Deutéronome 22

¹ לֹֽא־תִרְאֶה֩ אֶת־שֹׁ֨ור אָחִ֜יךָ אֹ֤ו אֶת־שֵׂיֹו֙ נִדָּחִ֔ים וְהִתְעַלַּמְתָּ֖ מֵהֶ֑ם הָשֵׁ֥ב תְּשִׁיבֵ֖ם לְאָחִֽיךָ׃ loʾ־tireʾeh ʾet־showr ʾaḥiykha ʾow ʾet־seyow nidaḥiym wehiteʿalameta mehem hashev teshiyvem leʾaḥiykha׃

² וְאִם־לֹ֨א קָרֹ֥וב אָחִ֛יךָ אֵלֶ֖יךָ וְלֹ֣א יְדַעְתֹּ֑ו וַאֲסַפְתֹּו֙ אֶל־תֹּ֣וךְ בֵּיתֶ֔ךָ וְהָיָ֣ה עִמְּךָ֗ עַ֣ד דְּרֹ֤שׁ אָחִ֙יךָ֙ אֹתֹ֔ו וַהֲשֵׁבֹתֹ֖ו לֹֽו׃ weʾim־loʾ qarowv ʾaḥiykha ʾeleykha weloʾ yedaʿetow waʾasafetow ʾel־towkhe beytekha wehayah ʿimekha ʿad derosh ʾaḥiykha ʾotow wahashevotow low׃

³ וְכֵ֧ן תַּעֲשֶׂ֣ה לַחֲמֹרֹ֗ו וְכֵ֣ן תַּעֲשֶׂה֮ לְשִׂמְלָתֹו֒ וְכֵ֣ן תַּעֲשֶׂ֜ה לְכָל־אֲבֵדַ֥ת אָחִ֛יךָ אֲשֶׁר־תֹּאבַ֥ד מִמֶּ֖נּוּ וּמְצָאתָ֑הּ לֹ֥א תוּכַ֖ל לְהִתְעַלֵּֽם׃ ס wekhen taʿaseh laḥamorow wekhen taʿaseh lesimelatow wekhen taʿaseh lekhal־ʾavedat ʾaḥiykha ʾasher־toʾvad mimenu umetsaʾtah loʾ tukhal lehiteʿalem׃ s

⁴ לֹא־תִרְאֶה֩ אֶת־חֲמֹ֨ור אָחִ֜יךָ אֹ֤ו שֹׁורֹו֙ נֹפְלִ֣ים בַּדֶּ֔רֶךְ וְהִתְעַלַּמְתָּ֖ מֵהֶ֑ם הָקֵ֥ם תָּקִ֖ים עִמֹּֽו׃ ס loʾ־tireʾeh ʾet־ḥamowr ʾaḥiykha ʾow showrow nofeliym baderekhe wehiteʿalameta mehem haqem taqiym ʿimow׃ s

⁵ לֹא־יִהְיֶ֤ה כְלִי־גֶ֙בֶר֙ עַל־אִשָּׁ֔ה וְלֹא־יִלְבַּ֥שׁ גֶּ֖בֶר שִׂמְלַ֣ת אִשָּׁ֑ה כִּ֧י תֹועֲבַ֛ת יְהוָ֥ה אֱלֹהֶ֖יךָ כָּל־עֹ֥שֵׂה אֵֽלֶּה׃ פ loʾ־yiheyeh kheliy־gever ʿal־ʾishah weloʾ־yilebash gever simelat ʾishah kiy towʿavat yehwah ʾeloheykha kal־ʿoseh ʾeleh׃ f

⁶ כִּ֣י יִקָּרֵ֣א קַן־צִפֹּ֣ור ׀ לְפָנֶ֡יךָ בַּדֶּ֜רֶךְ בְּכָל־עֵ֣ץ ׀ אֹ֣ו עַל־הָאָ֗רֶץ אֶפְרֹחִים֙ אֹ֣ו בֵיצִ֔ים וְהָאֵ֤ם רֹבֶ֙צֶת֙ עַל־הָֽאֶפְרֹחִ֔ים אֹ֖ו עַל־הַבֵּיצִ֑ים לֹא־תִקַּ֥ח הָאֵ֖ם עַל־הַבָּנִֽים׃ kiy yiqareʾ qan־tsipowr ׀ lefaneykha baderekhe bekhal־ʿets ׀ ʾow ʿal־haʾarets ʾeferoḥiym ʾow veytsiym wehaʾem rovetset ʿal־haʾeferoḥiym ʾow ʿal־habeytsiym loʾ־tiqaḥ haʾem ʿal־habaniym׃

⁷ שַׁלֵּ֤חַ תְּשַׁלַּח֙ אֶת־הָאֵ֔ם וְאֶת־הַבָּנִ֖ים תִּֽקַּֽח־לָ֑ךְ לְמַ֙עַן֙ יִ֣יטַב לָ֔ךְ וְהַאֲרַכְתָּ֖ יָמִֽים׃ ס shaleaḥ teshalaḥ ʾet־haʾem weʾet־habaniym tiqaḥ־lakhe lemaʿan yiyṭav lakhe wehaʾarakheta yamiym׃ s

⁸ כִּ֤י תִבְנֶה֙ בַּ֣יִת חָדָ֔שׁ וְעָשִׂ֥יתָ מַעֲקֶ֖ה לְגַגֶּ֑ךָ וְלֹֽא־תָשִׂ֤ים דָּמִים֙ בְּבֵיתֶ֔ךָ כִּֽי־יִפֹּ֥ל הַנֹּפֵ֖ל מִמֶּֽנּוּ׃ ס kiy tiveneh bayit ḥadash weʿasiyta maʿaqeh legagekha weloʾ־tasiym damiym beveytekha kiy־yipol hanofel mimenu׃ s

⁹ לֹא־תִזְרַ֥ע כַּרְמְךָ֖ כִּלְאָ֑יִם פֶּן־תִּקְדַּ֗שׁ הַֽמְלֵאָ֤ה הַזֶּ֙רַע֙ אֲשֶׁ֣ר תִּזְרָ֔ע וּתְבוּאַ֖ת הַכָּֽרֶם׃ ס loʾ־tizeraʿ karemekha kileʾayim pen־tiqedash hameleʾah hazeraʿ ʾasher tizeraʿ utevuʾat hakarem׃ s

¹⁰ לֹֽא־תַחֲרֹ֥שׁ בְּשֹׁור־וּבַחֲמֹ֖ר יַחְדָּֽו׃ ס loʾ־taḥarosh beshowr־uvaḥamor yaḥedaw׃ s

¹¹ לֹ֤א תִלְבַּשׁ֙ שַֽׁעַטְנֵ֔ז צֶ֥מֶר וּפִשְׁתִּ֖ים יַחְדָּֽו׃ ס loʾ tilebash shaʿaṭenez tsemer ufishetiym yaḥedaw׃ s

¹² גְּדִלִ֖ים תַּעֲשֶׂה־לָּ֑ךְ עַל־אַרְבַּ֛ע כַּנְפֹ֥ות כְּסוּתְךָ֖ אֲשֶׁ֥ר תְּכַסֶּה־בָּֽהּ׃ ס gediliym taʿaseh־lakhe ʿal־ʾarebaʿ kanefowt kesutekha ʾasher tekhaseh־bah׃ s

¹³ כִּֽי־יִקַּ֥ח אִ֖ישׁ אִשָּׁ֑ה וּבָ֥א אֵלֶ֖יהָ וּשְׂנֵאָֽהּ׃ kiy־yiqaḥ ʾiysh ʾishah uvaʾ ʾeleyha useneʾah׃

¹⁴ וְשָׂ֥ם לָהּ֙ עֲלִילֹ֣ת דְּבָרִ֔ים וְהֹוצִ֥יא עָלֶ֖יהָ שֵׁ֣ם רָ֑ע וְאָמַ֗ר אֶת־הָאִשָּׁ֤ה הַזֹּאת֙ לָקַ֔חְתִּי וָאֶקְרַ֣ב אֵלֶ֔יהָ וְלֹא־מָצָ֥אתִי לָ֖הּ בְּתוּלִֽים׃ wesam lah ʿaliylot devariym wehowtsiyʾ ʿaleyha shem raʿ weʾamar ʾet־haʾishah hazoʾt laqaḥetiy waʾeqerav ʾeleyha weloʾ־matsaʾtiy lah betuliym׃

¹⁵ וְלָקַ֛ח אֲבִ֥י [הַנַּעַר כ] (הַֽנַּעֲרָ֖ה ק) וְאִמָּ֑הּ וְהֹוצִ֜יאוּ אֶת־בְּתוּלֵ֧י [הַנַּעַר כ] (הַֽנַּעֲרָ֛ה ק) אֶל־זִקְנֵ֥י הָעִ֖יר הַשָּֽׁעְרָה׃ welaqaḥ ʾaviy [hanaʿar kh] (hanaʿarah q) weʾimah wehowtsiyʾu ʾet־betuley [hanaʿar kh] (hanaʿarah q) ʾel־ziqeney haʿiyr hashaʿerah׃

¹⁶ וְאָמַ֛ר אֲבִ֥י [הַנַּעַר כ] (הַֽנַּעֲרָ֖ה ק) אֶל־הַזְּקֵנִ֑ים אֶת־בִּתִּ֗י נָתַ֜תִּי לָאִ֥ישׁ הַזֶּ֛ה לְאִשָּׁ֖ה וַיִּשְׂנָאֶֽהָ׃ weʾamar ʾaviy [hanaʿar kh] (hanaʿarah q) ʾel־hazeqeniym ʾet־bitiy natatiy laʾiysh hazeh leʾishah wayisenaʾeah׃

¹⁷ וְהִנֵּה־ה֡וּא שָׂם֩ עֲלִילֹ֨ת דְּבָרִ֜ים לֵאמֹ֗ר לֹֽא־מָצָ֤אתִי לְבִתְּךָ֙ בְּתוּלִ֔ים וְאֵ֖לֶּה בְּתוּלֵ֣י בִתִּ֑י וּפָֽרְשׂוּ֙ הַשִּׂמְלָ֔ה לִפְנֵ֖י זִקְנֵ֥י הָעִֽיר׃ wehineh־huʾ sam ʿaliylot devariym leʾmor loʾ־matsaʾtiy levitekha betuliym weʾeleh betuley vitiy ufaresu hasimelah lifeney ziqeney haʿiyr׃

¹⁸ וְלָֽקְח֛וּ זִקְנֵ֥י הָֽעִיר־הַהִ֖וא אֶת־הָאִ֑ישׁ וְיִסְּר֖וּ אֹתֹֽו׃ welaqeḥu ziqeney haʿiyr־hahiwʾ ʾet־haʾiysh weyiseru ʾotow׃

¹⁹ וְעָנְשׁ֨וּ אֹתֹ֜ו מֵ֣אָה כֶ֗סֶף וְנָתְנוּ֙ לַאֲבִ֣י הַֽנַּעֲרָ֔ה כִּ֤י הֹוצִיא֙ שֵׁ֣ם רָ֔ע עַ֖ל בְּתוּלַ֣ת יִשְׂרָאֵ֑ל וְלֹֽו־תִהְיֶ֣ה לְאִשָּׁ֔ה לֹא־יוּכַ֥ל לְשַׁלְּחָ֖הּ כָּל־יָמָֽיו׃ ס weʿaneshu ʾotow meʾah khesef wenatenu laʾaviy hanaʿarah kiy howtsiyʾ shem raʿ ʿal betulat yiseraʾel welow־tiheyeh leʾishah loʾ־yukhal leshaleḥah kal־yamayw׃ s

²⁰ וְאִם־אֱמֶ֣ת הָיָ֔ה הַדָּבָ֖ר הַזֶּ֑ה לֹא־נִמְצְא֥וּ בְתוּלִ֖ים [לַנַּעַר כ] (לַֽנַּעֲרָֽה׃ ק) weʾim־ʾemet hayah hadavar hazeh loʾ־nimetseʾu vetuliym [lanaʿar kh] (lanaʿarah׃ q)

²¹ וְהֹוצִ֨יאוּ אֶת־ [הַנַּעַר כ] (הַֽנַּעֲרָ֜ה ק) אֶל־פֶּ֣תַח בֵּית־אָבִ֗יהָ וּסְקָלוּהָ֩ אַנְשֵׁ֨י עִירָ֤הּ בָּאֲבָנִים֙ וָמֵ֔תָה כִּֽי־עָשְׂתָ֤ה נְבָלָה֙ בְּיִשְׂרָאֵ֔ל לִזְנֹ֖ות בֵּ֣ית אָבִ֑יהָ וּבִֽעַרְתָּ֥ הָרָ֖ע מִקִּרְבֶּֽךָ׃ ס wehowtsiyʾu ʾet־ [hanaʿar kh] (hanaʿarah q) ʾel־petaḥ beyt־ʾaviyha useqaluah ʾaneshey ʿiyrah baʾavaniym wametah kiy־ʿasetah nevalah beyiseraʾel lizenowt beyt ʾaviyha uviʿareta haraʿ miqirebekha׃ s

²² כִּֽי־יִמָּצֵ֨א אִ֜ישׁ שֹׁכֵ֣ב ׀ עִם־אִשָּׁ֣ה בְעֻֽלַת־בַּ֗עַל וּמֵ֙תוּ֙ גַּם־שְׁנֵיהֶ֔ם הָאִ֛ישׁ הַשֹּׁכֵ֥ב עִם־הָאִשָּׁ֖ה וְהָאִשָּׁ֑ה וּבִֽעַרְתָּ֥ הָרָ֖ע מִיִּשְׂרָאֵֽל׃ ס kiy־yimatseʾ ʾiysh shokhev ׀ ʿim־ʾishah veʿulat־baʿal umetu gam־sheneyhem haʾiysh hashokhev ʿim־haʾishah wehaʾishah uviʿareta haraʿ miyiseraʾel׃ s

²³ כִּ֤י יִהְיֶה֙ [נַעַר כ] (נַעֲרָ֣ה ק) בְתוּלָ֔ה מְאֹרָשָׂ֖ה לְאִ֑ישׁ וּמְצָאָ֥הּ אִ֛ישׁ בָּעִ֖יר וְשָׁכַ֥ב עִמָּֽהּ׃ kiy yiheyeh [naʿar kh] (naʿarah q) vetulah meʾorasah leʾiysh umetsaʾah ʾiysh baʿiyr weshakhav ʿimah׃

²⁴ וְהֹוצֵאתֶ֨ם אֶת־שְׁנֵיהֶ֜ם אֶל־שַׁ֣עַר ׀ הָעִ֣יר הַהִ֗וא וּסְקַלְתֶּ֨ם אֹתָ֥ם בָּאֲבָנִים֮ וָמֵתוּ֒ אֶת־ [הַנַּעַר כ] (הַֽנַּעֲרָ֗ה ק) עַל־דְּבַר֙ אֲשֶׁ֣ר לֹא־צָעֲקָ֣ה בָעִ֔יר וְאֶ֨ת־הָאִ֔ישׁ עַל־דְּבַ֥ר אֲשֶׁר־עִנָּ֖ה אֶת־אֵ֣שֶׁת רֵעֵ֑הוּ וּבִֽעַרְתָּ֥ הָרָ֖ע מִקִּרְבֶּֽךָ׃ ס wehowtseʾtem ʾet־sheneyhem ʾel־shaʿar ׀ haʿiyr hahiwʾ useqaletem ʾotam baʾavaniym wametu ʾet־ [hanaʿar kh] (hanaʿarah q) ʿal־devar ʾasher loʾ־tsaʿaqah vaʿiyr weʾet־haʾiysh ʿal־devar ʾasher־ʿinah ʾet־ʾeshet reʿehu uviʿareta haraʿ miqirebekha׃ s

²⁵ וְֽאִם־בַּשָּׂדֶ֞ה יִמְצָ֣א הָאִ֗ישׁ אֶת־ [הַנַּעַר כ] (הַֽנַּעֲרָה֙ ק) הַמְאֹ֣רָשָׂ֔ה וְהֶחֱזִֽיק־בָּ֥הּ הָאִ֖ישׁ וְשָׁכַ֣ב עִמָּ֑הּ וּמֵ֗ת הָאִ֛ישׁ אֲשֶׁר־שָׁכַ֥ב עִמָּ֖הּ לְבַדֹּֽו׃ weʾim־basadeh yimetsaʾ haʾiysh ʾet־ [hanaʿar kh] (hanaʿarah q) hameʾorasah weheḥeziyq־bah haʾiysh weshakhav ʿimah umet haʾiysh ʾasher־shakhav ʿimah levadow׃

²⁶ [וְלַנַּעַר כ] (וְלַֽנַּעֲרָה֙ ק) לֹא־תַעֲשֶׂ֣ה דָבָ֔ר אֵ֥ין [לַנַּעַר כ] (לַֽנַּעֲרָ֖ה ק) חֵ֣טְא מָ֑וֶת כִּ֡י כַּאֲשֶׁר֩ יָק֨וּם אִ֤ישׁ עַל־רֵעֵ֙הוּ֙ וּרְצָחֹ֣ו נֶ֔פֶשׁ כֵּ֖ן הַדָּבָ֥ר הַזֶּֽה׃ [welanaʿar kh] (welanaʿarah q) loʾ־taʿaseh davar ʾeyn [lanaʿar kh] (lanaʿarah q) ḥeṭeʾ mawet kiy kaʾasher yaqum ʾiysh ʿal־reʿehu uretsaḥow nefesh ken hadavar hazeh׃

²⁷ כִּ֥י בַשָּׂדֶ֖ה מְצָאָ֑הּ צָעֲקָ֗ה [הַנַּעַר כ] (הַֽנַּעֲרָה֙ ק) הַמְאֹ֣רָשָׂ֔ה וְאֵ֥ין מֹושִׁ֖יעַ לָֽהּ׃ ס kiy vasadeh metsaʾah tsaʿaqah [hanaʿar kh] (hanaʿarah q) hameʾorasah weʾeyn mowshiyʿa lah׃ s

²⁸ כִּֽי־יִמְצָ֣א אִ֗ישׁ [נַעַר כ] (נַעֲרָ֤ה ק) בְתוּלָה֙ אֲשֶׁ֣ר לֹא־אֹרָ֔שָׂה וּתְפָשָׂ֖הּ וְשָׁכַ֣ב עִמָּ֑הּ וְנִמְצָֽאוּ׃ kiy־yimetsaʾ ʾiysh [naʿar kh] (naʿarah q) vetulah ʾasher loʾ־ʾorasah utefasah weshakhav ʿimah wenimetsaʾu׃

²⁹ וְ֠נָתַן הָאִ֨ישׁ הַשֹּׁכֵ֥ב עִמָּ֛הּ לַאֲבִ֥י [הַנַּעַר כ] (הַֽנַּעֲרָ֖ה ק) חֲמִשִּׁ֣ים כָּ֑סֶף וְלֹֽו־תִהְיֶ֣ה לְאִשָּׁ֗ה תַּ֚חַת אֲשֶׁ֣ר עִנָּ֔הּ לֹא־יוּכַ֥ל שַׁלְּחָ֖הּ כָּל־יָמָֽיו׃ ס wenatan haʾiysh hashokhev ʿimah laʾaviy [hanaʿar kh] (hanaʿarah q) ḥamishiym kasef welow־tiheyeh leʾishah taḥat ʾasher ʿinah loʾ־yukhal shaleḥah kal־yamayw׃ s