Ézéchiel 30

¹ וַיְהִ֥י דְבַר־יְהוָ֖ה אֵלַ֥י לֵאמֹֽר׃ wayehiy devar־yehwah ʾelay leʾmor׃

² בֶּן־אָדָ֕ם הִנָּבֵא֙ וְאָ֣מַרְתָּ֔ כֹּ֥ה אָמַ֖ר אֲדֹנָ֣י יְהוִ֑ה הֵילִ֖ילוּ הָ֥הּ לַיֹּֽום׃ ben־ʾadam hinaveʾ weʾamareta koh ʾamar ʾadonay yehwih heyliylu hah layowm׃

³ כִּֽי־קָרֹ֣וב יֹ֔ום וְקָרֹ֥וב יֹ֖ום לַֽיהוָ֑ה יֹ֣ום עָנָ֔ן עֵ֥ת גֹּויִ֖ם יִֽהְיֶֽה׃ kiy־qarowv yowm weqarowv yowm layhwah yowm ʿanan ʿet gowyim yiheyeh׃

⁴ וּבָאָ֥ה חֶ֙רֶב֙ בְּמִצְרַ֔יִם וְהָיְתָ֤ה חַלְחָלָה֙ בְּכ֔וּשׁ בִּנְפֹ֥ל חָלָ֖ל בְּמִצְרָ֑יִם וְלָקְח֣וּ הֲמֹונָ֔הּ וְנֶהֶרְס֖וּ יְסֹודֹתֶֽיהָ׃ uvaʾah ḥerev bemitserayim wehayetah ḥaleḥalah bekhush binefol ḥalal bemitserayim welaqeḥu hamownah weneheresu yesowdoteyha׃

⁵ כּ֣וּשׁ וּפ֤וּט וְלוּד֙ וְכָל־הָעֶ֣רֶב וְכ֔וּב וּבְנֵ֖י אֶ֣רֶץ הַבְּרִ֑ית אִתָּ֖ם בַּחֶ֥רֶב יִפֹּֽלוּ׃ פ kush ufuṭ welud wekhal־haʿerev wekhuv uveney ʾerets haberiyt ʾitam baḥerev yipolu׃ f

⁶ כֹּ֚ה אָמַ֣ר יְהוָ֔ה וְנָֽפְלוּ֙ סֹמְכֵ֣י מִצְרַ֔יִם וְיָרַ֖ד גְּאֹ֣ון עֻזָּ֑הּ מִמִּגְדֹּ֣ל סְוֵנֵ֗ה בַּחֶ֙רֶב֙ יִפְּלוּ־בָ֔הּ נְאֻ֖ם אֲדֹנָ֥י יְהוִֽה׃ koh ʾamar yehwah wenafelu somekhey mitserayim weyarad geʾown ʿuzah mimigedol seweneh baḥerev yipelu־vah neʾum ʾadonay yehwih׃

⁷ וְנָשַׁ֕מּוּ בְּתֹ֖וךְ אֲרָצֹ֣ות נְשַׁמֹּ֑ות וְעָרָ֕יו בְּתֹוךְ־עָרִ֥ים נַחֲרָבֹ֖ות תִּֽהְיֶֽינָה׃ wenashamu betowkhe ʾaratsowt neshamowt weʿarayw betowkhe־ʿariym naḥaravowt tiheyeynah׃

⁸ וְיָדְע֖וּ כִּֽי־אֲנִ֣י יְהוָ֑ה בְּתִתִּי־אֵ֣שׁ בְּמִצְרַ֔יִם וְנִשְׁבְּר֖וּ כָּל־עֹזְרֶֽיהָ׃ weyadeʿu kiy־ʾaniy yehwah betitiy־ʾesh bemitserayim wenisheberu kal־ʿozereyha׃

⁹ בַּיֹּ֣ום הַה֗וּא יֵצְא֨וּ מַלְאָכִ֤ים מִלְּפָנַי֙ בַּצִּ֔ים לְהַחֲרִ֖יד אֶת־כּ֣וּשׁ בֶּ֑טַח וְהָיְתָ֨ה חַלְחָלָ֤ה בָהֶם֙ בְּיֹ֣ום מִצְרַ֔יִם כִּ֥י הִנֵּ֖ה בָּאָֽה׃ ס bayowm hahuʾ yetseʾu maleʾakhiym milefanay batsiym lehaḥariyd ʾet־kush beṭaḥ wehayetah ḥaleḥalah vahem beyowm mitserayim kiy hineh baʾah׃ s

¹⁰ כֹּ֥ה אָמַ֖ר אֲדֹנָ֣י יְהוִ֑ה וְהִשְׁבַּתִּי֙ אֶת־הֲמֹ֣ון מִצְרַ֔יִם בְּיַ֖ד נְבוּכַדְרֶאצַּ֥ר מֶלֶךְ־בָּבֶֽל׃ koh ʾamar ʾadonay yehwih wehishebatiy ʾet־hamown mitserayim beyad nevukhadereʾtsar melekhe־bavel׃

¹¹ ה֠וּא וְעַמֹּ֤ו אִתֹּו֙ עָרִיצֵ֣י גֹויִ֔ם מֽוּבָאִ֖ים לְשַׁחֵ֣ת הָאָ֑רֶץ וְהֵרִ֤יקוּ חַרְבֹותָם֙ עַל־מִצְרַ֔יִם וּמָלְא֥וּ אֶת־הָאָ֖רֶץ חָלָֽל׃ huʾ weʿamow ʾitow ʿariytsey gowyim muvaʾiym leshaḥet haʾarets weheriyqu ḥarevowtam ʿal־mitserayim umaleʾu ʾet־haʾarets ḥalal׃

¹² וְנָתַתִּ֤י יְאֹרִים֙ חָֽרָבָ֔ה וּמָכַרְתִּ֥י אֶת־הָאָ֖רֶץ בְּיַד־רָעִ֑ים וַהֲשִׁמֹּתִ֞י אֶ֤רֶץ וּמְלֹאָהּ֙ בְּיַד־זָרִ֔ים אֲנִ֥י יְהוָ֖ה דִּבַּֽרְתִּי׃ ס wenatatiy yeʾoriym ḥaravah umakharetiy ʾet־haʾarets beyad־raʿiym wahashimotiy ʾerets umeloʾah beyad־zariym ʾaniy yehwah dibaretiy׃ s

¹³ כֹּֽה־אָמַ֞ר אֲדֹנָ֣י יְהוִ֗ה וְהַאֲבַדְתִּ֨י גִלּוּלִ֜ים וְהִשְׁבַּתִּ֤י אֱלִילִים֙ מִנֹּ֔ף וְנָשִׂ֥יא מֵאֶֽרֶץ־מִצְרַ֖יִם לֹ֣א יִֽהְיֶה־עֹ֑וד וְנָתַתִּ֥י יִרְאָ֖ה בְּאֶ֥רֶץ מִצְרָֽיִם׃ koh־ʾamar ʾadonay yehwih wehaʾavadetiy giluliym wehishebatiy ʾeliyliym minof wenasiyʾ meʾerets־mitserayim loʾ yiheyeh־ʿowd wenatatiy yireʾah beʾerets mitserayim׃

¹⁴ וַהֲשִׁמֹּתִי֙ אֶת־פַּתְרֹ֔וס וְנָתַ֥תִּי אֵ֖שׁ בְּצֹ֑עַן וְעָשִׂ֥יתִי שְׁפָטִ֖ים בְּנֹֽא׃ wahashimotiy ʾet־paterows wenatatiy ʾesh betsoʿan weʿasiytiy shefaṭiym benoʾ׃

¹⁵ וְשָׁפַכְתִּ֣י חֲמָתִ֔י עַל־סִ֖ין מָעֹ֣וז מִצְרָ֑יִם וְהִכְרַתִּ֖י אֶת־הֲמֹ֥ון נֹֽא׃ weshafakhetiy ḥamatiy ʿal־siyn maʿowz mitserayim wehikheratiy ʾet־hamown noʾ׃

¹⁶ וְנָתַ֤תִּי אֵשׁ֙ בְּמִצְרַ֔יִם ח֤וּל [תָּחִיל כ] (תָּחוּל֙ ק) סִ֔ין וְנֹ֖א תִּהְיֶ֣ה לְהִבָּקֵ֑עַ וְנֹ֖ף צָרֵ֥י יֹומָֽם׃ wenatatiy ʾesh bemitserayim ḥul [taḥiyl kh] (taḥul q) siyn wenoʾ tiheyeh lehibaqeaʿ wenof tsarey yowmam׃

¹⁷ בַּח֥וּרֵי אָ֛וֶן וּפִי־בֶ֖סֶת בַּחֶ֣רֶב יִפֹּ֑לוּ וְהֵ֖נָּה בַּשְּׁבִ֥י תֵלַֽכְנָה׃ baḥurey ʾawen ufiy־veset baḥerev yipolu wehenah basheviy telakhenah׃

¹⁸ וּבִֽתְחַפְנְחֵס֙ חָשַׂ֣ךְ הַיֹּ֔ום בְּשִׁבְרִי־שָׁם֙ אֶת־מֹטֹ֣ות מִצְרַ֔יִם וְנִשְׁבַּת־בָּ֖הּ גְּאֹ֣ון עֻזָּ֑הּ הִ֚יא עָנָ֣ן יְכַסֶּ֔נָּה וּבְנֹותֶ֖יהָ בַּשְּׁבִ֥י תֵלַֽכְנָה׃ uviteḥafeneḥes ḥasakhe hayowm beshiveriy־sham ʾet־moṭowt mitserayim wenishebat־bah geʾown ʿuzah hiyʾ ʿanan yekhasenah uvenowteyha basheviy telakhenah׃

¹⁹ וְעָשִׂ֥יתִי שְׁפָטִ֖ים בְּמִצְרָ֑יִם וְיָדְע֖וּ כִּֽי־אֲנִ֥י יְהוָֽה׃ פ weʿasiytiy shefaṭiym bemitserayim weyadeʿu kiy־ʾaniy yehwah׃ f

²⁰ וַיְהִ֗י בְּאַחַ֤ת עֶשְׂרֵה֙ שָׁנָ֔ה בָּֽרִאשֹׁ֖ון בְּשִׁבְעָ֣ה לַחֹ֑דֶשׁ הָיָ֥ה דְבַר־יְהוָ֖ה אֵלַ֥י לֵאמֹֽר׃ wayehiy beʾaḥat ʿesereh shanah bariʾshown beshiveʿah laḥodesh hayah devar־yehwah ʾelay leʾmor׃

²¹ בֶּן־אָדָ֕ם אֶת־זְרֹ֛ועַ פַּרְעֹ֥ה מֶֽלֶךְ־מִצְרַ֖יִם שָׁבָ֑רְתִּי וְהִנֵּ֣ה לֹֽא־חֻ֠בְּשָׁה לָתֵ֨ת רְפֻאֹ֜ות לָשׂ֥וּם חִתּ֛וּל לְחָבְשָׁ֥הּ לְחָזְקָ֖הּ לִתְפֹּ֥שׂ בֶּחָֽרֶב׃ ס ben־ʾadam ʾet־zerowʿa pareʿoh melekhe־mitserayim shavaretiy wehineh loʾ־ḥubeshah latet refuʾowt lasum ḥitul leḥaveshah leḥazeqah litepos beḥarev׃ s

²² לָכֵ֞ן כֹּה־אָמַ֣ר ׀ אֲדֹנָ֣י יְהֹוִ֗ה הִנְנִי֙ אֶל־פַּרְעֹ֣ה מֶֽלֶךְ־מִצְרַ֔יִם וְשָֽׁבַרְתִּי֙ אֶת־זְרֹ֣עֹתָ֔יו אֶת־הַחֲזָקָ֖ה וְאֶת־הַנִּשְׁבָּ֑רֶת וְהִפַּלְתִּ֥י אֶת־הַחֶ֖רֶב מִיָּדֹֽו׃ lakhen koh־ʾamar ׀ ʾadonay yehowih hineniy ʾel־pareʿoh melekhe־mitserayim weshavaretiy ʾet־zeroʿotayw ʾet־haḥazaqah weʾet־hanishebaret wehipaletiy ʾet־haḥerev miyadow׃

²³ וַהֲפִצֹותִ֥י אֶת־מִצְרַ֖יִם בַּגֹּויִ֑ם וְזֵרִיתִ֖ם בָּאֲרָצֹֽות׃ wahafitsowtiy ʾet־mitserayim bagowyim wezeriytim baʾaratsowt׃

²⁴ וְחִזַּקְתִּ֗י אֶת־זְרֹעֹות֙ מֶ֣לֶךְ בָּבֶ֔ל וְנָתַתִּ֥י אֶת־חַרְבִּ֖י בְּיָדֹ֑ו וְשָׁבַרְתִּי֙ אֶת־זְרֹעֹ֣ות פַּרְעֹ֔ה וְנָאַ֛ק נַאֲקֹ֥ות חָלָ֖ל לְפָנָֽיו׃ weḥizaqetiy ʾet־zeroʿowt melekhe bavel wenatatiy ʾet־ḥarebiy beyadow weshavaretiy ʾet־zeroʿowt pareʿoh wenaʾaq naʾaqowt ḥalal lefanayw׃

²⁵ וְהַחֲזַקְתִּ֗י אֶת־זְרֹעֹות֙ מֶ֣לֶךְ בָּבֶ֔ל וּזְרֹעֹ֥ות פַּרְעֹ֖ה תִּפֹּ֑לְנָה וְֽיָדְע֞וּ כִּֽי־אֲנִ֣י יְהוָ֗ה בְּתִתִּ֤י חַרְבִּי֙ בְּיַ֣ד מֶֽלֶךְ־בָּבֶ֔ל וְנָטָ֥ה אֹותָ֖הּ אֶל־אֶ֥רֶץ מִצְרָֽיִם׃ wehaḥazaqetiy ʾet־zeroʿowt melekhe bavel uzeroʿowt pareʿoh tipolenah weyadeʿu kiy־ʾaniy yehwah betitiy ḥarebiy beyad melekhe־bavel wenaṭah ʾowtah ʾel־ʾerets mitserayim׃

²⁶ וַהֲפִצֹותִ֤י אֶת־מִצְרַ֙יִם֙ בַּגֹּויִ֔ם וְזֵרִיתִ֥י אֹותָ֖ם בָּאֲרָצֹ֑ות וְיָדְע֖וּ כִּֽי־אֲנִ֥י יְהוָֽה׃ ס wahafitsowtiy ʾet־mitserayim bagowyim wezeriytiy ʾowtam baʾaratsowt weyadeʿu kiy־ʾaniy yehwah׃ s