1 Samuel 11

¹ וַיַּ֗עַל נָחָשׁ֙ הָֽעַמֹּונִ֔י וַיִּ֖חַן עַל־יָבֵ֣שׁ גִּלְעָ֑ד וַיֹּ֨אמְר֜וּ כָּל־אַנְשֵׁ֤י יָבֵישׁ֙ אֶל־נָחָ֔שׁ כְּרָת־לָ֥נוּ בְרִ֖ית וְנַעַבְדֶֽךָּ׃ wayaʿal naḥash haʿamowniy wayiḥan ʿal־yavesh gileʿad wayoʾmeru kal־ʾaneshey yaveysh ʾel־naḥash kerat־lanu veriyt wenaʿavedeka׃

² וַיֹּ֣אמֶר אֲלֵיהֶ֗ם נָחָשׁ֙ הָעַמֹּונִ֔י בְּזֹאת֙ אֶכְרֹ֣ת לָכֶ֔ם בִּנְקֹ֥ור לָכֶ֖ם כָּל־עֵ֣ין יָמִ֑ין וְשַׂמְתִּ֥יהָ חֶרְפָּ֖ה עַל־כָּל־יִשְׂרָאֵֽל׃ wayoʾmer ʾaleyhem naḥash haʿamowniy bezoʾt ʾekherot lakhem bineqowr lakhem kal־ʿeyn yamiyn wesametiyha ḥerepah ʿal־kal־yiseraʾel׃

³ וַיֹּאמְר֨וּ אֵלָ֜יו זִקְנֵ֣י יָבֵ֗ישׁ הֶ֤רֶף לָ֙נוּ֙ שִׁבְעַ֣ת יָמִ֔ים וְנִשְׁלְחָה֙ מַלְאָכִ֔ים בְּכֹ֖ל גְּב֣וּל יִשְׂרָאֵ֑ל וְאִם־אֵ֥ין מֹושִׁ֛יעַ אֹתָ֖נוּ וְיָצָ֥אנוּ אֵלֶֽיךָ׃ wayoʾmeru ʾelayw ziqeney yaveysh heref lanu shiveʿat yamiym wenisheleḥah maleʾakhiym bekhol gevul yiseraʾel weʾim־ʾeyn mowshiyʿa ʾotanu weyatsaʾnu ʾeleykha׃

⁴ וַיָּבֹ֤אוּ הַמַּלְאָכִים֙ גִּבְעַ֣ת שָׁא֔וּל וַיְדַבְּר֥וּ הַדְּבָרִ֖ים בְּאָזְנֵ֣י הָעָ֑ם וַיִּשְׂא֧וּ כָל־הָעָ֛ם אֶת־קֹולָ֖ם וַיִּבְכּֽוּ׃ wayavoʾu hamaleʾakhiym giveʿat shaʾul wayedaberu hadevariym beʾazeney haʿam wayiseʾu khal־haʿam ʾet־qowlam wayiveku׃

⁵ וְהִנֵּ֣ה שָׁא֗וּל בָּ֣א אַחֲרֵ֤י הַבָּקָר֙ מִן־הַשָּׂדֶ֔ה וַיֹּ֣אמֶר שָׁא֔וּל מַה־לָּעָ֖ם כִּ֣י יִבְכּ֑וּ וַיְסַ֨פְּרוּ־לֹ֔ו אֶת־דִּבְרֵ֖י אַנְשֵׁ֥י יָבֵֽישׁ׃ wehineh shaʾul baʾ ʾaḥarey habaqar min־hasadeh wayoʾmer shaʾul mah־laʿam kiy yiveku wayesaperu־low ʾet־diverey ʾaneshey yaveysh׃

⁶ וַתִּצְלַ֤ח רֽוּחַ־אֱלֹהִים֙ עַל־שָׁא֔וּל [בְּשָׁמְעֹו כ] (כְּשָׁמְעֹ֖ו ק) אֶת־הַדְּבָרִ֣ים הָאֵ֑לֶּה וַיִּ֥חַר אַפֹּ֖ו מְאֹֽד׃ watitselaḥ ruaḥ־ʾelohiym ʿal־shaʾul [beshameʿow kh] (keshameʿow q) ʾet־hadevariym haʾeleh wayiḥar ʾapow meʾod׃

⁷ וַיִּקַּח֩ צֶ֨מֶד בָּקָ֜ר וַֽיְנַתְּחֵ֗הוּ וַיְשַׁלַּ֞ח בְּכָל־גְּב֣וּל יִשְׂרָאֵל֮ בְּיַ֣ד הַמַּלְאָכִ֣ים ׀ לֵאמֹר֒ אֲשֶׁר֩ אֵינֶ֨נּוּ יֹצֵ֜א אַחֲרֵ֤י שָׁאוּל֙ וְאַחַ֣ר שְׁמוּאֵ֔ל כֹּ֥ה יֵעָשֶׂ֖ה לִבְקָרֹ֑ו וַיִּפֹּ֤ל פַּֽחַד־יְהוָה֙ עַל־הָעָ֔ם וַיֵּצְא֖וּ כְּאִ֥ישׁ אֶחָֽד׃ wayiqaḥ tsemed baqar wayenateḥehu wayeshalaḥ bekhal־gevul yiseraʾel beyad hamaleʾakhiym ׀ leʾmor ʾasher ʾeynenu yotseʾ ʾaḥarey shaʾul weʾaḥar shemuʾel koh yeʿaseh liveqarow wayipol paḥad־yehwah ʿal־haʿam wayetseʾu keʾiysh ʾeḥad׃

⁸ וַֽיִּפְקְדֵ֖ם בְּבָ֑זֶק וַיִּהְי֤וּ בְנֵֽי־יִשְׂרָאֵל֙ שְׁלֹ֣שׁ מֵאֹ֣ות אֶ֔לֶף וְאִ֥ישׁ יְהוּדָ֖ה שְׁלֹשִׁ֥ים אָֽלֶף׃ wayifeqedem bevazeq wayiheyu veney־yiseraʾel shelosh meʾowt ʾelef weʾiysh yehudah sheloshiym ʾalef׃

⁹ וַיֹּאמְר֞וּ לַמַּלְאָכִ֣ים הַבָּאִ֗ים כֹּ֤ה תֹֽאמְרוּן֙ לְאִישׁ֙ יָבֵ֣ישׁ גִּלְעָ֔ד מָחָ֛ר תִּהְיֶֽה־לָכֶ֥ם תְּשׁוּעָ֖ה [בְּחֹם כ] (כְּחֹ֣ם ק) הַשָּׁ֑מֶשׁ וַיָּבֹ֣אוּ הַמַּלְאָכִ֗ים וַיַּגִּ֛ידוּ לְאַנְשֵׁ֥י יָבֵ֖ישׁ וַיִּשְׂמָֽחוּ׃ wayoʾmeru lamaleʾakhiym habaʾiym koh toʾmerun leʾiysh yaveysh gileʿad maḥar tiheyeh־lakhem teshuʿah [beḥom kh] (keḥom q) hashamesh wayavoʾu hamaleʾakhiym wayagiydu leʾaneshey yaveysh wayisemaḥu׃

¹⁰ וַֽיֹּאמְרוּ֙ אַנְשֵׁ֣י יָבֵ֔ישׁ מָחָ֖ר נֵצֵ֣א אֲלֵיכֶ֑ם וַעֲשִׂיתֶ֣ם לָּ֔נוּ כְּכָל־הַטֹּ֖וב בְּעֵינֵיכֶֽם׃ ס wayoʾmeru ʾaneshey yaveysh maḥar netseʾ ʾaleykhem waʿasiytem lanu kekhal־haṭowv beʿeyneykhem׃ s

¹¹ וַיְהִ֣י מִֽמָּחֳרָ֗ת וַיָּ֨שֶׂם שָׁא֣וּל אֶת־הָעָם֮ שְׁלֹשָׁ֣ה רָאשִׁים֒ וַיָּבֹ֤אוּ בְתֹוךְ־הַֽמַּחֲנֶה֙ בְּאַשְׁמֹ֣רֶת הַבֹּ֔קֶר וַיַּכּ֥וּ אֶת־עַמֹּ֖ון עַד־חֹ֣ם הַיֹּ֑ום וַיְהִ֤י הַנִּשְׁאָרִים֙ וַיָּפֻ֔צוּ וְלֹ֥א נִשְׁאֲרוּ־בָ֖ם שְׁנַ֥יִם יָֽחַד׃ wayehiy mimaḥorat wayasem shaʾul ʾet־haʿam sheloshah raʾshiym wayavoʾu vetowkhe־hamaḥaneh beʾashemoret haboqer wayaku ʾet־ʿamown ʿad־ḥom hayowm wayehiy hanisheʾariym wayafutsu weloʾ nisheʾaru־vam shenayim yaḥad׃

¹² וַיֹּ֤אמֶר הָעָם֙ אֶל־שְׁמוּאֵ֔ל מִ֣י הָאֹמֵ֔ר שָׁא֖וּל יִמְלֹ֣ךְ עָלֵ֑ינוּ תְּנ֥וּ הָאֲנָשִׁ֖ים וּנְמִיתֵֽם׃ wayoʾmer haʿam ʾel־shemuʾel miy haʾomer shaʾul yimelokhe ʿaleynu tenu haʾanashiym unemiytem׃

¹³ וַיֹּ֣אמֶר שָׁא֔וּל לֹֽא־יוּמַ֥ת אִ֖ישׁ בַּיֹּ֣ום הַזֶּ֑ה כִּ֥י הַיֹּ֛ום עָשָֽׂה־יְהוָ֥ה תְּשׁוּעָ֖ה בְּיִשְׂרָאֵֽל׃ ס wayoʾmer shaʾul loʾ־yumat ʾiysh bayowm hazeh kiy hayowm ʿasah־yehwah teshuʿah beyiseraʾel׃ s

¹⁴ וַיֹּ֤אמֶר שְׁמוּאֵל֙ אֶל־הָעָ֔ם לְכ֖וּ וְנֵלְכָ֣ה הַגִּלְגָּ֑ל וּנְחַדֵּ֥שׁ שָׁ֖ם הַמְּלוּכָֽה׃ wayoʾmer shemuʾel ʾel־haʿam lekhu wenelekhah hagilegal uneḥadesh sham hamelukhah׃

¹⁵ וַיֵּלְכ֨וּ כָל־הָעָ֜ם הַגִּלְגָּ֗ל וַיַּמְלִכוּ֩ שָׁ֨ם אֶת־שָׁא֜וּל לִפְנֵ֤י יְהוָה֙ בַּגִּלְגָּ֔ל וַיִּזְבְּחוּ־שָׁ֛ם זְבָחִ֥ים שְׁלָמִ֖ים לִפְנֵ֣י יְהוָ֑ה וַיִּשְׂמַ֨ח שָׁ֥ם שָׁא֛וּל וְכָל־אַנְשֵׁ֥י יִשְׂרָאֵ֖ל עַד־מְאֹֽד׃ פ wayelekhu khal־haʿam hagilegal wayamelikhu sham ʾet־shaʾul lifeney yehwah bagilegal wayizebeḥu־sham zevaḥiym shelamiym lifeney yehwah wayisemaḥ sham shaʾul wekhal־ʾaneshey yiseraʾel ʿad־meʾod׃ f