Genèse 28

¹ וַיִּקְרָ֥א יִצְחָ֛ק אֶֽל־יַעֲקֹ֖ב וַיְבָ֣רֶךְ אֹתֹ֑ו וַיְצַוֵּ֙הוּ֙ וַיֹּ֣אמֶר לֹ֔ו לֹֽא־תִקַּ֥ח אִשָּׁ֖ה מִבְּנֹ֥ות כְּנָֽעַן׃ wayiqeraʾ yitseḥaq ʾel־yaʿaqov wayevarekhe ʾotow wayetsauehu wayoʾmer low loʾ־tiqaḥ ʾishah mibenowt kenaʿan׃

² ק֥וּם לֵךְ֙ פַּדֶּ֣נָֽה אֲרָ֔ם בֵּ֥יתָה בְתוּאֵ֖ל אֲבִ֣י אִמֶּ֑ךָ וְקַח־לְךָ֤ מִשָּׁם֙ אִשָּׁ֔ה מִבְּנֹ֥ות לָבָ֖ן אֲחִ֥י אִמֶּֽךָ׃ qum lekhe padenah ʾaram beytah vetuʾel ʾaviy ʾimekha weqaḥ־lekha misham ʾishah mibenowt lavan ʾaḥiy ʾimekha׃

³ וְאֵ֤ל שַׁדַּי֙ יְבָרֵ֣ךְ אֹֽתְךָ֔ וְיַפְרְךָ֖ וְיַרְבֶּ֑ךָ וְהָיִ֖יתָ לִקְהַ֥ל עַמִּֽים׃ weʾel shaday yevarekhe ʾotekha weyaferekha weyarebekha wehayiyta liqehal ʿamiym׃

⁴ וְיִֽתֶּן־לְךָ֙ אֶת־בִּרְכַּ֣ת אַבְרָהָ֔ם לְךָ֖ וּלְזַרְעֲךָ֣ אִתָּ֑ךְ לְרִשְׁתְּךָ֙ אֶת־אֶ֣רֶץ מְגֻרֶ֔יךָ אֲשֶׁר־נָתַ֥ן אֱלֹהִ֖ים לְאַבְרָהָֽם׃ weyiten־lekha ʾet־birekat ʾaveraham lekha ulezareʿakha ʾitakhe lerishetekha ʾet־ʾerets megureykha ʾasher־natan ʾelohiym leʾaveraham׃

⁵ וַיִּשְׁלַ֤ח יִצְחָק֙ אֶֽת־יַעֲקֹ֔ב וַיֵּ֖לֶךְ פַּדֶּ֣נָֽה אֲרָ֑ם אֶל־לָבָ֤ן בֶּן־בְּתוּאֵל֙ הָֽאֲרַמִּ֔י אֲחִ֣י רִבְקָ֔ה אֵ֥ם יַעֲקֹ֖ב וְעֵשָֽׂו׃ wayishelaḥ yitseḥaq ʾet־yaʿaqov wayelekhe padenah ʾaram ʾel־lavan ben־betuʾel haʾaramiy ʾaḥiy riveqah ʾem yaʿaqov weʿesaw׃

⁶ וַיַּ֣רְא עֵשָׂ֗ו כִּֽי־בֵרַ֣ךְ יִצְחָק֮ אֶֽת־יַעֲקֹב֒ וְשִׁלַּ֤ח אֹתֹו֙ פַּדֶּ֣נָֽה אֲרָ֔ם לָקַֽחַת־לֹ֥ו מִשָּׁ֖ם אִשָּׁ֑ה בְּבָרֲכֹ֣ו אֹתֹ֔ו וַיְצַ֤ו עָלָיו֙ לֵאמֹ֔ר לֹֽא־תִקַּ֥ח אִשָּׁ֖ה מִבְּנֹ֥ות כְּנָֽעַן׃ wayareʾ ʿesaw kiy־verakhe yitseḥaq ʾet־yaʿaqov weshilaḥ ʾotow padenah ʾaram laqaḥat־low misham ʾishah bevarakhow ʾotow wayetsaw ʿalayw leʾmor loʾ־tiqaḥ ʾishah mibenowt kenaʿan׃

⁷ וַיִּשְׁמַ֣ע יַעֲקֹ֔ב אֶל־אָבִ֖יו וְאֶל־אִמֹּ֑ו וַיֵּ֖לֶךְ פַּדֶּ֥נָֽה אֲרָֽם׃ wayishemaʿ yaʿaqov ʾel־ʾaviyw weʾel־ʾimow wayelekhe padenah ʾaram׃

⁸ וַיַּ֣רְא עֵשָׂ֔ו כִּ֥י רָעֹ֖ות בְּנֹ֣ות כְּנָ֑עַן בְּעֵינֵ֖י יִצְחָ֥ק אָבִֽיו׃ wayareʾ ʿesaw kiy raʿowt benowt kenaʿan beʿeyney yitseḥaq ʾaviyw׃

⁹ וַיֵּ֥לֶךְ עֵשָׂ֖ו אֶל־יִשְׁמָעֵ֑אל וַיִּקַּ֡ח אֶֽת־מָחֲלַ֣ת ׀ בַּת־יִשְׁמָעֵ֨אל בֶּן־אַבְרָהָ֜ם אֲחֹ֧ות נְבָיֹ֛ות עַל־נָשָׁ֖יו לֹ֥ו לְאִשָּֽׁה׃ ס wayelekhe ʿesaw ʾel־yishemaʿeʾl wayiqaḥ ʾet־maḥalat ׀ bat־yishemaʿeʾl ben־ʾaveraham ʾaḥowt nevayowt ʿal־nashayw low leʾishah׃ s

¹⁰ וַיֵּצֵ֥א יַעֲקֹ֖ב מִבְּאֵ֣ר שָׁ֑בַע וַיֵּ֖לֶךְ חָרָֽנָה׃ wayetseʾ yaʿaqov mibeʾer shavaʿ wayelekhe ḥaranah׃

¹¹ וַיִּפְגַּ֨ע בַּמָּקֹ֜ום וַיָּ֤לֶן שָׁם֙ כִּי־בָ֣א הַשֶּׁ֔מֶשׁ וַיִּקַּח֙ מֵאַבְנֵ֣י הַמָּקֹ֔ום וַיָּ֖שֶׂם מְרַֽאֲשֹׁתָ֑יו וַיִּשְׁכַּ֖ב בַּמָּקֹ֥ום הַהֽוּא׃ wayifegaʿ bamaqowm wayalen sham kiy־vaʾ hashemesh wayiqaḥ meʾaveney hamaqowm wayasem meraʾashotayw wayishekav bamaqowm hahuʾ׃

¹² וַֽיַּחֲלֹ֗ם וְהִנֵּ֤ה סֻלָּם֙ מֻצָּ֣ב אַ֔רְצָה וְרֹאשֹׁ֖ו מַגִּ֣יעַ הַשָּׁמָ֑יְמָה וְהִנֵּה֙ מַלְאֲכֵ֣י אֱלֹהִ֔ים עֹלִ֥ים וְיֹרְדִ֖ים בֹּֽו׃ wayaḥalom wehineh sulam mutsav ʾaretsah weroʾshow magiyʿa hashamayemah wehineh maleʾakhey ʾelohiym ʿoliym weyorediym bow׃

¹³ וְהִנֵּ֨ה יְהוָ֜ה נִצָּ֣ב עָלָיו֮ וַיֹּאמַר֒ אֲנִ֣י יְהוָ֗ה אֱלֹהֵי֙ אַבְרָהָ֣ם אָבִ֔יךָ וֵאלֹהֵ֖י יִצְחָ֑ק הָאָ֗רֶץ אֲשֶׁ֤ר אַתָּה֙ שֹׁכֵ֣ב עָלֶ֔יהָ לְךָ֥ אֶתְּנֶ֖נָּה וּלְזַרְעֶֽךָ׃ wehineh yehwah nitsav ʿalayw wayoʾmar ʾaniy yehwah ʾelohey ʾaveraham ʾaviykha weʾlohey yitseḥaq haʾarets ʾasher ʾatah shokhev ʿaleyha lekha ʾetenenah ulezareʿekha׃

¹⁴ וְהָיָ֤ה זַרְעֲךָ֙ כַּעֲפַ֣ר הָאָ֔רֶץ וּפָרַצְתָּ֛ יָ֥מָּה וָקֵ֖דְמָה וְצָפֹ֣נָה וָנֶ֑גְבָּה וְנִבְרֲכ֥וּ בְךָ֛ כָּל־מִשְׁפְּחֹ֥ת הָאֲדָמָ֖ה וּבְזַרְעֶֽךָ׃ wehayah zareʿakha kaʿafar haʾarets ufaratseta yamah waqedemah wetsafonah wanegebah weniverakhu vekha kal־mishepeḥot haʾadamah uvezareʿekha׃

¹⁵ וְהִנֵּ֨ה אָנֹכִ֜י עִמָּ֗ךְ וּשְׁמַרְתִּ֙יךָ֙ בְּכֹ֣ל אֲשֶׁר־תֵּלֵ֔ךְ וַהֲשִׁ֣בֹתִ֔יךָ אֶל־הָאֲדָמָ֖ה הַזֹּ֑את כִּ֚י לֹ֣א אֶֽעֱזָבְךָ֔ עַ֚ד אֲשֶׁ֣ר אִם־עָשִׂ֔יתִי אֵ֥ת אֲשֶׁר־דִּבַּ֖רְתִּי לָֽךְ׃ wehineh ʾanokhiy ʿimakhe ushemaretiykha bekhol ʾasher־telekhe wahashivotiykha ʾel־haʾadamah hazoʾt kiy loʾ ʾeʿezavekha ʿad ʾasher ʾim־ʿasiytiy ʾet ʾasher־dibaretiy lakhe׃

¹⁶ וַיִּיקַ֣ץ יַעֲקֹב֮ מִשְּׁנָתֹו֒ וַיֹּ֕אמֶר אָכֵן֙ יֵ֣שׁ יְהוָ֔ה בַּמָּקֹ֖ום הַזֶּ֑ה וְאָנֹכִ֖י לֹ֥א יָדָֽעְתִּי׃ wayiyqats yaʿaqov mishenatow wayoʾmer ʾakhen yesh yehwah bamaqowm hazeh weʾanokhiy loʾ yadaʿetiy׃

¹⁷ וַיִּירָא֙ וַיֹּאמַ֔ר מַה־נֹּורָ֖א הַמָּקֹ֣ום הַזֶּ֑ה אֵ֣ין זֶ֗ה כִּ֚י אִם־בֵּ֣ית אֱלֹהִ֔ים וְזֶ֖ה שַׁ֥עַר הַשָּׁמָֽיִם׃ wayiyraʾ wayoʾmar mah־nowraʾ hamaqowm hazeh ʾeyn zeh kiy ʾim־beyt ʾelohiym wezeh shaʿar hashamayim׃

¹⁸ וַיַּשְׁכֵּ֨ם יַעֲקֹ֜ב בַּבֹּ֗קֶר וַיִּקַּ֤ח אֶת־הָאֶ֙בֶן֙ אֲשֶׁר־שָׂ֣ם מְרַֽאֲשֹׁתָ֔יו וַיָּ֥שֶׂם אֹתָ֖הּ מַצֵּבָ֑ה וַיִּצֹ֥ק שֶׁ֖מֶן עַל־רֹאשָֽׁהּ׃ wayashekem yaʿaqov baboqer wayiqaḥ ʾet־haʾeven ʾasher־sam meraʾashotayw wayasem ʾotah matsevah wayitsoq shemen ʿal־roʾshah׃

¹⁹ וַיִּקְרָ֛א אֶת־שֵֽׁם־הַמָּקֹ֥ום הַה֖וּא בֵּֽית־אֵ֑ל וְאוּלָ֛ם ל֥וּז שֵׁם־הָעִ֖יר לָרִאשֹׁנָֽה׃ wayiqeraʾ ʾet־shem־hamaqowm hahuʾ beyt־ʾel weʾulam luz shem־haʿiyr lariʾshonah׃

²⁰ וַיִּדַּ֥ר יַעֲקֹ֖ב נֶ֣דֶר לֵאמֹ֑ר אִם־יִהְיֶ֨ה אֱלֹהִ֜ים עִמָּדִ֗י וּשְׁמָרַ֙נִי֙ בַּדֶּ֤רֶךְ הַזֶּה֙ אֲשֶׁ֣ר אָנֹכִ֣י הֹולֵ֔ךְ וְנָֽתַן־לִ֥י לֶ֛חֶם לֶאֱכֹ֖ל וּבֶ֥גֶד לִלְבֹּֽשׁ׃ wayidar yaʿaqov neder leʾmor ʾim־yiheyeh ʾelohiym ʿimadiy ushemaraniy baderekhe hazeh ʾasher ʾanokhiy howlekhe wenatan־liy leḥem leʾekhol uveged lilebosh׃

²¹ וְשַׁבְתִּ֥י בְשָׁלֹ֖ום אֶל־בֵּ֣ית אָבִ֑י וְהָיָ֧ה יְהוָ֛ה לִ֖י לֵאלֹהִֽים׃ weshavetiy veshalowm ʾel־beyt ʾaviy wehayah yehwah liy leʾlohiym׃

²² וְהָאֶ֣בֶן הַזֹּ֗את אֲשֶׁר־שַׂ֙מְתִּי֙ מַצֵּבָ֔ה יִהְיֶ֖ה בֵּ֣ית אֱלֹהִ֑ים וְכֹל֙ אֲשֶׁ֣ר תִּתֶּן־לִ֔י עַשֵּׂ֖ר אֲעַשְּׂרֶ֥נּוּ לָֽךְ׃ wehaʾeven hazoʾt ʾasher־sametiy matsevah yiheyeh beyt ʾelohiym wekhol ʾasher titen־liy ʿaser ʾaʿaserenu lakhe׃