Ézéchiel 31

¹ וַיְהִ֗י בְּאַחַ֤ת עֶשְׂרֵה֙ שָׁנָ֔ה בַּשְּׁלִישִׁ֖י בְּאֶחָ֣ד לַחֹ֑דֶשׁ הָיָ֥ה דְבַר־יְהוָ֖ה אֵלַ֥י לֵאמֹֽר׃ wayehiy beʾaḥat ʿesereh shanah basheliyshiy beʾeḥad laḥodesh hayah devar־yehwah ʾelay leʾmor׃

² בֶּן־אָדָ֕ם אֱמֹ֛ר אֶל־פַּרְעֹ֥ה מֶֽלֶךְ־מִצְרַ֖יִם וְאֶל־הֲמֹונֹ֑ו אֶל־מִ֖י דָּמִ֥יתָ בְגָדְלֶֽךָ׃ ben־ʾadam ʾemor ʾel־pareʿoh melekhe־mitserayim weʾel־hamownow ʾel־miy damiyta vegadelekha׃

³ הִנֵּ֨ה אַשּׁ֜וּר אֶ֣רֶז בַּלְּבָנֹ֗ון יְפֵ֥ה עָנָ֛ף וְחֹ֥רֶשׁ מֵצַ֖ל וּגְבַ֣הּ קֹומָ֑ה וּבֵ֣ין עֲבֹתִ֔ים הָיְתָ֖ה צַמַּרְתֹּֽו׃ hineh ʾashur ʾerez balevanown yefeh ʿanaf weḥoresh metsal ugevah qowmah uveyn ʿavotiym hayetah tsamaretow׃

⁴ מַ֣יִם גִּדְּל֔וּהוּ תְּהֹ֖ום רֹֽמְמָ֑תְהוּ אֶת־נַהֲרֹתֶ֗יהָ הֹלֵךְ֙ סְבִיבֹ֣ות מַטָּעָ֔הּ וְאֶת־תְּעָלֹתֶ֣יהָ שִׁלְחָ֔ה אֶ֖ל כָּל־עֲצֵ֥י הַשָּׂדֶֽה׃ mayim gideluhu tehowm romematehu ʾet־naharoteyha holekhe seviyvowt maṭaʿah weʾet־teʿaloteyha shileḥah ʾel kal־ʿatsey hasadeh׃

⁵ עַל־כֵּן֙ גָּבְהָ֣א קֹמָתֹ֔ו מִכֹּ֖ל עֲצֵ֣י הַשָּׂדֶ֑ה וַתִּרְבֶּ֨ינָה סַֽרְעַפֹּתָ֜יו וַתֶּאֱרַ֧כְנָה [פֹארֹתֹו כ] (פֹארֹתָ֛יו ק) מִמַּ֥יִם רַבִּ֖ים בְּשַׁלְּחֹֽו׃ ʿal־ken gavehaʾ qomatow mikol ʿatsey hasadeh watirebeynah sareʿapotayw wateʾerakhenah [foʾrotow kh] (foʾrotayw q) mimayim rabiym beshaleḥow׃

⁶ בִּסְעַפֹּתָ֤יו קִֽנְנוּ֙ כָּל־עֹ֣וף הַשָּׁמַ֔יִם וְתַ֤חַת פֹּֽארֹתָיו֙ יָֽלְד֔וּ כֹּ֖ל חַיַּ֣ת הַשָּׂדֶ֑ה וּבְצִלֹּו֙ יֵֽשְׁב֔וּ כֹּ֖ל גֹּויִ֥ם רַבִּֽים׃ biseʿapotayw qinenu kal־ʿowf hashamayim wetaḥat poʾrotayw yaledu kol ḥayat hasadeh uvetsilow yeshevu kol gowyim rabiym׃

⁷ וַיְּיִ֣ף בְּגָדְלֹ֔ו בְּאֹ֖רֶךְ דָּֽלִיֹּותָ֑יו כִּֽי־הָיָ֥ה שָׁרְשֹׁ֖ו אֶל־מַ֥יִם רַבִּֽים׃ wayeyif begadelow beʾorekhe daliyowtayw kiy־hayah shareshow ʾel־mayim rabiym׃

⁸ אֲרָזִ֣ים לֹֽא־עֲמָמֻהוּ֮ בְּגַן־אֱלֹהִים֒ בְּרֹושִׁ֗ים לֹ֤א דָמוּ֙ אֶל־סְעַפֹּתָ֔יו וְעַרְמֹנִ֥ים לֹֽא־הָי֖וּ כְּפֹֽארֹתָ֑יו כָּל־עֵץ֙ בְּגַן־אֱלֹהִ֔ים לֹא־דָמָ֥ה אֵלָ֖יו בְּיָפְיֹֽו׃ ʾaraziym loʾ־ʿamamuhu began־ʾelohiym berowshiym loʾ damu ʾel־seʿapotayw weʿaremoniym loʾ־hayu kefoʾrotayw kal־ʿets began־ʾelohiym loʾ־damah ʾelayw beyafeyow׃

⁹ יָפֶ֣ה עֲשִׂיתִ֔יו בְּרֹ֖ב דָּֽלִיֹּותָ֑יו וַיְקַנְאֻ֙הוּ֙ כָּל־עֲצֵי־עֵ֔דֶן אֲשֶׁ֖ר בְּגַ֥ן הָאֱלֹהִֽים׃ ס yafeh ʿasiytiyw berov daliyowtayw wayeqaneʾuhu kal־ʿatsey־ʿeden ʾasher began haʾelohiym׃ s

¹⁰ לָכֵ֗ן כֹּ֤ה אָמַר֙ אֲדֹנָ֣י יְהוִ֔ה יַ֕עַן אֲשֶׁ֥ר גָּבַ֖הְתָּ בְּקֹומָ֑ה וַיִּתֵּ֤ן צַמַּרְתֹּו֙ אֶל־בֵּ֣ין עֲבֹותִ֔ים וְרָ֥ם לְבָבֹ֖ו בְּגָבְהֹֽו׃ lakhen koh ʾamar ʾadonay yehwih yaʿan ʾasher gavaheta beqowmah wayiten tsamaretow ʾel־beyn ʿavowtiym weram levavow begavehow׃

¹¹ וְאֶ֨תְּנֵ֔הוּ בְּיַ֖ד אֵ֣יל גֹּויִ֑ם עָשֹׂ֤ו יַֽעֲשֶׂה֙ לֹ֔ו כְּרִשְׁעֹ֖ו גֵּרַשְׁתִּֽהוּ׃ weʾetenehu beyad ʾeyl gowyim ʿasow yaʿaseh low kerisheʿow gerashetihu׃

¹² וַיִּכְרְתֻ֧הוּ זָרִ֛ים עָרִיצֵ֥י גֹויִ֖ם וַֽיִּטְּשֻׁ֑הוּ אֶל־הֶ֠הָרִים וּבְכָל־גֵּ֨אָיֹ֜ות נָפְל֣וּ דָלִיֹּותָ֗יו וַתִּשָּׁבַ֤רְנָה פֹֽארֹתָיו֙ בְּכֹל֙ אֲפִיקֵ֣י הָאָ֔רֶץ וַיֵּרְד֧וּ מִצִּלֹּ֛ו כָּל־עַמֵּ֥י הָאָ֖רֶץ וַֽיִּטְּשֻֽׁהוּ׃ wayikheretuhu zariym ʿariytsey gowyim wayiṭeshuhu ʾel־hehariym uvekhal־geʾayowt nafelu daliyowtayw watishavarenah foʾrotayw bekhol ʾafiyqey haʾarets wayeredu mitsilow kal־ʿamey haʾarets wayiṭeshuhu׃

¹³ עַל־מַפַּלְתֹּ֥ו יִשְׁכְּנ֖וּ כָּל־עֹ֣וף הַשָּׁמָ֑יִם וְאֶל־פֹּארֹתָ֣יו הָי֔וּ כֹּ֖ל חַיַּ֥ת הַשָּׂדֶֽה׃ ʿal־mapaletow yishekenu kal־ʿowf hashamayim weʾel־poʾrotayw hayu kol ḥayat hasadeh׃

¹⁴ לְמַ֡עַן אֲשֶׁר֩ לֹא־יִגְבְּה֨וּ בְקֹומָתָ֜ם כָּל־עֲצֵי־מַ֗יִם וְלֹֽא־יִתְּנ֤וּ אֶת־צַמַּרְתָּם֙ אֶל־בֵּ֣ין עֲבֹתִ֔ים וְלֹֽא־יַעַמְד֧וּ אֵלֵיהֶ֛ם בְּגָבְהָ֖ם כָּל־שֹׁ֣תֵי מָ֑יִם כִּֽי־כֻלָּם֩ נִתְּנ֨וּ לַמָּ֜וֶת אֶל־אֶ֣רֶץ תַּחְתִּ֗ית בְּתֹ֛וךְ בְּנֵ֥י אָדָ֖ם אֶל־יֹ֥ורְדֵי בֹֽור׃ ס lemaʿan ʾasher loʾ־yigebehu veqowmatam kal־ʿatsey־mayim weloʾ־yitenu ʾet־tsamaretam ʾel־beyn ʿavotiym weloʾ־yaʿamedu ʾeleyhem begaveham kal־shotey mayim kiy־khulam nitenu lamawet ʾel־ʾerets taḥetiyt betowkhe beney ʾadam ʾel־yowredey vowr׃ s

¹⁵ כֹּֽה־אָמַ֞ר אֲדֹנָ֣י יְהוִ֗ה בְּיֹ֨ום רִדְתֹּ֤ו שְׁאֹ֙ולָה֙ הֶאֱבַ֜לְתִּי כִּסֵּ֤תִי עָלָיו֙ אֶת־תְּהֹ֔ום וָֽאֶמְנַע֙ נַהֲרֹותֶ֔יהָ וַיִּכָּלְא֖וּ מַ֣יִם רַבִּ֑ים וָאַקְדִּ֤ר עָלָיו֙ לְבָנֹ֔ון וְכָל־עֲצֵ֥י הַשָּׂדֶ֖ה עָלָ֥יו עֻלְפֶּֽה׃ koh־ʾamar ʾadonay yehwih beyowm ridetow sheʾowlah heʾevaletiy kisetiy ʿalayw ʾet־tehowm waʾemenaʿ naharowteyha wayikaleʾu mayim rabiym waʾaqedir ʿalayw levanown wekhal־ʿatsey hasadeh ʿalayw ʿulepeh׃

¹⁶ מִקֹּ֤ול מַפַּלְתֹּו֙ הִרְעַ֣שְׁתִּי גֹויִ֔ם בְּהֹורִדִ֥י אֹתֹ֛ו שְׁאֹ֖ולָה אֶת־יֹ֣ורְדֵי בֹ֑ור וַיִּנָּ֨חֲמ֜וּ בְּאֶ֤רֶץ תַּחְתִּית֙ כָּל־עֲצֵי־עֵ֔דֶן מִבְחַ֥ר וְטֹוב־לְבָנֹ֖ון כָּל־שֹׁ֥תֵי מָֽיִם׃ miqowl mapaletow hireʿashetiy gowyim behowridiy ʾotow sheʾowlah ʾet־yowredey vowr wayinaḥamu beʾerets taḥetiyt kal־ʿatsey־ʿeden miveḥar weṭowv־levanown kal־shotey mayim׃

¹⁷ גַּם־הֵ֗ם אִתֹּ֛ו יָרְד֥וּ שְׁאֹ֖ולָה אֶל־חַלְלֵי־חָ֑רֶב וּזְרֹעֹ֛ו יָשְׁב֥וּ בְצִלֹּ֖ו בְּתֹ֥וךְ גֹּויִֽם׃ gam־hem ʾitow yaredu sheʾowlah ʾel־ḥaleley־ḥarev uzeroʿow yashevu vetsilow betowkhe gowyim׃

¹⁸ אֶל־מִ֨י דָמִ֥יתָ כָּ֛כָה בְּכָבֹ֥וד וּבְגֹ֖דֶל בַּעֲצֵי־עֵ֑דֶן וְהוּרַדְתָּ֙ אֶת־עֲצֵי־עֵ֜דֶן אֶל־אֶ֣רֶץ תַּחְתִּ֗ית בְּתֹ֨וךְ עֲרֵלִ֤ים תִּשְׁכַּב֙ אֶת־חַלְלֵי־חֶ֔רֶב ה֤וּא פַרְעֹה֙ וְכָל־הֲמֹונֹ֔ה נְאֻ֖ם אֲדֹנָ֥י יְהוִֽה׃ ס ʾel־miy damiyta kakhah bekhavowd uvegodel baʿatsey־ʿeden wehuradeta ʾet־ʿatsey־ʿeden ʾel־ʾerets taḥetiyt betowkhe ʿareliym tishekav ʾet־ḥaleley־ḥerev huʾ fareʿoh wekhal־hamownoh neʾum ʾadonay yehwih׃ s