1 Samuel 1

¹ וַיְהִי֩ אִ֨ישׁ אֶחָ֜ד מִן־הָרָמָתַ֛יִם צֹופִ֖ים מֵהַ֣ר אֶפְרָ֑יִם וּשְׁמֹ֡ו אֶ֠לְקָנָה בֶּן־יְרֹחָ֧ם בֶּן־אֱלִיה֛וּא בֶּן־תֹּ֥חוּ בֶן־צ֖וּף אֶפְרָתִֽי׃ wayehiy ʾiysh ʾeḥad min־haramatayim tsowfiym mehar ʾeferayim ushemow ʾeleqanah ben־yeroḥam ben־ʾeliyhuʾ ben־toḥu ven־tsuf ʾeferatiy׃

² וְלֹו֙ שְׁתֵּ֣י נָשִׁ֔ים שֵׁ֤ם אַחַת֙ חַנָּ֔ה וְשֵׁ֥ם הַשֵּׁנִ֖ית פְּנִנָּ֑ה וַיְהִ֤י לִפְנִנָּה֙ יְלָדִ֔ים וּלְחַנָּ֖ה אֵ֥ין יְלָדִֽים׃ welow shetey nashiym shem ʾaḥat ḥanah weshem hasheniyt peninah wayehiy lifeninah yeladiym uleḥanah ʾeyn yeladiym׃

³ וְעָלָה֩ הָאִ֨ישׁ הַה֤וּא מֵֽעִירֹו֙ מִיָּמִ֣ים ׀ יָמִ֔ימָה לְהִֽשְׁתַּחֲוֹ֧ת וְלִזְבֹּ֛חַ לַיהוָ֥ה צְבָאֹ֖ות בְּשִׁלֹ֑ה וְשָׁ֞ם שְׁנֵ֣י בְנֵֽי־עֵלִ֗י חָפְנִי֙ וּפִ֣נְחָ֔ס כֹּהֲנִ֖ים לַיהוָֽה׃ weʿalah haʾiysh hahuʾ meʿiyrow miyamiym ׀ yamiymah lehishetaḥaot welizeboaḥ layhwah tsevaʾowt beshiloh wesham sheney veney־ʿeliy ḥafeniy ufineḥas kohaniym layhwah׃

⁴ וַיְהִ֣י הַיֹּ֔ום וַיִּזְבַּ֖ח אֶלְקָנָ֑ה וְנָתַ֞ן לִפְנִנָּ֣ה אִשְׁתֹּ֗ו וּֽלְכָל־בָּנֶ֛יהָ וּבְנֹותֶ֖יהָ מָנֹֽות׃ wayehiy hayowm wayizebaḥ ʾeleqanah wenatan lifeninah ʾishetow ulekhal־baneyha uvenowteyha manowt׃

⁵ וּלְחַנָּ֕ה יִתֵּ֛ן מָנָ֥ה אַחַ֖ת אַפָּ֑יִם כִּ֤י אֶת־חַנָּה֙ אָהֵ֔ב וַֽיהוָ֖ה סָגַ֥ר רַחְמָֽהּ׃ uleḥanah yiten manah ʾaḥat ʾapayim kiy ʾet־ḥanah ʾahev wayhwah sagar raḥemah׃

⁶ וְכִֽעֲסַ֤תָּה צָֽרָתָהּ֙ גַּם־כַּ֔עַס בַּעֲב֖וּר הַרְּעִמָ֑הּ כִּֽי־סָגַ֥ר יְהוָ֖ה בְּעַ֥ד רַחְמָֽהּ׃ wekhiʿasatah tsaratah gam־kaʿas baʿavur hareʿimah kiy־sagar yehwah beʿad raḥemah׃

⁷ וְכֵ֨ן יַעֲשֶׂ֜ה שָׁנָ֣ה בְשָׁנָ֗ה מִדֵּ֤י עֲלֹתָהּ֙ בְּבֵ֣ית יְהוָ֔ה כֵּ֖ן תַּכְעִסֶ֑נָּה וַתִּבְכֶּ֖ה וְלֹ֥א תֹאכַֽל׃ wekhen yaʿaseh shanah veshanah midey ʿalotah beveyt yehwah ken takheʿisenah wativekeh weloʾ toʾkhal׃

⁸ וַיֹּ֨אמֶר לָ֜הּ אֶלְקָנָ֣ה אִישָׁ֗הּ חַנָּה֙ לָ֣מֶה תִבְכִּ֗י וְלָ֙מֶה֙ לֹ֣א תֹֽאכְלִ֔י וְלָ֖מֶה יֵרַ֣ע לְבָבֵ֑ךְ הֲלֹ֤וא אָֽנֹכִי֙ טֹ֣וב לָ֔ךְ מֵעֲשָׂרָ֖ה בָּנִֽים׃ wayoʾmer lah ʾeleqanah ʾiyshah ḥanah lameh tivekiy welameh loʾ toʾkheliy welameh yeraʿ levavekhe halowʾ ʾanokhiy ṭowv lakhe meʿasarah baniym׃

⁹ וַתָּ֣קָם חַנָּ֔ה אַחֲרֵ֛י אָכְלָ֥ה בְשִׁלֹ֖ה וְאַחֲרֵ֣י שָׁתֹ֑ה וְעֵלִ֣י הַכֹּהֵ֗ן יֹשֵׁב֙ עַל־הַכִּסֵּ֔א עַל־מְזוּזַ֖ת הֵיכַ֥ל יְהוָֽה׃ wataqam ḥanah ʾaḥarey ʾakhelah veshiloh weʾaḥarey shatoh weʿeliy hakohen yoshev ʿal־hakiseʾ ʿal־mezuzat heykhal yehwah׃

¹⁰ וְהִ֖יא מָ֣רַת נָ֑פֶשׁ וַתִּתְפַּלֵּ֥ל עַל־יְהוָ֖ה וּבָכֹ֥ה תִבְכֶּֽה׃ wehiyʾ marat nafesh watitepalel ʿal־yehwah uvakhoh tivekeh׃

¹¹ וַתִּדֹּ֨ר נֶ֜דֶר וַתֹּאמַ֗ר יְהוָ֨ה צְבָאֹ֜ות אִם־רָאֹ֥ה תִרְאֶ֣ה ׀ בָּעֳנִ֣י אֲמָתֶ֗ךָ וּזְכַרְתַּ֙נִי֙ וְלֹֽא־תִשְׁכַּ֣ח אֶת־אֲמָתֶ֔ךָ וְנָתַתָּ֥ה לַאֲמָתְךָ֖ זֶ֣רַע אֲנָשִׁ֑ים וּנְתַתִּ֤יו לַֽיהוָה֙ כָּל־יְמֵ֣י חַיָּ֔יו וּמֹורָ֖ה לֹא־יַעֲלֶ֥ה עַל־רֹאשֹֽׁו׃ watidor neder watoʾmar yehwah tsevaʾowt ʾim־raʾoh tireʾeh ׀ baʿoniy ʾamatekha uzekharetaniy weloʾ־tishekaḥ ʾet־ʾamatekha wenatatah laʾamatekha zeraʿ ʾanashiym unetatiyw layhwah kal־yemey ḥayayw umowrah loʾ־yaʿaleh ʿal־roʾshow׃

¹² וְהָיָה֙ כִּ֣י הִרְבְּתָ֔ה לְהִתְפַּלֵּ֖ל לִפְנֵ֣י יְהוָ֑ה וְעֵלִ֖י שֹׁמֵ֥ר אֶת־פִּֽיהָ׃ wehayah kiy hirebetah lehitepalel lifeney yehwah weʿeliy shomer ʾet־piyha׃

¹³ וְחַנָּ֗ה הִ֚יא מְדַבֶּ֣רֶת עַל־לִבָּ֔הּ רַ֚ק שְׂפָתֶ֣יהָ נָּעֹ֔ות וְקֹולָ֖הּ לֹ֣א יִשָּׁמֵ֑עַ וַיַּחְשְׁבֶ֥הָ עֵלִ֖י לְשִׁכֹּרָֽה׃ weḥanah hiyʾ medaberet ʿal־libah raq sefateyha naʿowt weqowlah loʾ yishameaʿ wayaḥesheveah ʿeliy leshikorah׃

¹⁴ וַיֹּ֤אמֶר אֵלֶ֙יהָ֙ עֵלִ֔י עַד־מָתַ֖י תִּשְׁתַּכָּרִ֑ין הָסִ֥ירִי אֶת־יֵינֵ֖ךְ מֵעָלָֽיִךְ׃ wayoʾmer ʾeleyha ʿeliy ʿad־matay tishetakariyn hasiyriy ʾet־yeynekhe meʿalayikhe׃

¹⁵ וַתַּ֨עַן חַנָּ֤ה וַתֹּ֙אמֶר֙ לֹ֣א אֲדֹנִ֔י אִשָּׁ֤ה קְשַׁת־ר֙וּחַ֙ אָנֹ֔כִי וְיַ֥יִן וְשֵׁכָ֖ר לֹ֣א שָׁתִ֑יתִי וָאֶשְׁפֹּ֥ךְ אֶת־נַפְשִׁ֖י לִפְנֵ֥י יְהוָֽה׃ wataʿan ḥanah watoʾmer loʾ ʾadoniy ʾishah qeshat־ruaḥ ʾanokhiy weyayin weshekhar loʾ shatiytiy waʾeshepokhe ʾet־nafeshiy lifeney yehwah׃

¹⁶ אַל־תִּתֵּן֙ אֶת־אֲמָ֣תְךָ֔ לִפְנֵ֖י בַּת־בְּלִיָּ֑עַל כִּֽי־מֵרֹ֥ב שִׂיחִ֛י וְכַעְסִ֖י דִּבַּ֥רְתִּי עַד־הֵֽנָּה׃ ʾal־titen ʾet־ʾamatekha lifeney bat־beliyaʿal kiy־merov siyḥiy wekhaʿesiy dibaretiy ʿad־henah׃

¹⁷ וַיַּ֧עַן עֵלִ֛י וַיֹּ֖אמֶר לְכִ֣י לְשָׁלֹ֑ום וֵאלֹהֵ֣י יִשְׂרָאֵ֗ל יִתֵּן֙ אֶת־שֵׁ֣לָתֵ֔ךְ אֲשֶׁ֥ר שָׁאַ֖לְתְּ מֵעִמֹּֽו׃ wayaʿan ʿeliy wayoʾmer lekhiy leshalowm weʾlohey yiseraʾel yiten ʾet־shelatekhe ʾasher shaʾalete meʿimow׃

¹⁸ וַתֹּ֕אמֶר תִּמְצָ֧א שִׁפְחָתְךָ֛ חֵ֖ן בְּעֵינֶ֑יךָ וַתֵּ֨לֶךְ הָאִשָּׁ֤ה לְדַרְכָּהּ֙ וַתֹּאכַ֔ל וּפָנֶ֥יהָ לֹא־הָיוּ־לָ֖הּ עֹֽוד׃ watoʾmer timetsaʾ shifeḥatekha ḥen beʿeyneykha watelekhe haʾishah ledarekah watoʾkhal ufaneyha loʾ־hayu־lah ʿowd׃

¹⁹ וַיַּשְׁכִּ֣מוּ בַבֹּ֗קֶר וַיִּֽשְׁתַּחֲווּ֙ לִפְנֵ֣י יְהוָ֔ה וַיָּשֻׁ֛בוּ וַיָּבֹ֥אוּ אֶל־בֵּיתָ֖ם הָרָמָ֑תָה וַיֵּ֤דַע אֶלְקָנָה֙ אֶת־חַנָּ֣ה אִשְׁתֹּ֔ו וַיִּֽזְכְּרֶ֖הָ יְהוָֽה׃ wayashekimu vaboqer wayishetaḥawu lifeney yehwah wayashuvu wayavoʾu ʾel־beytam haramatah wayedaʿ ʾeleqanah ʾet־ḥanah ʾishetow wayizekereah yehwah׃

²⁰ וַיְהִי֙ לִתְקֻפֹ֣ות הַיָּמִ֔ים וַתַּ֥הַר חַנָּ֖ה וַתֵּ֣לֶד בֵּ֑ן וַתִּקְרָ֤א אֶת־שְׁמֹו֙ שְׁמוּאֵ֔ל כִּ֥י מֵיְהוָ֖ה שְׁאִלְתִּֽיו׃ wayehiy litequfowt hayamiym watahar ḥanah wateled ben watiqeraʾ ʾet־shemow shemuʾel kiy meyehwah sheʾiletiyw׃

²¹ וַיַּ֛עַל הָאִ֥ישׁ אֶלְקָנָ֖ה וְכָל־בֵּיתֹ֑ו לִזְבֹּ֧חַ לַֽיהוָ֛ה אֶת־זֶ֥בַח הַיָּמִ֖ים וְאֶת־נִדְרֹֽו׃ wayaʿal haʾiysh ʾeleqanah wekhal־beytow lizeboaḥ layhwah ʾet־zevaḥ hayamiym weʾet־niderow׃

²² וְחַנָּ֖ה לֹ֣א עָלָ֑תָה כִּֽי־אָמְרָ֣ה לְאִישָׁ֗הּ עַ֣ד יִגָּמֵ֤ל הַנַּ֙עַר֙ וַהֲבִאֹתִ֗יו וְנִרְאָה֙ אֶת־פְּנֵ֣י יְהוָ֔ה וְיָ֥שַׁב שָׁ֖ם עַד־עֹולָֽם׃ weḥanah loʾ ʿalatah kiy־ʾamerah leʾiyshah ʿad yigamel hanaʿar wahaviʾotiyw wenireʾah ʾet־peney yehwah weyashav sham ʿad־ʿowlam׃

²³ וַיֹּ֣אמֶר לָהּ֩ אֶלְקָנָ֨ה אִישָׁ֜הּ עֲשִׂ֧י הַטֹּ֣וב בְּעֵינַ֗יִךְ שְׁבִי֙ עַד־גָּמְלֵ֣ךְ אֹתֹ֔ו אַ֛ךְ יָקֵ֥ם יְהוָ֖ה אֶת־דְּבָרֹ֑ו וַתֵּ֤שֶׁב הָֽאִשָּׁה֙ וַתֵּ֣ינֶק אֶת־בְּנָ֔הּ עַד־גָמְלָ֖הּ אֹתֹֽו׃ wayoʾmer lah ʾeleqanah ʾiyshah ʿasiy haṭowv beʿeynayikhe sheviy ʿad־gamelekhe ʾotow ʾakhe yaqem yehwah ʾet־devarow wateshev haʾishah wateyneq ʾet־benah ʿad־gamelah ʾotow׃

²⁴ וַתַּעֲלֵ֨הוּ עִמָּ֜הּ כַּאֲשֶׁ֣ר גְּמָלַ֗תּוּ בְּפָרִ֤ים שְׁלֹשָׁה֙ וְאֵיפָ֨ה אַחַ֥ת קֶ֙מַח֙ וְנֵ֣בֶל יַ֔יִן וַתְּבִאֵ֥הוּ בֵית־יְהוָ֖ה שִׁלֹ֑ו וְהַנַּ֖עַר נָֽעַר׃ wataʿalehu ʿimah kaʾasher gemalatu befariym sheloshah weʾeyfah ʾaḥat qemaḥ wenevel yayin wateviʾehu veyt־yehwah shilow wehanaʿar naʿar׃

²⁵ וַֽיִּשְׁחֲט֖וּ אֶת־הַפָּ֑ר וַיָּבִ֥יאוּ אֶת־הַנַּ֖עַר אֶל־עֵלִֽי׃ wayisheḥaṭu ʾet־hapar wayaviyʾu ʾet־hanaʿar ʾel־ʿeliy׃

²⁶ וַתֹּ֙אמֶר֙ בִּ֣י אֲדֹנִ֔י חֵ֥י נַפְשְׁךָ֖ אֲדֹנִ֑י אֲנִ֣י הָאִשָּׁ֗ה הַנִּצֶּ֤בֶת עִמְּכָה֙ בָּזֶ֔ה לְהִתְפַּלֵּ֖ל אֶל־יְהוָֽה׃ watoʾmer biy ʾadoniy ḥey nafeshekha ʾadoniy ʾaniy haʾishah hanitsevet ʿimekhah bazeh lehitepalel ʾel־yehwah׃

²⁷ אֶל־הַנַּ֥עַר הַזֶּ֖ה הִתְפַּלָּ֑לְתִּי וַיִּתֵּ֨ן יְהוָ֥ה לִי֙ אֶת־שְׁאֵ֣לָתִ֔י אֲשֶׁ֥ר שָׁאַ֖לְתִּי מֵעִמֹּֽו׃ ʾel־hanaʿar hazeh hitepalaletiy wayiten yehwah liy ʾet־sheʾelatiy ʾasher shaʾaletiy meʿimow׃

²⁸ וְגַ֣ם אָנֹכִ֗י הִשְׁאִלְתִּ֙הוּ֙ לַֽיהוָ֔ה כָּל־הַיָּמִים֙ אֲשֶׁ֣ר הָיָ֔ה ה֥וּא שָׁא֖וּל לַֽיהוָ֑ה וַיִּשְׁתַּ֥חוּ שָׁ֖ם לַיהוָֽה׃ פ wegam ʾanokhiy hisheʾiletihu layhwah kal־hayamiym ʾasher hayah huʾ shaʾul layhwah wayishetaḥu sham layhwah׃ f