1 אָ֭הַבְתִּי כִּֽי־יִשְׁמַ֥ע ׀ יְהוָ֑ה אֶת־קֹ֝ולִ֗י תַּחֲנוּנָֽי׃ ʾahavetiy kiy־yishemaʿ ׀ yehwah ʾet־qowliy taḥanunay׃
2 כִּֽי־הִטָּ֣ה אָזְנֹ֣ו לִ֑י וּבְיָמַ֥י אֶקְרָֽא׃ kiy־hiṭah ʾazenow liy uveyamay ʾeqeraʾ׃
3 אֲפָפ֤וּנִי ׀ חֶבְלֵי־מָ֗וֶת וּמְצָרֵ֣י שְׁאֹ֣ול מְצָא֑וּנִי צָרָ֖ה וְיָגֹ֣ון אֶמְצָֽא׃ ʾafafuniy ׀ ḥeveley־mawet umetsarey sheʾowl metsaʾuniy tsarah weyagown ʾemetsaʾ׃
4 וּבְשֵֽׁם־יְהוָ֥ה אֶקְרָ֑א אָנָּ֥ה יְ֝הוָ֗ה מַלְּטָ֥ה נַפְשִֽׁי׃ uveshem־yehwah ʾeqeraʾ ʾanah yehwah maleṭah nafeshiy׃
5 חַנּ֣וּן יְהֹוָ֣ה וְצַדִּ֑יק וֵ֖אלֹהֵ֣ינוּ מְרַחֵֽם׃ ḥanun yehowah wetsadiyq weʾloheynu meraḥem׃
6 שֹׁמֵ֣ר פְּתָאיִ֣ם יְהֹוָ֑ה דַּ֝לֹּותִ֗י וְלִ֣י יְהֹושִֽׁיעַ׃ shomer petaʾyim yehowah dalowtiy weliy yehowshiyʿa׃
7 שׁוּבִ֣י נַ֭פְשִׁי לִמְנוּחָ֑יְכִי כִּֽי־יְ֝הוָ֗ה גָּמַ֥ל עָלָֽיְכִי׃ shuviy nafeshiy limenuḥayekhiy kiy־yehwah gamal ʿalayekhiy׃
8 כִּ֤י חִלַּ֥צְתָּ נַפְשִׁ֗י מִ֫מָּ֥וֶת אֶת־עֵינִ֥י מִן־דִּמְעָ֑ה אֶת־רַגְלִ֥י מִדֶּֽחִי׃ kiy ḥilatseta nafeshiy mimawet ʾet־ʿeyniy min־dimeʿah ʾet־rageliy mideḥiy׃
9 אֶ֭תְהַלֵּךְ לִפְנֵ֣י יְהוָ֑ה בְּ֝אַרְצֹ֗ות הַֽחַיִּֽים׃ ʾetehalekhe lifeney yehwah beʾaretsowt haḥayiym׃
10 הֶ֭אֱמַנְתִּי כִּ֣י אֲדַבֵּ֑ר אֲ֝נִ֗י עָנִ֥יתִי מְאֹֽד׃ heʾemanetiy kiy ʾadaber ʾaniy ʿaniytiy meʾod׃
11 אֲ֭נִי אָמַ֣רְתִּי בְחָפְזִ֑י כָּֽל־הָאָדָ֥ם כֹּזֵֽב׃ ʾaniy ʾamaretiy veḥafeziy kal־haʾadam kozev׃
12 מָֽה־אָשִׁ֥יב לַיהוָ֑ה כָּֽל־תַּגְמוּלֹ֥והִי עָלָֽי׃ mah־ʾashiyv layhwah kal־tagemulowhiy ʿalay׃
13 כֹּוס־יְשׁוּעֹ֥ות אֶשָּׂ֑א וּבְשֵׁ֖ם יְהוָ֣ה אֶקְרָֽא׃ kows־yeshuʿowt ʾesaʾ uveshem yehwah ʾeqeraʾ׃
14 נְ֭דָרַי לַיהוָ֣ה אֲשַׁלֵּ֑ם נֶגְדָה־נָּ֝֗א לְכָל־עַמֹּֽו׃ nedaray layhwah ʾashalem negedah־naʾ lekhal־ʿamow׃
15 יָ֭קָר בְּעֵינֵ֣י יְהוָ֑ה הַ֝מָּ֗וְתָה לַחֲסִידָֽיו׃ yaqar beʿeyney yehwah hamawetah laḥasiydayw׃
16 אָֽנָּ֣ה יְהוָה֮ כִּֽי־אֲנִ֪י עַ֫בְדֶּ֥ךָ אֲֽנִי־עַ֭בְדְּךָ בֶּן־אֲמָתֶ֑ךָ פִּ֝תַּ֗חְתָּ לְמֹוסֵרָֽי׃ ʾanah yehwah kiy־ʾaniy ʿavedekha אniy־ʿavedekha ben־ʾamatekha pitaḥeta lemowseray׃
17 לְֽךָ־אֶ֭זְבַּח זֶ֣בַח תֹּודָ֑ה וּבְשֵׁ֖ם יְהוָ֣ה אֶקְרָֽא׃ lekha־ʾezebaḥ zevaḥ towdah uveshem yehwah ʾeqeraʾ׃
18 נְ֭דָרַי לַיהוָ֣ה אֲשַׁלֵּ֑ם נֶגְדָה־נָּ֝֗א לְכָל־עַמֹּֽו׃ nedaray layhwah ʾashalem negedah־naʾ lekhal־ʿamow׃
19 בְּחַצְרֹ֤ות ׀ בֵּ֤ית יְהוָ֗ה בְּֽתֹ֘וכֵ֤כִי יְֽרוּשָׁלִָ֗ם הַֽלְלוּ־יָֽהּ׃ beḥatserowt ׀ beyt yehwah betowkhekhiy yerushalim halelu־yah׃