Esther 3

¹ אַחַ֣ר ׀ הַדְּבָרִ֣ים הָאֵ֗לֶּה גִּדַּל֩ הַמֶּ֨לֶךְ אֲחַשְׁוֵרֹ֜ושׁ אֶת־הָמָ֧ן בֶּֽן־הַמְּדָ֛תָא הָאֲגָגִ֖י וַֽיְנַשְּׂאֵ֑הוּ וַיָּ֙שֶׂם֙ אֶת־כִּסְאֹ֔ו מֵעַ֕ל כָּל־הַשָּׂרִ֖ים אֲשֶׁ֥ר אִתֹּֽו׃ ʾaḥar ׀ hadevariym haʾeleh gidal hamelekhe ʾaḥashewerowsh ʾet־haman ben־hamedataʾ haʾagagiy wayenaseʾehu wayasem ʾet־kiseʾow meʿal kal־hasariym ʾasher ʾitow׃

² וְכָל־עַבְדֵ֨י הַמֶּ֜לֶךְ אֲשֶׁר־בְּשַׁ֣עַר הַמֶּ֗לֶךְ כֹּרְעִ֤ים וּמִֽשְׁתַּחֲוִים֙ לְהָמָ֔ן כִּי־כֵ֖ן צִוָּה־לֹ֣ו הַמֶּ֑לֶךְ וּמָ֨רְדֳּכַ֔י לֹ֥א יִכְרַ֖ע וְלֹ֥א יִֽשְׁתַּחֲוֶֽה׃ wekhal־ʿavedey hamelekhe ʾasher־beshaʿar hamelekhe koreʿiym umishetaḥawiym lehaman kiy־khen tsiuah־low hamelekhe umaredokhay loʾ yikheraʿ weloʾ yishetaḥaweh׃

³ וַיֹּ֨אמְר֜וּ עַבְדֵ֥י הַמֶּ֛לֶךְ אֲשֶׁר־בְּשַׁ֥עַר הַמֶּ֖לֶךְ לְמָרְדֳּכָ֑י מַדּ֙וּעַ֙ אַתָּ֣ה עֹובֵ֔ר אֵ֖ת מִצְוַ֥ת הַמֶּֽלֶךְ׃ wayoʾmeru ʿavedey hamelekhe ʾasher־beshaʿar hamelekhe lemaredokhay maduaʿ ʾatah ʿowver ʾet mitsewat hamelekhe׃

⁴ וַיְהִ֗י [בְּאָמְרָם כ] (כְּאָמְרָ֤ם ק) אֵלָיו֙ יֹ֣ום וָיֹ֔ום וְלֹ֥א שָׁמַ֖ע אֲלֵיהֶ֑ם וַיַּגִּ֣ידוּ לְהָמָ֗ן לִרְאֹות֙ הֲיַֽעַמְדוּ֙ דִּבְרֵ֣י מָרְדֳּכַ֔י כִּֽי־הִגִּ֥יד לָהֶ֖ם אֲשֶׁר־ה֥וּא יְהוּדִֽי׃ wayehiy [beʾameram kh] (keʾameram q) ʾelayw yowm wayowm weloʾ shamaʿ ʾaleyhem wayagiydu lehaman lireʾowt hayaʿamedu diverey maredokhay kiy־higiyd lahem ʾasher־huʾ yehudiy׃

⁵ וַיַּ֣רְא הָמָ֔ן כִּי־אֵ֣ין מָרְדֳּכַ֔י כֹּרֵ֥עַ וּמִֽשְׁתַּחֲוֶ֖ה לֹ֑ו וַיִּמָּלֵ֥א הָמָ֖ן חֵמָֽה׃ wayareʾ haman kiy־ʾeyn maredokhay koreaʿ umishetaḥaweh low wayimaleʾ haman ḥemah׃

⁶ וַיִּ֣בֶז בְּעֵינָ֗יו לִשְׁלֹ֤ח יָד֙ בְּמָרְדֳּכַ֣י לְבַדֹּ֔ו כִּֽי־הִגִּ֥ידוּ לֹ֖ו אֶת־עַ֣ם מָרְדֳּכָ֑י וַיְבַקֵּ֣שׁ הָמָ֗ן לְהַשְׁמִ֧יד אֶת־כָּל־הַיְּהוּדִ֛ים אֲשֶׁ֛ר בְּכָל־מַלְכ֥וּת אֲחַשְׁוֵרֹ֖ושׁ עַ֥ם מָרְדֳּכָֽי׃ wayivez beʿeynayw lisheloḥ yad bemaredokhay levadow kiy־higiydu low ʾet־ʿam maredokhay wayevaqesh haman lehashemiyd ʾet־kal־hayehudiym ʾasher bekhal־malekhut ʾaḥashewerowsh ʿam maredokhay׃

⁷ בַּחֹ֤דֶשׁ הָרִאשֹׁון֙ הוּא־חֹ֣דֶשׁ נִיסָ֔ן בִּשְׁנַת֙ שְׁתֵּ֣ים עֶשְׂרֵ֔ה לַמֶּ֖לֶךְ אֲחַשְׁוֵרֹ֑ושׁ הִפִּ֣יל פּוּר֩ ה֨וּא הַגֹּורָ֜ל לִפְנֵ֣י הָמָ֗ן מִיֹּ֧ום ׀ לְיֹ֛ום וּמֵחֹ֛דֶשׁ לְחֹ֥דֶשׁ שְׁנֵים־עָשָׂ֖ר הוּא־חֹ֥דֶשׁ אֲדָֽר׃ ס baḥodesh hariʾshown huʾ־ḥodesh niysan bishenat sheteym ʿesereh lamelekhe ʾaḥashewerowsh hipiyl pur huʾ hagowral lifeney haman miyowm ׀ leyowm umeḥodesh leḥodesh sheneym־ʿasar huʾ־ḥodesh ʾadar׃ s

⁸ וַיֹּ֤אמֶר הָמָן֙ לַמֶּ֣לֶךְ אֲחַשְׁוֵרֹ֔ושׁ יֶשְׁנֹ֣ו עַם־אֶחָ֗ד מְפֻזָּ֤ר וּמְפֹרָד֙ בֵּ֣ין הָֽעַמִּ֔ים בְּכֹ֖ל מְדִינֹ֣ות מַלְכוּתֶ֑ךָ וְדָתֵיהֶ֞ם שֹׁנֹ֣ות מִכָּל־עָ֗ם וְאֶת־דָּתֵ֤י הַמֶּ֙לֶךְ֙ אֵינָ֣ם עֹשִׂ֔ים וְלַמֶּ֥לֶךְ אֵין־שֹׁוֶ֖ה לְהַנִּיחָֽם׃ wayoʾmer haman lamelekhe ʾaḥashewerowsh yeshenow ʿam־ʾeḥad mefuzar umeforad beyn haʿamiym bekhol mediynowt malekhutekha wedateyhem shonowt mikal־ʿam weʾet־datey hamelekhe ʾeynam ʿosiym welamelekhe ʾeyn־showeh lehaniyḥam׃

⁹ אִם־עַל־הַמֶּ֣לֶךְ טֹ֔וב יִכָּתֵ֖ב לְאַבְּדָ֑ם וַעֲשֶׂ֨רֶת אֲלָפִ֜ים כִּכַּר־כֶּ֗סֶף אֶשְׁקֹול֙ עַל־יְדֵי֙ עֹשֵׂ֣י הַמְּלָאכָ֔ה לְהָבִ֖יא אֶל־גִּנְזֵ֥י הַמֶּֽלֶךְ׃ ʾim־ʿal־hamelekhe ṭowv yikatev leʾabedam waʿaseret ʾalafiym kikar־kesef ʾesheqowl ʿal־yedey ʿosey hamelaʾkhah lehaviyʾ ʾel־ginezey hamelekhe׃

¹⁰ וַיָּ֧סַר הַמֶּ֛לֶךְ אֶת־טַבַּעְתֹּ֖ו מֵעַ֣ל יָדֹ֑ו וַֽיִּתְּנָ֗הּ לְהָמָ֧ן בֶּֽן־הַמְּדָ֛תָא הָאֲגָגִ֖י צֹרֵ֥ר הַיְּהוּדִֽים׃ wayasar hamelekhe ʾet־ṭabaʿetow meʿal yadow wayitenah lehaman ben־hamedataʾ haʾagagiy tsorer hayehudiym׃

¹¹ וַיֹּ֤אמֶר הַמֶּ֙לֶךְ֙ לְהָמָ֔ן הַכֶּ֖סֶף נָת֣וּן לָ֑ךְ וְהָעָ֕ם לַעֲשֹׂ֥ות בֹּ֖ו כַּטֹּ֥וב בְּעֵינֶֽיךָ׃ wayoʾmer hamelekhe lehaman hakesef natun lakhe wehaʿam laʿasowt bow kaṭowv beʿeyneykha׃

¹² וַיִּקָּרְאוּ֩ סֹפְרֵ֨י הַמֶּ֜לֶךְ בַּחֹ֣דֶשׁ הָרִאשֹׁ֗ון בִּשְׁלֹושָׁ֨ה עָשָׂ֣ר יֹום֮ בֹּו֒ וַיִּכָּתֵ֣ב כְּֽכָל־אֲשֶׁר־צִוָּ֣ה הָמָ֡ן אֶ֣ל אֲחַשְׁדַּרְפְּנֵֽי־הַ֠מֶּלֶךְ וְֽאֶל־הַפַּחֹ֞ות אֲשֶׁ֣ר ׀ עַל־מְדִינָ֣ה וּמְדִינָ֗ה וְאֶל־שָׂ֤רֵי עַם֙ וָעָ֔ם מְדִינָ֤ה וּמְדִינָה֙ כִּכְתָבָ֔הּ וְעַ֥ם וָעָ֖ם כִּלְשֹׁונֹ֑ו בְּשֵׁ֨ם הַמֶּ֤לֶךְ אֲחַשְׁוֵרֹשׁ֙ נִכְתָּ֔ב וְנֶחְתָּ֖ם בְּטַבַּ֥עַת הַמֶּֽלֶךְ׃ wayiqareʾu soferey hamelekhe baḥodesh hariʾshown bishelowshah ʿasar yowm bow wayikatev kekhal־ʾasher־tsiuah haman ʾel ʾaḥashedarepeney־hamelekhe weʾel־hapaḥowt ʾasher ׀ ʿal־mediynah umediynah weʾel־sarey ʿam waʿam mediynah umediynah kikhetavah weʿam waʿam kileshownow beshem hamelekhe ʾaḥashewerosh nikhetav weneḥetam beṭabaʿat hamelekhe׃

¹³ וְנִשְׁלֹ֨וחַ סְפָרִ֜ים בְּיַ֣ד הָרָצִים֮ אֶל־כָּל־מְדִינֹ֣ות הַמֶּלֶךְ֒ לְהַשְׁמִ֡יד לַהֲרֹ֣ג וּלְאַבֵּ֣ד אֶת־כָּל־הַ֠יְּהוּדִים מִנַּ֨עַר וְעַד־זָקֵ֨ן טַ֤ף וְנָשִׁים֙ בְּיֹ֣ום אֶחָ֔ד בִּשְׁלֹושָׁ֥ה עָשָׂ֛ר לְחֹ֥דֶשׁ שְׁנֵים־עָשָׂ֖ר הוּא־חֹ֣דֶשׁ אֲדָ֑ר וּשְׁלָלָ֖ם לָבֹֽוז׃ wenishelowḥa sefariym beyad haratsiym ʾel־kal־mediynowt hamelekhe lehashemiyd laharog uleʾabed ʾet־kal־hayehudiym minaʿar weʿad־zaqen ṭaf wenashiym beyowm ʾeḥad bishelowshah ʿasar leḥodesh sheneym־ʿasar huʾ־ḥodesh ʾadar ushelalam lavowz׃

¹⁴ פַּתְשֶׁ֣גֶן הַכְּתָ֗ב לְהִנָּ֤תֵֽן דָּת֙ בְּכָל־מְדִינָ֣ה וּמְדִינָ֔ה גָּל֖וּי לְכָל־הָֽעַמִּ֑ים לִהְיֹ֥ות עֲתִדִ֖ים לַיֹּ֥ום הַזֶּֽה׃ pateshegen haketav lehinaten dat bekhal־mediynah umediynah galuy lekhal־haʿamiym liheyowt ʿatidiym layowm hazeh׃

¹⁵ הָֽרָצִ֞ים יָצְא֤וּ דְחוּפִים֙ בִּדְבַ֣ר הַמֶּ֔לֶךְ וְהַדָּ֥ת נִתְּנָ֖ה בְּשׁוּשַׁ֣ן הַבִּירָ֑ה וְהַמֶּ֤לֶךְ וְהָמָן֙ יָשְׁב֣וּ לִשְׁתֹּ֔ות וְהָעִ֥יר שׁוּשָׁ֖ן נָבֹֽוכָה׃ פ haratsiym yatseʾu deḥufiym bidevar hamelekhe wehadat nitenah beshushan habiyrah wehamelekhe wehaman yashevu lishetowt wehaʿiyr shushan navowkhah׃ f