1 אֲנִי֙ חֲבַצֶּ֣לֶת הַשָּׁרֹ֔ון שֹֽׁושַׁנַּ֖ת הָעֲמָקִֽים׃ ʾaniy ḥavatselet hasharown showshanat haʿamaqiym׃

2 כְּשֹֽׁושַׁנָּה֙ בֵּ֣ין הַחֹוחִ֔ים כֵּ֥ן רַעְיָתִ֖י בֵּ֥ין הַבָּנֹֽות׃ keshowshanah beyn haḥowḥiym ken raʿeyatiy beyn habanowt׃

3 כְּתַפּ֙וּחַ֙ בַּעֲצֵ֣י הַיַּ֔עַר כֵּ֥ן דֹּודִ֖י בֵּ֣ין הַבָּנִ֑ים בְּצִלֹּו֙ חִמַּ֣דְתִּי וְיָשַׁ֔בְתִּי וּפִרְיֹ֖ו מָתֹ֥וק לְחִכִּֽי׃ ketapuaḥ baʿatsey hayaʿar ken dowdiy beyn habaniym betsilow ḥimadetiy weyashavetiy ufireyow matowq leḥikiy׃

4 הֱבִיאַ֙נִי֙ אֶל־בֵּ֣ית הַיָּ֔יִן וְדִגְלֹ֥ו עָלַ֖י אַהֲבָֽה׃ heviyʾaniy ʾel־beyt hayayin wedigelow ʿalay ʾahavah׃

5 סַמְּכ֙וּנִי֙ בָּֽאֲשִׁישֹׁ֔ות רַפְּד֖וּנִי בַּתַּפּוּחִ֑ים כִּי־חֹולַ֥ת אַהֲבָ֖ה אָֽנִי׃ samekhuniy baʾashiyshowt rapeduniy batapuḥiym kiy־ḥowlat ʾahavah ʾaniy׃

6 שְׂמֹאלֹו֙ תַּ֣חַת לְרֹאשִׁ֔י וִימִינֹ֖ו תְּחַבְּקֵֽנִי׃ semoʾlow taḥat leroʾshiy wiymiynow teḥabeqeniy׃

7 הִשְׁבַּ֨עְתִּי אֶתְכֶ֜ם בְּנֹ֤ות יְרוּשָׁלִַ֙ם֙ בִּצְבָאֹ֔ות אֹ֖ו בְּאַיְלֹ֣ות הַשָּׂדֶ֑ה אִם־תָּעִ֧ירוּ ׀ וְֽאִם־תְּעֹֽורְר֛וּ אֶת־הָאַהֲבָ֖ה עַ֥ד שֶׁתֶּחְפָּֽץ׃ ס hishebaʿetiy ʾetekhem benowt yerushalim bitsevaʾowt ʾow beʾayelowt hasadeh ʾim־taʿiyru ׀ weʾim־teʿowreru ʾet־haʾahavah ʿad sheteḥepats׃ s

8 קֹ֣ול דֹּודִ֔י הִנֵּה־זֶ֖ה בָּ֑א מְדַלֵּג֙ עַל־הֶ֣הָרִ֔ים מְקַפֵּ֖ץ עַל־הַגְּבָעֹֽות׃ qowl dowdiy hineh־zeh baʾ medaleg ʿal־hehariym meqapets ʿal־hagevaʿowt׃

9 דֹּומֶ֤ה דֹודִי֙ לִצְבִ֔י אֹ֖ו לְעֹ֣פֶר הָֽאַיָּלִ֑ים הִנֵּה־זֶ֤ה עֹומֵד֙ אַחַ֣ר כָּתְלֵ֔נוּ מַשְׁגִּ֙יחַ֙ מִן־הַֽחֲלֹּנֹ֔ות מֵצִ֖יץ מִן־הַֽחֲרַכִּֽים׃ dowmeh dowdiy litseviy ʾow leʿofer haʾayaliym hineh־zeh ʿowmed ʾaḥar katelenu mashegiyḥa min־haḥalonowt metsiyts min־haḥarakiym׃

10 עָנָ֥ה דֹודִ֖י וְאָ֣מַר לִ֑י ק֥וּמִי לָ֛ךְ רַעְיָתִ֥י יָפָתִ֖י וּלְכִי־לָֽךְ׃ ʿanah dowdiy weʾamar liy qumiy lakhe raʿeyatiy yafatiy ulekhiy־lakhe׃

11 כִּֽי־הִנֵּ֥ה [הַסְּתָו כ] (הַסְּתָ֖יו ק) עָבָ֑ר הַגֶּ֕שֶׁם חָלַ֖ף הָלַ֥ךְ לֹֽו׃ kiy־hineh [hasetaw kh] (hasetayw q) ʿavar hageshem ḥalaf halakhe low׃

12 הַנִּצָּנִים֙ נִרְא֣וּ בָאָ֔רֶץ עֵ֥ת הַזָּמִ֖יר הִגִּ֑יעַ וְקֹ֥ול הַתֹּ֖ור נִשְׁמַ֥ע בְּאַרְצֵֽנוּ׃ hanitsaniym nireʾu vaʾarets ʿet hazamiyr higiyʿa weqowl hatowr nishemaʿ beʾaretsenu׃

13 הַתְּאֵנָה֙ חָֽנְטָ֣ה פַגֶּ֔יהָ וְהַגְּפָנִ֥ים ׀ סְמָדַ֖ר נָ֣תְנוּ רֵ֑יחַ ק֥וּמִי [לְכִי כ] (לָ֛ךְ ק) רַעְיָתִ֥י יָפָתִ֖י וּלְכִי־לָֽךְ׃ ס hateʾenah ḥaneṭah fageyha wehagefaniym ׀ semadar natenu reyḥa qumiy [lekhiy kh] (lakhe q) raʿeyatiy yafatiy ulekhiy־lakhe׃ s

14 יֹונָתִ֞י בְּחַגְוֵ֣י הַסֶּ֗לַע בְּסֵ֙תֶר֙ הַמַּדְרֵגָ֔ה הַרְאִ֙ינִי֙ אֶת־מַרְאַ֔יִךְ הַשְׁמִיעִ֖ינִי אֶת־קֹולֵ֑ךְ כִּי־קֹולֵ֥ךְ עָרֵ֖ב וּמַרְאֵ֥יךְ נָאוֶֽה׃ ס yownatiy beḥagewey haselaʿ beseter hamaderegah hareʾiyniy ʾet־mareʾayikhe hashemiyʿiyniy ʾet־qowlekhe kiy־qowlekhe ʿarev umareʾeykhe naʾweh׃ s

15 אֶֽחֱזוּ־לָ֙נוּ֙ שֽׁוּעָלִ֔ים שֽׁוּעָלִ֥ים קְטַנִּ֖ים מְחַבְּלִ֣ים כְּרָמִ֑ים וּכְרָמֵ֖ינוּ סְמָדַֽר׃ ʾeḥezu־lanu shuʿaliym shuʿaliym qeṭaniym meḥabeliym keramiym ukherameynu semadar׃

16 דֹּודִ֥י לִי֙ וַאֲנִ֣י לֹ֔ו הָרֹעֶ֖ה בַּשֹּׁושַׁנִּֽים׃ dowdiy liy waʾaniy low haroʿeh bashowshaniym׃

17 עַ֤ד שֶׁיָּפ֙וּחַ֙ הַיֹּ֔ום וְנָ֖סוּ הַצְּלָלִ֑ים סֹב֩ דְּמֵה־לְךָ֙ דֹודִ֜י לִצְבִ֗י אֹ֛ו לְעֹ֥פֶר הָאַיָּלִ֖ים עַל־הָ֥רֵי בָֽתֶר׃ ס ʿad sheyafuaḥ hayowm wenasu hatselaliym sov demeh־lekha dowdiy litseviy ʾow leʿofer haʾayaliym ʿal־harey vater׃ s