1 Rois 3

¹ וַיִּתְחַתֵּ֣ן שְׁלֹמֹ֔ה אֶת־פַּרְעֹ֖ה מֶ֣לֶךְ מִצְרָ֑יִם וַיִּקַּ֣ח אֶת־בַּת־פַּרְעֹ֗ה וַיְבִיאֶ֙הָ֙ אֶל־עִ֣יר דָּוִ֔ד עַ֣ד כַּלֹּתֹ֗ו לִבְנֹ֤ות אֶת־בֵּיתֹו֙ וְאֶת־בֵּ֣ית יְהוָ֔ה וְאֶת־חֹומַ֥ת יְרוּשָׁלִַ֖ם סָבִֽיב׃ wayiteḥaten shelomoh ʾet־pareʿoh melekhe mitserayim wayiqaḥ ʾet־bat־pareʿoh wayeviyʾeah ʾel־ʿiyr dawid ʿad kalotow livenowt ʾet־beytow weʾet־beyt yehwah weʾet־ḥowmat yerushalim saviyv׃

² רַ֣ק הָעָ֔ם מְזַבְּחִ֖ים בַּבָּמֹ֑ות כִּ֠י לֹא־נִבְנָ֥ה בַ֙יִת֙ לְשֵׁ֣ם יְהוָ֔ה עַ֖ד הַיָּמִ֥ים הָהֵֽם׃ פ raq haʿam mezabeḥiym babamowt kiy loʾ־nivenah vayit leshem yehwah ʿad hayamiym hahem׃ f

³ וַיֶּאֱהַ֤ב שְׁלֹמֹה֙ אֶת־יְהוָ֔ה לָלֶ֕כֶת בְּחֻקֹּ֖ות דָּוִ֣ד אָבִ֑יו רַ֚ק בַּבָּמֹ֔ות ה֥וּא מְזַבֵּ֖חַ וּמַקְטִֽיר׃ wayeʾehav shelomoh ʾet־yehwah lalekhet beḥuqowt dawid ʾaviyw raq babamowt huʾ mezabeaḥ umaqeṭiyr׃

⁴ וַיֵּ֨לֶךְ הַמֶּ֤לֶךְ גִּבְעֹ֙נָה֙ לִזְבֹּ֣חַ שָׁ֔ם כִּ֥י הִ֖יא הַבָּמָ֣ה הַגְּדֹולָ֑ה אֶ֤לֶף עֹלֹות֙ יַעֲלֶ֣ה שְׁלֹמֹ֔ה עַ֖ל הַמִּזְבֵּ֥חַ הַהֽוּא׃ wayelekhe hamelekhe giveʿonah lizeboaḥ sham kiy hiyʾ habamah hagedowlah ʾelef ʿolowt yaʿaleh shelomoh ʿal hamizebeaḥ hahuʾ׃

⁵ בְּגִבְעֹ֗ון נִרְאָ֧ה יְהֹוָ֛ה אֶל־שְׁלֹמֹ֖ה בַּחֲלֹ֣ום הַלָּ֑יְלָה וַיֹּ֣אמֶר אֱלֹהִ֔ים שְׁאַ֖ל מָ֥ה אֶתֶּן־לָֽךְ׃ begiveʿown nireʾah yehowah ʾel־shelomoh baḥalowm halayelah wayoʾmer ʾelohiym sheʾal mah ʾeten־lakhe׃

⁶ וַיֹּ֣אמֶר שְׁלֹמֹ֗ה אַתָּ֨ה עָשִׂ֜יתָ עִם־עַבְדְּךָ֙ דָוִ֣ד אָבִי֮ חֶ֣סֶד גָּדֹול֒ כַּאֲשֶׁר֩ הָלַ֨ךְ לְפָנֶ֜יךָ בֶּאֱמֶ֧ת וּבִצְדָקָ֛ה וּבְיִשְׁרַ֥ת לֵבָ֖ב עִמָּ֑ךְ וַתִּשְׁמָר־לֹ֗ו אֶת־הַחֶ֤סֶד הַגָּדֹול֙ הַזֶּ֔ה וַתִּתֶּן־לֹ֥ו בֵ֛ן יֹשֵׁ֥ב עַל־כִּסְאֹ֖ו כַּיֹּ֥ום הַזֶּֽה׃ wayoʾmer shelomoh ʾatah ʿasiyta ʿim־ʿavedekha dawid ʾaviy ḥesed gadowl kaʾasher halakhe lefaneykha beʾemet uvitsedaqah uveyisherat levav ʿimakhe watishemar־low ʾet־haḥesed hagadowl hazeh watiten־low ven yoshev ʿal־kiseʾow kayowm hazeh׃

⁷ וְעַתָּה֙ יְהוָ֣ה אֱלֹהָ֔י אַתָּה֙ הִמְלַ֣כְתָּ אֶֽת־עַבְדְּךָ֔ תַּ֖חַת דָּוִ֣ד אָבִ֑י וְאָֽנֹכִי֙ נַ֣עַר קָטֹ֔ן לֹ֥א אֵדַ֖ע צֵ֥את וָבֹֽא׃ weʿatah yehwah ʾelohay ʾatah himelakheta ʾet־ʿavedekha taḥat dawid ʾaviy weʾanokhiy naʿar qaṭon loʾ ʾedaʿ tseʾt wavoʾ׃

⁸ וְעַ֨בְדְּךָ֔ בְּתֹ֥וךְ עַמְּךָ֖ אֲשֶׁ֣ר בָּחָ֑רְתָּ עַם־רָ֕ב אֲשֶׁ֧ר לֹֽא־יִמָּנֶ֛ה וְלֹ֥א יִסָּפֵ֖ר מֵרֹֽב׃ weʿavedekha betowkhe ʿamekha ʾasher baḥareta ʿam־rav ʾasher loʾ־yimaneh weloʾ yisafer merov׃

⁹ וְנָתַתָּ֨ לְעַבְדְּךָ֜ לֵ֤ב שֹׁמֵ֙עַ֙ לִשְׁפֹּ֣ט אֶֽת־עַמְּךָ֔ לְהָבִ֖ין בֵּֽין־טֹ֣וב לְרָ֑ע כִּ֣י מִ֤י יוּכַל֙ לִשְׁפֹּ֔ט אֶת־עַמְּךָ֥ הַכָּבֵ֖ד הַזֶּֽה׃ wenatata leʿavedekha lev shomeaʿ lishepoṭ ʾet־ʿamekha lehaviyn beyn־ṭowv leraʿ kiy miy yukhal lishepoṭ ʾet־ʿamekha hakaved hazeh׃

¹⁰ וַיִּיטַ֥ב הַדָּבָ֖ר בְּעֵינֵ֣י אֲדֹנָ֑י כִּ֚י שָׁאַ֣ל שְׁלֹמֹ֔ה אֶת־הַדָּבָ֖ר הַזֶּֽה׃ wayiyṭav hadavar beʿeyney ʾadonay kiy shaʾal shelomoh ʾet־hadavar hazeh׃

¹¹ וַיֹּ֨אמֶר אֱלֹהִ֜ים אֵלָ֗יו יַעַן֩ אֲשֶׁ֨ר שָׁאַ֜לְתָּ אֶת־הַדָּבָ֣ר הַזֶּ֗ה וְלֹֽא־שָׁאַ֨לְתָּ לְּךָ֜ יָמִ֣ים רַבִּ֗ים וְלֹֽא־שָׁאַ֤לְתָּ לְּךָ֙ עֹ֔שֶׁר וְלֹ֥א שָׁאַ֖לְתָּ נֶ֣פֶשׁ אֹיְבֶ֑יךָ וְשָׁאַ֧לְתָּ לְּךָ֛ הָבִ֖ין לִשְׁמֹ֥עַ מִשְׁפָּֽט׃ wayoʾmer ʾelohiym ʾelayw yaʿan ʾasher shaʾaleta ʾet־hadavar hazeh weloʾ־shaʾaleta lekha yamiym rabiym weloʾ־shaʾaleta lekha ʿosher weloʾ shaʾaleta nefesh ʾoyeveykha weshaʾaleta lekha haviyn lishemoaʿ mishepaṭ׃

¹² הִנֵּ֥ה עָשִׂ֖יתִי כִּדְבָרֶ֑יךָ הִנֵּ֣ה ׀ נָתַ֣תִּי לְךָ֗ לֵ֚ב חָכָ֣ם וְנָבֹ֔ון אֲשֶׁ֤ר כָּמֹ֙וךָ֙ לֹא־הָיָ֣ה לְפָנֶ֔יךָ וְאַחֲרֶ֖יךָ לֹא־יָק֥וּם כָּמֹֽוךָ׃ hineh ʿasiytiy kidevareykha hineh ׀ natatiy lekha lev ḥakham wenavown ʾasher kamowkha loʾ־hayah lefaneykha weʾaḥareykha loʾ־yaqum kamowkha׃

¹³ וְגַ֨ם אֲשֶׁ֤ר לֹֽא־שָׁאַ֙לְתָּ֙ נָתַ֣תִּי לָ֔ךְ גַּם־עֹ֖שֶׁר גַּם־כָּבֹ֑וד אֲ֠שֶׁר לֹא־הָיָ֨ה כָמֹ֥וךָ אִ֛ישׁ בַּמְּלָכִ֖ים כָּל־יָמֶֽיךָ׃ wegam ʾasher loʾ־shaʾaleta natatiy lakhe gam־ʿosher gam־kavowd ʾasher loʾ־hayah khamowkha ʾiysh bamelakhiym kal־yameykha׃

¹⁴ וְאִ֣ם ׀ תֵּלֵ֣ךְ בִּדְרָכַ֗י לִשְׁמֹ֤ר חֻקַּי֙ וּמִצְוֹתַ֔י כַּאֲשֶׁ֥ר הָלַ֖ךְ דָּוִ֣יד אָבִ֑יךָ וְהַאַרַכְתִּ֖י אֶת־יָמֶֽיךָ׃ ס weʾim ׀ telekhe biderakhay lishemor ḥuqay umitseotay kaʾasher halakhe dawiyd ʾaviykha wehaʾarakhetiy ʾet־yameykha׃ s

¹⁵ וַיִּקַ֥ץ שְׁלֹמֹ֖ה וְהִנֵּ֣ה חֲלֹ֑ום וַיָּבֹ֨וא יְרוּשָׁלִַ֜ם וַֽיַּעֲמֹ֣ד ׀ לִפְנֵ֣י ׀ אֲרֹ֣ון בְּרִית־אֲדֹנָ֗י וַיַּ֤עַל עֹלֹות֙ וַיַּ֣עַשׂ שְׁלָמִ֔ים וַיַּ֥עַשׂ מִשְׁתֶּ֖ה לְכָל־עֲבָדָֽיו׃ פ wayiqats shelomoh wehineh ḥalowm wayavowʾ yerushalim wayaʿamod ׀ lifeney ׀ ʾarown beriyt־ʾadonay wayaʿal ʿolowt wayaʿas shelamiym wayaʿas misheteh lekhal־ʿavadayw׃ f

¹⁶ אָ֣ז תָּבֹ֗אנָה שְׁתַּ֛יִם נָשִׁ֥ים זֹנֹ֖ות אֶל־הַמֶּ֑לֶךְ וַֽתַּעֲמֹ֖דְנָה לְפָנָֽיו׃ ʾaz tavoʾnah shetayim nashiym zonowt ʾel־hamelekhe wataʿamodenah lefanayw׃

¹⁷ וַתֹּ֜אמֶר הָאִשָּׁ֤ה הָֽאַחַת֙ בִּ֣י אֲדֹנִ֔י אֲנִי֙ וְהָאִשָּׁ֣ה הַזֹּ֔את יֹשְׁבֹ֖ת בְּבַ֣יִת אֶחָ֑ד וָאֵלֵ֥ד עִמָּ֖הּ בַּבָּֽיִת׃ watoʾmer haʾishah haʾaḥat biy ʾadoniy ʾaniy wehaʾishah hazoʾt yoshevot bevayit ʾeḥad waʾeled ʿimah babayit׃

¹⁸ וַיְהִ֞י בַּיֹּ֤ום הַשְּׁלִישִׁי֙ לְלִדְתִּ֔י וַתֵּ֖לֶד גַּם־הָאִשָּׁ֣ה הַזֹּ֑את וַאֲנַ֣חְנוּ יַחְדָּ֗ו אֵֽין־זָ֤ר אִתָּ֙נוּ֙ בַּבַּ֔יִת זוּלָתִ֥י שְׁתַּֽיִם־אֲנַ֖חְנוּ בַּבָּֽיִת׃ wayehiy bayowm hasheliyshiy lelidetiy wateled gam־haʾishah hazoʾt waʾanaḥenu yaḥedaw ʾeyn־zar ʾitanu babayit zulatiy shetayim־ʾanaḥenu babayit׃

¹⁹ וַיָּ֛מָת בֶּן־הָאִשָּׁ֥ה הַזֹּ֖את לָ֑יְלָה אֲשֶׁ֥ר שָׁכְבָ֖ה עָלָֽיו׃ wayamat ben־haʾishah hazoʾt layelah ʾasher shakhevah ʿalayw׃

²⁰ וַתָּקָם֩ בְּתֹ֨וךְ הַלַּ֜יְלָה וַתִּקַּ֧ח אֶת־בְּנִ֣י מֵֽאֶצְלִ֗י וַאֲמָֽתְךָ֙ יְשֵׁנָ֔ה וַתַּשְׁכִּיבֵ֖הוּ בְּחֵיקָ֑הּ וְאֶת־בְּנָ֥הּ הַמֵּ֖ת הִשְׁכִּ֥יבָה בְחֵיקִֽי׃ wataqam betowkhe halayelah watiqaḥ ʾet־beniy meʾetseliy waʾamatekha yeshenah watashekiyvehu beḥeyqah weʾet־benah hamet hishekiyvah veḥeyqiy׃

²¹ וָאָקֻ֥ם בַּבֹּ֛קֶר לְהֵינִ֥יק אֶת־בְּנִ֖י וְהִנֵּה־מֵ֑ת וָאֶתְבֹּונֵ֤ן אֵלָיו֙ בַּבֹּ֔קֶר וְהִנֵּ֛ה לֹֽא־הָיָ֥ה בְנִ֖י אֲשֶׁ֥ר יָלָֽדְתִּי׃ waʾaqum baboqer leheyniyq ʾet־beniy wehineh־met waʾetebownen ʾelayw baboqer wehineh loʾ־hayah veniy ʾasher yaladetiy׃

²² וַתֹּאמֶר֩ הָאִשָּׁ֨ה הָאַחֶ֜רֶת לֹ֣א כִ֗י בְּנִ֤י הַחַי֙ וּבְנֵ֣ךְ הַמֵּ֔ת וְזֹ֤את אֹמֶ֙רֶת֙ לֹ֣א כִ֔י בְּנֵ֥ךְ הַמֵּ֖ת וּבְנִ֣י הֶחָ֑י וַתְּדַבֵּ֖רְנָה לִפְנֵ֥י הַמֶּֽלֶךְ׃ watoʾmer haʾishah haʾaḥeret loʾ khiy beniy haḥay uvenekhe hamet wezoʾt ʾomeret loʾ khiy benekhe hamet uveniy heḥay watedaberenah lifeney hamelekhe׃

²³ וַיֹּ֣אמֶר הַמֶּ֔לֶךְ זֹ֣את אֹמֶ֔רֶת זֶה־בְּנִ֥י הַחַ֖י וּבְנֵ֣ךְ הַמֵּ֑ת וְזֹ֤את אֹמֶ֙רֶת֙ לֹ֣א כִ֔י בְּנֵ֥ךְ הַמֵּ֖ת וּבְנִ֥י הֶחָֽי׃ פ wayoʾmer hamelekhe zoʾt ʾomeret zeh־beniy haḥay uvenekhe hamet wezoʾt ʾomeret loʾ khiy benekhe hamet uveniy heḥay׃ f

²⁴ וַיֹּ֥אמֶר הַמֶּ֖לֶךְ קְח֣וּ לִי־חָ֑רֶב וַיָּבִ֥אוּ הַחֶ֖רֶב לִפְנֵ֥י הַמֶּֽלֶךְ׃ wayoʾmer hamelekhe qeḥu liy־ḥarev wayaviʾu haḥerev lifeney hamelekhe׃

²⁵ וַיֹּ֣אמֶר הַמֶּ֔לֶךְ גִּזְר֛וּ אֶת־הַיֶּ֥לֶד הַחַ֖י לִשְׁנָ֑יִם וּתְנ֤וּ אֶֽת־הַחֲצִי֙ לְאַחַ֔ת וְאֶֽת־הַחֲצִ֖י לְאֶחָֽת׃ wayoʾmer hamelekhe gizeru ʾet־hayeled haḥay lishenayim utenu ʾet־haḥatsiy leʾaḥat weʾet־haḥatsiy leʾeḥat׃

²⁶ וַתֹּ֣אמֶר הָאִשָּׁה֩ אֲשֶׁר־בְּנָ֨הּ הַחַ֜י אֶל־הַמֶּ֗לֶךְ כִּֽי־נִכְמְר֣וּ רַחֲמֶיהָ֮ עַל־בְּנָהּ֒ וַתֹּ֣אמֶר ׀ בִּ֣י אֲדֹנִ֗י תְּנוּ־לָהּ֙ אֶת־הַיָּל֣וּד הַחַ֔י וְהָמֵ֖ת אַל־תְּמִיתֻ֑הוּ וְזֹ֣את אֹמֶ֗רֶת גַּם־לִ֥י גַם־לָ֛ךְ לֹ֥א יִהְיֶ֖ה גְּזֹֽרוּ׃ watoʾmer haʾishah ʾasher־benah haḥay ʾel־hamelekhe kiy־nikhemeru raḥameyha ʿal־benah watoʾmer ׀ biy ʾadoniy tenu־lah ʾet־hayalud haḥay wehamet ʾal־temiytuhu wezoʾt ʾomeret gam־liy gam־lakhe loʾ yiheyeh gezoru׃

²⁷ וַיַּ֨עַן הַמֶּ֜לֶךְ וַיֹּ֗אמֶר תְּנוּ־לָהּ֙ אֶת־הַיָּל֣וּד הַחַ֔י וְהָמֵ֖ת לֹ֣א תְמִיתֻ֑הוּ הִ֖יא אִמֹּֽו׃ wayaʿan hamelekhe wayoʾmer tenu־lah ʾet־hayalud haḥay wehamet loʾ temiytuhu hiyʾ ʾimow׃

²⁸ וַיִּשְׁמְע֣וּ כָל־יִשְׂרָאֵ֗ל אֶת־הַמִּשְׁפָּט֙ אֲשֶׁ֣ר שָׁפַ֣ט הַמֶּ֔לֶךְ וַיִּֽרְא֖וּ מִפְּנֵ֣י הַמֶּ֑לֶךְ כִּ֣י רָא֔וּ כִּֽי־חָכְמַ֧ת אֱלֹהִ֛ים בְּקִרְבֹּ֖ו לַעֲשֹׂ֥ות מִשְׁפָּֽט׃ ס wayishemeʿu khal־yiseraʾel ʾet־hamishepaṭ ʾasher shafaṭ hamelekhe wayireʾu mipeney hamelekhe kiy raʾu kiy־ḥakhemat ʾelohiym beqirebow laʿasowt mishepaṭ׃ s