2 Samuel 4

¹ וַיִּשְׁמַ֣ע בֶּן־שָׁא֗וּל כִּ֣י מֵ֤ת אַבְנֵר֙ בְּחֶבְרֹ֔ון וַיִּרְפּ֖וּ יָדָ֑יו וְכָל־יִשְׂרָאֵ֖ל נִבְהָֽלוּ׃ wayishemaʿ ben־shaʾul kiy met ʾavener beḥeverown wayirepu yadayw wekhal־yiseraʾel nivehalu׃

² וּשְׁנֵ֣י אֲנָשִׁ֣ים שָׂרֵֽי־גְדוּדִ֣ים הָי֪וּ בֶן־שָׁא֟וּל שֵׁם֩ הָאֶחָ֨ד בַּֽעֲנָ֜ה וְשֵׁ֧ם הַשֵּׁנִ֣י רֵכָ֗ב בְּנֵ֛י רִמֹּ֥ון הַבְּאֶֽרֹתִ֖י מִבְּנֵ֣י בִנְיָמִ֑ן כִּ֚י גַּם־בְּאֵרֹ֔ות תֵּחָשֵׁ֖ב עַל־בִּנְיָמִֽן׃ usheney ʾanashiym sarey־gedudiym hayu ven־shaʾul shem haʾeḥad baʿanah weshem hasheniy rekhav beney rimown habeʾerotiy mibeney vineyamin kiy gam־beʾerowt teḥashev ʿal־bineyamin׃

³ וַיִּבְרְח֥וּ הַבְּאֵרֹתִ֖ים גִּתָּ֑יְמָה וַֽיִּהְיוּ־שָׁ֣ם גָּרִ֔ים עַ֖ד הַיֹּ֥ום הַזֶּֽה׃ ס wayivereḥu habeʾerotiym gitayemah wayiheyu־sham gariym ʿad hayowm hazeh׃ s

⁴ וְלִיהֹֽונָתָן֙ בֶּן־שָׁא֔וּל בֵּ֖ן נְכֵ֣ה רַגְלָ֑יִם בֶּן־חָמֵ֣שׁ שָׁנִ֣ים הָיָ֡ה בְּבֹ֣א שְׁמֻעַת֩ שָׁא֨וּל וִיהֹֽונָתָ֜ן מִֽיִּזְרְעֶ֗אל וַתִּשָּׂאֵ֤הוּ אֹֽמַנְתֹּו֙ וַתָּנֹ֔ס וַיְהִ֞י בְּחָפְזָ֥הּ לָנ֛וּס וַיִּפֹּ֥ל וַיִּפָּסֵ֖חַ וּשְׁמֹ֥ו מְפִיבֹֽשֶׁת׃ weliyhownatan ben־shaʾul ben nekheh ragelayim ben־ḥamesh shaniym hayah bevoʾ shemuʿat shaʾul wiyhownatan miyizereʿeʾl watisaʾehu ʾomanetow watanos wayehiy beḥafezah lanus wayipol wayipaseaḥ ushemow mefiyvoshet׃

⁵ וַיֵּ֨לְכ֜וּ בְּנֵֽי־רִמֹּ֤ון הַבְּאֵֽרֹתִי֙ רֵכָ֣ב וּבַעֲנָ֔ה וַיָּבֹ֙אוּ֙ כְּחֹ֣ם הַיֹּ֔ום אֶל־בֵּ֖ית אִ֣ישׁ בֹּ֑שֶׁת וְה֣וּא שֹׁכֵ֔ב אֵ֖ת מִשְׁכַּ֥ב הַֽצָּהֳרָֽיִם׃ wayelekhu beney־rimown habeʾerotiy rekhav uvaʿanah wayavoʾu keḥom hayowm ʾel־beyt ʾiysh boshet wehuʾ shokhev ʾet mishekav hatsahorayim׃

⁶ וְ֠הֵנָּה בָּ֜אוּ עַד־תֹּ֤וךְ הַבַּ֙יִת֙ לֹקְחֵ֣י חִטִּ֔ים וַיַּכֻּ֖הוּ אֶל־הַחֹ֑מֶשׁ וְרֵכָ֛ב וּבַעֲנָ֥ה אָחִ֖יו נִמְלָֽטוּ׃ wehenah baʾu ʿad־towkhe habayit loqeḥey ḥiṭiym wayakuhu ʾel־haḥomesh werekhav uvaʿanah ʾaḥiyw nimelaṭu׃

⁷ וַיָּבֹ֣אוּ הַבַּ֗יִת וְהֽוּא־שֹׁכֵ֤ב עַל־מִטָּתֹו֙ בַּחֲדַ֣ר מִשְׁכָּבֹ֔ו וַיַּכֻּ֙הוּ֙ וַיְמִתֻ֔הוּ וַיָּסִ֖ירוּ אֶת־רֹאשֹׁ֑ו וַיִּקְחוּ֙ אֶת־רֹאשֹׁ֔ו וַיֵּֽלְכ֛וּ דֶּ֥רֶךְ הָעֲרָבָ֖ה כָּל־הַלָּֽיְלָה׃ wayavoʾu habayit wehuʾ־shokhev ʿal־miṭatow baḥadar mishekavow wayakuhu wayemituhu wayasiyru ʾet־roʾshow wayiqeḥu ʾet־roʾshow wayelekhu derekhe haʿaravah kal־halayelah׃

⁸ וַ֠יָּבִאוּ אֶת־רֹ֨אשׁ אִֽישׁ־בֹּ֥שֶׁת אֶל־דָּוִד֮ חֶבְרֹון֒ וַיֹּֽאמְרוּ֙ אֶל־הַמֶּ֔לֶךְ הִנֵּֽה־רֹ֣אשׁ אִֽישׁ־בֹּ֗שֶׁת בֶּן־שָׁאוּל֙ אֹֽיִבְךָ֔ אֲשֶׁ֥ר בִּקֵּ֖שׁ אֶת־נַפְשֶׁ֑ךָ וַיִּתֵּ֣ן יְ֠הוָה לַֽאדֹנִ֨י הַמֶּ֤לֶךְ נְקָמֹות֙ הַיֹּ֣ום הַזֶּ֔ה מִשָּׁא֖וּל וּמִזַּרְעֹֽו׃ ס wayaviʾu ʾet־roʾsh ʾiysh־boshet ʾel־dawid ḥeverown wayoʾmeru ʾel־hamelekhe hineh־roʾsh ʾiysh־boshet ben־shaʾul ʾoyivekha ʾasher biqesh ʾet־nafeshekha wayiten yehwah laʾdoniy hamelekhe neqamowt hayowm hazeh mishaʾul umizareʿow׃ s

⁹ וַיַּ֨עַן דָּוִ֜ד אֶת־רֵכָ֣ב ׀ וְאֶת־בַּעֲנָ֣ה אָחִ֗יו בְּנֵ֛י רִמֹּ֥ון הַבְּאֵֽרֹתִ֖י וַיֹּ֣אמֶר לָהֶ֑ם חַי־יְהוָ֕ה אֲשֶׁר־פָּדָ֥ה אֶת־נַפְשִׁ֖י מִכָּל־צָרָֽה׃ wayaʿan dawid ʾet־rekhav ׀ weʾet־baʿanah ʾaḥiyw beney rimown habeʾerotiy wayoʾmer lahem ḥay־yehwah ʾasher־padah ʾet־nafeshiy mikal־tsarah׃

¹⁰ כִּ֣י הַמַּגִּיד֩ לִ֨י לֵאמֹ֜ר הִנֵּה־מֵ֣ת שָׁא֗וּל וְהֽוּא־הָיָ֤ה כִמְבַשֵּׂר֙ בְּעֵינָ֔יו וָאֹחֲזָ֣ה בֹ֔ו וָאֶהְרְגֵ֖הוּ בְּצִֽקְלָ֑ג אֲשֶׁ֥ר לְתִתִּי־לֹ֖ו בְּשֹׂרָֽה׃ kiy hamagiyd liy leʾmor hineh־met shaʾul wehuʾ־hayah khimevaser beʿeynayw waʾoḥazah vow waʾeheregehu betsiqelag ʾasher letitiy־low besorah׃

¹¹ אַ֞ף כִּֽי־אֲנָשִׁ֣ים רְשָׁעִ֗ים הָרְג֧וּ אֶת־אִישׁ־צַדִּ֛יק בְּבֵיתֹ֖ו עַל־מִשְׁכָּבֹ֑ו וְעַתָּ֗ה הֲלֹ֨וא אֲבַקֵּ֤שׁ אֶת־דָּמֹו֙ מִיֶּדְכֶ֔ם וּבִעַרְתִּ֥י אֶתְכֶ֖ם מִן־הָאָֽרֶץ׃ ʾaf kiy־ʾanashiym reshaʿiym haregu ʾet־ʾiysh־tsadiyq beveytow ʿal־mishekavow weʿatah halowʾ ʾavaqesh ʾet־damow miyedekhem uviʿaretiy ʾetekhem min־haʾarets׃

¹² וַיְצַו֩ דָּוִ֨ד אֶת־הַנְּעָרִ֜ים וַיַּהַרְג֗וּם וַֽיְקַצְּצ֤וּ אֶת־יְדֵיהֶם֙ וְאֶת־רַגְלֵיהֶ֔ם וַיִּתְל֥וּ עַל־הַבְּרֵכָ֖ה בְּחֶבְרֹ֑ון וְאֵ֨ת רֹ֤אשׁ אִֽישׁ־בֹּ֙שֶׁת֙ לָקָ֔חוּ וַיִּקְבְּר֥וּ בְקֶֽבֶר־אַבְנֵ֖ר בְּחֶבְרֹֽון׃ פ wayetsaw dawid ʾet־haneʿariym wayaharegum wayeqatsetsu ʾet־yedeyhem weʾet־rageleyhem wayitelu ʿal־haberekhah beḥeverown weʾet roʾsh ʾiysh־boshet laqaḥu wayiqeberu veqever־ʾavener beḥeverown׃ f