2 Samuel 12

¹ וַיִּשְׁלַ֧ח יְהוָ֛ה אֶת־נָתָ֖ן אֶל־דָּוִ֑ד וַיָּבֹ֣א אֵלָ֗יו וַיֹּ֤אמֶר לֹו֙ שְׁנֵ֣י אֲנָשִׁ֗ים הָיוּ֙ בְּעִ֣יר אֶחָ֔ת אֶחָ֥ד עָשִׁ֖יר וְאֶחָ֥ד רָֽאשׁ׃ wayishelaḥ yehwah ʾet־natan ʾel־dawid wayavoʾ ʾelayw wayoʾmer low sheney ʾanashiym hayu beʿiyr ʾeḥat ʾeḥad ʿashiyr weʾeḥad raʾsh׃

² לְעָשִׁ֗יר הָיָ֛ה צֹ֥אן וּבָקָ֖ר הַרְבֵּ֥ה מְאֹֽד׃ leʿashiyr hayah tsoʾn uvaqar harebeh meʾod׃

³ וְלָרָ֣שׁ אֵֽין־כֹּ֗ל כִּי֩ אִם־כִּבְשָׂ֨ה אַחַ֤ת קְטַנָּה֙ אֲשֶׁ֣ר קָנָ֔ה וַיְחַיֶּ֕הָ וַתִּגְדַּ֥ל עִמֹּ֛ו וְעִם־בָּנָ֖יו יַחְדָּ֑ו מִפִּתֹּ֨ו תֹאכַ֜ל וּמִכֹּסֹ֤ו תִשְׁתֶּה֙ וּבְחֵיקֹ֣ו תִשְׁכָּ֔ב וַתְּהִי־לֹ֖ו כְּבַֽת׃ welarash ʾeyn־kol kiy ʾim־kivesah ʾaḥat qeṭanah ʾasher qanah wayeḥayeah watigedal ʿimow weʿim־banayw yaḥedaw mipitow toʾkhal umikosow tisheteh uveḥeyqow tishekav watehiy־low kevat׃

⁴ וַיָּ֣בֹא הֵלֶךְ֮ לְאִ֣ישׁ הֶֽעָשִׁיר֒ וַיַּחְמֹ֗ל לָקַ֤חַת מִצֹּאנֹו֙ וּמִבְּקָרֹ֔ו לַעֲשֹׂ֕ות לָאֹרֵ֖חַ הַבָּא־לֹ֑ו וַיִּקַּ֗ח אֶת־כִּבְשַׂת֙ הָאִ֣ישׁ הָרָ֔אשׁ וַֽיַּעֲשֶׂ֔הָ לָאִ֖ישׁ הַבָּ֥א אֵלָֽיו׃ wayavoʾ helekhe leʾiysh heʿashiyr wayaḥemol laqaḥat mitsoʾnow umibeqarow laʿasowt laʾoreaḥ habaʾ־low wayiqaḥ ʾet־kivesat haʾiysh haraʾsh wayaʿaseah laʾiysh habaʾ ʾelayw׃

⁵ וַיִּֽחַר־אַ֥ף דָּוִ֛ד בָּאִ֖ישׁ מְאֹ֑ד וַיֹּ֙אמֶר֙ אֶל־נָתָ֔ן חַי־יְהוָ֕ה כִּ֣י בֶן־מָ֔וֶת הָאִ֖ישׁ הָעֹשֶׂ֥ה זֹֽאת׃ wayiḥar־ʾaf dawid baʾiysh meʾod wayoʾmer ʾel־natan ḥay־yehwah kiy ven־mawet haʾiysh haʿoseh zoʾt׃

⁶ וְאֶת־הַכִּבְשָׂ֖ה יְשַׁלֵּ֣ם אַרְבַּעְתָּ֑יִם עֵ֗קֶב אֲשֶׁ֤ר עָשָׂה֙ אֶת־הַדָּבָ֣ר הַזֶּ֔ה וְעַ֖ל אֲשֶׁ֥ר לֹֽא־חָמָֽל׃ weʾet־hakivesah yeshalem ʾarebaʿetayim ʿeqev ʾasher ʿasah ʾet־hadavar hazeh weʿal ʾasher loʾ־ḥamal׃

⁷ וַיֹּ֧אמֶר נָתָ֛ן אֶל־דָּוִ֖ד אַתָּ֣ה הָאִ֑ישׁ כֹּה־אָמַ֨ר יְהוָ֜ה אֱלֹהֵ֣י יִשְׂרָאֵ֗ל אָנֹכִ֞י מְשַׁחְתִּ֤יךָֽ לְמֶ֙לֶךְ֙ עַל־יִשְׂרָאֵ֔ל וְאָנֹכִ֥י הִצַּלְתִּ֖יךָ מִיַּ֥ד שָׁאֽוּל׃ wayoʾmer natan ʾel־dawid ʾatah haʾiysh koh־ʾamar yehwah ʾelohey yiseraʾel ʾanokhiy meshaḥetiykha lemelekhe ʿal־yiseraʾel weʾanokhiy hitsaletiykha miyad shaʾul׃

⁸ וָאֶתְּנָ֨ה לְךָ֜ אֶת־בֵּ֣ית אֲדֹנֶ֗יךָ וְאֶת־נְשֵׁ֤י אֲדֹנֶ֙יךָ֙ בְּחֵיקֶ֔ךָ וָאֶתְּנָ֣ה לְךָ֔ אֶת־בֵּ֥ית יִשְׂרָאֵ֖ל וִֽיהוּדָ֑ה וְאִ֨ם־מְעָ֔ט וְאֹסִ֥פָה לְּךָ֖ כָּהֵ֥נָּה וְכָהֵֽנָּה׃ waʾetenah lekha ʾet־beyt ʾadoneykha weʾet־neshey ʾadoneykha beḥeyqekha waʾetenah lekha ʾet־beyt yiseraʾel wiyhudah weʾim־meʿaṭ weʾosifah lekha kahenah wekhahenah׃

⁹ מַדּ֜וּעַ בָּזִ֣יתָ ׀ אֶת־דְּבַ֣ר יְהוָ֗ה לַעֲשֹׂ֣ות הָרַע֮ [בְּעֵינֹו כ] (בְּעֵינַי֒ ק) אֵ֣ת אוּרִיָּ֤ה הַֽחִתִּי֙ הִכִּ֣יתָ בַחֶ֔רֶב וְאֶ֨ת־אִשְׁתֹּ֔ו לָקַ֥חְתָּ לְּךָ֖ לְאִשָּׁ֑ה וְאֹתֹ֣ו הָרַ֔גְתָּ בְּחֶ֖רֶב בְּנֵ֥י עַמֹּֽון׃ maduaʿ baziyta ׀ ʾet־devar yehwah laʿasowt haraʿ [beʿeynow kh] (beʿeynay q) ʾet ʾuriyah haḥitiy hikiyta vaḥerev weʾet־ʾishetow laqaḥeta lekha leʾishah weʾotow harageta beḥerev beney ʿamown׃

¹⁰ וְעַתָּ֗ה לֹא־תָס֥וּר חֶ֛רֶב מִבֵּיתְךָ֖ עַד־עֹולָ֑ם עֵ֚קֶב כִּ֣י בְזִתָ֔נִי וַתִּקַּ֗ח אֶת־אֵ֙שֶׁת֙ אוּרִיָּ֣ה הַחִתִּ֔י לִהְיֹ֥ות לְךָ֖ לְאִשָּֽׁה׃ ס weʿatah loʾ־tasur ḥerev mibeytekha ʿad־ʿowlam ʿeqev kiy vezitaniy watiqaḥ ʾet־ʾeshet ʾuriyah haḥitiy liheyowt lekha leʾishah׃ s

¹¹ כֹּ֣ה ׀ אָמַ֣ר יְהוָ֗ה הִנְנִי֩ מֵקִ֨ים עָלֶ֤יךָ רָעָה֙ מִבֵּיתֶ֔ךָ וְלָקַחְתִּ֤י אֶת־נָשֶׁ֙יךָ֙ לְעֵינֶ֔יךָ וְנָתַתִּ֖י לְרֵעֶ֑יךָ וְשָׁכַב֙ עִם־נָשֶׁ֔יךָ לְעֵינֵ֖י הַשֶּׁ֥מֶשׁ הַזֹּֽאת׃ koh ׀ ʾamar yehwah hineniy meqiym ʿaleykha raʿah mibeytekha welaqaḥetiy ʾet־nasheykha leʿeyneykha wenatatiy lereʿeykha weshakhav ʿim־nasheykha leʿeyney hashemesh hazoʾt׃

¹² כִּ֥י אַתָּ֖ה עָשִׂ֣יתָ בַסָּ֑תֶר וַאֲנִ֗י אֶעֱשֶׂה֙ אֶת־הַדָּבָ֣ר הַזֶּ֔ה נֶ֥גֶד כָּל־יִשְׂרָאֵ֖ל וְנֶ֥גֶד הַשָּֽׁמֶשׁ׃ ס kiy ʾatah ʿasiyta vasater waʾaniy ʾeʿeseh ʾet־hadavar hazeh neged kal־yiseraʾel weneged hashamesh׃ s

¹³ וַיֹּ֤אמֶר דָּוִד֙ אֶל־נָתָ֔ן חָטָ֖אתִי לַֽיהוָ֑ה ס וַיֹּ֨אמֶר נָתָ֜ן אֶל־דָּוִ֗ד גַּם־יְהוָ֛ה הֶעֱבִ֥יר חַטָּאתְךָ֖ לֹ֥א תָמֽוּת׃ wayoʾmer dawid ʾel־natan ḥaṭaʾtiy layhwah s wayoʾmer natan ʾel־dawid gam־yehwah heʿeviyr ḥaṭaʾtekha loʾ tamut׃

¹⁴ אֶ֗פֶס כִּֽי־נִאֵ֤ץ נִאַ֙צְתָּ֙ אֶת־אֹיְבֵ֣י יְהוָ֔ה בַּדָּבָ֖ר הַזֶּ֑ה גַּ֗ם הַבֵּ֛ן הַיִּלֹּ֥וד לְךָ֖ מֹ֥ות יָמֽוּת׃ ʾefes kiy־niʾets niʾatseta ʾet־ʾoyevey yehwah badavar hazeh gam haben hayilowd lekha mowt yamut׃

¹⁵ וַיֵּ֥לֶךְ נָתָ֖ן אֶל־בֵּיתֹ֑ו וַיִּגֹּ֣ף יְהוָ֗ה אֶת־הַיֶּ֜לֶד אֲשֶׁ֨ר יָלְדָ֧ה אֵֽשֶׁת־אוּרִיָּ֛ה לְדָוִ֖ד וַיֵּאָנַֽשׁ׃ wayelekhe natan ʾel־beytow wayigof yehwah ʾet־hayeled ʾasher yaledah ʾeshet־ʾuriyah ledawid wayeʾanash׃

¹⁶ וַיְבַקֵּ֥שׁ דָּוִ֛ד אֶת־הָאֱלֹהִ֖ים בְּעַ֣ד הַנָּ֑עַר וַיָּ֤צָם דָּוִד֙ צֹ֔ום וּבָ֥א וְלָ֖ן וְשָׁכַ֥ב אָֽרְצָה׃ wayevaqesh dawid ʾet־haʾelohiym beʿad hanaʿar wayatsam dawid tsowm uvaʾ welan weshakhav ʾaretsah׃

¹⁷ וַיָּקֻ֜מוּ זִקְנֵ֤י בֵיתֹו֙ עָלָ֔יו לַהֲקִימֹ֖ו מִן־הָאָ֑רֶץ וְלֹ֣א אָבָ֔ה וְלֹֽא־בָרָ֥א אִתָּ֖ם לָֽחֶם׃ wayaqumu ziqeney veytow ʿalayw lahaqiymow min־haʾarets weloʾ ʾavah weloʾ־varaʾ ʾitam laḥem׃

¹⁸ וַיְהִ֛י בַּיֹּ֥ום הַשְּׁבִיעִ֖י וַיָּ֣מָת הַיָּ֑לֶד וַיִּֽרְאוּ֩ עַבְדֵ֨י דָוִ֜ד לְהַגִּ֥יד לֹ֣ו ׀ כִּי־מֵ֣ת הַיֶּ֗לֶד כִּ֤י אָֽמְרוּ֙ הִנֵּה֩ בִהְיֹ֨ות הַיֶּ֜לֶד חַ֗י דִּבַּ֤רְנוּ אֵלָיו֙ וְלֹא־שָׁמַ֣ע בְּקֹולֵ֔נוּ וְאֵ֨יךְ נֹאמַ֥ר אֵלָ֛יו מֵ֥ת הַיֶּ֖לֶד וְעָשָׂ֥ה רָעָֽה׃ wayehiy bayowm hasheviyʿiy wayamat hayaled wayireʾu ʿavedey dawid lehagiyd low ׀ kiy־met hayeled kiy ʾameru hineh viheyowt hayeled ḥay dibarenu ʾelayw weloʾ־shamaʿ beqowlenu weʾeykhe noʾmar ʾelayw met hayeled weʿasah raʿah׃

¹⁹ וַיַּ֣רְא דָּוִ֗ד כִּ֤י עֲבָדָיו֙ מִֽתְלַחֲשִׁ֔ים וַיָּ֥בֶן דָּוִ֖ד כִּ֣י מֵ֣ת הַיָּ֑לֶד וַיֹּ֨אמֶר דָּוִ֧ד אֶל־עֲבָדָ֛יו הֲמֵ֥ת הַיֶּ֖לֶד וַיֹּ֥אמְרוּ מֵֽת׃ wayareʾ dawid kiy ʿavadayw mitelaḥashiym wayaven dawid kiy met hayaled wayoʾmer dawid ʾel־ʿavadayw hamet hayeled wayoʾmeru met׃

²⁰ וַיָּקָם֩ דָּוִ֨ד מֵהָאָ֜רֶץ וַיִּרְחַ֣ץ וַיָּ֗סֶךְ וַיְחַלֵּף֙ [שִׂמְלֹתֹו כ] (שִׂמְלֹתָ֔יו ק) וַיָּבֹ֥א בֵית־יְהוָ֖ה וַיִּשְׁתָּ֑חוּ וַיָּבֹא֙ אֶל־בֵּיתֹ֔ו וַיִּשְׁאַ֕ל וַיָּשִׂ֥ימוּ לֹ֛ו לֶ֖חֶם וַיֹּאכַֽל׃ wayaqam dawid mehaʾarets wayireḥats wayasekhe wayeḥalef [simelotow kh] (simelotayw q) wayavoʾ veyt־yehwah wayishetaḥu wayavoʾ ʾel־beytow wayisheʾal wayasiymu low leḥem wayoʾkhal׃

²¹ וַיֹּאמְר֤וּ עֲבָדָיו֙ אֵלָ֔יו מָֽה־הַדָּבָ֥ר הַזֶּ֖ה אֲשֶׁ֣ר עָשִׂ֑יתָה בַּעֲב֞וּר הַיֶּ֤לֶד חַי֙ צַ֣מְתָּ וַתֵּ֔בְךְּ וְכַֽאֲשֶׁר֙ מֵ֣ת הַיֶּ֔לֶד קַ֖מְתָּ וַתֹּ֥אכַל לָֽחֶם׃ wayoʾmeru ʿavadayw ʾelayw mah־hadavar hazeh ʾasher ʿasiytah baʿavur hayeled ḥay tsameta wateveke wekhaʾasher met hayeled qameta watoʾkhal laḥem׃

²² וַיֹּ֕אמֶר בְּעֹוד֙ הַיֶּ֣לֶד חַ֔י צַ֖מְתִּי וָֽאֶבְכֶּ֑ה כִּ֤י אָמַ֙רְתִּי֙ מִ֣י יֹודֵ֔עַ [יְחָנַּנִי כ] (וְחַנַּ֥נִי ק) יְהוָ֖ה וְחַ֥י הַיָּֽלֶד׃ wayoʾmer beʿowd hayeled ḥay tsametiy waʾevekeh kiy ʾamaretiy miy yowdeaʿ [yeḥananiy kh] (weḥananiy q) yehwah weḥay hayaled׃

²³ וְעַתָּ֣ה ׀ מֵ֗ת לָ֤מָּה זֶּה֙ אֲנִ֣י צָ֔ם הַאוּכַ֥ל לַהֲשִׁיבֹ֖ו עֹ֑וד אֲנִי֙ הֹלֵ֣ךְ אֵלָ֔יו וְה֖וּא לֹֽא־יָשׁ֥וּב אֵלָֽי׃ weʿatah ׀ met lamah zeh ʾaniy tsam haʾukhal lahashiyvow ʿowd ʾaniy holekhe ʾelayw wehuʾ loʾ־yashuv ʾelay׃

²⁴ וַיְנַחֵ֣ם דָּוִ֗ד אֵ֚ת בַּת־שֶׁ֣בַע אִשְׁתֹּ֔ו וַיָּבֹ֥א אֵלֶ֖יהָ וַיִּשְׁכַּ֣ב עִמָּ֑הּ וַתֵּ֣לֶד בֵּ֗ן [וַיִּקְרָא כ] (וַתִּקְרָ֤א ק) אֶת־שְׁמֹו֙ שְׁלֹמֹ֔ה וַיהוָ֖ה אֲהֵבֹֽו׃ wayenaḥem dawid ʾet bat־shevaʿ ʾishetow wayavoʾ ʾeleyha wayishekav ʿimah wateled ben [wayiqeraʾ kh] (watiqeraʾ q) ʾet־shemow shelomoh wayhwah ʾahevow׃

²⁵ וַיִּשְׁלַ֗ח בְּיַד֙ נָתָ֣ן הַנָּבִ֔יא וַיִּקְרָ֥א אֶת־שְׁמֹ֖ו יְדִ֣ידְיָ֑הּ בַּעֲב֖וּר יְהוָֽה׃ פ wayishelaḥ beyad natan hanaviyʾ wayiqeraʾ ʾet־shemow yediydeyah baʿavur yehwah׃ f

²⁶ וַיִּלָּ֣חֶם יֹואָ֔ב בְּרַבַּ֖ת בְּנֵ֣י עַמֹּ֑ון וַיִּלְכֹּ֖ד אֶת־עִ֥יר הַמְּלוּכָֽה׃ wayilaḥem yowʾav berabat beney ʿamown wayilekod ʾet־ʿiyr hamelukhah׃

²⁷ וַיִּשְׁלַ֥ח יֹואָ֛ב מַלְאָכִ֖ים אֶל־דָּוִ֑ד וַיֹּ֙אמֶר֙ נִלְחַ֣מְתִּי בְרַבָּ֔ה גַּם־לָכַ֖דְתִּי אֶת־עִ֥יר הַמָּֽיִם׃ wayishelaḥ yowʾav maleʾakhiym ʾel־dawid wayoʾmer nileḥametiy verabah gam־lakhadetiy ʾet־ʿiyr hamayim׃

²⁸ וְעַתָּ֗ה אֱסֹף֙ אֶת־יֶ֣תֶר הָעָ֔ם וַחֲנֵ֥ה עַל־הָעִ֖יר וְלָכְדָ֑הּ פֶּן־אֶלְכֹּ֤ד אֲנִי֙ אֶת־הָעִ֔יר וְנִקְרָ֥א שְׁמִ֖י עָלֶֽיהָ׃ weʿatah ʾesof ʾet־yeter haʿam waḥaneh ʿal־haʿiyr welakhedah pen־ʾelekod ʾaniy ʾet־haʿiyr weniqeraʾ shemiy ʿaleyha׃

²⁹ וַיֶּאֱסֹ֥ף דָּוִ֛ד אֶת־כָּל־הָעָ֖ם וַיֵּ֣לֶךְ רַבָּ֑תָה וַיִּלָּ֥חֶם בָּ֖הּ וַֽיִּלְכְּדָֽהּ׃ wayeʾesof dawid ʾet־kal־haʿam wayelekhe rabatah wayilaḥem bah wayilekedah׃

³⁰ וַיִּקַּ֣ח אֶת־עֲטֶֽרֶת־מַלְכָּם֩ מֵעַ֨ל רֹאשֹׁ֜ו וּמִשְׁקָלָ֨הּ כִּכַּ֤ר זָהָב֙ וְאֶ֣בֶן יְקָרָ֔ה וַתְּהִ֖י עַל־רֹ֣אשׁ דָּוִ֑ד וּשְׁלַ֥ל הָעִ֛יר הֹוצִ֖יא הַרְבֵּ֥ה מְאֹֽד׃ wayiqaḥ ʾet־ʿaṭeret־malekam meʿal roʾshow umisheqalah kikar zahav weʾeven yeqarah watehiy ʿal־roʾsh dawid ushelal haʿiyr howtsiyʾ harebeh meʾod׃

³¹ וְאֶת־הָעָ֨ם אֲשֶׁר־בָּ֜הּ הֹוצִ֗יא וַיָּ֣שֶׂם בַּ֠מְּגֵרָה וּבַחֲרִצֵ֨י הַבַּרְזֶ֜ל וּֽבְמַגְזְרֹ֣ת הַבַּרְזֶ֗ל וְהֶעֱבִ֤יר אֹותָם֙ [בַּמַּלְכֶּן כ] (בַּמַּלְבֵּ֔ן ק) וְכֵ֣ן יַעֲשֶׂ֔ה לְכֹ֖ל עָרֵ֣י בְנֵֽי־עַמֹּ֑ון וַיָּ֧שָׁב דָּוִ֛ד וְכָל־הָעָ֖ם יְרוּשָׁלִָֽם׃ פ weʾet־haʿam ʾasher־bah howtsiyʾ wayasem bamegerah uvaḥaritsey habarezel uvemagezerot habarezel weheʿeviyr ʾowtam [bamaleken kh] (bamaleben q) wekhen yaʿaseh lekhol ʿarey veney־ʿamown wayashav dawid wekhal־haʿam yerushalim׃ f