Ésaïe 5

¹ אָשִׁ֤ירָה נָּא֙ לִֽידִידִ֔י שִׁירַ֥ת דֹּודִ֖י לְכַרְמֹ֑ו כֶּ֛רֶם הָיָ֥ה לִֽידִידִ֖י בְּקֶ֥רֶן בֶּן־שָֽׁמֶן׃ ʾashiyrah naʾ liydiydiy shiyrat dowdiy lekharemow kerem hayah liydiydiy beqeren ben־shamen׃

² וַֽיְעַזְּקֵ֣הוּ וַֽיְסַקְּלֵ֗הוּ וַיִּטָּעֵ֙הוּ֙ שֹׂרֵ֔ק וַיִּ֤בֶן מִגְדָּל֙ בְּתֹוכֹ֔ו וְגַם־יֶ֖קֶב חָצֵ֣ב בֹּ֑ו וַיְקַ֛ו לַעֲשֹׂ֥ות עֲנָבִ֖ים וַיַּ֥עַשׂ בְּאֻשִֽׁים׃ wayeʿazeqehu wayesaqelehu wayiṭaʿehu soreq wayiven migedal betowkhow wegam־yeqev ḥatsev bow wayeqaw laʿasowt ʿanaviym wayaʿas beʾushiym׃

³ וְעַתָּ֛ה יֹושֵׁ֥ב יְרוּשָׁלִַ֖ם וְאִ֣ישׁ יְהוּדָ֑ה שִׁפְטוּ־נָ֕א בֵּינִ֖י וּבֵ֥ין כַּרְמִֽי׃ weʿatah yowshev yerushalim weʾiysh yehudah shifeṭu־naʾ beyniy uveyn karemiy׃

⁴ מַה־לַּעֲשֹׂ֥ות עֹוד֙ לְכַרְמִ֔י וְלֹ֥א עָשִׂ֖יתִי בֹּ֑ו מַדּ֧וּעַ קִוֵּ֛יתִי לַעֲשֹׂ֥ות עֲנָבִ֖ים וַיַּ֥עַשׂ בְּאֻשִֽׁים׃ mah־laʿasowt ʿowd lekharemiy weloʾ ʿasiytiy bow maduaʿ qiueytiy laʿasowt ʿanaviym wayaʿas beʾushiym׃

⁵ וְעַתָּה֙ אֹודִֽיעָה־נָּ֣א אֶתְכֶ֔ם אֵ֛ת אֲשֶׁר־אֲנִ֥י עֹשֶׂ֖ה לְכַרְמִ֑י הָסֵ֤ר מְשׂוּכָּתֹו֙ וְהָיָ֣ה לְבָעֵ֔ר פָּרֹ֥ץ גְּדֵרֹ֖ו וְהָיָ֥ה לְמִרְמָֽס׃ weʿatah ʾowdiyʿah־naʾ ʾetekhem ʾet ʾasher־ʾaniy ʿoseh lekharemiy haser mesukatow wehayah levaʿer parots gederow wehayah lemiremas׃

⁶ וַאֲשִׁיתֵ֣הוּ בָתָ֗ה לֹ֤א יִזָּמֵר֙ וְלֹ֣א יֵעָדֵ֔ר וְעָלָ֥ה שָׁמִ֖יר וָשָׁ֑יִת וְעַ֤ל הֶעָבִים֙ אֲצַוֶּ֔ה מֵהַמְטִ֥יר עָלָ֖יו מָטָֽר׃ waʾashiytehu vatah loʾ yizamer weloʾ yeʿader weʿalah shamiyr washayit weʿal heʿaviym ʾatsaueh mehameṭiyr ʿalayw maṭar׃

⁷ כִּ֣י כֶ֜רֶם יְהוָ֤ה צְבָאֹות֙ בֵּ֣ית יִשְׂרָאֵ֔ל וְאִ֣ישׁ יְהוּדָ֔ה נְטַ֖ע שַׁעֲשׁוּעָ֑יו וַיְקַ֤ו לְמִשְׁפָּט֙ וְהִנֵּ֣ה מִשְׂפָּ֔ח לִצְדָקָ֖ה וְהִנֵּ֥ה צְעָקָֽה׃ ס kiy kherem yehwah tsevaʾowt beyt yiseraʾel weʾiysh yehudah neṭaʿ shaʿashuʿayw wayeqaw lemishepaṭ wehineh misepaḥ litsedaqah wehineh tseʿaqah׃ s

⁸ הֹ֗וי מַגִּיעֵ֥י בַ֙יִת֙ בְּבַ֔יִת שָׂדֶ֥ה בְשָׂדֶ֖ה יַקְרִ֑יבוּ עַ֚ד אֶ֣פֶס מָקֹ֔ום וְהֽוּשַׁבְתֶּ֥ם לְבַדְּכֶ֖ם בְּקֶ֥רֶב הָאָֽרֶץ׃ howy magiyʿey vayit bevayit sadeh vesadeh yaqeriyvu ʿad ʾefes maqowm wehushavetem levadekhem beqerev haʾarets׃

⁹ בְּאָזְנָ֖י יְהוָ֣ה צְבָאֹ֑ות אִם־לֹ֞א בָּתִּ֤ים רַבִּים֙ לְשַׁמָּ֣ה יִֽהְי֔וּ גְּדֹלִ֥ים וְטֹובִ֖ים מֵאֵ֥ין יֹושֵֽׁב׃ beʾazenay yehwah tsevaʾowt ʾim־loʾ batiym rabiym leshamah yiheyu gedoliym weṭowviym meʾeyn yowshev׃

¹⁰ כִּ֗י עֲשֶׂ֙רֶת֙ צִמְדֵּי־כֶ֔רֶם יַעֲשׂ֖וּ בַּ֣ת אֶחָ֑ת וְזֶ֥רַע חֹ֖מֶר יַעֲשֶׂ֥ה אֵיפָֽה׃ פ kiy ʿaseret tsimedey־kherem yaʿasu bat ʾeḥat wezeraʿ ḥomer yaʿaseh ʾeyfah׃ f

¹¹ הֹ֛וי מַשְׁכִּימֵ֥י בַבֹּ֖קֶר שֵׁכָ֣ר יִרְדֹּ֑פוּ מְאַחֲרֵ֣י בַנֶּ֔שֶׁף יַ֖יִן יַדְלִיקֵֽם׃ howy mashekiymey vaboqer shekhar yiredofu meʾaḥarey vaneshef yayin yadeliyqem׃

¹² וְהָיָ֨ה כִנֹּ֜ור וָנֶ֗בֶל תֹּ֧ף וְחָלִ֛יל וָיַ֖יִן מִשְׁתֵּיהֶ֑ם וְאֵ֨ת פֹּ֤עַל יְהוָה֙ לֹ֣א יַבִּ֔יטוּ וּמַעֲשֵׂ֥ה יָדָ֖יו לֹ֥א רָאֽוּ׃ wehayah khinowr wanevel tof weḥaliyl wayayin misheteyhem weʾet poʿal yehwah loʾ yabiyṭu umaʿaseh yadayw loʾ raʾu׃

¹³ לָכֵ֛ן גָּלָ֥ה עַמִּ֖י מִבְּלִי־דָ֑עַת וּכְבֹודֹו֙ מְתֵ֣י רָעָ֔ב וַהֲמֹונֹ֖ו צִחֵ֥ה צָמָֽא׃ lakhen galah ʿamiy mibeliy־daʿat ukhevowdow metey raʿav wahamownow tsiḥeh tsamaʾ׃

¹⁴ לָכֵ֗ן הִרְחִ֤יבָה שְּׁאֹול֙ נַפְשָׁ֔הּ וּפָעֲרָ֥ה פִ֖יהָ לִבְלִי־חֹ֑ק וְיָרַ֨ד הֲדָרָ֧הּ וַהֲמֹונָ֛הּ וּשְׁאֹונָ֖הּ וְעָלֵ֥ז בָּֽהּ׃ lakhen hireḥiyvah sheʾowl nafeshah ufaʿarah fiyha liveliy־ḥoq weyarad hadarah wahamownah usheʾownah weʿalez bah׃

¹⁵ וַיִּשַּׁ֥ח אָדָ֖ם וַיִּשְׁפַּל־אִ֑ישׁ וְעֵינֵ֥י גְבֹהִ֖ים תִּשְׁפַּֽלְנָה׃ wayishaḥ ʾadam wayishepal־ʾiysh weʿeyney gevohiym tishepalenah׃

¹⁶ וַיִּגְבַּ֛ה יְהוָ֥ה צְבָאֹ֖ות בַּמִּשְׁפָּ֑ט וְהָאֵל֙ הַקָּדֹ֔ושׁ נִקְדָּ֖שׁ בִּצְדָקָֽה׃ wayigebah yehwah tsevaʾowt bamishepaṭ wehaʾel haqadowsh niqedash bitsedaqah׃

¹⁷ וְרָע֥וּ כְבָשִׂ֖ים כְּדָבְרָ֑ם וְחָרְבֹ֥ות מֵחִ֖ים גָּרִ֥ים יֹאכֵֽלוּ׃ weraʿu khevasiym kedaveram weḥarevowt meḥiym gariym yoʾkhelu׃

¹⁸ הֹ֛וי מֹשְׁכֵ֥י הֶֽעָוֹ֖ן בְּחַבְלֵ֣י הַשָּׁ֑וְא וְכַעֲבֹ֥ות הָעֲגָלָ֖ה חַטָּאָֽה׃ howy moshekhey heʿaon beḥaveley hashaweʾ wekhaʿavowt haʿagalah ḥaṭaʾah׃

¹⁹ הָאֹמְרִ֗ים יְמַהֵ֧ר ׀ יָחִ֛ישָׁה מַעֲשֵׂ֖הוּ לְמַ֣עַן נִרְאֶ֑ה וְתִקְרַ֣ב וְתָבֹ֗ואָה עֲצַ֛ת קְדֹ֥ושׁ יִשְׂרָאֵ֖ל וְנֵדָֽעָה׃ ס haʾomeriym yemaher ׀ yaḥiyshah maʿasehu lemaʿan nireʾeh wetiqerav wetavowʾah ʿatsat qedowsh yiseraʾel wenedaʿah׃ s

²⁰ הֹ֣וי הָאֹמְרִ֥ים לָרַ֛ע טֹ֖וב וְלַטֹּ֣וב רָ֑ע שָׂמִ֨ים חֹ֤שֶׁךְ לְאֹור֙ וְאֹ֣ור לְחֹ֔שֶׁךְ שָׂמִ֥ים מַ֛ר לְמָתֹ֖וק וּמָתֹ֥וק לְמָֽר׃ ס howy haʾomeriym laraʿ ṭowv welaṭowv raʿ samiym ḥoshekhe leʾowr weʾowr leḥoshekhe samiym mar lematowq umatowq lemar׃ s

²¹ הֹ֖וי חֲכָמִ֣ים בְּעֵֽינֵיהֶ֑ם וְנֶ֥גֶד פְּנֵיהֶ֖ם נְבֹנִֽים׃ howy ḥakhamiym beʿeyneyhem weneged peneyhem nevoniym׃

²² הֹ֕וי גִּבֹּורִ֖ים לִשְׁתֹּ֣ות יָ֑יִן וְאַנְשֵׁי־חַ֖יִל לִמְסֹ֥ךְ שֵׁכָֽר׃ howy gibowriym lishetowt yayin weʾaneshey־ḥayil limesokhe shekhar׃

²³ מַצְדִּיקֵ֥י רָשָׁ֖ע עֵ֣קֶב שֹׁ֑חַד וְצִדְקַ֥ת צַדִּיקִ֖ים יָסִ֥ירוּ מִמֶּֽנּוּ׃ ס matsediyqey rashaʿ ʿeqev shoḥad wetsideqat tsadiyqiym yasiyru mimenu׃ s

²⁴ לָכֵן֩ כֶּאֱכֹ֨ל קַ֜שׁ לְשֹׁ֣ון אֵ֗שׁ וַחֲשַׁ֤שׁ לֶֽהָבָה֙ יִרְפֶּ֔ה שָׁרְשָׁם֙ כַּמָּ֣ק יִֽהְיֶ֔ה וּפִרְחָ֖ם כָּאָבָ֣ק יַעֲלֶ֑ה כִּ֣י מָאֲס֗וּ אֵ֚ת תֹּורַת֙ יְהוָ֣ה צְבָאֹ֔ות וְאֵ֛ת אִמְרַ֥ת קְדֹֽושׁ־יִשְׂרָאֵ֖ל נִאֵֽצוּ׃ lakhen keʾekhol qash leshown ʾesh waḥashash lehavah yirepeh sharesham kamaq yiheyeh ufireḥam kaʾavaq yaʿaleh kiy maʾasu ʾet towrat yehwah tsevaʾowt weʾet ʾimerat qedowsh־yiseraʾel niʾetsu׃

²⁵ עַל־כֵּ֡ן חָרָה֩ אַף־יְהוָ֨ה בְּעַמֹּ֜ו וַיֵּ֣ט יָדֹ֧ו עָלָ֣יו וַיַּכֵּ֗הוּ וַֽיִּרְגְּזוּ֙ הֶֽהָרִ֔ים וַתְּהִ֧י נִבְלָתָ֛ם כַּסּוּחָ֖ה בְּקֶ֣רֶב חוּצֹ֑ות בְּכָל־זֹאת֙ לֹא־שָׁ֣ב אַפֹּ֔ו וְעֹ֖וד יָדֹ֥ו נְטוּיָֽה׃ ʿal־ken ḥarah ʾaf־yehwah beʿamow wayeṭ yadow ʿalayw wayakehu wayiregezu hehariym watehiy nivelatam kasuḥah beqerev ḥutsowt bekhal־zoʾt loʾ־shav ʾapow weʿowd yadow neṭuyah׃

²⁶ וְנָֽשָׂא־נֵ֤ס לַגֹּויִם֙ מֵרָחֹ֔וק וְשָׁ֥רַק לֹ֖ו מִקְצֵ֣ה הָאָ֑רֶץ וְהִנֵּ֥ה מְהֵרָ֖ה קַ֥ל יָבֹֽוא׃ wenasaʾ־nes lagowyim meraḥowq wesharaq low miqetseh haʾarets wehineh meherah qal yavowʾ׃

²⁷ אֵין־עָיֵ֤ף וְאֵין־כֹּושֵׁל֙ בֹּ֔ו לֹ֥א יָנ֖וּם וְלֹ֣א יִישָׁ֑ן וְלֹ֤א נִפְתַּח֙ אֵזֹ֣ור חֲלָצָ֔יו וְלֹ֥א נִתַּ֖ק שְׂרֹ֥וךְ נְעָלָֽיו׃ ʾeyn־ʿayef weʾeyn־kowshel bow loʾ yanum weloʾ yiyshan weloʾ nifetaḥ ʾezowr ḥalatsayw weloʾ nitaq serowkhe neʿalayw׃

²⁸ אֲשֶׁ֤ר חִצָּיו֙ שְׁנוּנִ֔ים וְכָל־קַשְּׁתֹתָ֖יו דְּרֻכֹ֑ות פַּרְסֹ֤ות סוּסָיו֙ כַּצַּ֣ר נֶחְשָׁ֔בוּ וְגַלְגִּלָּ֖יו כַּסּוּפָֽה׃ ʾasher ḥitsayw shenuniym wekhal־qashetotayw derukhowt paresowt susayw katsar neḥeshavu wegalegilayw kasufah׃

²⁹ שְׁאָגָ֥ה לֹ֖ו כַּלָּבִ֑יא [וְשָׁאַג כ] (יִשְׁאַ֨ג ק) כַּכְּפִירִ֤ים וְיִנְהֹם֙ וְיֹאחֵ֣ז טֶ֔רֶף וְיַפְלִ֖יט וְאֵ֥ין מַצִּֽיל׃ sheʾagah low kalaviyʾ [weshaʾag kh] (yisheʾag q) kakefiyriym weyinehom weyoʾḥez ṭeref weyafeliyṭ weʾeyn matsiyl׃

³⁰ וְיִנְהֹ֥ם עָלָ֛יו בַּיֹּ֥ום הַה֖וּא כְּנַהֲמַת־יָ֑ם וְנִבַּ֤ט לָאָ֙רֶץ֙ וְהִנֵּה־חֹ֔שֶׁךְ צַ֣ר וָאֹ֔ור חָשַׁ֖ךְ בַּעֲרִיפֶֽיהָ׃ פ weyinehom ʿalayw bayowm hahuʾ kenahamat־yam wenibaṭ laʾarets wehineh־ḥoshekhe tsar waʾowr ḥashakhe baʿariyfeyha׃ f