Ézéchiel 45

¹ וּבְהַפִּֽילְכֶ֨ם אֶת־הָאָ֜רֶץ בְּנַחֲלָ֗ה תָּרִימוּ֩ תְרוּמָ֨ה לַיהוָ֥ה ׀ קֹדֶשׁ֮ מִן־הָאָרֶץ֒ אֹ֗רֶךְ חֲמִשָּׁ֨ה וְעֶשְׂרִ֥ים אֶ֙לֶף֙ אֹ֔רֶךְ וְרֹ֖חַב עֲשָׂ֣רָה אָ֑לֶף קֹדֶשׁ־ה֥וּא בְכָל־גְּבוּלָ֖הּ סָבִֽיב׃ uvehapiylekhem ʾet־haʾarets benaḥalah tariymu terumah layhwah ׀ qodesh min־haʾarets ʾorekhe ḥamishah weʿeseriym ʾelef ʾorekhe weroḥav ʿasarah ʾalef qodesh־huʾ vekhal־gevulah saviyv׃

² יִהְיֶ֤ה מִזֶּה֙ אֶל־הַקֹּ֔דֶשׁ חֲמֵ֥שׁ מֵאֹ֛ות בַּחֲמֵ֥שׁ מֵאֹ֖ות מְרֻבָּ֣ע סָבִ֑יב וַחֲמִשִּׁ֣ים אַמָּ֔ה מִגְרָ֥שׁ לֹ֖ו סָבִֽיב׃ yiheyeh mizeh ʾel־haqodesh ḥamesh meʾowt baḥamesh meʾowt merubaʿ saviyv waḥamishiym ʾamah migerash low saviyv׃

³ וּמִן־הַמִּדָּ֤ה הַזֹּאת֙ תָּמֹ֔וד אֹ֗רֶךְ [חֲמֵשׁ כ] (חֲמִשָּׁ֤ה ק) וְעֶשְׂרִים֙ אֶ֔לֶף וְרֹ֖חַב עֲשֶׂ֣רֶת אֲלָפִ֑ים וּבֹֽו־יִהְיֶ֥ה הַמִּקְדָּ֖שׁ קֹ֥דֶשׁ קָדָשִֽׁים׃ umin־hamidah hazoʾt tamowd ʾorekhe [ḥamesh kh] (ḥamishah q) weʿeseriym ʾelef weroḥav ʿaseret ʾalafiym uvow־yiheyeh hamiqedash qodesh qadashiym׃

⁴ קֹ֣דֶשׁ מִן־הָאָ֜רֶץ ה֗וּא לַכֹּ֨הֲנִ֜ים מְשָׁרְתֵ֤י הַמִּקְדָּשׁ֙ יִֽהְיֶ֔ה הַקְּרֵבִ֖ים לְשָׁרֵ֣ת אֶת־יְהוָ֑ה וְהָיָ֨ה לָהֶ֤ם מָקֹום֙ לְבָ֣תִּ֔ים וּמִקְדָּ֖שׁ לַמִּקְדָּֽשׁ׃ qodesh min־haʾarets huʾ lakohaniym mesharetey hamiqedash yiheyeh haqereviym lesharet ʾet־yehwah wehayah lahem maqowm levatiym umiqedash lamiqedash׃

⁵ וַחֲמִשָּׁ֨ה וְעֶשְׂרִ֥ים אֶ֙לֶף֙ אֹ֔רֶךְ וַעֲשֶׂ֥רֶת אֲלָפִ֖ים רֹ֑חַב [יִהְיֶה כ] (וְֽהָיָ֡ה ק) לַלְוִיִּם֩ מְשָׁרְתֵ֨י הַבַּ֧יִת לָהֶ֛ם לַאֲחֻזָּ֖ה עֶשְׂרִ֥ים לְשָׁכֹֽת׃ waḥamishah weʿeseriym ʾelef ʾorekhe waʿaseret ʾalafiym roḥav [yiheyeh kh] (wehayah q) lalewiyim mesharetey habayit lahem laʾaḥuzah ʿeseriym leshakhot׃

⁶ וַאֲחֻזַּ֨ת הָעִ֜יר תִּתְּנ֗וּ חֲמֵ֤שֶׁת אֲלָפִים֙ רֹ֔חַב וְאֹ֗רֶךְ חֲמִשָּׁ֤ה וְעֶשְׂרִים֙ אֶ֔לֶף לְעֻמַּ֖ת תְּרוּמַ֣ת הַקֹּ֑דֶשׁ לְכָל־בֵּ֥ית יִשְׂרָאֵ֖ל יִהְיֶֽה׃ waʾaḥuzat haʿiyr titenu ḥameshet ʾalafiym roḥav weʾorekhe ḥamishah weʿeseriym ʾelef leʿumat terumat haqodesh lekhal־beyt yiseraʾel yiheyeh׃

⁷ וְלַנָּשִׂ֡יא מִזֶּ֣ה וּמִזֶּה֩ לִתְרוּמַ֨ת הַקֹּ֜דֶשׁ וְלַאֲחֻזַּ֣ת הָעִ֗יר אֶל־פְּנֵ֤י תְרֽוּמַת־הַקֹּ֙דֶשׁ֙ וְאֶל־פְּנֵי֙ אֲחֻזַּ֣ת הָעִ֔יר מִפְּאַת־יָ֣ם יָ֔מָּה וּמִפְּאַת־קֵ֖דְמָה קָדִ֑ימָה וְאֹ֗רֶךְ לְעֻמֹּות֙ אַחַ֣ד הַחֲלָקִ֔ים מִגְּב֥וּל יָ֖ם אֶל־גְּב֥וּל קָדִֽימָה׃ welanasiyʾ mizeh umizeh literumat haqodesh welaʾaḥuzat haʿiyr ʾel־peney terumat־haqodesh weʾel־peney ʾaḥuzat haʿiyr mipeʾat־yam yamah umipeʾat־qedemah qadiymah weʾorekhe leʿumowt ʾaḥad haḥalaqiym migevul yam ʾel־gevul qadiymah׃

⁸ לָאָ֛רֶץ יִֽהְיֶה־לֹּ֥ו לַֽאֲחֻזָּ֖ה בְּיִשְׂרָאֵ֑ל וְלֹא־יֹונ֨וּ עֹ֤וד נְשִׂיאַי֙ אֶת־עַמִּ֔י וְהָאָ֛רֶץ יִתְּנ֥וּ לְבֵֽית־יִשְׂרָאֵ֖ל לְשִׁבְטֵיהֶֽם׃ ס laʾarets yiheyeh־low laʾaḥuzah beyiseraʾel weloʾ־yownu ʿowd nesiyʾay ʾet־ʿamiy wehaʾarets yitenu leveyt־yiseraʾel leshiveṭeyhem׃ s

⁹ כֹּֽה־אָמַ֞ר אֲדֹנָ֣י יְהוִ֗ה רַב־לָכֶם֙ נְשִׂיאֵ֣י יִשְׂרָאֵ֔ל חָמָ֤ס וָשֹׁד֙ הָסִ֔ירוּ וּמִשְׁפָּ֥ט וּצְדָקָ֖ה עֲשׂ֑וּ הָרִ֤ימוּ גְרֻשֹֽׁתֵיכֶם֙ מֵעַ֣ל עַמִּ֔י נְאֻ֖ם אֲדֹנָ֥י יְהוִֽה׃ koh־ʾamar ʾadonay yehwih rav־lakhem nesiyʾey yiseraʾel ḥamas washod hasiyru umishepaṭ utsedaqah ʿasu hariymu gerushoteykhem meʿal ʿamiy neʾum ʾadonay yehwih׃

¹⁰ מֹֽאזְנֵי־צֶ֧דֶק וְאֵֽיפַת־צֶ֛דֶק וּבַת־צֶ֖דֶק יְהִ֥י לָכֶֽם׃ moʾzeney־tsedeq weʾeyfat־tsedeq uvat־tsedeq yehiy lakhem׃

¹¹ הָאֵיפָ֣ה וְהַבַּ֗ת תֹּ֤כֶן אֶחָד֙ יִֽהְיֶ֔ה לָשֵׂ֕את מַעְשַׂ֥ר הַחֹ֖מֶר הַבָּ֑ת וַעֲשִׂירִ֤ת הַחֹ֙מֶר֙ הָֽאֵיפָ֔ה אֶל־הַחֹ֖מֶר יִהְיֶ֥ה מַתְכֻּנְתֹּֽו׃ haʾeyfah wehabat tokhen ʾeḥad yiheyeh laseʾt maʿesar haḥomer habat waʿasiyrit haḥomer haʾeyfah ʾel־haḥomer yiheyeh matekunetow׃

¹² וְהַשֶּׁ֖קֶל עֶשְׂרִ֣ים גֵּרָ֑ה עֶשְׂרִ֨ים שְׁקָלִ֜ים חֲמִשָּׁ֧ה וְעֶשְׂרִ֣ים שְׁקָלִ֗ים עֲשָׂרָ֤ה וַחֲמִשָּׁה֙ שֶׁ֔קֶל הַמָּנֶ֖ה יִֽהְיֶ֥ה לָכֶֽם׃ wehasheqel ʿeseriym gerah ʿeseriym sheqaliym ḥamishah weʿeseriym sheqaliym ʿasarah waḥamishah sheqel hamaneh yiheyeh lakhem׃

¹³ זֹ֥את הַתְּרוּמָ֖ה אֲשֶׁ֣ר תָּרִ֑ימוּ שִׁשִּׁ֤ית הָֽאֵיפָה֙ מֵחֹ֣מֶר הַֽחִטִּ֔ים וְשִׁשִּׁיתֶם֙ הָֽאֵיפָ֔ה מֵחֹ֖מֶר הַשְּׂעֹרִֽים׃ zoʾt haterumah ʾasher tariymu shishiyt haʾeyfah meḥomer haḥiṭiym weshishiytem haʾeyfah meḥomer haseʿoriym׃

¹⁴ וְחֹ֨ק הַשֶּׁ֜מֶן הַבַּ֣ת הַשֶּׁ֗מֶן מַעְשַׂ֤ר הַבַּת֙ מִן־הַכֹּ֔ר עֲשֶׂ֥רֶת הַבַּתִּ֖ים חֹ֑מֶר כִּֽי־עֲשֶׂ֥רֶת הַבַּתִּ֖ים חֹֽמֶר׃ weḥoq hashemen habat hashemen maʿesar habat min־hakor ʿaseret habatiym ḥomer kiy־ʿaseret habatiym ḥomer׃

¹⁵ וְשֶׂה־אַחַ֨ת מִן־הַצֹּ֤אן מִן־הַמָּאתַ֙יִם֙ מִמַּשְׁקֵ֣ה יִשְׂרָאֵ֔ל לְמִנְחָ֖ה וּלְעֹולָ֣ה וְלִשְׁלָמִ֑ים לְכַפֵּ֣ר עֲלֵיהֶ֔ם נְאֻ֖ם אֲדֹנָ֥י יְהוִֽה׃ weseh־ʾaḥat min־hatsoʾn min־hamaʾtayim mimasheqeh yiseraʾel lemineḥah uleʿowlah welishelamiym lekhaper ʿaleyhem neʾum ʾadonay yehwih׃

¹⁶ כֹּ֚ל הָעָ֣ם הָאָ֔רֶץ יִהְי֖וּ אֶל־הַתְּרוּמָ֣ה הַזֹּ֑את לַנָּשִׂ֖יא בְּיִשְׂרָאֵֽל׃ kol haʿam haʾarets yiheyu ʾel־haterumah hazoʾt lanasiyʾ beyiseraʾel׃

¹⁷ וְעַֽל־הַנָּשִׂ֣יא יִהְיֶ֗ה הָעֹולֹ֣ות וְהַמִּנְחָה֮ וְהַנֵּסֶךְ֒ בַּחַגִּ֤ים וּבֶחֳדָשִׁים֙ וּבַשַּׁבָּתֹ֔ות בְּכָֽל־מֹועֲדֵ֖י בֵּ֣ית יִשְׂרָאֵ֑ל הֽוּא־יַעֲשֶׂ֞ה אֶת־הַחַטָּ֣את וְאֶת־הַמִּנְחָ֗ה וְאֶת־הָֽעֹולָה֙ וְאֶת־הַשְּׁלָמִ֔ים לְכַפֵּ֖ר בְּעַ֥ד בֵּֽית־יִשְׂרָאֵֽל׃ ס weʿal־hanasiyʾ yiheyeh haʿowlowt wehamineḥah wehanesekhe baḥagiym uveḥodashiym uvashabatowt bekhal־mowʿadey beyt yiseraʾel huʾ־yaʿaseh ʾet־haḥaṭaʾt weʾet־hamineḥah weʾet־haʿowlah weʾet־hashelamiym lekhaper beʿad beyt־yiseraʾel׃ s

¹⁸ כֹּה־אָמַר֮ אֲדֹנָ֣י יְהוִה֒ בָּֽרִאשֹׁון֙ בְּאֶחָ֣ד לַחֹ֔דֶשׁ תִּקַּ֥ח פַּר־בֶּן־בָּקָ֖ר תָּמִ֑ים וְחִטֵּאתָ֖ אֶת־הַמִּקְדָּֽשׁ׃ koh־ʾamar ʾadonay yehwih bariʾshown beʾeḥad laḥodesh tiqaḥ par־ben־baqar tamiym weḥiṭeʾta ʾet־hamiqedash׃

¹⁹ וְלָקַ֨ח הַכֹּהֵ֜ן מִדַּ֣ם הַחַטָּ֗את וְנָתַן֙ אֶל־מְזוּזַ֣ת הַבַּ֔יִת וְאֶל־אַרְבַּ֛ע פִּנֹּ֥ות הָעֲזָרָ֖ה לַמִּזְבֵּ֑חַ וְעַ֨ל־מְזוּזַ֔ת שַׁ֖עַר הֶחָצֵ֥ר הַפְּנִימִֽית׃ welaqaḥ hakohen midam haḥaṭaʾt wenatan ʾel־mezuzat habayit weʾel־ʾarebaʿ pinowt haʿazarah lamizebeaḥ weʿal־mezuzat shaʿar heḥatser hapeniymiyt׃

²⁰ וְכֵ֤ן תַּֽעֲשֶׂה֙ בְּשִׁבְעָ֣ה בַחֹ֔דֶשׁ מֵאִ֥ישׁ שֹׁגֶ֖ה וּמִפֶּ֑תִי וְכִפַּרְתֶּ֖ם אֶת־הַבָּֽיִת׃ wekhen taʿaseh beshiveʿah vaḥodesh meʾiysh shogeh umipetiy wekhiparetem ʾet־habayit׃

²¹ בָּ֠רִאשֹׁון בְּאַרְבָּעָ֨ה עָשָׂ֥ר יֹום֙ לַחֹ֔דֶשׁ יִהְיֶ֥ה לָכֶ֖ם הַפָּ֑סַח חָ֕ג שְׁבֻעֹ֣ות יָמִ֔ים מַצֹּ֖ות יֵאָכֵֽל׃ bariʾshown beʾarebaʿah ʿasar yowm laḥodesh yiheyeh lakhem hapasaḥ ḥag shevuʿowt yamiym matsowt yeʾakhel׃

²² וְעָשָׂ֤ה הַנָּשִׂיא֙ בַּיֹּ֣ום הַה֔וּא בַּעֲדֹ֕ו וּבְעַ֖ד כָּל־עַ֣ם הָאָ֑רֶץ פַּ֖ר חַטָּֽאת׃ weʿasah hanasiyʾ bayowm hahuʾ baʿadow uveʿad kal־ʿam haʾarets par ḥaṭaʾt׃

²³ וְשִׁבְעַ֨ת יְמֵֽי־הֶחָ֜ג יַעֲשֶׂ֧ה עֹולָ֣ה לַֽיהוָ֗ה שִׁבְעַ֣ת פָּ֠רִים וְשִׁבְעַ֨ת אֵילִ֤ים תְּמִימִם֙ לַיֹּ֔ום שִׁבְעַ֖ת הַיָּמִ֑ים וְחַטָּ֕את שְׂעִ֥יר עִזִּ֖ים לַיֹּֽום׃ weshiveʿat yemey־heḥag yaʿaseh ʿowlah layhwah shiveʿat pariym weshiveʿat ʾeyliym temiymim layowm shiveʿat hayamiym weḥaṭaʾt seʿiyr ʿiziym layowm׃

²⁴ וּמִנְחָ֗ה אֵיפָ֥ה לַפָּ֛ר וְאֵיפָ֥ה לָאַ֖יִל יַֽעֲשֶׂ֑ה וְשֶׁ֖מֶן הִ֥ין לָאֵיפָֽה׃ umineḥah ʾeyfah lapar weʾeyfah laʾayil yaʿaseh weshemen hiyn laʾeyfah׃

²⁵ בַּשְּׁבִיעִ֡י בַּחֲמִשָּׁה֩ עָשָׂ֨ר יֹ֤ום לַחֹ֙דֶשׁ֙ בֶּחָ֔ג יַעֲשֶׂ֥ה כָאֵ֖לֶּה שִׁבְעַ֣ת הַיָּמִ֑ים כַּֽחַטָּאת֙ כָּעֹלָ֔ה וְכַמִּנְחָ֖ה וְכַשָּֽׁמֶן׃ ס basheviyʿiy baḥamishah ʿasar yowm laḥodesh beḥag yaʿaseh khaʾeleh shiveʿat hayamiym kaḥaṭaʾt kaʿolah wekhamineḥah wekhashamen׃ s