1 הִנָּ֨ךְ יָפָ֤ה רַעְיָתִי֙ הִנָּ֣ךְ יָפָ֔ה עֵינַ֣יִךְ יֹונִ֔ים מִבַּ֖עַד לְצַמָּתֵ֑ךְ שַׂעְרֵךְ֙ כְּעֵ֣דֶר הָֽעִזִּ֔ים שֶׁגָּלְשׁ֖וּ מֵהַ֥ר גִּלְעָֽד׃ hinakhe yafah raʿeyatiy hinakhe yafah ʿeynayikhe yowniym mibaʿad letsamatekhe saʿerekhe keʿeder haʿiziym shegaleshu mehar gileʿad׃
2 שִׁנַּ֙יִךְ֙ כְּעֵ֣דֶר הַקְּצוּבֹ֔ות שֶׁעָל֖וּ מִן־הָרַחְצָ֑ה שֶׁכֻּלָּם֙ מַתְאִימֹ֔ות וְשַׁכֻּלָ֖ה אֵ֥ין בָּהֶֽם׃ shinayikhe keʿeder haqetsuvowt sheʿalu min־haraḥetsah shekulam mateʾiymowt weshakulah ʾeyn bahem׃
3 כְּח֤וּט הַשָּׁנִי֙ שִׂפְתֹתַ֔יִךְ וּמִדְבָּרֵ֖יךְ נָאוֶ֑ה כְּפֶ֤לַח הָֽרִמֹּון֙ רַקָּתֵ֔ךְ מִבַּ֖עַד לְצַמָּתֵֽךְ׃ keḥuṭ hashaniy sifetotayikhe umidebareykhe naʾweh kefelaḥ harimown raqatekhe mibaʿad letsamatekhe׃
4 כְּמִגְדַּ֤ל דָּוִיד֙ צַוָּארֵ֔ךְ בָּנ֖וּי לְתַלְפִּיֹּ֑ות אֶ֤לֶף הַמָּגֵן֙ תָּל֣וּי עָלָ֔יו כֹּ֖ל שִׁלְטֵ֥י הַגִּבֹּורִֽים׃ kemigedal dawiyd tsauaʾrekhe banuy letalepiyowt ʾelef hamagen taluy ʿalayw kol shileṭey hagibowriym׃
5 שְׁנֵ֥י שָׁדַ֛יִךְ כִּשְׁנֵ֥י עֳפָרִ֖ים תְּאֹומֵ֣י צְבִיָּ֑ה הָרֹועִ֖ים בַּשֹּׁושַׁנִּֽים׃ sheney shadayikhe kisheney ʿofariym teʾowmey tseviyah harowʿiym bashowshaniym׃
6 עַ֤ד שֶׁיָּפ֙וּחַ֙ הַיֹּ֔ום וְנָ֖סוּ הַצְּלָלִ֑ים אֵ֤לֶךְ לִי֙ אֶל־הַ֣ר הַמֹּ֔ור וְאֶל־גִּבְעַ֖ת הַלְּבֹונָֽה׃ ʿad sheyafuaḥ hayowm wenasu hatselaliym ʾelekhe liy ʾel־har hamowr weʾel־giveʿat halevownah׃
7 כֻּלָּ֤ךְ יָפָה֙ רַעְיָתִ֔י וּמ֖וּם אֵ֥ין בָּֽךְ׃ ס kulakhe yafah raʿeyatiy umum ʾeyn bakhe׃ s
8 אִתִּ֤י מִלְּבָנֹון֙ כַּלָּ֔ה אִתִּ֖י מִלְּבָנֹ֣ון תָּבֹ֑ואִי תָּשׁ֣וּרִי ׀ מֵרֹ֣אשׁ אֲמָנָ֗ה מֵרֹ֤אשׁ שְׂנִיר֙ וְחֶרְמֹ֔ון מִמְּעֹנֹ֣ות אֲרָיֹ֔ות מֵֽהַרְרֵ֖י נְמֵרִֽים׃ ʾitiy milevanown kalah ʾitiy milevanown tavowʾiy tashuriy ׀ meroʾsh ʾamanah meroʾsh seniyr weḥeremown mimeʿonowt ʾarayowt meharerey nemeriym׃
9 לִבַּבְתִּ֖נִי אֲחֹתִ֣י כַלָּ֑ה לִבַּבְתִּ֙ינִי֙ [בְּאַחַד כ] (בְּאַחַ֣ת ק) מֵעֵינַ֔יִךְ בְּאַחַ֥ד עֲנָ֖ק מִצַּוְּרֹנָֽיִךְ׃ libavetiniy ʾaḥotiy khalah libavetiyniy [beʾaḥad kh] (beʾaḥat q) meʿeynayikhe beʾaḥad ʿanaq mitsaueronayikhe׃
10 מַה־יָּפ֥וּ דֹדַ֖יִךְ אֲחֹתִ֣י כַלָּ֑ה מַה־טֹּ֤בוּ דֹדַ֙יִךְ֙ מִיַּ֔יִן וְרֵ֥יחַ שְׁמָנַ֖יִךְ מִכָּל־בְּשָׂמִֽים׃ mah־yafu dodayikhe ʾaḥotiy khalah mah־ṭovu dodayikhe miyayin wereyḥa shemanayikhe mikal־besamiym׃
11 נֹ֛פֶת תִּטֹּ֥פְנָה שִׂפְתֹותַ֖יִךְ כַּלָּ֑ה דְּבַ֤שׁ וְחָלָב֙ תַּ֣חַת לְשֹׁונֵ֔ךְ וְרֵ֥יחַ שַׂלְמֹתַ֖יִךְ כְּרֵ֥יחַ לְבָנֹֽון׃ ס nofet tiṭofenah sifetowtayikhe kalah devash weḥalav taḥat leshownekhe wereyḥa salemotayikhe kereyḥa levanown׃ s
12 גַּ֥ן ׀ נָע֖וּל אֲחֹתִ֣י כַלָּ֑ה גַּ֥ל נָע֖וּל מַעְיָ֥ן חָתֽוּם׃ gan ׀ naʿul ʾaḥotiy khalah gal naʿul maʿeyan ḥatum׃
13 שְׁלָחַ֙יִךְ֙ פַּרְדֵּ֣ס רִמֹּונִ֔ים עִ֖ם פְּרִ֣י מְגָדִ֑ים כְּפָרִ֖ים עִם־נְרָדִֽים׃ shelaḥayikhe paredes rimowniym ʿim periy megadiym kefariym ʿim־neradiym׃
14 נֵ֣רְדְּ ׀ וְכַרְכֹּ֗ם קָנֶה֙ וְקִנָּמֹ֔ון עִ֖ם כָּל־עֲצֵ֣י לְבֹונָ֑ה מֹ֚ר וַאֲהָלֹ֔ות עִ֖ם כָּל־רָאשֵׁ֥י בְשָׂמִֽים׃ nerede ׀ wekharekom qaneh weqinamown ʿim kal־ʿatsey levownah mor waʾahalowt ʿim kal־raʾshey vesamiym׃
15 מַעְיַ֣ן גַּנִּ֔ים בְּאֵ֖ר מַ֣יִם חַיִּ֑ים וְנֹזְלִ֖ים מִן־לְבָנֹֽון׃ maʿeyan ganiym beʾer mayim ḥayiym wenozeliym min־levanown׃
16 ע֤וּרִי צָפֹון֙ וּבֹ֣ואִי תֵימָ֔ן הָפִ֥יחִי גַנִּ֖י יִזְּל֣וּ בְשָׂמָ֑יו יָבֹ֤א דֹודִי֙ לְגַנֹּ֔ו וְיֹאכַ֖ל פְּרִ֥י מְגָדָֽיו׃ ʿuriy tsafown uvowʾiy teyman hafiyḥiy ganiy yizelu vesamayw yavoʾ dowdiy leganow weyoʾkhal periy megadayw׃