Josué 10

¹ וַיְהִי֩ כִשְׁמֹ֨עַ אֲדֹֽנִי־צֶ֜דֶק מֶ֣לֶךְ יְרוּשָׁלִַ֗ם כִּֽי־לָכַ֨ד יְהֹושֻׁ֣עַ אֶת־הָעַי֮ וַיַּחֲרִימָהּ֒ כַּאֲשֶׁ֨ר עָשָׂ֤ה לִֽירִיחֹו֙ וּלְמַלְכָּ֔הּ כֵּן־עָשָׂ֥ה לָעַ֖י וּלְמַלְכָּ֑הּ וְכִ֨י הִשְׁלִ֜ימוּ יֹשְׁבֵ֤י גִבְעֹון֙ אֶת־יִשְׂרָאֵ֔ל וַיִּֽהְי֖וּ בְּקִרְבָּֽם׃ wayehiy khishemoaʿ ʾadoniy־tsedeq melekhe yerushalim kiy־lakhad yehowshuaʿ ʾet־haʿay wayaḥariymah kaʾasher ʿasah liyriyḥow ulemalekah ken־ʿasah laʿay ulemalekah wekhiy hisheliymu yoshevey giveʿown ʾet־yiseraʾel wayiheyu beqirebam׃

² וַיִּֽירְא֣וּ מְאֹ֔ד כִּ֣י עִ֤יר גְּדֹולָה֙ גִּבְעֹ֔ון כְּאַחַ֖ת עָרֵ֣י הַמַּמְלָכָ֑ה וְכִ֨י הִ֤יא גְדֹולָה֙ מִן־הָעַ֔י וְכָל־אֲנָשֶׁ֖יהָ גִּבֹּרִֽים׃ wayiyreʾu meʾod kiy ʿiyr gedowlah giveʿown keʾaḥat ʿarey hamamelakhah wekhiy hiyʾ gedowlah min־haʿay wekhal־ʾanasheyha giboriym׃

³ וַיִּשְׁלַ֨ח אֲדֹנִי־צֶ֜דֶק מֶ֣לֶךְ יְרוּשָׁלִַ֗ם אֶל־הֹוהָ֣ם מֶֽלֶךְ־חֶ֠בְרֹון וְאֶל־פִּרְאָ֨ם מֶֽלֶךְ־יַרְמ֜וּת וְאֶל־יָפִ֧יעַ מֶֽלֶךְ־לָכִ֛ישׁ וְאֶל־דְּבִ֥יר מֶֽלֶךְ־עֶגְלֹ֖ון לֵאמֹֽר׃ wayishelaḥ ʾadoniy־tsedeq melekhe yerushalim ʾel־howham melekhe־ḥeverown weʾel־pireʾam melekhe־yaremut weʾel־yafiyʿa melekhe־lakhiysh weʾel־deviyr melekhe־ʿegelown leʾmor׃

⁴ עֲלֽוּ־אֵלַ֣י וְעִזְרֻ֔נִי וְנַכֶּ֖ה אֶת־גִּבְעֹ֑ון כִּֽי־הִשְׁלִ֥ימָה אֶת־יְהֹושֻׁ֖עַ וְאֶת־בְּנֵ֥י יִשְׂרָאֵֽל׃ ʿalu־ʾelay weʿizeruniy wenakeh ʾet־giveʿown kiy־hisheliymah ʾet־yehowshuaʿ weʾet־beney yiseraʾel׃

⁵ וַיֵּאָסְפ֨וּ וַֽיַּעֲל֜וּ חֲמֵ֣שֶׁת ׀ מַלְכֵ֣י הָאֱמֹרִ֗י מֶ֣לֶךְ יְרוּשָׁלִַ֜ם מֶֽלֶךְ־חֶבְרֹ֤ון מֶֽלֶךְ־יַרְמוּת֙ מֶֽלֶךְ־לָכִ֣ישׁ מֶֽלֶךְ־עֶגְלֹ֔ון הֵ֖ם וְכָל־מַֽחֲנֵיהֶ֑ם וַֽיַּחֲנוּ֙ עַל־גִּבְעֹ֔ון וַיִּֽלָּחֲמ֖וּ עָלֶֽיהָ׃ wayeʾasefu wayaʿalu ḥameshet ׀ malekhey haʾemoriy melekhe yerushalim melekhe־ḥeverown melekhe־yaremut melekhe־lakhiysh melekhe־ʿegelown hem wekhal־maḥaneyhem wayaḥanu ʿal־giveʿown wayilaḥamu ʿaleyha׃

⁶ וַיִּשְׁלְח֣וּ אַנְשֵׁי֩ גִבְעֹ֨ון אֶל־יְהֹושֻׁ֤עַ אֶל־הַֽמַּחֲנֶה֙ הַגִּלְגָּ֣לָה לֵאמֹ֔ר אַל־תֶּ֥רֶף יָדֶ֖יךָ מֵֽעֲבָדֶ֑יךָ עֲלֵ֧ה אֵלֵ֣ינוּ מְהֵרָ֗ה וְהֹושִׁ֤יעָה לָּ֙נוּ֙ וְעָזְרֵ֔נוּ כִּ֚י נִקְבְּצ֣וּ אֵלֵ֔ינוּ כָּל־מַלְכֵ֥י הָאֱמֹרִ֖י יֹשְׁבֵ֥י הָהָֽר׃ wayisheleḥu ʾaneshey giveʿown ʾel־yehowshuaʿ ʾel־hamaḥaneh hagilegalah leʾmor ʾal־teref yadeykha meʿavadeykha ʿaleh ʾeleynu meherah wehowshiyʿah lanu weʿazerenu kiy niqebetsu ʾeleynu kal־malekhey haʾemoriy yoshevey hahar׃

⁷ וַיַּ֨עַל יְהֹושֻׁ֜עַ מִן־הַגִּלְגָּ֗ל ה֚וּא וְכָל־עַ֤ם הַמִּלְחָמָה֙ עִמֹּ֔ו וְכֹ֖ל גִּבֹּורֵ֥י הֶחָֽיִל׃ פ wayaʿal yehowshuaʿ min־hagilegal huʾ wekhal־ʿam hamileḥamah ʿimow wekhol gibowrey heḥayil׃ f

⁸ וַיֹּ֨אמֶר יְהוָ֤ה אֶל־יְהֹושֻׁ֙עַ֙ אַל־תִּירָ֣א מֵהֶ֔ם כִּ֥י בְיָדְךָ֖ נְתַתִּ֑ים לֹֽא־יַעֲמֹ֥ד אִ֛ישׁ מֵהֶ֖ם בְּפָנֶֽיךָ׃ wayoʾmer yehwah ʾel־yehowshuaʿ ʾal־tiyraʾ mehem kiy veyadekha netatiym loʾ־yaʿamod ʾiysh mehem befaneykha׃

⁹ וַיָּבֹ֧א אֲלֵיהֶ֛ם יְהֹושֻׁ֖עַ פִּתְאֹ֑ם כָּל־הַלַּ֕יְלָה עָלָ֖ה מִן־הַגִּלְגָּֽל׃ wayavoʾ ʾaleyhem yehowshuaʿ piteʾom kal־halayelah ʿalah min־hagilegal׃

¹⁰ וַיְהֻמֵּ֤ם יְהוָה֙ לִפְנֵ֣י יִשְׂרָאֵ֔ל וַיַּכֵּ֥ם מַכָּֽה־גְדֹולָ֖ה בְּגִבְעֹ֑ון וַֽיִּרְדְּפֵ֗ם דֶּ֚רֶךְ מַעֲלֵ֣ה בֵית־חֹורֹ֔ן וַיַּכֵּ֥ם עַד־עֲזֵקָ֖ה וְעַד־מַקֵּדָֽה׃ wayehumem yehwah lifeney yiseraʾel wayakem makah־gedowlah begiveʿown wayiredefem derekhe maʿaleh veyt־ḥowron wayakem ʿad־ʿazeqah weʿad־maqedah׃

¹¹ וַיְהִ֞י בְּנֻסָ֣ם ׀ מִפְּנֵ֣י יִשְׂרָאֵ֗ל הֵ֞ם בְּמֹורַ֤ד בֵּית־חֹורֹן֙ וַֽיהוָ֡ה הִשְׁלִ֣יךְ עֲלֵיהֶם֩ אֲבָנִ֨ים גְּדֹלֹ֧ות מִן־הַשָּׁמַ֛יִם עַד־עֲזֵקָ֖ה וַיָּמֻ֑תוּ רַבִּ֗ים אֲשֶׁר־מֵ֙תוּ֙ בְּאַבְנֵ֣י הַבָּרָ֔ד מֵאֲשֶׁ֥ר הָרְג֛וּ בְּנֵ֥י יִשְׂרָאֵ֖ל בֶּחָֽרֶב׃ ס wayehiy benusam ׀ mipeney yiseraʾel hem bemowrad beyt־ḥowron wayhwah hisheliykhe ʿaleyhem ʾavaniym gedolowt min־hashamayim ʿad־ʿazeqah wayamutu rabiym ʾasher־metu beʾaveney habarad meʾasher haregu beney yiseraʾel beḥarev׃ s

¹² אָ֣ז יְדַבֵּ֤ר יְהֹושֻׁעַ֙ לַֽיהוָ֔ה בְּיֹ֗ום תֵּ֤ת יְהוָה֙ אֶת־הָ֣אֱמֹרִ֔י לִפְנֵ֖י בְּנֵ֣י יִשְׂרָאֵ֑ל וַיֹּ֣אמֶר ׀ לְעֵינֵ֣י יִשְׂרָאֵ֗ל מֶשׁ בְּגִבְעֹ֣ון דֹּ֔ום וְיָרֵ֖חַ בְּעֵ֥מֶק אַיָּלֹֽון׃ ʾaz yedaber yehowshuaʿ layhwah beyowm tet yehwah ʾet־haʾemoriy lifeney beney yiseraʾel wayoʾmer ׀ leʿeyney yiseraʾel mesh begiveʿown dowm weyareaḥ beʿemeq ʾayalown׃

¹³ וַיִּדֹּ֨ם הַשֶּׁ֜מֶשׁ וְיָרֵ֣חַ עָמָ֗ד עַד־יִקֹּ֥ם גֹּוי֙ אֹֽיְבָ֔יו הֲלֹא־הִ֥יא כְתוּבָ֖ה עַל־סֵ֣פֶר הַיָּשָׁ֑ר וַיַּעֲמֹ֤ד הַשֶּׁ֙מֶשׁ֙ בַּחֲצִ֣י הַשָּׁמַ֔יִם וְלֹא־אָ֥ץ לָבֹ֖וא כְּיֹ֥ום תָּמִֽים׃ wayidom hashemesh weyareaḥ ʿamad ʿad־yiqom gowy ʾoyevayw haloʾ־hiyʾ khetuvah ʿal־sefer hayashar wayaʿamod hashemesh baḥatsiy hashamayim weloʾ־ʾats lavowʾ keyowm tamiym׃

¹⁴ וְלֹ֨א הָיָ֜ה כַּיֹּ֤ום הַהוּא֙ לְפָנָ֣יו וְאַחֲרָ֔יו לִשְׁמֹ֥עַ יְהוָ֖ה בְּקֹ֣ול אִ֑ישׁ כִּ֣י יְהוָ֔ה נִלְחָ֖ם לְיִשְׂרָאֵֽל׃ פ weloʾ hayah kayowm hahuʾ lefanayw weʾaḥarayw lishemoaʿ yehwah beqowl ʾiysh kiy yehwah nileḥam leyiseraʾel׃ f

¹⁵ וַיָּ֤שָׁב יְהֹושֻׁ֙עַ֙ וְכָל־יִשְׂרָאֵ֣ל עִמֹּ֔ו אֶל־הַֽמַּחֲנֶ֖ה הַגִּלְגָּֽלָה׃ wayashav yehowshuaʿ wekhal־yiseraʾel ʿimow ʾel־hamaḥaneh hagilegalah׃

¹⁶ וַיָּנֻ֕סוּ חֲמֵ֖שֶׁת הַמְּלָכִ֣ים הָאֵ֑לֶּה וַיֵּחָבְא֥וּ בַמְּעָרָ֖ה בְּמַקֵּדָֽה׃ wayanusu ḥameshet hamelakhiym haʾeleh wayeḥaveʾu vameʿarah bemaqedah׃

¹⁷ וַיֻּגַּ֖ד לִיהֹושֻׁ֣עַ לֵאמֹ֑ר נִמְצְאוּ֙ חֲמֵ֣שֶׁת הַמְּלָכִ֔ים נֶחְבְּאִ֥ים בַּמְּעָרָ֖ה בְּמַקֵּדָֽה׃ wayugad liyhowshuaʿ leʾmor nimetseʾu ḥameshet hamelakhiym neḥebeʾiym bameʿarah bemaqedah׃

¹⁸ וַיֹּ֣אמֶר יְהֹושֻׁ֔עַ גֹּ֛לּוּ אֲבָנִ֥ים גְּדֹלֹ֖ות אֶל־פִּ֣י הַמְּעָרָ֑ה וְהַפְקִ֧ידוּ עָלֶ֛יהָ אֲנָשִׁ֖ים לְשָׁמְרָֽם׃ wayoʾmer yehowshuaʿ golu ʾavaniym gedolowt ʾel־piy hameʿarah wehafeqiydu ʿaleyha ʾanashiym leshameram׃

¹⁹ וְאַתֶּם֙ אַֽל־תַּעֲמֹ֔דוּ רִדְפוּ֙ אַחֲרֵ֣י אֹֽיְבֵיכֶ֔ם וְזִנַּבְתֶּ֖ם אֹותָ֑ם אַֽל־תִּתְּנ֗וּם לָבֹוא֙ אֶל־עָ֣רֵיהֶ֔ם כִּ֧י נְתָנָ֛ם יְהוָ֥ה אֱלֹהֵיכֶ֖ם בְּיֶדְכֶֽם׃ weʾatem ʾal־taʿamodu ridefu ʾaḥarey ʾoyeveykhem wezinavetem ʾowtam ʾal־titenum lavowʾ ʾel־ʿareyhem kiy netanam yehwah ʾeloheykhem beyedekhem׃

²⁰ וַיְהִי֩ כְּכַלֹּ֨ות יְהֹושֻׁ֜עַ וּבְנֵ֣י יִשְׂרָאֵ֗ל לְהַכֹּותָ֛ם מַכָּ֥ה גְדֹולָֽה־מְאֹ֖ד עַד־תֻּמָּ֑ם וְהַשְּׂרִידִים֙ שָׂרְד֣וּ מֵהֶ֔ם וַיָּבֹ֖אוּ אֶל־עָרֵ֥י הַמִּבְצָֽר׃ wayehiy kekhalowt yehowshuaʿ uveney yiseraʾel lehakowtam makah gedowlah־meʾod ʿad־tumam wehaseriydiym saredu mehem wayavoʾu ʾel־ʿarey hamivetsar׃

²¹ וַיָּשֻׁבוּ֩ כָל־הָעָ֨ם אֶל־הַמַּחֲנֶ֧ה אֶל־יְהֹושֻׁ֛עַ מַקֵּדָ֖ה בְּשָׁלֹ֑ום לֹֽא־חָרַ֞ץ לִבְנֵ֧י יִשְׂרָאֵ֛ל לְאִ֖ישׁ אֶת־לְשֹׁנֹֽו׃ wayashuvu khal־haʿam ʾel־hamaḥaneh ʾel־yehowshuaʿ maqedah beshalowm loʾ־ḥarats liveney yiseraʾel leʾiysh ʾet־leshonow׃

²² וַיֹּ֣אמֶר יְהֹושֻׁ֔עַ פִּתְח֖וּ אֶת־פִּ֣י הַמְּעָרָ֑ה וְהֹוצִ֣יאוּ אֵלַ֗י אֶת־חֲמֵ֛שֶׁת הַמְּלָכִ֥ים הָאֵ֖לֶּה מִן־הַמְּעָרָֽה׃ wayoʾmer yehowshuaʿ piteḥu ʾet־piy hameʿarah wehowtsiyʾu ʾelay ʾet־ḥameshet hamelakhiym haʾeleh min־hameʿarah׃

²³ וַיַּ֣עֲשׂוּ כֵ֔ן וַיֹּצִ֣יאוּ אֵלָ֗יו אֶת־חֲמֵ֛שֶׁת הַמְּלָכִ֥ים הָאֵ֖לֶּה מִן־הַמְּעָרָ֑ה אֵ֣ת ׀ מֶ֣לֶךְ יְרוּשָׁלִַ֗ם אֶת־מֶ֤לֶךְ חֶבְרֹון֙ אֶת־מֶ֣לֶךְ יַרְמ֔וּת אֶת־מֶ֥לֶךְ לָכִ֖ישׁ אֶת־מֶ֥לֶךְ עֶגְלֹֽון׃ wayaʿasu khen wayotsiyʾu ʾelayw ʾet־ḥameshet hamelakhiym haʾeleh min־hameʿarah ʾet ׀ melekhe yerushalim ʾet־melekhe ḥeverown ʾet־melekhe yaremut ʾet־melekhe lakhiysh ʾet־melekhe ʿegelown׃

²⁴ וַ֠יְהִי כְּֽהֹוצִיאָ֞ם אֶת־הַמְּלָכִ֣ים הָאֵלֶּה֮ אֶל־יְהֹושֻׁעַ֒ וַיִּקְרָ֨א יְהֹושֻׁ֜עַ אֶל־כָּל־אִ֣ישׁ יִשְׂרָאֵ֗ל וַ֠יֹּאמֶר אֶל־קְצִינֵ֞י אַנְשֵׁ֤י הַמִּלְחָמָה֙ הֶהָלְכ֣וּא אִתֹּ֔ו קִרְב֗וּ ימוּ אֶת־רַגְלֵיכֶ֔ם עַֽל־צַוְּארֵ֖י הַמְּלָכִ֣ים הָאֵ֑לֶּה וַֽיִּקְרְב֔וּ וַיָּשִׂ֥ימוּ אֶת־רַגְלֵיהֶ֖ם עַל־צַוְּארֵיהֶֽם׃ wayehiy kehowtsiyʾam ʾet־hamelakhiym haʾeleh ʾel־yehowshuaʿ wayiqeraʾ yehowshuaʿ ʾel־kal־ʾiysh yiseraʾel wayoʾmer ʾel־qetsiyney ʾaneshey hamileḥamah hehalekhuʾ ʾitow qirevu ymu ʾet־rageleykhem ʿal־tsaueʾrey hamelakhiym haʾeleh wayiqerevu wayasiymu ʾet־rageleyhem ʿal־tsaueʾreyhem׃

²⁵ וַיֹּ֤אמֶר אֲלֵיהֶם֙ יְהֹושֻׁ֔עַ אַל־תִּֽירְא֖וּ וְאַל־תֵּחָ֑תּוּ חִזְק֣וּ וְאִמְצ֔וּ כִּ֣י כָ֗כָה יַעֲשֶׂ֤ה יְהוָה֙ לְכָל־אֹ֣יְבֵיכֶ֔ם אֲשֶׁ֥ר אַתֶּ֖ם נִלְחָמִ֥ים אֹותָֽם׃ wayoʾmer ʾaleyhem yehowshuaʿ ʾal־tiyreʾu weʾal־teḥatu ḥizequ weʾimetsu kiy khakhah yaʿaseh yehwah lekhal־ʾoyeveykhem ʾasher ʾatem nileḥamiym ʾowtam׃

²⁶ וַיַּכֵּ֨ם יְהֹושֻׁ֤עַ אַֽחֲרֵי־כֵן֙ וַיְמִיתֵ֔ם וַיִּתְלֵ֕ם עַ֖ל חֲמִשָּׁ֣ה עֵצִ֑ים וַיִּֽהְי֛וּ תְּלוּיִ֥ם עַל־הָעֵצִ֖ים עַד־הָעָֽרֶב׃ wayakem yehowshuaʿ ʾaḥarey־khen wayemiytem wayitelem ʿal ḥamishah ʿetsiym wayiheyu teluyim ʿal־haʿetsiym ʿad־haʿarev׃

²⁷ וַיְהִ֞י לְעֵ֣ת ׀ בֹּ֣וא הַשֶּׁ֗מֶשׁ צִוָּ֤ה יְהֹושֻׁ֙עַ֙ וַיֹּֽרִידוּם֙ מֵעַ֣ל הָעֵצִ֔ים וַיַּ֨שְׁלִכֻ֔ם אֶל־הַמְּעָרָ֖ה אֲשֶׁ֣ר נֶחְבְּאוּ־שָׁ֑ם וַיָּשִׂ֜מוּ אֲבָנִ֤ים גְּדֹלֹות֙ עַל־פִּ֣י הַמְּעָרָ֔ה עַד־עֶ֖צֶם הַיֹּ֥ום הַזֶּֽה׃ פ wayehiy leʿet ׀ bowʾ hashemesh tsiuah yehowshuaʿ wayoriydum meʿal haʿetsiym wayashelikhum ʾel־hameʿarah ʾasher neḥebeʾu־sham wayasimu ʾavaniym gedolowt ʿal־piy hameʿarah ʿad־ʿetsem hayowm hazeh׃ f

²⁸ וְאֶת־מַקֵּדָה֩ לָכַ֨ד יְהֹושֻׁ֜עַ בַּיֹּ֣ום הַה֗וּא וַיַּכֶּ֣הָ לְפִי־חֶרֶב֮ וְאֶת־מַלְכָּהּ֒ הֶחֱרִ֣ם אֹותָ֗ם וְאֶת־כָּל־הַנֶּ֙פֶשׁ֙ אֲשֶׁר־בָּ֔הּ לֹ֥א הִשְׁאִ֖יר שָׂרִ֑יד וַיַּ֙עַשׂ֙ לְמֶ֣לֶךְ מַקֵּדָ֔ה כַּאֲשֶׁ֥ר עָשָׂ֖ה לְמֶ֥לֶךְ יְרִיחֹֽו׃ weʾet־maqedah lakhad yehowshuaʿ bayowm hahuʾ wayakeah lefiy־ḥerev weʾet־malekah heḥerim ʾowtam weʾet־kal־hanefesh ʾasher־bah loʾ hisheʾiyr sariyd wayaʿas lemelekhe maqedah kaʾasher ʿasah lemelekhe yeriyḥow׃

²⁹ וַיַּעֲבֹ֣ר יְ֠הֹושֻׁעַ וְכָֽל־יִשְׂרָאֵ֥ל עִמֹּ֛ו מִמַּקֵּדָ֖ה לִבְנָ֑ה וַיִּלָּ֖חֶם עִם־לִבְנָֽה׃ wayaʿavor yehowshuaʿ wekhal־yiseraʾel ʿimow mimaqedah livenah wayilaḥem ʿim־livenah׃

³⁰ וַיִּתֵּן֩ יְהוָ֨ה גַּם־אֹותָ֜הּ בְּיַ֣ד יִשְׂרָאֵל֮ וְאֶת־מַלְכָּהּ֒ וַיַּכֶּ֣הָ לְפִי־חֶ֗רֶב וְאֶת־כָּל־הַנֶּ֙פֶשׁ֙ אֲשֶׁר־בָּ֔הּ לֹֽא־הִשְׁאִ֥יר בָּ֖הּ שָׂרִ֑יד וַיַּ֣עַשׂ לְמַלְכָּ֔הּ כַּאֲשֶׁ֥ר עָשָׂ֖ה לְמֶ֥לֶךְ יְרִיחֹֽו׃ ס wayiten yehwah gam־ʾowtah beyad yiseraʾel weʾet־malekah wayakeah lefiy־ḥerev weʾet־kal־hanefesh ʾasher־bah loʾ־hisheʾiyr bah sariyd wayaʿas lemalekah kaʾasher ʿasah lemelekhe yeriyḥow׃ s

³¹ וַיַּעֲבֹ֣ר יְ֠הֹושֻׁעַ וְכָל־יִשְׂרָאֵ֥ל עִמֹּ֛ו מִלִּבְנָ֖ה לָכִ֑ישָׁה וַיִּ֣חַן עָלֶ֔יהָ וַיִּלָּ֖חֶם בָּֽהּ׃ wayaʿavor yehowshuaʿ wekhal־yiseraʾel ʿimow milivenah lakhiyshah wayiḥan ʿaleyha wayilaḥem bah׃

³² וַיִּתֵּן֩ יְהוָ֨ה אֶת־לָכִ֜ישׁ בְּיַ֣ד יִשְׂרָאֵ֗ל וַֽיִּלְכְּדָהּ֙ בַּיֹּ֣ום הַשֵּׁנִ֔י וַיַּכֶּ֣הָ לְפִי־חֶ֔רֶב וְאֶת־כָּל־הַנֶּ֖פֶשׁ אֲשֶׁר־בָּ֑הּ כְּכֹ֥ל אֲשֶׁר־עָשָׂ֖ה לְלִבְנָֽה׃ פ wayiten yehwah ʾet־lakhiysh beyad yiseraʾel wayilekedah bayowm hasheniy wayakeah lefiy־ḥerev weʾet־kal־hanefesh ʾasher־bah kekhol ʾasher־ʿasah lelivenah׃ f

³³ אָ֣ז עָלָ֗ה הֹרָם֙ מֶ֣לֶךְ גֶּ֔זֶר לַעְזֹ֖ר אֶת־לָכִ֑ישׁ וַיַּכֵּ֤הוּ יְהֹושֻׁ֙עַ֙ וְאֶת־עַמֹּ֔ו עַד־בִּלְתִּ֥י הִשְׁאִֽיר־לֹ֖ו שָׂרִֽיד׃ ʾaz ʿalah horam melekhe gezer laʿezor ʾet־lakhiysh wayakehu yehowshuaʿ weʾet־ʿamow ʿad־biletiy hisheʾiyr־low sariyd׃

³⁴ וַיַּעֲבֹ֣ר יְ֠הֹושֻׁעַ וְכָל־יִשְׂרָאֵ֥ל עִמֹּ֛ו מִלָּכִ֖ישׁ עֶגְלֹ֑נָה וַיַּחֲנ֣וּ עָלֶ֔יהָ וַיִּֽלָּחֲמ֖וּ עָלֶֽיהָ׃ wayaʿavor yehowshuaʿ wekhal־yiseraʾel ʿimow milakhiysh ʿegelonah wayaḥanu ʿaleyha wayilaḥamu ʿaleyha׃

³⁵ וַֽיִּלְכְּד֜וּהָ בַּיֹּ֤ום הַהוּא֙ וַיַּכּ֣וּהָ לְפִי־חֶ֔רֶב וְאֵת֙ כָּל־הַנֶּ֣פֶשׁ אֲשֶׁר־בָּ֔הּ בַּיֹּ֥ום הַה֖וּא הֶחֱרִ֑ים כְּכֹ֥ל אֲשֶׁר־עָשָׂ֖ה לְלָכִֽישׁ׃ פ wayilekeduah bayowm hahuʾ wayakuah lefiy־ḥerev weʾet kal־hanefesh ʾasher־bah bayowm hahuʾ heḥeriym kekhol ʾasher־ʿasah lelakhiysh׃ f

³⁶ וַיַּ֣עַל יְ֠הֹושֻׁעַ וְכָֽל־יִשְׂרָאֵ֥ל עִמֹּ֛ו מֵעֶגְלֹ֖ונָה חֶבְרֹ֑ונָה וַיִּֽלָּחֲמ֖וּ עָלֶֽיהָ׃ wayaʿal yehowshuaʿ wekhal־yiseraʾel ʿimow meʿegelownah ḥeverownah wayilaḥamu ʿaleyha׃

³⁷ וַיִּלְכְּד֣וּהָ וַיַּכּֽוּהָ־לְפִי־חֶ֠רֶב וְאֶת־מַלְכָּ֨הּ וְאֶת־כָּל־עָרֶ֜יהָ וְאֶת־כָּל־הַנֶּ֤פֶשׁ אֲשֶׁר־בָּהּ֙ לֹֽא־הִשְׁאִ֣יר שָׂרִ֔יד כְּכֹ֥ל אֲשֶׁר־עָשָׂ֖ה לְעֶגְלֹ֑ון וַיַּחֲרֵ֣ם אֹותָ֔הּ וְאֶת־כָּל־הַנֶּ֖פֶשׁ אֲשֶׁר־בָּֽהּ׃ ס wayilekeduah wayakuah־lefiy־ḥerev weʾet־malekah weʾet־kal־ʿareyha weʾet־kal־hanefesh ʾasher־bah loʾ־hisheʾiyr sariyd kekhol ʾasher־ʿasah leʿegelown wayaḥarem ʾowtah weʾet־kal־hanefesh ʾasher־bah׃ s

³⁸ וַיָּ֧שָׁב יְהֹושֻׁ֛עַ וְכָל־יִשְׂרָאֵ֥ל עִמֹּ֖ו דְּבִ֑רָה וַיִּלָּ֖חֶם עָלֶֽיהָ׃ wayashav yehowshuaʿ wekhal־yiseraʾel ʿimow devirah wayilaḥem ʿaleyha׃

³⁹ וַֽיִּלְכְּדָ֞הּ וְאֶת־מַלְכָּ֤הּ וְאֶת־כָּל־עָרֶ֙יהָ֙ וַיַּכּ֣וּם לְפִי־חֶ֔רֶב וַֽיַּחֲרִ֙ימוּ֙ אֶת־כָּל־נֶ֣פֶשׁ אֲשֶׁר־בָּ֔הּ לֹ֥א הִשְׁאִ֖יר שָׂרִ֑יד כַּאֲשֶׁ֨ר עָשָׂ֜ה לְחֶבְרֹ֗ון כֵּן־עָשָׂ֤ה לִדְבִ֙רָה֙ וּלְמַלְכָּ֔הּ וְכַאֲשֶׁ֥ר עָשָׂ֛ה לְלִבְנָ֖ה וּלְמַלְכָּֽהּ׃ wayilekedah weʾet־malekah weʾet־kal־ʿareyha wayakum lefiy־ḥerev wayaḥariymu ʾet־kal־nefesh ʾasher־bah loʾ hisheʾiyr sariyd kaʾasher ʿasah leḥeverown ken־ʿasah lidevirah ulemalekah wekhaʾasher ʿasah lelivenah ulemalekah׃

⁴⁰ וַיַּכֶּ֣ה יְהֹושֻׁ֣עַ אֶת־כָּל־הָאָ֡רֶץ הָהָר֩ וְהַנֶּ֨גֶב וְהַשְּׁפֵלָ֜ה וְהָאֲשֵׁדֹ֗ות וְאֵת֙ כָּל־מַלְכֵיהֶ֔ם לֹ֥א הִשְׁאִ֖יר שָׂרִ֑יד וְאֵ֤ת כָּל־הַנְּשָׁמָה֙ הֶחֱרִ֔ים כַּאֲשֶׁ֣ר צִוָּ֔ה יְהוָ֖ה אֱלֹהֵ֥י יִשְׂרָאֵֽל׃ wayakeh yehowshuaʿ ʾet־kal־haʾarets hahar wehanegev wehashefelah wehaʾashedowt weʾet kal־malekheyhem loʾ hisheʾiyr sariyd weʾet kal־haneshamah heḥeriym kaʾasher tsiuah yehwah ʾelohey yiseraʾel׃

⁴¹ וַיַּכֵּ֧ם יְהֹושֻׁ֛עַ מִקָּדֵ֥שׁ בַּרְנֵ֖עַ וְעַד־עַזָּ֑ה וְאֵ֛ת כָּל־אֶ֥רֶץ גֹּ֖שֶׁן וְעַד־גִּבְעֹֽון׃ wayakem yehowshuaʿ miqadesh bareneaʿ weʿad־ʿazah weʾet kal־ʾerets goshen weʿad־giveʿown׃

⁴² וְאֵ֨ת כָּל־הַמְּלָכִ֤ים הָאֵ֙לֶּה֙ וְאֶת־אַרְצָ֔ם לָכַ֥ד יְהֹושֻׁ֖עַ פַּ֣עַם אֶחָ֑ת כִּ֗י יְהוָה֙ אֱלֹהֵ֣י יִשְׂרָאֵ֔ל נִלְחָ֖ם לְיִשְׂרָאֵֽל׃ weʾet kal־hamelakhiym haʾeleh weʾet־ʾaretsam lakhad yehowshuaʿ paʿam ʾeḥat kiy yehwah ʾelohey yiseraʾel nileḥam leyiseraʾel׃

⁴³ וַיָּ֤שָׁב יְהֹושֻׁ֙עַ֙ וְכָל־יִשְׂרָאֵ֣ל עִמֹּ֔ו אֶל־הַֽמַּחֲנֶ֖ה הַגִּלְגָּֽלָה׃ פ wayashav yehowshuaʿ wekhal־yiseraʾel ʿimow ʾel־hamaḥaneh hagilegalah׃ f