1 Samuel 19

¹ וַיְדַבֵּ֣ר שָׁא֗וּל אֶל־יֹונָתָ֤ן בְּנֹו֙ וְאֶל־כָּל־עֲבָדָ֔יו לְהָמִ֖ית אֶת־דָּוִ֑ד וִיהֹֽונָתָן֙ בֶּן־שָׁא֔וּל חָפֵ֥ץ בְּדָוִ֖ד מְאֹֽד׃ wayedaber shaʾul ʾel־yownatan benow weʾel־kal־ʿavadayw lehamiyt ʾet־dawid wiyhownatan ben־shaʾul ḥafets bedawid meʾod׃

² וַיַּגֵּ֤ד יְהֹונָתָן֙ לְדָוִ֣ד לֵאמֹ֔ר מְבַקֵּ֛שׁ שָׁא֥וּל אָבִ֖י לַהֲמִיתֶ֑ךָ וְעַתָּה֙ הִשָּֽׁמֶר־נָ֣א בַבֹּ֔קֶר וְיָשַׁבְתָּ֥ בַסֵּ֖תֶר וְנַחְבֵּֽאתָ׃ wayaged yehownatan ledawid leʾmor mevaqesh shaʾul ʾaviy lahamiytekha weʿatah hishamer־naʾ vaboqer weyashaveta vaseter wenaḥebeʾta׃

³ וַאֲנִ֨י אֵצֵ֜א וְעָמַדְתִּ֣י לְיַד־אָבִ֗י בַּשָּׂדֶה֙ אֲשֶׁ֣ר אַתָּ֣ה שָׁ֔ם וַאֲנִ֕י אֲדַבֵּ֥ר בְּךָ֖ אֶל־אָבִ֑י וְרָאִ֥יתִי מָ֖ה וְהִגַּ֥דְתִּי לָֽךְ׃ ס waʾaniy ʾetseʾ weʿamadetiy leyad־ʾaviy basadeh ʾasher ʾatah sham waʾaniy ʾadaber bekha ʾel־ʾaviy weraʾiytiy mah wehigadetiy lakhe׃ s

⁴ וַיְדַבֵּ֨ר יְהֹונָתָ֤ן בְּדָוִד֙ טֹ֔וב אֶל־שָׁא֖וּל אָבִ֑יו וַיֹּ֣אמֶר אֵ֠לָיו אַל־יֶחֱטָ֨א הַמֶּ֜לֶךְ בְּעַבְדֹּ֣ו בְדָוִ֗ד כִּ֣י לֹ֤וא חָטָא֙ לָ֔ךְ וְכִ֥י מַעֲשָׂ֖יו טֹוב־לְךָ֥ מְאֹֽד׃ wayedaber yehownatan bedawid ṭowv ʾel־shaʾul ʾaviyw wayoʾmer ʾelayw ʾal־yeḥeṭaʾ hamelekhe beʿavedow vedawid kiy lowʾ ḥaṭaʾ lakhe wekhiy maʿasayw ṭowv־lekha meʾod׃

⁵ וַיָּשֶׂם֩ אֶת־נַפְשֹׁ֨ו בְכַפֹּ֜ו וַיַּ֣ךְ אֶת־הַפְּלִשְׁתִּ֗י וַיַּ֨עַשׂ יְהוָ֜ה תְּשׁוּעָ֤ה גְדֹולָה֙ לְכָל־יִשְׂרָאֵ֔ל רָאִ֖יתָ וַתִּשְׂמָ֑ח וְלָ֤מָּה תֶֽחֱטָא֙ בְּדָ֣ם נָקִ֔י לְהָמִ֥ית אֶת־דָּוִ֖ד חִנָּֽם׃ wayasem ʾet־nafeshow vekhapow wayakhe ʾet־hapelishetiy wayaʿas yehwah teshuʿah gedowlah lekhal־yiseraʾel raʾiyta watisemaḥ welamah teḥeṭaʾ bedam naqiy lehamiyt ʾet־dawid ḥinam׃

⁶ וַיִּשְׁמַ֥ע שָׁא֖וּל בְּקֹ֣ול יְהֹונָתָ֑ן וַיִּשָּׁבַ֣ע שָׁא֔וּל חַי־יְהוָ֖ה אִם־יוּמָֽת׃ wayishemaʿ shaʾul beqowl yehownatan wayishavaʿ shaʾul ḥay־yehwah ʾim־yumat׃

⁷ וַיִּקְרָ֤א יְהֹונָתָן֙ לְדָוִ֔ד וַיַּגֶּד־לֹו֙ יְהֹ֣ונָתָ֔ן אֵ֥ת כָּל־הַדְּבָרִ֖ים הָאֵ֑לֶּה וַיָּבֵ֨א יְהֹונָתָ֤ן אֶת־דָּוִד֙ אֶל־שָׁא֔וּל וַיְהִ֥י לְפָנָ֖יו כְּאֶתְמֹ֥ול שִׁלְשֹֽׁום׃ ס wayiqeraʾ yehownatan ledawid wayaged־low yehownatan ʾet kal־hadevariym haʾeleh wayaveʾ yehownatan ʾet־dawid ʾel־shaʾul wayehiy lefanayw keʾetemowl shileshowm׃ s

⁸ וַתֹּ֥וסֶף הַמִּלְחָמָ֖ה לִֽהְיֹ֑ות וַיֵּצֵ֨א דָוִ֜ד וַיִּלָּ֣חֶם בַּפְּלִשְׁתִּ֗ים וַיַּ֤ךְ בָּהֶם֙ מַכָּ֣ה גְדֹולָ֔ה וַיָּנֻ֖סוּ מִפָּנָֽיו׃ watowsef hamileḥamah liheyowt wayetseʾ dawid wayilaḥem bapelishetiym wayakhe bahem makah gedowlah wayanusu mipanayw׃

⁹ וַתְּהִי֩ ר֨וּחַ יְהוָ֤ה ׀ רָעָה֙ אֶל־שָׁא֔וּל וְהוּא֙ בְּבֵיתֹ֣ו יֹושֵׁ֔ב וַחֲנִיתֹ֖ו בְּיָדֹ֑ו וְדָוִ֖ד מְנַגֵּ֥ן בְּיָֽד׃ watehiy ruaḥ yehwah ׀ raʿah ʾel־shaʾul wehuʾ beveytow yowshev waḥaniytow beyadow wedawid menagen beyad׃

¹⁰ וַיְבַקֵּ֨שׁ שָׁא֜וּל לְהַכֹּ֤ות בַּֽחֲנִית֙ בְּדָוִ֣ד וּבַקִּ֔יר וַיִּפְטַר֙ מִפְּנֵ֣י שָׁא֔וּל וַיַּ֥ךְ אֶֽת־הַחֲנִ֖ית בַּקִּ֑יר וְדָוִ֛ד נָ֥ס וַיִּמָּלֵ֖ט בַּלַּ֥יְלָה הֽוּא׃ פ wayevaqesh shaʾul lehakowt baḥaniyt bedawid uvaqiyr wayifeṭar mipeney shaʾul wayakhe ʾet־haḥaniyt baqiyr wedawid nas wayimaleṭ balayelah huʾ׃ f

¹¹ וַיִּשְׁלַח֩ שָׁא֨וּל מַלְאָכִ֜ים אֶל־בֵּ֤ית דָּוִד֙ לְשָׁמְרֹ֔ו וְלַהֲמִיתֹ֖ו בַּבֹּ֑קֶר וַתַּגֵּ֣ד לְדָוִ֗ד מִיכַ֤ל אִשְׁתֹּו֙ לֵאמֹ֔ר אִם־אֵ֨ינְךָ֜ מְמַלֵּ֤ט אֶֽת־נַפְשְׁךָ֙ הַלַּ֔יְלָה מָחָ֖ר אַתָּ֥ה מוּמָֽת׃ wayishelaḥ shaʾul maleʾakhiym ʾel־beyt dawid leshamerow welahamiytow baboqer wataged ledawid miykhal ʾishetow leʾmor ʾim־ʾeynekha memaleṭ ʾet־nafeshekha halayelah maḥar ʾatah mumat׃

¹² וַתֹּ֧רֶד מִיכַ֛ל אֶת־דָּוִ֖ד בְּעַ֣ד הַחַלֹּ֑ון וַיֵּ֥לֶךְ וַיִּבְרַ֖ח וַיִּמָּלֵֽט׃ watored miykhal ʾet־dawid beʿad haḥalown wayelekhe wayiveraḥ wayimaleṭ׃

¹³ וַתִּקַּ֨ח מִיכַ֜ל אֶת־הַתְּרָפִ֗ים וַתָּ֙שֶׂם֙ אֶל־הַמִּטָּ֔ה וְאֵת֙ כְּבִ֣יר הָֽעִזִּ֔ים שָׂ֖מָה מְרַֽאֲשֹׁתָ֑יו וַתְּכַ֖ס בַּבָּֽגֶד׃ ס watiqaḥ miykhal ʾet־haterafiym watasem ʾel־hamiṭah weʾet keviyr haʿiziym samah meraʾashotayw watekhas babaged׃ s

¹⁴ וַיִּשְׁלַ֥ח שָׁא֛וּל מַלְאָכִ֖ים לָקַ֣חַת אֶת־דָּוִ֑ד וַתֹּ֖אמֶר חֹלֶ֥ה הֽוּא׃ פ wayishelaḥ shaʾul maleʾakhiym laqaḥat ʾet־dawid watoʾmer ḥoleh huʾ׃ f

¹⁵ וַיִּשְׁלַ֤ח שָׁאוּל֙ אֶת־הַמַּלְאָכִ֔ים לִרְאֹ֥ות אֶת־דָּוִ֖ד לֵאמֹ֑ר הַעֲל֨וּ אֹתֹ֧ו בַמִּטָּ֛ה אֵלַ֖י לַהֲמִתֹֽו׃ wayishelaḥ shaʾul ʾet־hamaleʾakhiym lireʾowt ʾet־dawid leʾmor haʿalu ʾotow vamiṭah ʾelay lahamitow׃

¹⁶ וַיָּבֹ֙אוּ֙ הַמַּלְאָכִ֔ים וְהִנֵּ֥ה הַתְּרָפִ֖ים אֶל־הַמִּטָּ֑ה וּכְבִ֥יר הָעִזִּ֖ים מְרַאֲשֹׁתָֽיו׃ wayavoʾu hamaleʾakhiym wehineh haterafiym ʾel־hamiṭah ukheviyr haʿiziym meraʾashotayw׃

¹⁷ וַיֹּ֨אמֶר שָׁא֜וּל אֶל־מִיכַ֗ל לָ֤מָּה כָּ֙כָה֙ רִמִּיתִ֔נִי וַתְּשַׁלְּחִ֥י אֶת־אֹיְבִ֖י וַיִּמָּלֵ֑ט וַתֹּ֤אמֶר מִיכַל֙ אֶל־שָׁא֔וּל הוּא־אָמַ֥ר אֵלַ֛י שַׁלְּחִ֖נִי לָמָ֥ה אֲמִיתֵֽךְ׃ wayoʾmer shaʾul ʾel־miykhal lamah kakhah rimiytiniy wateshaleḥiy ʾet־ʾoyeviy wayimaleṭ watoʾmer miykhal ʾel־shaʾul huʾ־ʾamar ʾelay shaleḥiniy lamah ʾamiytekhe׃

¹⁸ וְדָוִ֨ד בָּרַ֜ח וַיִּמָּלֵ֗ט וַיָּבֹ֤א אֶל־שְׁמוּאֵל֙ הָרָמָ֔תָה וַיַּ֨גֶּד־לֹ֔ו אֵ֛ת כָּל־אֲשֶׁ֥ר עָֽשָׂה־לֹ֖ו שָׁא֑וּל וַיֵּ֤לֶךְ הוּא֙ וּשְׁמוּאֵ֔ל וַיֵּשְׁב֖וּ [בְּנֹוִית כ] (בְּנָֽיֹות׃ ק) wedawid baraḥ wayimaleṭ wayavoʾ ʾel־shemuʾel haramatah wayaged־low ʾet kal־ʾasher ʿasah־low shaʾul wayelekhe huʾ ushemuʾel wayeshevu [benowiyt kh] (benayowt׃ q)

¹⁹ וַיֻּגַּ֥ד לְשָׁא֖וּל לֵאמֹ֑ר הִנֵּ֣ה דָוִ֔ד [בְּנֹוִית כ] (בְּנָיֹ֖ות ק) בָּרָמָֽה׃ wayugad leshaʾul leʾmor hineh dawid [benowiyt kh] (benayowt q) baramah׃

²⁰ וַיִּשְׁלַ֨ח שָׁא֣וּל מַלְאָכִים֮ לָקַ֣חַת אֶת־דָּוִד֒ וַיַּ֗רְא אֶֽת־לַהֲקַ֤ת הַנְּבִיאִים֙ נִבְּאִ֔ים וּשְׁמוּאֵ֕ל עֹמֵ֥ד נִצָּ֖ב עֲלֵיהֶ֑ם וַתְּהִ֞י עַֽל־מַלְאֲכֵ֤י שָׁאוּל֙ ר֣וּחַ אֱלֹהִ֔ים וַיִּֽתְנַבְּא֖וּ גַּם־הֵֽמָּה׃ wayishelaḥ shaʾul maleʾakhiym laqaḥat ʾet־dawid wayareʾ ʾet־lahaqat haneviyʾiym nibeʾiym ushemuʾel ʿomed nitsav ʿaleyhem watehiy ʿal־maleʾakhey shaʾul ruaḥ ʾelohiym wayitenabeʾu gam־hemah׃

²¹ וַיַּגִּ֣דוּ לְשָׁא֗וּל וַיִּשְׁלַח֙ מַלְאָכִ֣ים אֲחֵרִ֔ים וַיִּֽתְנַבְּא֖וּ גַּם־הֵ֑מָּה וַיֹּ֣סֶף שָׁא֗וּל וַיִּשְׁלַח֙ מַלְאָכִ֣ים שְׁלִשִׁ֔ים וַיִּֽתְנַבְּא֖וּ גַּם־הֵֽמָּה׃ wayagidu leshaʾul wayishelaḥ maleʾakhiym ʾaḥeriym wayitenabeʾu gam־hemah wayosef shaʾul wayishelaḥ maleʾakhiym shelishiym wayitenabeʾu gam־hemah׃

²² וַיֵּ֨לֶךְ גַּם־ה֜וּא הָרָמָ֗תָה וַיָּבֹא֙ עַד־בֹּ֤ור הַגָּדֹול֙ אֲשֶׁ֣ר בַּשֶּׂ֔כוּ וַיִּשְׁאַ֣ל וַיֹּ֔אמֶר אֵיפֹ֥ה שְׁמוּאֵ֖ל וְדָוִ֑ד וַיֹּ֕אמֶר הִנֵּ֖ה [בְּנֹוִית כ] (בְּנָיֹ֥ות ק) בָּרָמָֽה׃ wayelekhe gam־huʾ haramatah wayavoʾ ʿad־bowr hagadowl ʾasher basekhu wayisheʾal wayoʾmer ʾeyfoh shemuʾel wedawid wayoʾmer hineh [benowiyt kh] (benayowt q) baramah׃

²³ וַיֵּ֣לֶךְ שָׁ֔ם אֶל־ [נֹוִית כ] (נָיֹ֖ות ק) בָּרָמָ֑ה וַתְּהִי֩ עָלָ֨יו גַּם־ה֜וּא ר֣וּחַ אֱלֹהִ֗ים וַיֵּ֤לֶךְ הָלֹוךְ֙ וַיִּתְנַבֵּ֔א עַד־בֹּאֹ֖ו [בְּנֹוִית כ] (בְּנָיֹ֥ות ק) בָּרָמָֽה׃ wayelekhe sham ʾel־ [nowiyt kh] (nayowt q) baramah watehiy ʿalayw gam־huʾ ruaḥ ʾelohiym wayelekhe halowkhe wayitenabeʾ ʿad־boʾow [benowiyt kh] (benayowt q) baramah׃

²⁴ וַיִּפְשַׁ֨ט גַּם־ה֜וּא בְּגָדָ֗יו וַיִּתְנַבֵּ֤א גַם־הוּא֙ לִפְנֵ֣י שְׁמוּאֵ֔ל וַיִּפֹּ֣ל עָרֹ֔ם כָּל־הַיֹּ֥ום הַה֖וּא וְכָל־הַלָּ֑יְלָה עַל־כֵּן֙ יֹֽאמְר֔וּ הֲגַ֥ם שָׁא֖וּל בַּנְּבִיאִֽם׃ פ wayifeshaṭ gam־huʾ begadayw wayitenabeʾ gam־huʾ lifeney shemuʾel wayipol ʿarom kal־hayowm hahuʾ wekhal־halayelah ʿal־ken yoʾmeru hagam shaʾul baneviyʾim׃ f