1 דְּבַר־יְהוָ֣ה ׀ אֲשֶׁ֣ר הָיָ֗ה אֶל־צְפַנְיָה֙ בֶּן־כּוּשִׁ֣י בֶן־גְּדַלְיָ֔ה בֶּן־אֲמַרְיָ֖ה בֶּן־חִזְקִיָּ֑ה בִּימֵ֛י יֹאשִׁיָּ֥הוּ בֶן־אָמֹ֖ון מֶ֥לֶךְ יְהוּדָֽה׃ devar־yehwah ׀ ʾasher hayah ʾel־tsefaneyah ben־kushiy ven־gedaleyah ben־ʾamareyah ben־ḥizeqiyah biymey yoʾshiyahu ven־ʾamown melekhe yehudah׃
2 אָסֹ֨ף אָסֵ֜ף כֹּ֗ל מֵעַ֛ל פְּנֵ֥י הָאֲדָמָ֖ה נְאֻם־יְהוָֽה׃ ʾasof ʾasef kol meʿal peney haʾadamah neʾum־yehwah׃
3 אָסֵ֨ף אָדָ֜ם וּבְהֵמָ֗ה אָסֵ֤ף עֹוף־הַשָּׁמַ֙יִם֙ וּדְגֵ֣י הַיָּ֔ם וְהַמַּכְשֵׁלֹ֖ות אֶת־הָרְשָׁעִ֑ים וְהִכְרַתִּ֣י אֶת־הָאָדָ֗ם מֵעַ֛ל פְּנֵ֥י הָאֲדָמָ֖ה נְאֻם־יְהוָֽה׃ ʾasef ʾadam uvehemah ʾasef ʿowf־hashamayim udegey hayam wehamakheshelowt ʾet־hareshaʿiym wehikheratiy ʾet־haʾadam meʿal peney haʾadamah neʾum־yehwah׃
4 וְנָטִ֤יתִי יָדִי֙ עַל־יְהוּדָ֔ה וְעַ֖ל כָּל־יֹושְׁבֵ֣י יְרוּשָׁלִָ֑ם וְהִכְרַתִּ֞י מִן־הַמָּקֹ֤ום הַזֶּה֙ אֶת־שְׁאָ֣ר הַבַּ֔עַל אֶת־שֵׁ֥ם הַכְּמָרִ֖ים עִם־הַכֹּהֲנִֽים׃ wenaṭiytiy yadiy ʿal־yehudah weʿal kal־yowshevey yerushalim wehikheratiy min־hamaqowm hazeh ʾet־sheʾar habaʿal ʾet־shem hakemariym ʿim־hakohaniym׃
5 וְאֶת־הַמִּשְׁתַּחֲוִ֥ים עַל־הַגַּגֹּ֖ות לִצְבָ֣א הַשָּׁמָ֑יִם וְאֶת־הַמִּֽשְׁתַּחֲוִים֙ הַנִּשְׁבָּעִ֣ים לַֽיהוָ֔ה וְהַנִּשְׁבָּעִ֖ים בְּמַלְכָּֽם׃ weʾet־hamishetaḥawiym ʿal־hagagowt litsevaʾ hashamayim weʾet־hamishetaḥawiym hanishebaʿiym layhwah wehanishebaʿiym bemalekam׃
6 וְאֶת־הַנְּסֹוגִ֖ים מֵאַחֲרֵ֣י יְהוָ֑ה וַאֲשֶׁ֛ר לֹֽא־בִקְשׁ֥וּ אֶת־יְהוָ֖ה וְלֹ֥א דְרָשֻֽׁהוּ׃ weʾet־hanesowgiym meʾaḥarey yehwah waʾasher loʾ־viqeshu ʾet־yehwah weloʾ derashuhu׃
7 הַ֕ס מִפְּנֵ֖י אֲדֹנָ֣י יְהוִ֑ה כִּ֤י קָרֹוב֙ יֹ֣ום יְהוָ֔ה כִּֽי־הֵכִ֧ין יְהוָ֛ה זֶ֖בַח הִקְדִּ֥ישׁ קְרֻאָֽיו׃ has mipeney ʾadonay yehwih kiy qarowv yowm yehwah kiy־hekhiyn yehwah zevaḥ hiqediysh qeruʾayw׃
8 וְהָיָ֗ה בְּיֹום֙ זֶ֣בַח יְהוָ֔ה וּפָקַדְתִּ֥י עַל־הַשָּׂרִ֖ים וְעַל־בְּנֵ֣י הַמֶּ֑לֶךְ וְעַ֥ל כָּל־הַלֹּבְשִׁ֖ים מַלְבּ֥וּשׁ נָכְרִֽי׃ wehayah beyowm zevaḥ yehwah ufaqadetiy ʿal־hasariym weʿal־beney hamelekhe weʿal kal־haloveshiym malebush nakheriy׃
9 וּפָקַדְתִּ֗י עַ֧ל כָּל־הַדֹּולֵ֛ג עַל־הַמִּפְתָּ֖ן בַּיֹּ֣ום הַה֑וּא הַֽמְמַלְאִ֛ים בֵּ֥ית אֲדֹנֵיהֶ֖ם חָמָ֥ס וּמִרְמָֽה׃ ס ufaqadetiy ʿal kal־hadowleg ʿal־hamifetan bayowm hahuʾ hamemaleʾiym beyt ʾadoneyhem ḥamas umiremah׃ s
10 וְהָיָה֩ בַיֹּ֨ום הַה֜וּא נְאֻם־יְהוָ֗ה קֹ֤ול צְעָקָה֙ מִשַּׁ֣עַר הַדָּגִ֔ים וִֽילָלָ֖ה מִן־הַמִּשְׁנֶ֑ה וְשֶׁ֥בֶר גָּדֹ֖ול מֵהַגְּבָעֹֽות׃ wehayah vayowm hahuʾ neʾum־yehwah qowl tseʿaqah mishaʿar hadagiym wiylalah min־hamisheneh weshever gadowl mehagevaʿowt׃
11 הֵילִ֖ילוּ יֹשְׁבֵ֣י הַמַּכְתֵּ֑שׁ כִּ֤י נִדְמָה֙ כָּל־עַ֣ם כְּנַ֔עַן נִכְרְת֖וּ כָּל־נְטִ֥ילֵי כָֽסֶף׃ heyliylu yoshevey hamakhetesh kiy nidemah kal־ʿam kenaʿan nikheretu kal־neṭiyley khasef׃
12 וְהָיָה֙ בָּעֵ֣ת הַהִ֔יא אֲחַפֵּ֥שׂ אֶת־יְרוּשָׁלִַ֖ם בַּנֵּרֹ֑ות וּפָקַדְתִּ֣י עַל־הָאֲנָשִׁ֗ים הַקֹּֽפְאִים֙ עַל־שִׁמְרֵיהֶ֔ם הָאֹֽמְרִים֙ בִּלְבָבָ֔ם לֹֽא־יֵיטִ֥יב יְהוָ֖ה וְלֹ֥א יָרֵֽעַ׃ wehayah baʿet hahiyʾ ʾaḥapes ʾet־yerushalim banerowt ufaqadetiy ʿal־haʾanashiym haqofeʾiym ʿal־shimereyhem haʾomeriym bilevavam loʾ־yeyṭiyv yehwah weloʾ yareaʿ׃
13 וְהָיָ֤ה חֵילָם֙ לִמְשִׁסָּ֔ה וּבָתֵּיהֶ֖ם לִשְׁמָמָ֑ה וּבָנ֤וּ בָתִּים֙ וְלֹ֣א יֵשֵׁ֔בוּ וְנָטְע֣וּ כְרָמִ֔ים וְלֹ֥א יִשְׁתּ֖וּ אֶת־יֵינָֽם׃ wehayah ḥeylam limeshisah uvateyhem lishemamah uvanu vatiym weloʾ yeshevu wenaṭeʿu kheramiym weloʾ yishetu ʾet־yeynam׃
14 קָרֹ֤וב יֹום־יְהוָה֙ הַגָּדֹ֔ול קָרֹ֖וב וּמַהֵ֣ר מְאֹ֑ד קֹ֚ול יֹ֣ום יְהוָ֔ה מַ֥ר צֹרֵ֖חַ שָׁ֥ם גִּבֹּֽור׃ qarowv yowm־yehwah hagadowl qarowv umaher meʾod qowl yowm yehwah mar tsoreaḥ sham gibowr׃
15 יֹ֥ום עֶבְרָ֖ה הַיֹּ֣ום הַה֑וּא יֹ֧ום צָרָ֣ה וּמְצוּקָ֗ה יֹ֤ום שֹׁאָה֙ וּמְשֹׁואָ֔ה יֹ֥ום חֹ֙שֶׁךְ֙ וַאֲפֵלָ֔ה יֹ֥ום עָנָ֖ן וַעֲרָפֶֽל׃ yowm ʿeverah hayowm hahuʾ yowm tsarah umetsuqah yowm shoʾah umeshowʾah yowm ḥoshekhe waʾafelah yowm ʿanan waʿarafel׃
16 יֹ֥ום שֹׁופָ֖ר וּתְרוּעָ֑ה עַ֚ל הֶעָרִ֣ים הַבְּצֻרֹ֔ות וְעַ֖ל הַפִּנֹּ֥ות הַגְּבֹהֹֽות׃ yowm showfar uteruʿah ʿal heʿariym habetsurowt weʿal hapinowt hagevohowt׃
17 וַהֲצֵרֹ֣תִי לָאָדָ֗ם וְהָֽלְכוּ֙ כַּֽעִוְרִ֔ים כִּ֥י לַֽיהוָ֖ה חָטָ֑אוּ וְשֻׁפַּ֤ךְ דָּמָם֙ כֶּֽעָפָ֔ר וּלְחֻמָ֖ם כַּגְּלָלִֽים׃ wahatserotiy laʾadam wehalekhu kaʿiweriym kiy layhwah ḥaṭaʾu weshupakhe damam keʿafar uleḥumam kagelaliym׃
18 גַּם־כַּסְפָּ֨ם גַּם־זְהָבָ֜ם לֹֽא־יוּכַ֣ל לְהַצִּילָ֗ם בְּיֹום֙ עֶבְרַ֣ת יְהוָ֔ה וּבְאֵשׁ֙ קִנְאָתֹ֔ו תֵּאָכֵ֖ל כָּל־הָאָ֑רֶץ כִּֽי־כָלָ֤ה אַךְ־נִבְהָלָה֙ יַֽעֲשֶׂ֔ה אֵ֥ת כָּל־יֹשְׁבֵ֖י הָאָֽרֶץ׃ ס gam־kasepam gam־zehavam loʾ־yukhal lehatsiylam beyowm ʿeverat yehwah uveʾesh qineʾatow teʾakhel kal־haʾarets kiy־khalah ʾakhe־nivehalah yaʿaseh ʾet kal־yoshevey haʾarets׃ s