1 וַיְהִ֥י דְבַר־יְהוָ֖ה אֵלַ֥י לֵאמֹֽר׃ wayehiy devar־yehwah ʾelay leʾmor׃
2 בֶּן־אָדָ֕ם הִנָּבֵ֖א עַל־רֹועֵ֣י יִשְׂרָאֵ֑ל הִנָּבֵ֣א וְאָמַרְתָּ֩ אֲלֵיהֶ֨ם לָרֹעִ֜ים כֹּ֥ה אָמַ֣ר ׀ אֲדֹנָ֣י יְהוִ֗ה הֹ֤וי רֹעֵֽי־יִשְׂרָאֵל֙ אֲשֶׁ֤ר הָיוּ֙ רֹעִ֣ים אֹותָ֔ם הֲלֹ֣וא הַצֹּ֔אן יִרְע֖וּ הָרֹעִֽים׃ ben־ʾadam hinaveʾ ʿal־rowʿey yiseraʾel hinaveʾ weʾamareta ʾaleyhem laroʿiym koh ʾamar ׀ ʾadonay yehwih howy roʿey־yiseraʾel ʾasher hayu roʿiym ʾowtam halowʾ hatsoʾn yireʿu haroʿiym׃
3 אֶת־הַחֵ֤לֶב תֹּאכֵ֙לוּ֙ וְאֶת־הַצֶּ֣מֶר תִּלְבָּ֔שׁוּ הַבְּרִיאָ֖ה תִּזְבָּ֑חוּ הַצֹּ֖אן לֹ֥א תִרְעֽוּ׃ ʾet־haḥelev toʾkhelu weʾet־hatsemer tilebashu haberiyʾah tizebaḥu hatsoʾn loʾ tireʿu׃
4 אֶֽת־הַנַּחְלֹות֩ לֹ֨א חִזַּקְתֶּ֜ם וְאֶת־הַחֹולָ֣ה לֹֽא־רִפֵּאתֶ֗ם וְלַנִּשְׁבֶּ֙רֶת֙ לֹ֣א חֲבַשְׁתֶּ֔ם וְאֶת־הַנִּדַּ֙חַת֙ לֹ֣א הֲשֵׁבֹתֶ֔ם וְאֶת־הָאֹבֶ֖דֶת לֹ֣א בִקַּשְׁתֶּ֑ם וּבְחָזְקָ֛ה רְדִיתֶ֥ם אֹתָ֖ם וּבְפָֽרֶךְ׃ ʾet־hanaḥelowt loʾ ḥizaqetem weʾet־haḥowlah loʾ־ripeʾtem welanisheberet loʾ ḥavashetem weʾet־hanidaḥat loʾ hashevotem weʾet־haʾovedet loʾ viqashetem uveḥazeqah rediytem ʾotam uvefarekhe׃
5 וַתְּפוּצֶ֖ינָה מִבְּלִ֣י רֹעֶ֑ה וַתִּהְיֶ֧ינָה לְאָכְלָ֛ה לְכָל־חַיַּ֥ת הַשָּׂדֶ֖ה וַתְּפוּצֶֽינָה׃ watefutseynah mibeliy roʿeh watiheyeynah leʾakhelah lekhal־ḥayat hasadeh watefutseynah׃
6 יִשְׁגּ֤וּ צֹאנִי֙ בְּכָל־הֶ֣הָרִ֔ים וְעַ֖ל כָּל־גִּבְעָ֣ה רָמָ֑ה וְעַ֨ל כָּל־פְּנֵ֤י הָאָ֙רֶץ֙ נָפֹ֣צוּ צֹאנִ֔י וְאֵ֥ין דֹּורֵ֖שׁ וְאֵ֥ין מְבַקֵּֽשׁ׃ yishegu tsoʾniy bekhal־hehariym weʿal kal־giveʿah ramah weʿal kal־peney haʾarets nafotsu tsoʾniy weʾeyn dowresh weʾeyn mevaqesh׃
7 לָכֵ֣ן רֹעִ֔ים שִׁמְע֖וּ אֶת־דְּבַ֥ר יְהוָֽה׃ lakhen roʿiym shimeʿu ʾet־devar yehwah׃
8 חַי־אָ֜נִי נְאֻ֣ם ׀ אֲדֹנָ֣י יְהוִ֗ה אִם־לֹ֣א יַ֣עַן הֱיֹֽות־צֹאנִ֣י ׀ לָבַ֡ז וַתִּֽהְיֶינָה֩ צֹאנִ֨י לְאָכְלָ֜ה לְכָל־חַיַּ֤ת הַשָּׂדֶה֙ מֵאֵ֣ין רֹעֶ֔ה וְלֹֽא־דָרְשׁ֥וּ רֹעַ֖י אֶת־צֹאנִ֑י וַיִּרְע֤וּ הָֽרֹעִים֙ אֹותָ֔ם וְאֶת־צֹאנִ֖י לֹ֥א רָעֽוּ׃ ס ḥay־ʾaniy neʾum ׀ ʾadonay yehwih ʾim־loʾ yaʿan heyowt־tsoʾniy ׀ lavaz watiheyeynah tsoʾniy leʾakhelah lekhal־ḥayat hasadeh meʾeyn roʿeh weloʾ־dareshu roʿay ʾet־tsoʾniy wayireʿu haroʿiym ʾowtam weʾet־tsoʾniy loʾ raʿu׃ s
9 לָכֵן֙ הָֽרֹעִ֔ים שִׁמְע֖וּ דְּבַר־יְהוָֽה׃ lakhen haroʿiym shimeʿu devar־yehwah׃
10 כֹּה־אָמַ֞ר אֲדֹנָ֣י יְהוִ֗ה הִנְנִ֨י אֶֽל־הָרֹעִ֜ים וְֽדָרַשְׁתִּ֧י אֶת־צֹאנִ֣י מִיָּדָ֗ם וְהִשְׁבַּתִּים֙ מֵרְעֹ֣ות צֹ֔אן וְלֹא־יִרְע֥וּ עֹ֛וד הָרֹעִ֖ים אֹותָ֑ם וְהִצַּלְתִּ֤י צֹאנִי֙ מִפִּיהֶ֔ם וְלֹֽא־תִהְיֶ֥יןָ לָהֶ֖ם לְאָכְלָֽה׃ ס koh־ʾamar ʾadonay yehwih hineniy ʾel־haroʿiym wedarashetiy ʾet־tsoʾniy miyadam wehishebatiym mereʿowt tsoʾn weloʾ־yireʿu ʿowd haroʿiym ʾowtam wehitsaletiy tsoʾniy mipiyhem weloʾ־tiheyeyna lahem leʾakhelah׃ s
11 כִּ֛י כֹּ֥ה אָמַ֖ר אֲדֹנָ֣י יְהוִ֑ה הִנְנִי־אָ֕נִי וְדָרַשְׁתִּ֥י אֶת־צֹאנִ֖י וּבִקַּרְתִּֽים׃ kiy koh ʾamar ʾadonay yehwih hineniy־ʾaniy wedarashetiy ʾet־tsoʾniy uviqaretiym׃
12 כְּבַקָּרַת֩ רֹעֶ֨ה עֶדְרֹ֜ו בְּיֹום־הֱיֹותֹ֤ו בְתֹוךְ־צֹאנֹו֙ נִפְרָשֹׁ֔ות כֵּ֖ן אֲבַקֵּ֣ר אֶת־צֹאנִ֑י וְהִצַּלְתִּ֣י אֶתְהֶ֗ם מִכָּל־הַמְּקֹומֹת֙ אֲשֶׁ֣ר נָפֹ֣צוּ שָׁ֔ם בְּיֹ֥ום עָנָ֖ן וַעֲרָפֶֽל׃ kevaqarat roʿeh ʿederow beyowm־heyowtow vetowkhe־tsoʾnow niferashowt ken ʾavaqer ʾet־tsoʾniy wehitsaletiy ʾetehem mikal־hameqowmot ʾasher nafotsu sham beyowm ʿanan waʿarafel׃
13 וְהֹוצֵאתִ֣ים מִן־הָעַמִּ֗ים וְקִבַּצְתִּים֙ מִן־הָ֣אֲרָצֹ֔ות וַהֲבִיאֹתִ֖ים אֶל־אַדְמָתָ֑ם וּרְעִיתִים֙ אֶל־הָרֵ֣י יִשְׂרָאֵ֔ל בָּאֲפִיקִ֕ים וּבְכֹ֖ל מֹושְׁבֵ֥י הָאָֽרֶץ׃ wehowtseʾtiym min־haʿamiym weqibatsetiym min־haʾaratsowt wahaviyʾotiym ʾel־ʾadematam ureʿiytiym ʾel־harey yiseraʾel baʾafiyqiym uvekhol mowshevey haʾarets׃
14 בְּמִרְעֶה־טֹּוב֙ אֶרְעֶ֣ה אֹתָ֔ם וּבְהָרֵ֥י מְרֹֽום־יִשְׂרָאֵ֖ל יִהְיֶ֣ה נְוֵהֶ֑ם שָׁ֤ם תִּרְבַּ֙צְנָה֙ בְּנָ֣וֶה טֹּ֔וב וּמִרְעֶ֥ה שָׁמֵ֛ן תִּרְעֶ֖ינָה אֶל־הָרֵ֥י יִשְׂרָאֵֽל׃ bemireʿeh־ṭowv ʾereʿeh ʾotam uveharey merowm־yiseraʾel yiheyeh newehem sham tirebatsenah benaweh ṭowv umireʿeh shamen tireʿeynah ʾel־harey yiseraʾel׃
15 אֲנִ֨י אֶרְעֶ֤ה צֹאנִי֙ וַאֲנִ֣י אַרְבִּיצֵ֔ם נְאֻ֖ם אֲדֹנָ֥י יְהוִֽה׃ ʾaniy ʾereʿeh tsoʾniy waʾaniy ʾarebiytsem neʾum ʾadonay yehwih׃
16 אֶת־הָאֹבֶ֤דֶת אֲבַקֵּשׁ֙ וְאֶת־הַנִּדַּ֣חַת אָשִׁ֔יב וְלַנִּשְׁבֶּ֣רֶת אֶחֱבֹ֔שׁ וְאֶת־הַחֹולָ֖ה אֲחַזֵּ֑ק וְאֶת־הַשְּׁמֵנָ֧ה וְאֶת־הַחֲזָקָ֛ה אַשְׁמִ֖יד אֶרְעֶ֥נָּה בְמִשְׁפָּֽט׃ ʾet־haʾovedet ʾavaqesh weʾet־hanidaḥat ʾashiyv welanisheberet ʾeḥevosh weʾet־haḥowlah ʾaḥazeq weʾet־hashemenah weʾet־haḥazaqah ʾashemiyd ʾereʿenah vemishepaṭ׃
17 וְאַתֵּ֣נָה צֹאנִ֔י כֹּ֥ה אָמַ֖ר אֲדֹנָ֣י יְהוִ֑ה הִנְנִ֤י שֹׁפֵט֙ בֵּֽין־שֶׂ֣ה לָשֶׂ֔ה לָאֵילִ֖ים וְלָעַתּוּדִֽים׃ weʾatenah tsoʾniy koh ʾamar ʾadonay yehwih hineniy shofeṭ beyn־seh laseh laʾeyliym welaʿatudiym׃
18 הַמְעַ֣ט מִכֶּ֗ם הַמִּרְעֶ֤ה הַטֹּוב֙ תִּרְע֔וּ וְיֶ֙תֶר֙ מִרְעֵיכֶ֔ם תִּרְמְס֖וּ בְּרַגְלֵיכֶ֑ם וּמִשְׁקַע־מַ֣יִם תִּשְׁתּ֔וּ וְאֵת֙ הַנֹּ֣ותָרִ֔ים בְּרַגְלֵיכֶ֖ם תִּרְפֹּשֽׂוּן׃ hameʿaṭ mikem hamireʿeh haṭowv tireʿu weyeter mireʿeykhem tiremesu berageleykhem umisheqaʿ־mayim tishetu weʾet hanowtariym berageleykhem tireposun׃
19 וְצֹאנִ֑י מִרְמַ֤ס רַגְלֵיכֶם֙ תִּרְעֶ֔ינָה וּמִרְפַּ֥שׂ רַגְלֵיכֶ֖ם תִּשְׁתֶּֽינָה׃ ס wetsoʾniy miremas rageleykhem tireʿeynah umirepas rageleykhem tisheteynah׃ s
20 לָכֵ֗ן כֹּ֥ה אָמַ֛ר אֲדֹנָ֥י יְהוִ֖ה אֲלֵיהֶ֑ם הִנְנִי־אָ֕נִי וְשָֽׁפַטְתִּי֙ בֵּֽין־שֶׂ֣ה בִרְיָ֔ה וּבֵ֥ין שֶׂ֖ה רָזָֽה׃ lakhen koh ʾamar ʾadonay yehwih ʾaleyhem hineniy־ʾaniy weshafaṭetiy beyn־seh vireyah uveyn seh razah׃
21 יַ֗עַן בְּצַ֤ד וּבְכָתֵף֙ תֶּהְדֹּ֔פוּ וּבְקַרְנֵיכֶ֥ם תְּנַגְּח֖וּ כָּל־הַנַּחְלֹ֑ות עַ֣ד אֲשֶׁ֧ר הֲפִיצֹותֶ֛ם אֹותָ֖נָה אֶל־הַחֽוּצָה׃ yaʿan betsad uvekhatef tehedofu uveqareneykhem tenageḥu kal־hanaḥelowt ʿad ʾasher hafiytsowtem ʾowtanah ʾel־haḥutsah׃
22 וְהֹושַׁעְתִּ֣י לְצֹאנִ֔י וְלֹֽא־תִהְיֶ֥ינָה עֹ֖וד לָבַ֑ז וְשָׁ֣פַטְתִּ֔י בֵּ֥ין שֶׂ֖ה לָשֶֽׂה׃ wehowshaʿetiy letsoʾniy weloʾ־tiheyeynah ʿowd lavaz weshafaṭetiy beyn seh laseh׃
23 וַהֲקִמֹתִ֨י עֲלֵיהֶ֜ם רֹעֶ֤ה אֶחָד֙ וְרָעָ֣ה אֶתְהֶ֔ן אֵ֖ת עַבְדִּ֣י דָוִ֑יד ה֚וּא יִרְעֶ֣ה אֹתָ֔ם וְהֽוּא־יִהְיֶ֥ה לָהֶ֖ן לְרֹעֶֽה׃ wahaqimotiy ʿaleyhem roʿeh ʾeḥad weraʿah ʾetehen ʾet ʿavediy dawiyd huʾ yireʿeh ʾotam wehuʾ־yiheyeh lahen leroʿeh׃
24 וַאֲנִ֣י יְהוָ֗ה אֶהְיֶ֤ה לָהֶם֙ לֵֽאלֹהִ֔ים וְעַבְדִּ֥י דָוִ֖ד נָשִׂ֣יא בְתֹוכָ֑ם אֲנִ֥י יְהוָ֖ה דִּבַּֽרְתִּי׃ waʾaniy yehwah ʾeheyeh lahem leʾlohiym weʿavediy dawid nasiyʾ vetowkham ʾaniy yehwah dibaretiy׃
25 וְכָרַתִּ֤י לָהֶם֙ בְּרִ֣ית שָׁלֹ֔ום וְהִשְׁבַּתִּ֥י חַיָּֽה־רָעָ֖ה מִן־הָאָ֑רֶץ וְיָשְׁב֤וּ בַמִּדְבָּר֙ לָבֶ֔טַח וְיָשְׁנ֖וּ בַּיְּעָרִֽים׃ wekharatiy lahem beriyt shalowm wehishebatiy ḥayah־raʿah min־haʾarets weyashevu vamidebar laveṭaḥ weyashenu bayeʿariym׃
26 וְנָתַתִּ֥י אֹותָ֛ם וּסְבִיבֹ֥ות גִּבְעָתִ֖י בְּרָכָ֑ה וְהֹורַדְתִּ֤י הַגֶּ֙שֶׁם֙ בְּעִתֹּ֔ו גִּשְׁמֵ֥י בְרָכָ֖ה יִֽהְיֽוּ׃ wenatatiy ʾowtam useviyvowt giveʿatiy berakhah wehowradetiy hageshem beʿitow gishemey verakhah yiheyu׃
27 וְנָתַן֩ עֵ֨ץ הַשָּׂדֶ֜ה אֶת־פִּרְיֹ֗ו וְהָאָ֙רֶץ֙ תִּתֵּ֣ן יְבוּלָ֔הּ וְהָי֥וּ עַל־אַדְמָתָ֖ם לָבֶ֑טַח וְֽיָדְע֞וּ כִּי־אֲנִ֣י יְהוָ֗ה בְּשִׁבְרִי֙ אֶת־מֹטֹ֣ות עֻלָּ֔ם וְהִ֨צַּלְתִּ֔ים מִיַּ֖ד הָעֹבְדִ֥ים בָּהֶֽם׃ wenatan ʿets hasadeh ʾet־pireyow wehaʾarets titen yevulah wehayu ʿal־ʾadematam laveṭaḥ weyadeʿu kiy־ʾaniy yehwah beshiveriy ʾet־moṭowt ʿulam wehitsaletiym miyad haʿovediym bahem׃
28 וְלֹא־יִהְי֨וּ עֹ֥וד בַּז֙ לַגֹּויִ֔ם וְחַיַּ֥ת הָאָ֖רֶץ לֹ֣א תֹאכְלֵ֑ם וְיָשְׁב֥וּ לָבֶ֖טַח וְאֵ֥ין מַחֲרִֽיד׃ weloʾ־yiheyu ʿowd baz lagowyim weḥayat haʾarets loʾ toʾkhelem weyashevu laveṭaḥ weʾeyn maḥariyd׃
29 וַהֲקִמֹתִ֥י לָהֶ֛ם מַטָּ֖ע לְשֵׁ֑ם וְלֹֽא־יִהְי֨וּ עֹ֜וד אֲסֻפֵ֤י רָעָב֙ בָּאָ֔רֶץ וְלֹֽא־יִשְׂא֥וּ עֹ֖וד כְּלִמַּ֥ת הַגֹּויִֽם׃ wahaqimotiy lahem maṭaʿ leshem weloʾ־yiheyu ʿowd ʾasufey raʿav baʾarets weloʾ־yiseʾu ʿowd kelimat hagowyim׃
30 וְיָדְע֗וּ כִּ֣י אֲנִ֧י יְהוָ֛ה אֱלֹהֵיהֶ֖ם אִתָּ֑ם וְהֵ֗מָּה עַמִּי֙ בֵּ֣ית יִשְׂרָאֵ֔ל נְאֻ֖ם אֲדֹנָ֥י יְהוִֽה׃ weyadeʿu kiy ʾaniy yehwah ʾeloheyhem ʾitam wehemah ʿamiy beyt yiseraʾel neʾum ʾadonay yehwih׃
31 וְאַתֵּ֥ן צֹאנִ֛י צֹ֥אן מַרְעִיתִ֖י אָדָ֣ם אַתֶּ֑ם אֲנִי֙ אֱלֹ֣הֵיכֶ֔ם נְאֻ֖ם אֲדֹנָ֥י יְהוִֽה׃ פ weʾaten tsoʾniy tsoʾn mareʿiytiy ʾadam ʾatem ʾaniy ʾeloheykhem neʾum ʾadonay yehwih׃ f