1 לַמְנַצֵּ֥חַ לִבְנֵי־קֹ֑רַח עַֽל־עֲלָמֹ֥ות שִֽׁיר׃ lamenatseaḥ liveney־qoraḥ ʿal־ʿalamowt shiyr׃
2 אֱלֹהִ֣ים לָ֭נוּ מַחֲסֶ֣ה וָעֹ֑ז עֶזְרָ֥ה בְ֝צָרֹ֗ות נִמְצָ֥א מְאֹֽד׃ ʾelohiym lanu maḥaseh waʿoz ʿezerah vetsarowt nimetsaʾ meʾod׃
3 עַל־כֵּ֣ן לֹא־נִ֭ירָא בְּהָמִ֣יר אָ֑רֶץ וּבְמֹ֥וט הָ֝רִ֗ים בְּלֵ֣ב יַמִּֽים׃ ʿal־ken loʾ־niyraʾ behamiyr ʾarets uvemowṭ hariym belev yamiym׃
4 יֶהֱמ֣וּ יֶחְמְר֣וּ מֵימָ֑יו יִֽרְעֲשֽׁוּ־הָרִ֖ים בְּגַאֲוָתֹ֣ו סֶֽלָה׃ yehemu yeḥemeru meymayw yireʿashu־hariym begaʾawatow selah׃
5 נָהָ֗ר פְּלָגָ֗יו יְשַׂמְּח֥וּ עִיר־אֱלֹהִ֑ים קְ֝דֹ֗שׁ מִשְׁכְּנֵ֥י עֶלְיֹֽון׃ nahar pelagayw yesameḥu ʿiyr־ʾelohiym qedosh mishekeney ʿeleyown׃
6 אֱלֹהִ֣ים בְּ֭קִרְבָּהּ בַּל־תִּמֹּ֑וט יַעְזְרֶ֥הָ אֱ֝לֹהִ֗ים לִפְנֹ֥ות בֹּֽקֶר׃ ʾelohiym beqirebah bal־timowṭ yaʿezereah ʾelohiym lifenowt boqer׃
7 הָמ֣וּ גֹ֖ויִם מָ֣טוּ מַמְלָכֹ֑ות נָתַ֥ן בְּ֝קֹולֹ֗ו תָּמ֥וּג אָֽרֶץ׃ hamu gowyim maṭu mamelakhowt natan beqowlow tamug ʾarets׃
8 יְהוָ֣ה צְבָאֹ֣ות עִמָּ֑נוּ מִשְׂגָּֽב־לָ֝נוּ אֱלֹהֵ֖י יַעֲקֹ֣ב סֶֽלָה׃ yehwah tsevaʾowt ʿimanu misegav־lanu ʾelohey yaʿaqov selah׃
9 לְֽכוּ־חֲ֭זוּ מִפְעֲלֹ֣ות יְהוָ֑ה אֲשֶׁר־שָׂ֖ם שַׁמֹּ֣ות בָּאָֽרֶץ׃ lekhu־ḥazu mifeʿalowt yehwah ʾasher־sam shamowt baʾarets׃
10 מַשְׁבִּ֥ית מִלְחָמֹות֮ עַד־קְצֵ֪ה הָ֫אָ֥רֶץ קֶ֣שֶׁת יְ֭שַׁבֵּר וְקִצֵּ֣ץ חֲנִ֑ית עֲ֝גָלֹ֗ות יִשְׂרֹ֥ף בָּאֵֽשׁ׃ mashebiyt mileḥamowt ʿad־qetseh haʾarets qeshet yeshaber weqitsets ḥaniyt ʿagalowt yiserof baʾesh׃
11 הַרְפּ֣וּ וּ֭דְעוּ כִּי־אָנֹכִ֣י אֱלֹהִ֑ים אָר֥וּם בַּ֝גֹּויִ֗ם אָר֥וּם בָּאָֽרֶץ׃ harepu udeʿu kiy־ʾanokhiy ʾelohiym ʾarum bagowyim ʾarum baʾarets׃
12 יְהוָ֣ה צְבָאֹ֣ות עִמָּ֑נוּ מִשְׂגָּֽב־לָ֝נוּ אֱלֹהֵ֖י יַעֲקֹ֣ב סֶֽלָה׃ yehwah tsevaʾowt ʿimanu misegav־lanu ʾelohey yaʿaqov selah׃