Amos 4

¹ שִׁמְע֞וּ הַדָּבָ֣ר הַזֶּ֗ה פָּרֹ֤ות הַבָּשָׁן֙ אֲשֶׁר֙ בְּהַ֣ר שֹֽׁמְרֹ֔ון הָעֹשְׁקֹ֣ות דַּלִּ֔ים הָרֹצְצֹ֖ות אֶבְיֹונִ֑ים הָאֹמְרֹ֥ת לַאֲדֹֽנֵיהֶ֖ם הָבִ֥יאָה וְנִשְׁתֶּֽה׃ shimeʿu hadavar hazeh parowt habashan ʾasher behar shomerown haʿosheqowt daliym harotsetsowt ʾeveyowniym haʾomerot laʾadoneyhem haviyʾah wenisheteh׃

² נִשְׁבַּ֨ע אֲדֹנָ֤י יְהוִה֙ בְּקָדְשֹׁ֔ו כִּ֛י הִנֵּ֥ה יָמִ֖ים בָּאִ֣ים עֲלֵיכֶ֑ם וְנִשָּׂ֤א אֶתְכֶם֙ בְּצִנֹּ֔ות וְאַחֲרִיתְכֶ֖ן בְּסִירֹ֥ות דּוּגָֽה׃ nishebaʿ ʾadonay yehwih beqadeshow kiy hineh yamiym baʾiym ʿaleykhem wenisaʾ ʾetekhem betsinowt weʾaḥariytekhen besiyrowt dugah׃

³ וּפְרָצִ֥ים תֵּצֶ֖אנָה אִשָּׁ֣ה נֶגְדָּ֑הּ וְהִשְׁלַכְתֶּ֥נָה הַהַרְמֹ֖ונָה נְאֻם־יְהוָֽה׃ uferatsiym tetseʾnah ʾishah negedah wehishelakhetenah haharemownah neʾum־yehwah׃

⁴ בֹּ֤אוּ בֵֽית־אֵל֙ וּפִשְׁע֔וּ הַגִּלְגָּ֖ל הַרְבּ֣וּ לִפְשֹׁ֑עַ וְהָבִ֤יאוּ לַבֹּ֙קֶר֙ זִבְחֵיכֶ֔ם לִשְׁלֹ֥שֶׁת יָמִ֖ים מַעְשְׂרֹֽתֵיכֶֽם׃ boʾu veyt־ʾel ufisheʿu hagilegal harebu lifeshoaʿ wehaviyʾu laboqer ziveḥeykhem lisheloshet yamiym maʿeseroteykhem׃

⁵ וְקַטֵּ֤ר מֵֽחָמֵץ֙ תֹּודָ֔ה וְקִרְא֥וּ נְדָבֹ֖ות הַשְׁמִ֑יעוּ כִּ֣י כֵ֤ן אֲהַבְתֶּם֙ בְּנֵ֣י יִשְׂרָאֵ֔ל נְאֻ֖ם אֲדֹנָ֥י יְהוִֽה׃ weqaṭer meḥamets towdah weqireʾu nedavowt hashemiyʿu kiy khen ʾahavetem beney yiseraʾel neʾum ʾadonay yehwih׃

⁶ וְגַם־אֲנִי֩ נָתַ֨תִּי לָכֶ֜ם נִקְיֹ֤ון שִׁנַּ֙יִם֙ בְּכָל־עָ֣רֵיכֶ֔ם וְחֹ֣סֶר לֶ֔חֶם בְּכֹ֖ל מְקֹומֹֽתֵיכֶ֑ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ wegam־ʾaniy natatiy lakhem niqeyown shinayim bekhal־ʿareykhem weḥoser leḥem bekhol meqowmoteykhem weloʾ־shavetem ʿaday neʾum־yehwah׃

⁷ וְגַ֣ם אָנֹכִי֩ מָנַ֨עְתִּי מִכֶּ֜ם אֶת־הַגֶּ֗שֶׁם בְּעֹ֨וד שְׁלֹשָׁ֤ה חֳדָשִׁים֙ לַקָּצִ֔יר וְהִמְטַרְתִּי֙ עַל־עִ֣יר אֶחָ֔ת וְעַל־עִ֥יר אַחַ֖ת לֹ֣א אַמְטִ֑יר חֶלְקָ֤ה אַחַת֙ תִּמָּטֵ֔ר וְחֶלְקָ֛ה אֲשֶֽׁר־לֹֽא־תַמְטִ֥יר עָלֶ֖יהָ תִּיבָֽשׁ׃ wegam ʾanokhiy manaʿetiy mikem ʾet־hageshem beʿowd sheloshah ḥodashiym laqatsiyr wehimeṭaretiy ʿal־ʿiyr ʾeḥat weʿal־ʿiyr ʾaḥat loʾ ʾameṭiyr ḥeleqah ʾaḥat timaṭer weḥeleqah ʾasher־loʾ־tameṭiyr ʿaleyha tiyvash׃

⁸ וְנָע֡וּ שְׁתַּיִם֩ שָׁלֹ֨שׁ עָרִ֜ים אֶל־עִ֥יר אַחַ֛ת לִשְׁתֹּ֥ות מַ֖יִם וְלֹ֣א יִשְׂבָּ֑עוּ וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ wenaʿu shetayim shalosh ʿariym ʾel־ʿiyr ʾaḥat lishetowt mayim weloʾ yisebaʿu weloʾ־shavetem ʿaday neʾum־yehwah׃

⁹ הִכֵּ֣יתִי אֶתְכֶם֮ בַּשִּׁדָּפֹ֣ון וּבַיֵּרָקֹון֒ הַרְבֹּ֨ות גַּנֹּותֵיכֶ֧ם וְכַרְמֵיכֶ֛ם וּתְאֵנֵיכֶ֥ם וְזֵיתֵיכֶ֖ם יֹאכַ֣ל הַגָּזָ֑ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ ס hikeytiy ʾetekhem bashidafown uvayeraqown harebowt ganowteykhem wekharemeykhem uteʾeneykhem wezeyteykhem yoʾkhal hagazam weloʾ־shavetem ʿaday neʾum־yehwah׃ s

¹⁰ שִׁלַּ֨חְתִּי בָכֶ֥ם דֶּ֙בֶר֙ בְּדֶ֣רֶךְ מִצְרַ֔יִם הָרַ֤גְתִּי בַחֶ֙רֶב֙ בַּח֣וּרֵיכֶ֔ם עִ֖ם שְׁבִ֣י סֽוּסֵיכֶ֑ם וָאַעֲלֶ֞ה בְּאֹ֤שׁ מַחֲנֵיכֶם֙ וּֽבְאַפְּכֶ֔ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ shilaḥetiy vakhem dever bederekhe mitserayim haragetiy vaḥerev baḥureykhem ʿim sheviy suseykhem waʾaʿaleh beʾosh maḥaneykhem uveʾapekhem weloʾ־shavetem ʿaday neʾum־yehwah׃

¹¹ הָפַ֣כְתִּי בָכֶ֗ם כְּמַהְפֵּכַ֤ת אֱלֹהִים֙ אֶת־סְדֹ֣ם וְאֶת־עֲמֹרָ֔ה וַתִּהְי֕וּ כְּא֖וּד מֻצָּ֣ל מִשְּׂרֵפָ֑ה וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ ס hafakhetiy vakhem kemahepekhat ʾelohiym ʾet־sedom weʾet־ʿamorah watiheyu keʾud mutsal miserefah weloʾ־shavetem ʿaday neʾum־yehwah׃ s

¹² לָכֵ֕ן כֹּ֥ה אֶעֱשֶׂה־לְּךָ֖ יִשְׂרָאֵ֑ל עֵ֚קֶב כִּֽי־זֹ֣את אֶֽעֱשֶׂה־לָּ֔ךְ הִכֹּ֥ון לִקְרַאת־אֱלֹהֶ֖יךָ יִשְׂרָאֵֽל׃ lakhen koh ʾeʿeseh־lekha yiseraʾel ʿeqev kiy־zoʾt ʾeʿeseh־lakhe hikown liqeraʾt־ʾeloheykha yiseraʾel׃

¹³ כִּ֡י הִנֵּה֩ יֹוצֵ֨ר הָרִ֜ים וּבֹרֵ֣א ר֗וּחַ וּמַגִּ֤יד לְאָדָם֙ מַה־שֵּׂחֹ֔ו עֹשֵׂ֥ה שַׁ֙חַר֙ עֵיפָ֔ה וְדֹרֵ֖ךְ עַל־בָּ֣מֳתֵי אָ֑רֶץ יְהוָ֥ה אֱלֹהֵֽי־צְבָאֹ֖ות שְׁמֹֽו׃ ס kiy hineh yowtser hariym uvoreʾ ruaḥ umagiyd leʾadam mah־seḥow ʿoseh shaḥar ʿeyfah wedorekhe ʿal־bamotey ʾarets yehwah ʾelohey־tsevaʾowt shemow׃ s