1 וַיְדַבֵּ֤ר יְהוָה֙ אֶל־מֹשֶׁ֔ה אַחֲרֵ֣י מֹ֔ות שְׁנֵ֖י בְּנֵ֣י אַהֲרֹ֑ן בְּקָרְבָתָ֥ם לִפְנֵי־יְהוָ֖ה וַיָּמֻֽתוּ׃ wayedaber yehwah ʾel־mosheh ʾaḥarey mowt sheney beney ʾaharon beqarevatam lifeney־yehwah wayamutu׃
2 וַיֹּ֨אמֶר יְהוָ֜ה אֶל־מֹשֶׁ֗ה דַּבֵּר֮ אֶל־אַהֲרֹ֣ן אָחִיךָ֒ וְאַל־יָבֹ֤א בְכָל־עֵת֙ אֶל־הַקֹּ֔דֶשׁ מִבֵּ֖ית לַפָּרֹ֑כֶת אֶל־פְּנֵ֨י הַכַּפֹּ֜רֶת אֲשֶׁ֤ר עַל־הָאָרֹן֙ וְלֹ֣א יָמ֔וּת כִּ֚י בֶּֽעָנָ֔ן אֵרָאֶ֖ה עַל־הַכַּפֹּֽרֶת׃ wayoʾmer yehwah ʾel־mosheh daber ʾel־ʾaharon ʾaḥiykha weʾal־yavoʾ vekhal־ʿet ʾel־haqodesh mibeyt laparokhet ʾel־peney hakaporet ʾasher ʿal־haʾaron weloʾ yamut kiy beʿanan ʾeraʾeh ʿal־hakaporet׃
3 בְּזֹ֛את יָבֹ֥א אַהֲרֹ֖ן אֶל־הַקֹּ֑דֶשׁ בְּפַ֧ר בֶּן־בָּקָ֛ר לְחַטָּ֖את וְאַ֥יִל לְעֹלָֽה׃ bezoʾt yavoʾ ʾaharon ʾel־haqodesh befar ben־baqar leḥaṭaʾt weʾayil leʿolah׃
4 כְּתֹֽנֶת־בַּ֨ד קֹ֜דֶשׁ יִלְבָּ֗שׁ וּמִֽכְנְסֵי־בַד֮ יִהְי֣וּ עַל־בְּשָׂרֹו֒ וּבְאַבְנֵ֥ט בַּד֙ יַחְגֹּ֔ר וּבְמִצְנֶ֥פֶת בַּ֖ד יִצְנֹ֑ף בִּגְדֵי־קֹ֣דֶשׁ הֵ֔ם וְרָחַ֥ץ בַּמַּ֛יִם אֶת־בְּשָׂרֹ֖ו וּלְבֵשָֽׁם׃ ketonet־bad qodesh yilebash umikhenesey־vad yiheyu ʿal־besarow uveʾaveneṭ bad yaḥegor uvemitsenefet bad yitsenof bigedey־qodesh hem weraḥats bamayim ʾet־besarow ulevesham׃
5 וּמֵאֵ֗ת עֲדַת֙ בְּנֵ֣י יִשְׂרָאֵ֔ל יִקַּ֛ח שְׁנֵֽי־שְׂעִירֵ֥י עִזִּ֖ים לְחַטָּ֑את וְאַ֥יִל אֶחָ֖ד לְעֹלָֽה׃ umeʾet ʿadat beney yiseraʾel yiqaḥ sheney־seʿiyrey ʿiziym leḥaṭaʾt weʾayil ʾeḥad leʿolah׃
6 וְהִקְרִ֧יב אַהֲרֹ֛ן אֶת־פַּ֥ר הַחַטָּ֖את אֲשֶׁר־לֹ֑ו וְכִפֶּ֥ר בַּעֲדֹ֖ו וּבְעַ֥ד בֵּיתֹֽו׃ wehiqeriyv ʾaharon ʾet־par haḥaṭaʾt ʾasher־low wekhiper baʿadow uveʿad beytow׃
7 וְלָקַ֖ח אֶת־שְׁנֵ֣י הַשְּׂעִירִ֑ם וְהֶעֱמִ֤יד אֹתָם֙ לִפְנֵ֣י יְהוָ֔ה פֶּ֖תַח אֹ֥הֶל מֹועֵֽד׃ welaqaḥ ʾet־sheney haseʿiyrim weheʿemiyd ʾotam lifeney yehwah petaḥ ʾohel mowʿed׃
8 וְנָתַ֧ן אַהֲרֹ֛ן עַל־שְׁנֵ֥י הַשְּׂעִירִ֖ם גֹּורָלֹ֑ות גֹּורָ֤ל אֶחָד֙ לַיהוָ֔ה וְגֹורָ֥ל אֶחָ֖ד לַעֲזָאזֵֽל׃ wenatan ʾaharon ʿal־sheney haseʿiyrim gowralowt gowral ʾeḥad layhwah wegowral ʾeḥad laʿazaʾzel׃
9 וְהִקְרִ֤יב אַהֲרֹן֙ אֶת־הַשָּׂעִ֔יר אֲשֶׁ֨ר עָלָ֥ה עָלָ֛יו הַגֹּורָ֖ל לַיהוָ֑ה וְעָשָׂ֖הוּ חַטָּֽאת׃ wehiqeriyv ʾaharon ʾet־hasaʿiyr ʾasher ʿalah ʿalayw hagowral layhwah weʿasahu ḥaṭaʾt׃
10 וְהַשָּׂעִ֗יר אֲשֶׁר֩ עָלָ֨ה עָלָ֤יו הַגֹּורָל֙ לַעֲזָאזֵ֔ל יָֽעֳמַד־חַ֛י לִפְנֵ֥י יְהוָ֖ה לְכַפֵּ֣ר עָלָ֑יו לְשַׁלַּ֥ח אֹתֹ֛ו לַעֲזָאזֵ֖ל הַמִּדְבָּֽרָה׃ wehasaʿiyr ʾasher ʿalah ʿalayw hagowral laʿazaʾzel yaʿomad־ḥay lifeney yehwah lekhaper ʿalayw leshalaḥ ʾotow laʿazaʾzel hamidebarah׃
11 וְהִקְרִ֨יב אַהֲרֹ֜ן אֶת־פַּ֤ר הַֽחַטָּאת֙ אֲשֶׁר־לֹ֔ו וְכִפֶּ֥ר בַּֽעֲדֹ֖ו וּבְעַ֣ד בֵּיתֹ֑ו וְשָׁחַ֛ט אֶת־פַּ֥ר הַֽחַטָּ֖את אֲשֶׁר־לֹֽו׃ wehiqeriyv ʾaharon ʾet־par haḥaṭaʾt ʾasher־low wekhiper baʿadow uveʿad beytow weshaḥaṭ ʾet־par haḥaṭaʾt ʾasher־low׃
12 וְלָקַ֣ח מְלֹֽא־הַ֠מַּחְתָּה גַּֽחֲלֵי־אֵ֞שׁ מֵעַ֤ל הַמִּזְבֵּ֙חַ֙ מִלִּפְנֵ֣י יְהוָ֔ה וּמְלֹ֣א חָפְנָ֔יו קְטֹ֥רֶת סַמִּ֖ים דַּקָּ֑ה וְהֵבִ֖יא מִבֵּ֥ית לַפָּרֹֽכֶת׃ welaqaḥ meloʾ־hamaḥetah gaḥaley־ʾesh meʿal hamizebeaḥ milifeney yehwah umeloʾ ḥafenayw qeṭoret samiym daqah weheviyʾ mibeyt laparokhet׃
13 וְנָתַ֧ן אֶֽת־הַקְּטֹ֛רֶת עַל־הָאֵ֖שׁ לִפְנֵ֣י יְהוָ֑ה וְכִסָּ֣ה ׀ עֲנַ֣ן הַקְּטֹ֗רֶת אֶת־הַכַּפֹּ֛רֶת אֲשֶׁ֥ר עַל־הָעֵד֖וּת וְלֹ֥א יָמֽוּת׃ wenatan ʾet־haqeṭoret ʿal־haʾesh lifeney yehwah wekhisah ׀ ʿanan haqeṭoret ʾet־hakaporet ʾasher ʿal־haʿedut weloʾ yamut׃
14 וְלָקַח֙ מִדַּ֣ם הַפָּ֔ר וְהִזָּ֧ה בְאֶצְבָּעֹ֛ו עַל־פְּנֵ֥י הַכַּפֹּ֖רֶת קֵ֑דְמָה וְלִפְנֵ֣י הַכַּפֹּ֗רֶת יַזֶּ֧ה שֶֽׁבַע־פְּעָמִ֛ים מִן־הַדָּ֖ם בְּאֶצְבָּעֹֽו׃ welaqaḥ midam hapar wehizah veʾetsebaʿow ʿal־peney hakaporet qedemah welifeney hakaporet yazeh shevaʿ־peʿamiym min־hadam beʾetsebaʿow׃
15 וְשָׁחַ֞ט אֶת־שְׂעִ֤יר הַֽחַטָּאת֙ אֲשֶׁ֣ר לָעָ֔ם וְהֵבִיא֙ אֶת־דָּמֹ֔ו אֶל־מִבֵּ֖ית לַפָּרֹ֑כֶת וְעָשָׂ֣ה אֶת־דָּמֹ֗ו כַּאֲשֶׁ֤ר עָשָׂה֙ לְדַ֣ם הַפָּ֔ר וְהִזָּ֥ה אֹתֹ֛ו עַל־הַכַּפֹּ֖רֶת וְלִפְנֵ֥י הַכַּפֹּֽרֶת׃ weshaḥaṭ ʾet־seʿiyr haḥaṭaʾt ʾasher laʿam weheviyʾ ʾet־damow ʾel־mibeyt laparokhet weʿasah ʾet־damow kaʾasher ʿasah ledam hapar wehizah ʾotow ʿal־hakaporet welifeney hakaporet׃
16 וְכִפֶּ֣ר עַל־הַקֹּ֗דֶשׁ מִטֻּמְאֹת֙ בְּנֵ֣י יִשְׂרָאֵ֔ל וּמִפִּשְׁעֵיהֶ֖ם לְכָל־חַטֹּאתָ֑ם וְכֵ֤ן יַעֲשֶׂה֙ לְאֹ֣הֶל מֹועֵ֔ד הַשֹּׁכֵ֣ן אִתָּ֔ם בְּתֹ֖וךְ טֻמְאֹתָֽם׃ wekhiper ʿal־haqodesh miṭumeʾot beney yiseraʾel umipisheʿeyhem lekhal־ḥaṭoʾtam wekhen yaʿaseh leʾohel mowʿed hashokhen ʾitam betowkhe ṭumeʾotam׃
17 וְכָל־אָדָ֞ם לֹא־יִהְיֶ֣ה ׀ בְּאֹ֣הֶל מֹועֵ֗ד בְּבֹאֹ֛ו לְכַפֵּ֥ר בַּקֹּ֖דֶשׁ עַד־צֵאתֹ֑ו וְכִפֶּ֤ר בַּעֲדֹו֙ וּבְעַ֣ד בֵּיתֹ֔ו וּבְעַ֖ד כָּל־קְהַ֥ל יִשְׂרָאֵֽל׃ wekhal־ʾadam loʾ־yiheyeh ׀ beʾohel mowʿed bevoʾow lekhaper baqodesh ʿad־tseʾtow wekhiper baʿadow uveʿad beytow uveʿad kal־qehal yiseraʾel׃
18 וְיָצָ֗א אֶל־הַמִּזְבֵּ֛חַ אֲשֶׁ֥ר לִפְנֵֽי־יְהוָ֖ה וְכִפֶּ֣ר עָלָ֑יו וְלָקַ֞ח מִדַּ֤ם הַפָּר֙ וּמִדַּ֣ם הַשָּׂעִ֔יר וְנָתַ֛ן עַל־קַרְנֹ֥ות הַמִּזְבֵּ֖חַ סָבִֽיב׃ weyatsaʾ ʾel־hamizebeaḥ ʾasher lifeney־yehwah wekhiper ʿalayw welaqaḥ midam hapar umidam hasaʿiyr wenatan ʿal־qarenowt hamizebeaḥ saviyv׃
19 וְהִזָּ֨ה עָלָ֧יו מִן־הַדָּ֛ם בְּאֶצְבָּעֹ֖ו שֶׁ֣בַע פְּעָמִ֑ים וְטִהֲרֹ֣ו וְקִדְּשֹׁ֔ו מִטֻּמְאֹ֖ת בְּנֵ֥י יִשְׂרָאֵֽל׃ wehizah ʿalayw min־hadam beʾetsebaʿow shevaʿ peʿamiym weṭiharow weqideshow miṭumeʾot beney yiseraʾel׃
20 וְכִלָּה֙ מִכַּפֵּ֣ר אֶת־הַקֹּ֔דֶשׁ וְאֶת־אֹ֥הֶל מֹועֵ֖ד וְאֶת־הַמִּזְבֵּ֑חַ וְהִקְרִ֖יב אֶת־הַשָּׂעִ֥יר הֶחָֽי׃ wekhilah mikaper ʾet־haqodesh weʾet־ʾohel mowʿed weʾet־hamizebeaḥ wehiqeriyv ʾet־hasaʿiyr heḥay׃
21 וְסָמַ֨ךְ אַהֲרֹ֜ן אֶת־שְׁתֵּ֣י [יָדֹו כ] (יָדָ֗יו ק) עַ֨ל רֹ֣אשׁ הַשָּׂעִיר֮ הַחַי֒ וְהִתְוַדָּ֣ה עָלָ֗יו אֶת־כָּל־עֲוֹנֹת֙ בְּנֵ֣י יִשְׂרָאֵ֔ל וְאֶת־כָּל־פִּשְׁעֵיהֶ֖ם לְכָל־חַטֹּאתָ֑ם וְנָתַ֤ן אֹתָם֙ עַל־רֹ֣אשׁ הַשָּׂעִ֔יר וְשִׁלַּ֛ח בְּיַד־אִ֥ישׁ עִתִּ֖י הַמִּדְבָּֽרָה׃ wesamakhe ʾaharon ʾet־shetey [yadow kh] (yadayw q) ʿal roʾsh hasaʿiyr haḥay wehitewadah ʿalayw ʾet־kal־ʿaonot beney yiseraʾel weʾet־kal־pisheʿeyhem lekhal־ḥaṭoʾtam wenatan ʾotam ʿal־roʾsh hasaʿiyr weshilaḥ beyad־ʾiysh ʿitiy hamidebarah׃
22 וְנָשָׂ֨א הַשָּׂעִ֥יר עָלָ֛יו אֶת־כָּל־עֲוֹנֹתָ֖ם אֶל־אֶ֣רֶץ גְּזֵרָ֑ה וְשִׁלַּ֥ח אֶת־הַשָּׂעִ֖יר בַּמִּדְבָּֽר׃ wenasaʾ hasaʿiyr ʿalayw ʾet־kal־ʿaonotam ʾel־ʾerets gezerah weshilaḥ ʾet־hasaʿiyr bamidebar׃
23 וּבָ֤א אַהֲרֹן֙ אֶל־אֹ֣הֶל מֹועֵ֔ד וּפָשַׁט֙ אֶת־בִּגְדֵ֣י הַבָּ֔ד אֲשֶׁ֥ר לָבַ֖שׁ בְּבֹאֹ֣ו אֶל־הַקֹּ֑דֶשׁ וְהִנִּיחָ֖ם שָֽׁם׃ uvaʾ ʾaharon ʾel־ʾohel mowʿed ufashaṭ ʾet־bigedey habad ʾasher lavash bevoʾow ʾel־haqodesh wehiniyḥam sham׃
24 וְרָחַ֨ץ אֶת־בְּשָׂרֹ֤ו בַמַּ֙יִם֙ בְּמָקֹ֣ום קָדֹ֔ושׁ וְלָבַ֖שׁ אֶת־בְּגָדָ֑יו וְיָצָ֗א וְעָשָׂ֤ה אֶת־עֹֽלָתֹו֙ וְאֶת־עֹלַ֣ת הָעָ֔ם וְכִפֶּ֥ר בַּעֲדֹ֖ו וּבְעַ֥ד הָעָֽם׃ weraḥats ʾet־besarow vamayim bemaqowm qadowsh welavash ʾet־begadayw weyatsaʾ weʿasah ʾet־ʿolatow weʾet־ʿolat haʿam wekhiper baʿadow uveʿad haʿam׃
25 וְאֵ֛ת חֵ֥לֶב הַֽחַטָּ֖את יַקְטִ֥יר הַמִּזְבֵּֽחָה׃ weʾet ḥelev haḥaṭaʾt yaqeṭiyr hamizebeḥah׃
26 וְהַֽמְשַׁלֵּ֤חַ אֶת־הַשָּׂעִיר֙ לַֽעֲזָאזֵ֔ל יְכַבֵּ֣ס בְּגָדָ֔יו וְרָחַ֥ץ אֶת־בְּשָׂרֹ֖ו בַּמָּ֑יִם וְאַחֲרֵי־כֵ֖ן יָבֹ֥וא אֶל־הַֽמַּחֲנֶֽה׃ wehameshaleaḥ ʾet־hasaʿiyr laʿazaʾzel yekhabes begadayw weraḥats ʾet־besarow bamayim weʾaḥarey־khen yavowʾ ʾel־hamaḥaneh׃
27 וְאֵת֩ פַּ֨ר הַֽחַטָּ֜את וְאֵ֣ת ׀ שְׂעִ֣יר הַֽחַטָּ֗את אֲשֶׁ֨ר הוּבָ֤א אֶת־דָּמָם֙ לְכַפֵּ֣ר בַּקֹּ֔דֶשׁ יֹוצִ֖יא אֶל־מִח֣וּץ לַֽמַּחֲנֶ֑ה וְשָׂרְפ֣וּ בָאֵ֔שׁ אֶת־עֹרֹתָ֥ם וְאֶת־בְּשָׂרָ֖ם וְאֶת־פִּרְשָֽׁם׃ weʾet par haḥaṭaʾt weʾet ׀ seʿiyr haḥaṭaʾt ʾasher huvaʾ ʾet־damam lekhaper baqodesh yowtsiyʾ ʾel־miḥuts lamaḥaneh wesarefu vaʾesh ʾet־ʿorotam weʾet־besaram weʾet־piresham׃
28 וְהַשֹּׂרֵ֣ף אֹתָ֔ם יְכַבֵּ֣ס בְּגָדָ֔יו וְרָחַ֥ץ אֶת־בְּשָׂרֹ֖ו בַּמָּ֑יִם וְאַחֲרֵי־כֵ֖ן יָבֹ֥וא אֶל־הַֽמַּחֲנֶֽה׃ wehasoref ʾotam yekhabes begadayw weraḥats ʾet־besarow bamayim weʾaḥarey־khen yavowʾ ʾel־hamaḥaneh׃
29 וְהָיְתָ֥ה לָכֶ֖ם לְחֻקַּ֣ת עֹולָ֑ם בַּחֹ֣דֶשׁ הַ֠שְּׁבִיעִי בֶּֽעָשֹׂ֨ור לַחֹ֜דֶשׁ תְּעַנּ֣וּ אֶת־נַפְשֹֽׁתֵיכֶ֗ם וְכָל־מְלָאכָה֙ לֹ֣א תַעֲשׂ֔וּ הָֽאֶזְרָ֔ח וְהַגֵּ֖ר הַגָּ֥ר בְּתֹוכְכֶֽם׃ wehayetah lakhem leḥuqat ʿowlam baḥodesh hasheviyʿiy beʿasowr laḥodesh teʿanu ʾet־nafeshoteykhem wekhal־melaʾkhah loʾ taʿasu haʾezeraḥ wehager hagar betowkhekhem׃
30 כִּֽי־בַיֹּ֥ום הַזֶּ֛ה יְכַפֵּ֥ר עֲלֵיכֶ֖ם לְטַהֵ֣ר אֶתְכֶ֑ם מִכֹּל֙ חַטֹּ֣אתֵיכֶ֔ם לִפְנֵ֥י יְהוָ֖ה תִּטְהָֽרוּ׃ kiy־vayowm hazeh yekhaper ʿaleykhem leṭaher ʾetekhem mikol ḥaṭoʾteykhem lifeney yehwah tiṭeharu׃
31 שַׁבַּ֨ת שַׁבָּתֹ֥ון הִיא֙ לָכֶ֔ם וְעִנִּיתֶ֖ם אֶת־נַפְשֹׁתֵיכֶ֑ם חֻקַּ֖ת עֹולָֽם׃ shabat shabatown hiyʾ lakhem weʿiniytem ʾet־nafeshoteykhem ḥuqat ʿowlam׃
32 וְכִפֶּ֨ר הַכֹּהֵ֜ן אֲשֶׁר־יִמְשַׁ֣ח אֹתֹ֗ו וַאֲשֶׁ֤ר יְמַלֵּא֙ אֶת־יָדֹ֔ו לְכַהֵ֖ן תַּ֣חַת אָבִ֑יו וְלָבַ֛שׁ אֶת־בִּגְדֵ֥י הַבָּ֖ד בִּגְדֵ֥י הַקֹּֽדֶשׁ׃ wekhiper hakohen ʾasher־yimeshaḥ ʾotow waʾasher yemaleʾ ʾet־yadow lekhahen taḥat ʾaviyw welavash ʾet־bigedey habad bigedey haqodesh׃
33 וְכִפֶּר֙ אֶת־מִקְדַּ֣שׁ הַקֹּ֔דֶשׁ וְאֶת־אֹ֧הֶל מֹועֵ֛ד וְאֶת־הַמִּזְבֵּ֖חַ יְכַפֵּ֑ר וְעַ֧ל הַכֹּהֲנִ֛ים וְעַל־כָּל־עַ֥ם הַקָּהָ֖ל יְכַפֵּֽר׃ wekhiper ʾet־miqedash haqodesh weʾet־ʾohel mowʿed weʾet־hamizebeaḥ yekhaper weʿal hakohaniym weʿal־kal־ʿam haqahal yekhaper׃
34 וְהָֽיְתָה־זֹּ֨את לָכֶ֜ם לְחֻקַּ֣ת עֹולָ֗ם לְכַפֵּ֞ר עַל־בְּנֵ֤י יִשְׂרָאֵל֙ מִכָּל־חַטֹּאתָ֔ם אַחַ֖ת בַּשָּׁנָ֑ה וַיַּ֕עַשׂ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ פ wehayetah־zoʾt lakhem leḥuqat ʿowlam lekhaper ʿal־beney yiseraʾel mikal־ḥaṭoʾtam ʾaḥat bashanah wayaʿas kaʾasher tsiuah yehwah ʾet־mosheh׃ f