Esther 1

¹ וַיְהִ֖י בִּימֵ֣י אֲחַשְׁוֵרֹ֑ושׁ ה֣וּא אֲחַשְׁוֵרֹ֗ושׁ הַמֹּלֵךְ֙ מֵהֹ֣דּוּ וְעַד־כּ֔וּשׁ שֶׁ֛בַע וְעֶשְׂרִ֥ים וּמֵאָ֖ה מְדִינָֽה׃ wayehiy biymey ʾaḥashewerowsh huʾ ʾaḥashewerowsh hamolekhe mehodu weʿad־kush shevaʿ weʿeseriym umeʾah mediynah׃

² בַּיָּמִ֖ים הָהֵ֑ם כְּשֶׁ֣בֶת ׀ הַמֶּ֣לֶךְ אֲחַשְׁוֵרֹ֗ושׁ עַ֚ל כִּסֵּ֣א מַלְכוּתֹ֔ו אֲשֶׁ֖ר בְּשׁוּשַׁ֥ן הַבִּירָֽה׃ bayamiym hahem keshevet ׀ hamelekhe ʾaḥashewerowsh ʿal kiseʾ malekhutow ʾasher beshushan habiyrah׃

³ בִּשְׁנַ֤ת שָׁלֹושׁ֙ לְמָלְכֹ֔ו עָשָׂ֣ה מִשְׁתֶּ֔ה לְכָל־שָׂרָ֖יו וַעֲבָדָ֑יו חֵ֣יל ׀ פָּרַ֣ס וּמָדַ֗י הַֽפַּרְתְּמִ֛ים וְשָׂרֵ֥י הַמְּדִינֹ֖ות לְפָנָֽיו׃ bishenat shalowsh lemalekhow ʿasah misheteh lekhal־sarayw waʿavadayw ḥeyl ׀ paras umaday haparetemiym wesarey hamediynowt lefanayw׃

⁴ בְּהַרְאֹתֹ֗ו אֶת־עֹ֙שֶׁר֙ כְּבֹ֣וד מַלְכוּתֹ֔ו וְאֶ֨ת־יְקָ֔ר תִּפְאֶ֖רֶת גְּדוּלָּתֹ֑ו יָמִ֣ים רַבִּ֔ים שְׁמֹונִ֥ים וּמְאַ֖ת יֹֽום׃ behareʾotow ʾet־ʿosher kevowd malekhutow weʾet־yeqar tifeʾeret gedulatow yamiym rabiym shemowniym umeʾat yowm׃

⁵ וּבִמְלֹ֣ואת ׀ הַיָּמִ֣ים הָאֵ֗לֶּה עָשָׂ֣ה הַמֶּ֡לֶךְ לְכָל־הָעָ֣ם הַנִּמְצְאִים֩ בְּשׁוּשַׁ֨ן הַבִּירָ֜ה לְמִגָּ֧דֹול וְעַד־קָטָ֛ן מִשְׁתֶּ֖ה שִׁבְעַ֣ת יָמִ֑ים בַּחֲצַ֕ר גִּנַּ֥ת בִּיתַ֖ן הַמֶּֽלֶךְ׃ uvimelowʾt ׀ hayamiym haʾeleh ʿasah hamelekhe lekhal־haʿam hanimetseʾiym beshushan habiyrah lemigadowl weʿad־qaṭan misheteh shiveʿat yamiym baḥatsar ginat biytan hamelekhe׃

⁶ ח֣וּר ׀ כַּרְפַּ֣ס וּתְכֵ֗לֶת אָחוּז֙ בְּחַבְלֵי־ב֣וּץ וְאַרְגָּמָ֔ן עַל־גְּלִ֥ילֵי כֶ֖סֶף וְעַמּ֣וּדֵי שֵׁ֑שׁ מִטֹּ֣ות ׀ זָהָ֣ב וָכֶ֗סֶף עַ֛ל רִֽצְפַ֥ת בַּהַט־וָשֵׁ֖שׁ וְדַ֥ר וְסֹחָֽרֶת׃ ḥur ׀ karepas utekhelet ʾaḥuz beḥaveley־vuts weʾaregaman ʿal־geliyley khesef weʿamudey shesh miṭowt ׀ zahav wakhesef ʿal ritsefat bahaṭ־washesh wedar wesoḥaret׃

⁷ וְהַשְׁקֹות֙ בִּכְלֵ֣י זָהָ֔ב וְכֵלִ֖ים מִכֵּלִ֣ים שֹׁונִ֑ים וְיֵ֥ין מַלְכ֛וּת רָ֖ב כְּיַ֥ד הַמֶּֽלֶךְ׃ wehasheqowt bikheley zahav wekheliym mikeliym showniym weyeyn malekhut rav keyad hamelekhe׃

⁸ וְהַשְּׁתִיָּ֥ה כַדָּ֖ת אֵ֣ין אֹנֵ֑ס כִּי־כֵ֣ן ׀ יִסַּ֣ד הַמֶּ֗לֶךְ עַ֚ל כָּל־רַ֣ב בֵּיתֹ֔ו לַעֲשֹׂ֖ות כִּרְצֹ֥ון אִישׁ־וָאִֽישׁ׃ wehashetiyah khadat ʾeyn ʾones kiy־khen ׀ yisad hamelekhe ʿal kal־rav beytow laʿasowt kiretsown ʾiysh־waʾiysh׃

⁹ גַּ֚ם וַשְׁתִּ֣י הַמַּלְכָּ֔ה עָשְׂתָ֖ה מִשְׁתֵּ֣ה נָשִׁ֑ים בֵּ֚ית הַמַּלְכ֔וּת אֲשֶׁ֖ר לַמֶּ֥לֶךְ אֲחַשְׁוֵרֹֽושׁ׃ ס gam washetiy hamalekah ʿasetah misheteh nashiym beyt hamalekhut ʾasher lamelekhe ʾaḥashewerowsh׃ s

¹⁰ בַּיֹּום֙ הַשְּׁבִיעִ֔י כְּטֹ֥וב לֵב־הַמֶּ֖לֶךְ בַּיָּ֑יִן אָמַ֡ר לִ֠מְהוּמָן בִּזְּתָ֨א חַרְבֹונָ֜א בִּגְתָ֤א וַאֲבַגְתָא֙ זֵתַ֣ר וְכַרְכַּ֔ס שִׁבְעַת֙ הַסָּ֣רִיסִ֔ים הַמְשָׁ֣רְתִ֔ים אֶת־פְּנֵ֖י הַמֶּ֥לֶךְ אֲחַשְׁוֵרֹֽושׁ׃ bayowm hasheviyʿiy keṭowv lev־hamelekhe bayayin ʾamar limehuman bizetaʾ ḥarevownaʾ bigetaʾ waʾavagetaʾ zetar wekharekas shiveʿat hasariysiym hamesharetiym ʾet־peney hamelekhe ʾaḥashewerowsh׃

¹¹ לְ֠הָבִיא אֶת־וַשְׁתִּ֧י הַמַּלְכָּ֛ה לִפְנֵ֥י הַמֶּ֖לֶךְ בְּכֶ֣תֶר מַלְכ֑וּת לְהַרְאֹ֨ות הָֽעַמִּ֤ים וְהַשָּׂרִים֙ אֶת־יָפְיָ֔הּ כִּֽי־טֹובַ֥ת מַרְאֶ֖ה הִֽיא׃ lehaviyʾ ʾet־washetiy hamalekah lifeney hamelekhe bekheter malekhut lehareʾowt haʿamiym wehasariym ʾet־yafeyah kiy־ṭowvat mareʾeh hiyʾ׃

¹² וַתְּמָאֵ֞ן הַמַּלְכָּ֣ה וַשְׁתִּ֗י לָבֹוא֙ בִּדְבַ֣ר הַמֶּ֔לֶךְ אֲשֶׁ֖ר בְּיַ֣ד הַסָּרִיסִ֑ים וַיִּקְצֹ֤ף הַמֶּ֙לֶךְ֙ מְאֹ֔ד וַחֲמָתֹ֖ו בָּעֲרָ֥ה בֹֽו׃ watemaʾen hamalekah washetiy lavowʾ bidevar hamelekhe ʾasher beyad hasariysiym wayiqetsof hamelekhe meʾod waḥamatow baʿarah vow׃

¹³ וַיֹּ֣אמֶר הַמֶּ֔לֶךְ לַחֲכָמִ֖ים יֹדְעֵ֣י הָֽעִתִּ֑ים כִּי־כֵן֙ דְּבַ֣ר הַמֶּ֔לֶךְ לִפְנֵ֕י כָּל־יֹדְעֵ֖י דָּ֥ת וָדִֽין׃ wayoʾmer hamelekhe laḥakhamiym yodeʿey haʿitiym kiy־khen devar hamelekhe lifeney kal־yodeʿey dat wadiyn׃

¹⁴ וְהַקָּרֹ֣ב אֵלָ֗יו כַּרְשְׁנָ֤א שֵׁתָר֙ אַדְמָ֣תָא תַרְשִׁ֔ישׁ מֶ֥רֶס מַרְסְנָ֖א מְמוּכָ֑ן שִׁבְעַ֞ת שָׂרֵ֣י ׀ פָּרַ֣ס וּמָדַ֗י רֹאֵי֙ פְּנֵ֣י הַמֶּ֔לֶךְ הַיֹּשְׁבִ֥ים רִאשֹׁנָ֖ה בַּמַּלְכֽוּת׃ wehaqarov ʾelayw kareshenaʾ shetar ʾademataʾ tareshiysh meres maresenaʾ memukhan shiveʿat sarey ׀ paras umaday roʾey peney hamelekhe hayosheviym riʾshonah bamalekhut׃

¹⁵ כְּדָת֙ מַֽה־לַּעֲשֹׂ֔ות בַּמַּלְכָּ֖ה וַשְׁתִּ֑י עַ֣ל ׀ אֲשֶׁ֣ר לֹֽא־עָשְׂתָ֗ה אֶֽת־מַאֲמַר֙ הַמֶּ֣לֶךְ אֲחַשְׁוֵרֹ֔ושׁ בְּיַ֖ד הַסָּרִיסִֽים׃ ס kedat mah־laʿasowt bamalekah washetiy ʿal ׀ ʾasher loʾ־ʿasetah ʾet־maʾamar hamelekhe ʾaḥashewerowsh beyad hasariysiym׃ s

¹⁶ וַיֹּ֣אמֶר [מוּמְכָן כ] (מְמוּכָ֗ן ק) לִפְנֵ֤י הַמֶּ֙לֶךְ֙ וְהַשָּׂרִ֔ים לֹ֤א עַל־הַמֶּ֙לֶךְ֙ לְבַדֹּ֔ו עָוְתָ֖ה וַשְׁתִּ֣י הַמַּלְכָּ֑ה כִּ֤י עַל־כָּל־הַשָּׂרִים֙ וְעַל־כָּל־הָ֣עַמִּ֔ים אֲשֶׁ֕ר בְּכָל־מְדִינֹ֖ות הַמֶּ֥לֶךְ אֲחַשְׁוֵרֹֽושׁ׃ wayoʾmer [mumekhan kh] (memukhan q) lifeney hamelekhe wehasariym loʾ ʿal־hamelekhe levadow ʿawetah washetiy hamalekah kiy ʿal־kal־hasariym weʿal־kal־haʿamiym ʾasher bekhal־mediynowt hamelekhe ʾaḥashewerowsh׃

¹⁷ כִּֽי־יֵצֵ֤א דְבַר־הַמַּלְכָּה֙ עַל־כָּל־הַנָּשִׁ֔ים לְהַבְזֹ֥ות בַּעְלֵיהֶ֖ן בְּעֵינֵיהֶ֑ן בְּאָמְרָ֗ם הַמֶּ֣לֶךְ אֲחַשְׁוֵרֹ֡ושׁ אָמַ֞ר לְהָבִ֨יא אֶת־וַשְׁתִּ֧י הַמַּלְכָּ֛ה לְפָנָ֖יו וְלֹא־בָֽאָה׃ kiy־yetseʾ devar־hamalekah ʿal־kal־hanashiym lehavezowt baʿeleyhen beʿeyneyhen beʾameram hamelekhe ʾaḥashewerowsh ʾamar lehaviyʾ ʾet־washetiy hamalekah lefanayw weloʾ־vaʾah׃

¹⁸ וְֽהַיֹּ֨ום הַזֶּ֜ה תֹּאמַ֣רְנָה ׀ שָׂרֹ֣ות פָּֽרַס־וּמָדַ֗י אֲשֶׁ֤ר שָֽׁמְעוּ֙ אֶת־דְּבַ֣ר הַמַּלְכָּ֔ה לְכֹ֖ל שָׂרֵ֣י הַמֶּ֑לֶךְ וּכְדַ֖י בִּזָּיֹ֥ון וָקָֽצֶף׃ wehayowm hazeh toʾmarenah ׀ sarowt paras־umaday ʾasher shameʿu ʾet־devar hamalekah lekhol sarey hamelekhe ukheday bizayown waqatsef׃

¹⁹ אִם־עַל־הַמֶּ֣לֶךְ טֹ֗וב יֵצֵ֤א דְבַר־מַלְכוּת֙ מִלְּפָנָ֔יו וְיִכָּתֵ֛ב בְּדָתֵ֥י פָֽרַס־וּמָדַ֖י וְלֹ֣א יַעֲבֹ֑ור אֲשֶׁ֨ר לֹֽא־תָבֹ֜וא וַשְׁתִּ֗י לִפְנֵי֙ הַמֶּ֣לֶךְ אֲחַשְׁוֵרֹ֔ושׁ וּמַלְכוּתָהּ֙ יִתֵּ֣ן הַמֶּ֔לֶךְ לִרְעוּתָ֖הּ הַטֹּובָ֥ה מִמֶּֽנָּה׃ ʾim־ʿal־hamelekhe ṭowv yetseʾ devar־malekhut milefanayw weyikatev bedatey faras־umaday weloʾ yaʿavowr ʾasher loʾ־tavowʾ washetiy lifeney hamelekhe ʾaḥashewerowsh umalekhutah yiten hamelekhe lireʿutah haṭowvah mimenah׃

²⁰ וְנִשְׁמַע֩ פִּתְגָ֨ם הַמֶּ֤לֶךְ אֲשֶֽׁר־יַעֲשֶׂה֙ בְּכָל־מַלְכוּתֹ֔ו כִּ֥י רַבָּ֖ה הִ֑יא וְכָל־הַנָּשִׁ֗ים יִתְּנ֤וּ יְקָר֙ לְבַעְלֵיהֶ֔ן לְמִגָּדֹ֖ול וְעַד־קָטָֽן׃ wenishemaʿ pitegam hamelekhe ʾasher־yaʿaseh bekhal־malekhutow kiy rabah hiyʾ wekhal־hanashiym yitenu yeqar levaʿeleyhen lemigadowl weʿad־qaṭan׃

²¹ וַיִּיטַב֙ הַדָּבָ֔ר בְּעֵינֵ֥י הַמֶּ֖לֶךְ וְהַשָּׂרִ֑ים וַיַּ֥עַשׂ הַמֶּ֖לֶךְ כִּדְבַ֥ר מְמוּכָֽן׃ wayiyṭav hadavar beʿeyney hamelekhe wehasariym wayaʿas hamelekhe kidevar memukhan׃

²² וַיִּשְׁלַ֤ח סְפָרִים֙ אֶל־כָּל־מְדִינֹ֣ות הַמֶּ֔לֶךְ אֶל־מְדִינָ֤ה וּמְדִינָה֙ כִּכְתָבָ֔הּ וְאֶל־עַ֥ם וָעָ֖ם כִּלְשֹׁונֹ֑ו לִהְיֹ֤ות כָּל־אִישׁ֙ שֹׂרֵ֣ר בְּבֵיתֹ֔ו וּמְדַבֵּ֖ר כִּלְשֹׁ֥ון עַמֹּֽו׃ פ wayishelaḥ sefariym ʾel־kal־mediynowt hamelekhe ʾel־mediynah umediynah kikhetavah weʾel־ʿam waʿam kileshownow liheyowt kal־ʾiysh sorer beveytow umedaber kileshown ʿamow׃ f