayoshev baʾarets weheʿariym betsurowt gedolot meʾod wegam־yelidey haʿanaq raʾiynu sham׃
29 עֲמָלֵ֥ק יֹושֵׁ֖ב בְּאֶ֣רֶץ הַנֶּ֑גֶב וְ֠הַֽחִתִּי וְהַיְבוּסִ֤י וְהָֽאֱמֹרִי֙ יֹושֵׁ֣ב בָּהָ֔ר וְהַֽכְּנַעֲנִי֙ יֹשֵׁ֣ב עַל־הַיָּ֔ם וְעַ֖ל יַ֥ד הַיַּרְדֵּֽן׃ ʿamaleq yowshev beʾerets hanegev wehaḥitiy wehayevusiy wehaʾemoriy yowshev bahar wehakenaʿaniy yoshev ʿal־hayam weʿal yad hayareden׃
30 וַיַּ֧הַס כָּלֵ֛ב אֶת־הָעָ֖ם אֶל־מֹשֶׁ֑ה וַיֹּ֗אמֶר עָלֹ֤ה נַעֲלֶה֙ וְיָרַ֣שְׁנוּ אֹתָ֔הּ כִּֽי־יָכֹ֥ול נוּכַ֖ל לָֽהּ׃ wayahas kalev ʾet־haʿam ʾel־mosheh wayoʾmer ʿaloh naʿaleh weyarashenu ʾotah kiy־yakhowl nukhal lah׃
31 וְהָ֨אֲנָשִׁ֜ים אֲשֶׁר־עָל֤וּ עִמֹּו֙ אָֽמְר֔וּ לֹ֥א נוּכַ֖ל לַעֲלֹ֣ות אֶל־הָעָ֑ם כִּֽי־חָזָ֥ק ה֖וּא מִמֶּֽנּוּ׃ wehaʾanashiym ʾasher־ʿalu ʿimow ʾameru loʾ nukhal laʿalowt ʾel־haʿam kiy־ḥazaq huʾ mimenu׃
32 וַיֹּוצִ֜יאוּ דִּבַּ֤ת הָאָ֙רֶץ֙ אֲשֶׁ֣ר תָּר֣וּ אֹתָ֔הּ אֶל־בְּנֵ֥י יִשְׂרָאֵ֖ל לֵאמֹ֑ר הָאָ֡רֶץ אֲשֶׁר֩ עָבַ֨רְנוּ בָ֜הּ לָת֣וּר אֹתָ֗הּ אֶ֣רֶץ אֹכֶ֤לֶת יֹושְׁבֶ֙יהָ֙ הִ֔וא וְכָל־הָעָ֛ם אֲשֶׁר־רָאִ֥ינוּ בְתֹוכָ֖הּ אַנְשֵׁ֥י מִדֹּֽות׃ wayowtsiyʾu dibat haʾarets ʾasher taru ʾotah ʾel־beney yiseraʾel leʾmor haʾarets ʾasher ʿavarenu vah latur ʾotah ʾerets ʾokhelet yowsheveyha hiwʾ wekhal־haʿam ʾasher־raʾiynu vetowkhah ʾaneshey midowt׃
33 וְשָׁ֣ם רָאִ֗ינוּ אֶת־הַנְּפִילִ֛ים בְּנֵ֥י עֲנָ֖ק מִן־הַנְּפִלִ֑ים וַנְּהִ֤י בְעֵינֵ֙ינוּ֙ כַּֽחֲגָבִ֔ים וְכֵ֥ן הָיִ֖ינוּ בְּעֵינֵיהֶֽם׃ wesham raʾiynu ʾet־hanefiyliym beney ʿanaq min־hanefiliym wanehiy veʿeyneynu kaḥagaviym wekhen hayiynu beʿeyneyhem׃