1 וַיַּאַסְפ֨וּ פְלִשְׁתִּ֤ים אֶת־מַֽחֲנֵיהֶם֙ לַמִּלְחָמָ֔ה וַיֵּאָ֣סְפ֔וּ שֹׂכֹ֖ה אֲשֶׁ֣ר לִיהוּדָ֑ה וַֽיַּחֲנ֛וּ בֵּין־שֹׂוכֹ֥ה וּבֵין־עֲזֵקָ֖ה בְּאֶ֥פֶס דַּמִּֽים׃ wayaʾasefu felishetiym ʾet־maḥaneyhem lamileḥamah wayeʾasefu sokhoh ʾasher liyhudah wayaḥanu beyn־sowkhoh uveyn־ʿazeqah beʾefes damiym׃
2 וְשָׁא֤וּל וְאִֽישׁ־יִשְׂרָאֵל֙ נֶאֶסְפ֔וּ וַֽיַּחֲנ֖וּ בְּעֵ֣מֶק הָאֵלָ֑ה וַיַּעַרְכ֥וּ מִלְחָמָ֖ה לִקְרַ֥את פְּלִשְׁתִּֽים׃ weshaʾul weʾiysh־yiseraʾel neʾesefu wayaḥanu beʿemeq haʾelah wayaʿarekhu mileḥamah liqeraʾt pelishetiym׃
3 וּפְלִשְׁתִּ֞ים עֹמְדִ֤ים אֶל־הָהָר֙ מִזֶּ֔ה וְיִשְׂרָאֵ֛ל עֹמְדִ֥ים אֶל־הָהָ֖ר מִזֶּ֑ה וְהַגַּ֖יְא בֵּינֵיהֶֽם׃ ufelishetiym ʿomediym ʾel־hahar mizeh weyiseraʾel ʿomediym ʾel־hahar mizeh wehagayeʾ beyneyhem׃
4 וַיֵּצֵ֤א אִֽישׁ־הַבֵּנַ֙יִם֙ מִמַּחֲנֹ֣ות פְּלִשְׁתִּ֔ים גָּלְיָ֥ת שְׁמֹ֖ו מִגַּ֑ת גָּבְהֹ֕ו שֵׁ֥שׁ אַמֹּ֖ות וָזָֽרֶת׃ wayetseʾ ʾiysh־habenayim mimaḥanowt pelishetiym galeyat shemow migat gavehow shesh ʾamowt wazaret׃
5 וְכֹ֤ובַע נְחֹ֙שֶׁת֙ עַל־רֹאשֹׁ֔ו וְשִׁרְיֹ֥ון קַשְׂקַשִּׂ֖ים ה֣וּא לָב֑וּשׁ וּמִשְׁקַל֙ הַשִּׁרְיֹ֔ון חֲמֵשֶׁת־אֲלָפִ֥ים שְׁקָלִ֖ים נְחֹֽשֶֽׁת׃ wekhowvaʿ neḥoshet ʿal־roʾshow weshireyown qaseqasiym huʾ lavush umisheqal hashireyown ḥameshet־ʾalafiym sheqaliym neḥoshet׃
6 וּמִצְחַ֥ת נְחֹ֖שֶׁת עַל־רַגְלָ֑יו וְכִידֹ֥ון נְחֹ֖שֶׁת בֵּ֥ין כְּתֵפָֽיו׃ umitseḥat neḥoshet ʿal־ragelayw wekhiydown neḥoshet beyn ketefayw׃
7 [וְחָץ כ] (וְעֵ֣ץ ק) חֲנִיתֹ֗ו כִּמְנֹור֙ אֹֽרְגִ֔ים וְלַהֶ֣בֶת חֲנִיתֹ֔ו שֵׁשׁ־מֵאֹ֥ות שְׁקָלִ֖ים בַּרְזֶ֑ל וְנֹשֵׂ֥א הַצִּנָּ֖ה הֹלֵ֥ךְ לְפָנָֽיו׃ [weḥats kh] (weʿets q) ḥaniytow kimenowr ʾoregiym welahevet ḥaniytow shesh־meʾowt sheqaliym barezel wenoseʾ hatsinah holekhe lefanayw׃
8 וַֽיַּעֲמֹ֗ד וַיִּקְרָא֙ אֶל־מַעַרְכֹ֣ת יִשְׂרָאֵ֔ל וַיֹּ֣אמֶר לָהֶ֔ם לָ֥מָּה תֵצְא֖וּ לַעֲרֹ֣ךְ מִלְחָמָ֑ה הֲלֹ֧וא אָנֹכִ֣י הַפְּלִשְׁתִּ֗י וְאַתֶּם֙ עֲבָדִ֣ים לְשָׁא֔וּל בְּרוּ־לָכֶ֥ם אִ֖ישׁ וְיֵרֵ֥ד אֵלָֽי׃ wayaʿamod wayiqeraʾ ʾel־maʿarekhot yiseraʾel wayoʾmer lahem lamah tetseʾu laʿarokhe mileḥamah halowʾ ʾanokhiy hapelishetiy weʾatem ʿavadiym leshaʾul beru־lakhem ʾiysh weyered ʾelay׃
9 אִם־יוּכַ֞ל לְהִלָּחֵ֤ם אִתִּי֙ וְהִכָּ֔נִי וְהָיִ֥ינוּ לָכֶ֖ם לַעֲבָדִ֑ים וְאִם־אֲנִ֤י אֽוּכַל־לֹו֙ וְהִכִּיתִ֔יו וִהְיִ֤יתֶם לָ֙נוּ֙ לַעֲבָדִ֔ים וַעֲבַדְתֶּ֖ם אֹתָֽנוּ׃ ʾim־yukhal lehilaḥem ʾitiy wehikaniy wehayiynu lakhem laʿavadiym weʾim־ʾaniy ʾukhal־low wehikiytiyw wiheyiytem lanu laʿavadiym waʿavadetem ʾotanu׃
10 וַיֹּ֙אמֶר֙ הַפְּלִשְׁתִּ֔י אֲנִ֗י חֵרַ֛פְתִּי אֶת־מַעַרְכֹ֥ות יִשְׂרָאֵ֖ל הַיֹּ֣ום הַזֶּ֑ה תְּנוּ־לִ֣י אִ֔ישׁ וְנִֽלָּחֲמָ֖ה יָֽחַד׃ wayoʾmer hapelishetiy ʾaniy ḥerafetiy ʾet־maʿarekhowt yiseraʾel hayowm hazeh tenu־liy ʾiysh wenilaḥamah yaḥad׃
11 וַיִּשְׁמַ֤ע שָׁאוּל֙ וְכָל־יִשְׂרָאֵ֔ל אֶת־דִּבְרֵ֥י הַפְּלִשְׁתִּ֖י הָאֵ֑לֶּה וַיֵּחַ֥תּוּ וַיִּֽרְא֖וּ מְאֹֽד׃ פ wayishemaʿ shaʾul wekhal־yiseraʾel ʾet־diverey hapelishetiy haʾeleh wayeḥatu wayireʾu meʾod׃ f
12 וְדָוִד֩ בֶּן־אִ֨ישׁ אֶפְרָתִ֜י הַזֶּ֗ה מִבֵּ֥ית לֶ֙חֶם֙ יְהוּדָ֔ה וּשְׁמֹ֣ו יִשַׁ֔י וְלֹ֖ו שְׁמֹנָ֣ה בָנִ֑ים וְהָאִישׁ֙ בִּימֵ֣י שָׁא֔וּל זָקֵ֖ן בָּ֥א בַאֲנָשִֽׁים׃ wedawid ben־ʾiysh ʾeferatiy hazeh mibeyt leḥem yehudah ushemow yishay welow shemonah vaniym wehaʾiysh biymey shaʾul zaqen baʾ vaʾanashiym׃
13 וַיֵּ֨לְכ֜וּ שְׁלֹ֤שֶׁת בְּנֵֽי־יִשַׁי֙ הַגְּדֹלִ֔ים הָלְכ֥וּ אַחֲרֵי־שָׁא֖וּל לַמִּלְחָמָ֑ה וְשֵׁ֣ם ׀ שְׁלֹ֣שֶׁת בָּנָ֗יו אֲשֶׁ֤ר הָלְכוּ֙ בַּמִּלְחָמָ֔ה אֱלִיאָ֣ב הַבְּכֹ֗ור וּמִשְׁנֵ֙הוּ֙ אֲבִ֣ינָדָ֔ב וְהַשְּׁלִשִׁ֖י שַׁמָּֽה׃ wayelekhu sheloshet beney־yishay hagedoliym halekhu ʾaḥarey־shaʾul lamileḥamah weshem ׀ sheloshet banayw ʾasher halekhu bamileḥamah ʾeliyʾav habekhowr umishenehu ʾaviynadav wehashelishiy shamah׃
14 וְדָוִ֖ד ה֣וּא הַקָּטָ֑ן וּשְׁלֹשָׁה֙ הַגְּדֹלִ֔ים הָלְכ֖וּ אַחֲרֵ֥י שָׁאֽוּל׃ ס wedawid huʾ haqaṭan usheloshah hagedoliym halekhu ʾaḥarey shaʾul׃ s
15 וְדָוִ֛ד הֹלֵ֥ךְ וָשָׁ֖ב מֵעַ֣ל שָׁא֑וּל לִרְעֹ֛ות אֶת־צֹ֥אן אָבִ֖יו בֵּֽית־לָֽחֶם׃ wedawid holekhe washav meʿal shaʾul lireʿowt ʾet־tsoʾn ʾaviyw beyt־laḥem׃
16 וַיִּגַּ֥שׁ הַפְּלִשְׁתִּ֖י הַשְׁכֵּ֣ם וְהַעֲרֵ֑ב וַיִּתְיַצֵּ֖ב אַרְבָּעִ֥ים יֹֽום׃ פ wayigash hapelishetiy hashekem wehaʿarev wayiteyatsev ʾarebaʿiym yowm׃ f
17 וַיֹּ֨אמֶר יִשַׁ֜י לְדָוִ֣ד בְּנֹ֗ו קַח־נָ֤א לְאַחֶ֙יךָ֙ אֵיפַ֤ת הַקָּלִיא֙ הַזֶּ֔ה וַעֲשָׂרָ֥ה לֶ֖חֶם הַזֶּ֑ה וְהָרֵ֥ץ הַֽמַּחֲנֶ֖ה לְאַחֶֽיךָ׃ wayoʾmer yishay ledawid benow qaḥ־naʾ leʾaḥeykha ʾeyfat haqaliyʾ hazeh waʿasarah leḥem hazeh weharets hamaḥaneh leʾaḥeykha׃
18 וְ֠אֵת עֲשֶׂ֜רֶת חֲרִצֵ֤י הֶֽחָלָב֙ הָאֵ֔לֶּה תָּבִ֖יא לְשַׂר־הָאָ֑לֶף וְאֶת־אַחֶ֙יךָ֙ תִּפְקֹ֣ד לְשָׁלֹ֔ום וְאֶת־עֲרֻבָּתָ֖ם תִּקָּֽח׃ weʾet ʿaseret ḥaritsey heḥalav haʾeleh taviyʾ lesar־haʾalef weʾet־ʾaḥeykha tifeqod leshalowm weʾet־ʿarubatam tiqaḥ׃
19 וְשָׁא֤וּל וְהֵ֙מָּה֙ וְכָל־אִ֣ישׁ יִשְׂרָאֵ֔ל בְּעֵ֖מֶק הָֽאֵלָ֑ה נִלְחָמִ֖ים עִם־פְּלִשְׁתִּֽים׃ weshaʾul wehemah wekhal־ʾiysh yiseraʾel beʿemeq haʾelah nileḥamiym ʿim־pelishetiym׃
20 וַיַּשְׁכֵּ֨ם דָּוִ֜ד בַּבֹּ֗קֶר וַיִּטֹּ֤שׁ אֶת־הַצֹּאן֙ עַל־שֹׁמֵ֔ר וַיִּשָּׂ֣א וַיֵּ֔לֶךְ כַּאֲשֶׁ֥ר צִוָּ֖הוּ יִשָׁ֑י וַיָּבֹא֙ הַמַּעְגָּ֔לָה וְהַחַ֗יִל הַיֹּצֵא֙ אֶל־הַמַּ֣עֲרָכָ֔ה וְהֵרֵ֖עוּ בַּמִּלְחָמָֽה׃ wayashekem dawid baboqer wayiṭosh ʾet־hatsoʾn ʿal־shomer wayisaʾ wayelekhe kaʾasher tsiuahu yishay wayavoʾ hamaʿegalah wehaḥayil hayotseʾ ʾel־hamaʿarakhah wehereʿu bamileḥamah׃
21 וַתַּעֲרֹ֤ךְ יִשְׂרָאֵל֙ וּפְלִשְׁתִּ֔ים מַעֲרָכָ֖ה לִקְרַ֥את מַעֲרָכָֽה׃ wataʿarokhe yiseraʾel ufelishetiym maʿarakhah liqeraʾt maʿarakhah׃
22 וַיִּטֹּשׁ֩ דָּוִ֨ד אֶת־הַכֵּלִ֜ים מֵעָלָ֗יו עַל־יַד֙ שֹׁומֵ֣ר הַכֵּלִ֔ים וַיָּ֖רָץ הַמַּעֲרָכָ֑ה וַיָּבֹ֕א וַיִּשְׁאַ֥ל לְאֶחָ֖יו לְשָׁלֹֽום׃ wayiṭosh dawid ʾet־hakeliym meʿalayw ʿal־yad showmer hakeliym wayarats hamaʿarakhah wayavoʾ wayisheʾal leʾeḥayw leshalowm׃
23 וְה֣וּא ׀ מְדַבֵּ֣ר עִמָּ֗ם וְהִנֵּ֣ה אִ֣ישׁ הַבֵּנַ֡יִם עֹולֶ֞ה גָּלְיָת֩ הַפְּלִשְׁתִּ֨י שְׁמֹ֤ו מִגַּת֙ [מִמַּעֲרֹות כ] (מִמַּעַרְכֹ֣ות ק) פְּלִשְׁתִּ֔ים וַיְדַבֵּ֖ר כַּדְּבָרִ֣ים הָאֵ֑לֶּה וַיִּשְׁמַ֖ע דָּוִֽד׃ wehuʾ ׀ medaber ʿimam wehineh ʾiysh habenayim ʿowleh galeyat hapelishetiy shemow migat [mimaʿarowt kh] (mimaʿarekhowt q) pelishetiym wayedaber kadevariym haʾeleh wayishemaʿ dawid׃
24 וְכֹל֙ אִ֣ישׁ יִשְׂרָאֵ֔ל בִּרְאֹותָ֖ם אֶת־הָאִ֑ישׁ וַיָּנֻ֙סוּ֙ מִפָּנָ֔יו וַיִּֽירְא֖וּ מְאֹֽד׃ wekhol ʾiysh yiseraʾel bireʾowtam ʾet־haʾiysh wayanusu mipanayw wayiyreʾu meʾod׃
25 וַיֹּ֣אמֶר ׀ אִ֣ישׁ יִשְׂרָאֵ֗ל הַרְּאִיתֶם֙ הָאִ֤ישׁ הָֽעֹלֶה֙ הַזֶּ֔ה כִּ֛י לְחָרֵ֥ף אֶת־יִשְׂרָאֵ֖ל עֹלֶ֑ה וְֽ֠הָיָה הָאִ֨ישׁ אֲשֶׁר־יַכֶּ֜נּוּ יַעְשְׁרֶ֥נּוּ הַמֶּ֣לֶךְ ׀ עֹ֣שֶׁר גָּדֹ֗ול וְאֶת־בִּתֹּו֙ יִתֶּן־לֹ֔ו וְאֵת֙ בֵּ֣ית אָבִ֔יו יַעֲשֶׂ֥ה חָפְשִׁ֖י בְּיִשְׂרָאֵֽל׃ wayoʾmer ׀ ʾiysh yiseraʾel hareʾiytem haʾiysh haʿoleh hazeh kiy leḥaref ʾet־yiseraʾel ʿoleh wehayah haʾiysh ʾasher־yakenu yaʿesherenu hamelekhe ׀ ʿosher gadowl weʾet־bitow yiten־low weʾet beyt ʾaviyw yaʿaseh ḥafeshiy beyiseraʾel׃
26 וַיֹּ֣אמֶר דָּוִ֗ד אֶֽל־הָאֲנָשִׁ֞ים הָעֹמְדִ֣ים עִמֹּו֮ לֵאמֹר֒ מַה־יֵּעָשֶׂ֗ה לָאִישׁ֙ אֲשֶׁ֤ר יַכֶּה֙ אֶת־הַפְּלִשְׁתִּ֣י הַלָּ֔ז וְהֵסִ֥יר חֶרְפָּ֖ה מֵעַ֣ל יִשְׂרָאֵ֑ל כִּ֣י מִ֗י הַפְּלִשְׁתִּ֤י הֶֽעָרֵל֙ הַזֶּ֔ה כִּ֣י חֵרֵ֔ף מַעַרְכֹ֖ות אֱלֹהִ֥ים חַיִּֽים׃ wayoʾmer dawid ʾel־haʾanashiym haʿomediym ʿimow leʾmor mah־yeʿaseh laʾiysh ʾasher yakeh ʾet־hapelishetiy halaz wehesiyr ḥerepah meʿal yiseraʾel kiy miy hapelishetiy heʿarel hazeh kiy ḥeref maʿarekhowt ʾelohiym ḥayiym׃
27 וַיֹּ֤אמֶר לֹו֙ הָעָ֔ם כַּדָּבָ֥ר הַזֶּ֖ה לֵאמֹ֑ר כֹּ֣ה יֵעָשֶׂ֔ה לָאִ֖ישׁ אֲשֶׁ֥ר יַכֶּֽנּוּ׃ wayoʾmer low haʿam kadavar hazeh leʾmor koh yeʿaseh laʾiysh ʾasher yakenu׃
28 וַיִּשְׁמַ֤ע אֱלִיאָב֙ אָחִ֣יו הַגָּדֹ֔ול בְּדַבְּרֹ֖ו אֶל־הָאֲנָשִׁ֑ים וַיִּֽחַר־אַף֩ אֱלִיאָ֨ב בְּדָוִ֜ד וַיֹּ֣אמֶר ׀ לָמָּה־זֶּ֣ה יָרַ֗דְתָּ וְעַל־מִ֨י נָטַ֜שְׁתָּ מְעַ֨ט הַצֹּ֤אן הָהֵ֙נָּה֙ בַּמִּדְבָּ֔ר אֲנִ֧י יָדַ֣עְתִּי אֶת־זְדֹנְךָ֗ וְאֵת֙ רֹ֣עַ לְבָבֶ֔ךָ כִּ֗י לְמַ֛עַן רְאֹ֥ות הַמִּלְחָמָ֖ה יָרָֽדְתָּ׃ wayishemaʿ ʾeliyʾav ʾaḥiyw hagadowl bedaberow ʾel־haʾanashiym wayiḥar־ʾaf ʾeliyʾav bedawid wayoʾmer ׀ lamah־zeh yaradeta weʿal־miy naṭasheta meʿaṭ hatsoʾn hahenah bamidebar ʾaniy yadaʿetiy ʾet־zedonekha weʾet roaʿ levavekha kiy lemaʿan reʾowt hamileḥamah yaradeta׃
29 וַיֹּ֣אמֶר דָּוִ֔ד מֶ֥ה עָשִׂ֖יתִי עָ֑תָּה הֲלֹ֖וא דָּבָ֥ר הֽוּא׃ wayoʾmer dawid meh ʿasiytiy ʿatah halowʾ davar huʾ׃
30 וַיִּסֹּ֤ב מֵֽאֶצְלֹו֙ אֶל־מ֣וּל אַחֵ֔ר וַיֹּ֖אמֶר כַּדָּבָ֣ר הַזֶּ֑ה וַיְשִׁבֻ֤הוּ הָעָם֙ דָּבָ֔ר כַּדָּבָ֖ר הָרִאשֹֽׁון׃ wayisov meʾetselow ʾel־mul ʾaḥer wayoʾmer kadavar hazeh wayeshivuhu haʿam davar kadavar hariʾshown׃
31 וַיְּשָּֽׁמְעוּ֙ הַדְּבָרִ֔ים אֲשֶׁ֖ר דִּבֶּ֣ר דָּוִ֑ד וַיַּגִּ֥דוּ לִפְנֵֽי־שָׁא֖וּל וַיִּקָּחֵֽהוּ׃ wayeshameʿu hadevariym ʾasher diber dawid wayagidu lifeney־shaʾul wayiqaḥehu׃
32 וַיֹּ֤אמֶר דָּוִד֙ אֶל־שָׁא֔וּל אַל־יִפֹּ֥ל לֵב־אָדָ֖ם עָלָ֑יו עַבְדְּךָ֣ יֵלֵ֔ךְ וְנִלְחַ֖ם עִם־הַפְּלִשְׁתִּ֥י הַזֶּֽה׃ wayoʾmer dawid ʾel־shaʾul ʾal־yipol lev־ʾadam ʿalayw ʿavedekha yelekhe wenileḥam ʿim־hapelishetiy hazeh׃
33 וַיֹּ֨אמֶר שָׁא֜וּל אֶל־דָּוִ֗ד לֹ֤א תוּכַל֙ לָלֶ֙כֶת֙ אֶל־הַפְּלִשְׁתִּ֣י הַזֶּ֔ה לְהִלָּחֵ֖ם עִמֹּ֑ו כִּֽי־נַ֣עַר אַ֔תָּה וְה֛וּא אִ֥ישׁ מִלְחָמָ֖ה מִנְּעֻרָֽיו׃ ס wayoʾmer shaʾul ʾel־dawid loʾ tukhal lalekhet ʾel־hapelishetiy hazeh lehilaḥem ʿimow kiy־naʿar ʾatah wehuʾ ʾiysh mileḥamah mineʿurayw׃ s
34 וַיֹּ֤אמֶר דָּוִד֙ אֶל־שָׁא֔וּל רֹעֶ֨ה הָיָ֧ה עַבְדְּךָ֛ לְאָבִ֖יו בַּצֹּ֑אן וּבָ֤א הָֽאֲרִי֙ וְאֶת־הַדֹּ֔וב וְנָשָׂ֥א שֶׂ֖ה מֵהָעֵֽדֶר׃ wayoʾmer dawid ʾel־shaʾul roʿeh hayah ʿavedekha leʾaviyw batsoʾn uvaʾ haʾariy weʾet־hadowv wenasaʾ seh mehaʿeder׃
35 וְיָצָ֧אתִי אַחֲרָ֛יו וְהִכִּתִ֖יו וְהִצַּ֣לְתִּי מִפִּ֑יו וַיָּ֣קָם עָלַ֔י וְהֶחֱזַ֙קְתִּי֙ בִּזְקָנֹ֔ו וְהִכִּתִ֖יו וַהֲמִיתִּֽיו׃ weyatsaʾtiy ʾaḥarayw wehikitiyw wehitsaletiy mipiyw wayaqam ʿalay weheḥezaqetiy bizeqanow wehikitiyw wahamiytiyw׃
36 גַּ֧ם אֶֽת־הָאֲרִ֛י גַּם־הַדֹּ֖וב הִכָּ֣ה עַבְדֶּ֑ךָ וְֽ֠הָיָה הַפְּלִשְׁתִּ֨י הֶעָרֵ֤ל הַזֶּה֙ כְּאַחַ֣ד מֵהֶ֔ם כִּ֣י חֵרֵ֔ף מַעַרְכֹ֖ת אֱלֹהִ֥ים חַיִּֽים׃ ס gam ʾet־haʾariy gam־hadowv hikah ʿavedekha wehayah hapelishetiy heʿarel hazeh keʾaḥad mehem kiy ḥeref maʿarekhot ʾelohiym ḥayiym׃ s
37 וַיֹּאמֶר֮ דָּוִד֒ יְהוָ֗ה אֲשֶׁ֨ר הִצִּלַ֜נִי מִיַּ֤ד הָֽאֲרִי֙ וּמִיַּ֣ד הַדֹּ֔ב ה֣וּא יַצִּילֵ֔נִי מִיַּ֥ד הַפְּלִשְׁתִּ֖י הַזֶּ֑ה ס וַיֹּ֨אמֶר שָׁא֤וּל אֶל־דָּוִד֙ לֵ֔ךְ וַֽיהוָ֖ה יִהְיֶ֥ה עִמָּֽךְ׃ wayoʾmer dawid yehwah ʾasher hitsilaniy miyad haʾariy umiyad hadov huʾ yatsiyleniy miyad hapelishetiy hazeh s wayoʾmer shaʾul ʾel־dawid lekhe wayhwah yiheyeh ʿimakhe׃
38 וַיַּלְבֵּ֨שׁ שָׁא֤וּל אֶת־דָּוִד֙ מַדָּ֔יו וְנָתַ֛ן קֹ֥ובַע נְחֹ֖שֶׁת עַל־רֹאשֹׁ֑ו וַיַּלְבֵּ֥שׁ אֹתֹ֖ו שִׁרְיֹֽון׃ wayalebesh shaʾul ʾet־dawid madayw wenatan qowvaʿ neḥoshet ʿal־roʾshow wayalebesh ʾotow shireyown׃
39 וַיַּחְגֹּ֣ר דָּוִ֣ד אֶת־חַ֠רְבֹּו מֵעַ֨ל לְמַדָּ֜יו וַיֹּ֣אֶל לָלֶכֶת֮ כִּ֣י לֹֽא־נִסָּה֒ וַיֹּ֨אמֶר דָּוִ֜ד אֶל־שָׁא֗וּל לֹ֥א אוּכַ֛ל לָלֶ֥כֶת בָּאֵ֖לֶּה כִּ֣י לֹ֣א נִסִּ֑יתִי וַיְסִרֵ֥ם דָּוִ֖ד מֵעָלָֽיו׃ wayaḥegor dawid ʾet־ḥarebow meʿal lemadayw wayoʾel lalekhet kiy loʾ־nisah wayoʾmer dawid ʾel־shaʾul loʾ ʾukhal lalekhet baʾeleh kiy loʾ nisiytiy wayesirem dawid meʿalayw׃
40 וַיִּקַּ֨ח מַקְלֹ֜ו בְּיָדֹ֗ו וַיִּבְחַר־לֹ֣ו חֲמִשָּׁ֣ה חַלֻּקֵֽי־אֲבָנִ֣ים ׀ מִן־הַנַּ֡חַל וַיָּ֣שֶׂם אֹ֠תָם בִּכְלִ֨י הָרֹעִ֧ים אֲשֶׁר־לֹ֛ו וּבַיַּלְק֖וּט וְקַלְּעֹ֣ו בְיָדֹ֑ו וַיִּגַּ֖שׁ אֶל־הַפְּלִשְׁתִּֽי׃ wayiqaḥ maqelow beyadow wayiveḥar־low ḥamishah ḥaluqey־ʾavaniym ׀ min־hanaḥal wayasem ʾotam bikheliy haroʿiym ʾasher־low uvayalequṭ weqaleʿow veyadow wayigash ʾel־hapelishetiy׃
41 וַיֵּ֙לֶךְ֙ הַפְּלִשְׁתִּ֔י הֹלֵ֥ךְ וְקָרֵ֖ב אֶל־דָּוִ֑ד וְהָאִ֛ישׁ נֹשֵׂ֥א הַצִּנָּ֖ה לְפָנָֽיו׃ wayelekhe hapelishetiy holekhe weqarev ʾel־dawid wehaʾiysh noseʾ hatsinah lefanayw׃
42 וַיַּבֵּ֧ט הַפְּלִשְׁתִּ֛י וַיִּרְאֶ֥ה אֶת־דָּוִ֖ד וַיִּבְזֵ֑הוּ כִּֽי־הָיָ֣ה נַ֔עַר וְאַדְמֹנִ֖י עִם־יְפֵ֥ה מַרְאֶֽה׃ wayabeṭ hapelishetiy wayireʾeh ʾet־dawid wayivezehu kiy־hayah naʿar weʾademoniy ʿim־yefeh mareʾeh׃
43 וַיֹּ֤אמֶר הַפְּלִשְׁתִּי֙ אֶל־דָּוִ֔ד הֲכֶ֣לֶב אָנֹ֔כִי כִּֽי־אַתָּ֥ה בָֽא־אֵלַ֖י בַּמַּקְלֹ֑ות וַיְקַלֵּ֧ל הַפְּלִשְׁתִּ֛י אֶת־דָּוִ֖ד בֵּאלֹהָֽיו׃ wayoʾmer hapelishetiy ʾel־dawid hakhelev ʾanokhiy kiy־ʾatah vaʾ־ʾelay bamaqelowt wayeqalel hapelishetiy ʾet־dawid beʾlohayw׃
44 וַיֹּ֥אמֶר הַפְּלִשְׁתִּ֖י אֶל־דָּוִ֑ד לְכָ֣ה אֵלַ֔י וְאֶתְּנָה֙ אֶת־בְּשָׂ֣רְךָ֔ לְעֹ֥וף הַשָּׁמַ֖יִם וּלְבֶהֱמַ֥ת הַשָּׂדֶֽה׃ ס wayoʾmer hapelishetiy ʾel־dawid lekhah ʾelay weʾetenah ʾet־besarekha leʿowf hashamayim ulevehemat hasadeh׃ s
45 וַיֹּ֤אמֶר דָּוִד֙ אֶל־הַפְּלִשְׁתִּ֔י אַתָּה֙ בָּ֣א אֵלַ֔י בְּחֶ֖רֶב וּבַחֲנִ֣ית וּבְכִידֹ֑ון וְאָנֹכִ֣י בָֽא־אֵלֶ֗יךָ בְּשֵׁם֙ יְהוָ֣ה צְבָאֹ֔ות אֱלֹהֵ֛י מַעַרְכֹ֥ות יִשְׂרָאֵ֖ל אֲשֶׁ֥ר חֵרַֽפְתָּ׃ wayoʾmer dawid ʾel־hapelishetiy ʾatah baʾ ʾelay beḥerev uvaḥaniyt uvekhiydown weʾanokhiy vaʾ־ʾeleykha beshem yehwah tsevaʾowt ʾelohey maʿarekhowt yiseraʾel ʾasher ḥerafeta׃
46 הַיֹּ֣ום הַזֶּ֡ה יְסַגֶּרְךָ֩ יְהוָ֨ה בְּיָדִ֜י וְהִכִּיתִ֗ךָ וַהֲסִרֹתִ֤י אֶת־רֹֽאשְׁךָ֙ מֵעָלֶ֔יךָ וְנָ֨תַתִּ֜י פֶּ֣גֶר מַחֲנֵ֤ה פְלִשְׁתִּים֙ הַיֹּ֣ום הַזֶּ֔ה לְעֹ֥וף הַשָּׁמַ֖יִם וּלְחַיַּ֣ת הָאָ֑רֶץ וְיֵֽדְעוּ֙ כָּל־הָאָ֔רֶץ כִּ֛י יֵ֥שׁ אֱלֹהִ֖ים לְיִשְׂרָאֵֽל׃ hayowm hazeh yesagerekha yehwah beyadiy wehikiytikha wahasirotiy ʾet־roʾshekha meʿaleykha wenatatiy peger maḥaneh felishetiym hayowm hazeh leʿowf hashamayim uleḥayat haʾarets weyedeʿu kal־haʾarets kiy yesh ʾelohiym leyiseraʾel׃
47 וְיֵֽדְעוּ֙ כָּל־הַקָּהָ֣ל הַזֶּ֔ה כִּֽי־לֹ֛א בְּחֶ֥רֶב וּבַחֲנִ֖ית יְהֹושִׁ֣יעַ יְהוָ֑ה כִּ֤י לַֽיהוָה֙ הַמִּלְחָמָ֔ה וְנָתַ֥ן אֶתְכֶ֖ם בְּיָדֵֽנוּ׃ weyedeʿu kal־haqahal hazeh kiy־loʾ beḥerev uvaḥaniyt yehowshiyʿa yehwah kiy layhwah hamileḥamah wenatan ʾetekhem beyadenu׃
48 וְהָיָה֙ כִּֽי־קָ֣ם הַפְּלִשְׁתִּ֔י וַיֵּ֥לֶךְ וַיִּקְרַ֖ב לִקְרַ֣את דָּוִ֑ד וַיְמַהֵ֣ר דָּוִ֔ד וַיָּ֥רָץ הַמַּעֲרָכָ֖ה לִקְרַ֥את הַפְּלִשְׁתִּֽי׃ wehayah kiy־qam hapelishetiy wayelekhe wayiqerav liqeraʾt dawid wayemaher dawid wayarats hamaʿarakhah liqeraʾt hapelishetiy׃
49 וַיִּשְׁלַח֩ דָּוִ֨ד אֶת־יָדֹ֜ו אֶל־הַכֶּ֗לִי וַיִּקַּ֨ח מִשָּׁ֥ם אֶ֙בֶן֙ וַיְקַלַּ֔ע וַיַּ֥ךְ אֶת־הַפְּלִשְׁתִּ֖י אֶל־מִצְחֹ֑ו וַתִּטְבַּ֤ע הָאֶ֙בֶן֙ בְּמִצְחֹ֔ו וַיִּפֹּ֥ל עַל־פָּנָ֖יו אָֽרְצָה׃ wayishelaḥ dawid ʾet־yadow ʾel־hakeliy wayiqaḥ misham ʾeven wayeqalaʿ wayakhe ʾet־hapelishetiy ʾel־mitseḥow watiṭebaʿ haʾeven bemitseḥow wayipol ʿal־panayw ʾaretsah׃
50 וַיֶּחֱזַ֨ק דָּוִ֤ד מִן־הַפְּלִשְׁתִּי֙ בַּקֶּ֣לַע וּבָאֶ֔בֶן וַיַּ֥ךְ אֶת־הַפְּלִשְׁתִּ֖י וַיְמִיתֵ֑הוּ וְחֶ֖רֶב אֵ֥ין בְּיַד־דָּוִֽד׃ wayeḥezaq dawid min־hapelishetiy baqelaʿ uvaʾeven wayakhe ʾet־hapelishetiy wayemiytehu weḥerev ʾeyn beyad־dawid׃
51 וַיָּ֣רָץ דָּ֠וִד וַיַּעֲמֹ֨ד אֶל־הַפְּלִשְׁתִּ֜י וַיִּקַּ֣ח אֶת־חַ֠רְבֹּו וַֽיִּשְׁלְפָ֤הּ מִתַּעְרָהּ֙ וַיְמֹ֣תְתֵ֔הוּ וַיִּכְרָת־בָּ֖הּ אֶת־רֹאשֹׁ֑ו וַיִּרְא֧וּ הַפְּלִשְׁתִּ֛ים כִּֽי־מֵ֥ת גִּבֹּורָ֖ם וַיָּנֻֽסוּ׃ wayarats dawid wayaʿamod ʾel־hapelishetiy wayiqaḥ ʾet־ḥarebow wayishelefah mitaʿerah wayemotetehu wayikherat־bah ʾet־roʾshow wayireʾu hapelishetiym kiy־met gibowram wayanusu׃
52 וַיָּקֻ֣מוּ אַנְשֵׁי֩ יִשְׂרָאֵ֨ל וִיהוּדָ֜ה וַיָּרִ֗עוּ וַֽיִּרְדְּפוּ֙ אֶת־הַפְּלִשְׁתִּ֔ים עַד־בֹּואֲךָ֣ גַ֔יְא וְעַ֖ד שַׁעֲרֵ֣י עֶקְרֹ֑ון וַֽיִּפְּל֞וּ חַֽלְלֵ֤י פְלִשְׁתִּים֙ בְּדֶ֣רֶךְ שַׁעֲרַ֔יִם וְעַד־גַּ֖ת וְעַד־עֶקְרֹֽון׃ wayaqumu ʾaneshey yiseraʾel wiyhudah wayariʿu wayiredefu ʾet־hapelishetiym ʿad־bowʾakha gayeʾ weʿad shaʿarey ʿeqerown wayipelu ḥaleley felishetiym bederekhe shaʿarayim weʿad־gat weʿad־ʿeqerown׃
53 וַיָּשֻׁ֙בוּ֙ בְּנֵ֣י יִשְׂרָאֵ֔ל מִדְּלֹ֖ק אַחֲרֵ֣י פְלִשְׁתִּ֑ים וַיָּשֹׁ֖סּוּ אֶת־מַחֲנֵיהֶֽם׃ wayashuvu beney yiseraʾel mideloq ʾaḥarey felishetiym wayashosu ʾet־maḥaneyhem׃
54 וַיִּקַּ֤ח דָּוִד֙ אֶת־רֹ֣אשׁ הַפְּלִשְׁתִּ֔י וַיְבִאֵ֖הוּ יְרוּשָׁלִָ֑ם וְאֶת־כֵּלָ֖יו שָׂ֥ם בְּאָהֳלֹֽו׃ ס wayiqaḥ dawid ʾet־roʾsh hapelishetiy wayeviʾehu yerushalim weʾet־kelayw sam beʾaholow׃ s
55 וְכִרְאֹ֨ות שָׁא֜וּל אֶת־דָּוִ֗ד יֹצֵא֙ לִקְרַ֣את הַפְּלִשְׁתִּ֔י אָמַ֗ר אֶל־אַבְנֵר֙ שַׂ֣ר הַצָּבָ֔א בֶּן־מִי־זֶ֥ה הַנַּ֖עַר אַבְנֵ֑ר וַיֹּ֣אמֶר אַבְנֵ֔ר חֵֽי־נַפְשְׁךָ֥ הַמֶּ֖לֶךְ אִם־יָדָֽעְתִּי׃ wekhireʾowt shaʾul ʾet־dawid yotseʾ liqeraʾt hapelishetiy ʾamar ʾel־ʾavener sar hatsavaʾ ben־miy־zeh hanaʿar ʾavener wayoʾmer ʾavener ḥey־nafeshekha hamelekhe ʾim־yadaʿetiy׃
56 וַיֹּ֖אמֶר הַמֶּ֑לֶךְ שְׁאַ֣ל אַתָּ֔ה בֶּן־מִי־זֶ֖ה הָעָֽלֶם׃ ס wayoʾmer hamelekhe sheʾal ʾatah ben־miy־zeh haʿalem׃ s
57 וּכְשׁ֣וּב דָּוִ֗ד מֵֽהַכֹּות֙ אֶת־הַפְּלִשְׁתִּ֔י וַיִּקַּ֤ח אֹתֹו֙ אַבְנֵ֔ר וַיְבִאֵ֖הוּ לִפְנֵ֣י שָׁא֑וּל וְרֹ֥אשׁ הַפְּלִשְׁתִּ֖י בְּיָדֹֽו׃ ukheshuv dawid mehakowt ʾet־hapelishetiy wayiqaḥ ʾotow ʾavener wayeviʾehu lifeney shaʾul weroʾsh hapelishetiy beyadow׃
58 וַיֹּ֤אמֶר אֵלָיו֙ שָׁא֔וּל בֶּן־מִ֥י אַתָּ֖ה הַנָּ֑עַר וַיֹּ֣אמֶר דָּוִ֔ד בֶּֽן־עַבְדְּךָ֥ יִשַׁ֖י בֵּ֥ית הַלַּחְמִֽי׃ wayoʾmer ʾelayw shaʾul ben־miy ʾatah hanaʿar wayoʾmer dawid ben־ʿavedekha yishay beyt halaḥemiy׃