1 וַיֹּ֤אמֶר שְׁמוּאֵל֙ אֶל־כָּל־יִשְׂרָאֵ֔ל הִנֵּה֙ שָׁמַ֣עְתִּי בְקֹֽלְכֶ֔ם לְכֹ֥ל אֲשֶׁר־אֲמַרְתֶּ֖ם לִ֑י וָאַמְלִ֥יךְ עֲלֵיכֶ֖ם מֶֽלֶךְ׃ wayoʾmer shemuʾel ʾel־kal־yiseraʾel hineh shamaʿetiy veqolekhem lekhol ʾasher־ʾamaretem liy waʾameliykhe ʿaleykhem melekhe׃
2 וְעַתָּ֞ה הִנֵּ֥ה הַמֶּ֣לֶךְ ׀ מִתְהַלֵּ֣ךְ לִפְנֵיכֶ֗ם וַאֲנִי֙ זָקַ֣נְתִּי וָשַׂ֔בְתִּי וּבָנַ֖י הִנָּ֣ם אִתְּכֶ֑ם וַאֲנִי֙ הִתְהַלַּ֣כְתִּי לִפְנֵיכֶ֔ם מִנְּעֻרַ֖י עַד־הַיֹּ֥ום הַזֶּֽה׃ weʿatah hineh hamelekhe ׀ mitehalekhe lifeneykhem waʾaniy zaqanetiy wasavetiy uvanay hinam ʾitekhem waʾaniy hitehalakhetiy lifeneykhem mineʿuray ʿad־hayowm hazeh׃
3 הִנְנִ֣י עֲנ֣וּ בִי֩ נֶ֨גֶד יְהוָ֜ה וְנֶ֣גֶד מְשִׁיחֹ֗ו אֶת־שֹׁור֩ ׀ מִ֨י לָקַ֜חְתִּי וַחֲמֹ֧ור מִ֣י לָקַ֗חְתִּי וְאֶת־מִ֤י עָשַׁ֙קְתִּי֙ אֶת־מִ֣י רַצֹּ֔ותִי וּמִיַּד־מִי֙ לָקַ֣חְתִּי כֹ֔פֶר וְאַעְלִ֥ים עֵינַ֖י בֹּ֑ו וְאָשִׁ֖יב לָכֶֽם׃ hineniy ʿanu viy neged yehwah weneged meshiyḥow ʾet־showr ׀ miy laqaḥetiy waḥamowr miy laqaḥetiy weʾet־miy ʿashaqetiy ʾet־miy ratsowtiy umiyad־miy laqaḥetiy khofer weʾaʿeliym ʿeynay bow weʾashiyv lakhem׃
4 וַיֹּ֣אמְר֔וּ לֹ֥א עֲשַׁקְתָּ֖נוּ וְלֹ֣א רַצֹּותָ֑נוּ וְלֹֽא־לָקַ֥חְתָּ מִיַּד־אִ֖ישׁ מְאֽוּמָה׃ wayoʾmeru loʾ ʿashaqetanu weloʾ ratsowtanu weloʾ־laqaḥeta miyad־ʾiysh meʾumah׃
5 וַיֹּ֨אמֶר אֲלֵיהֶ֜ם עֵ֧ד יְהוָ֣ה בָּכֶ֗ם וְעֵ֤ד מְשִׁיחֹו֙ הַיֹּ֣ום הַזֶּ֔ה כִּ֣י לֹ֧א מְצָאתֶ֛ם בְּיָדִ֖י מְא֑וּמָה וַיֹּ֖אמֶר עֵֽד׃ פ wayoʾmer ʾaleyhem ʿed yehwah bakhem weʿed meshiyḥow hayowm hazeh kiy loʾ metsaʾtem beyadiy meʾumah wayoʾmer ʿed׃ f
6 וַיֹּ֥אמֶר שְׁמוּאֵ֖ל אֶל־הָעָ֑ם יְהוָ֗ה אֲשֶׁ֤ר עָשָׂה֙ אֶת־מֹשֶׁ֣ה וְאֶֽת־אַהֲרֹ֔ן וַאֲשֶׁ֧ר הֶעֱלָ֛ה אֶת־אֲבֹתֵיכֶ֖ם מֵאֶ֥רֶץ מִצְרָֽיִם׃ wayoʾmer shemuʾel ʾel־haʿam yehwah ʾasher ʿasah ʾet־mosheh weʾet־ʾaharon waʾasher heʿelah ʾet־ʾavoteykhem meʾerets mitserayim׃
7 וְעַתָּ֗ה הִֽתְיַצְּב֛וּ וְאִשָּׁפְטָ֥ה אִתְּכֶ֖ם לִפְנֵ֣י יְהוָ֑ה אֵ֚ת כָּל־צִדְקֹ֣ות יְהוָ֔ה אֲשֶׁר־עָשָׂ֥ה אִתְּכֶ֖ם וְאֶת־אֲבֹותֵיכֶֽם׃ weʿatah hiteyatsevu weʾishafeṭah ʾitekhem lifeney yehwah ʾet kal־tsideqowt yehwah ʾasher־ʿasah ʾitekhem weʾet־ʾavowteykhem׃
8 כַּֽאֲשֶׁר־בָּ֥א יַעֲקֹ֖ב מִצְרָ֑יִם וַיִּזְעֲק֤וּ אֲבֹֽותֵיכֶם֙ אֶל־יְהוָ֔ה וַיִּשְׁלַ֨ח יְהוָ֜ה אֶת־מֹשֶׁ֣ה וְאֶֽת־אַהֲרֹ֗ן וַיֹּוצִ֤יאוּ אֶת־אֲבֹֽתֵיכֶם֙ מִמִּצְרַ֔יִם וַיֹּשִׁב֖וּם בַּמָּקֹ֥ום הַזֶּֽה׃ kaʾasher־baʾ yaʿaqov mitserayim wayizeʿaqu ʾavowteykhem ʾel־yehwah wayishelaḥ yehwah ʾet־mosheh weʾet־ʾaharon wayowtsiyʾu ʾet־ʾavoteykhem mimitserayim wayoshivum bamaqowm hazeh׃
9 וַֽיִּשְׁכְּח֖וּ אֶת־יְהוָ֣ה אֱלֹהֵיהֶ֑ם וַיִּמְכֹּ֣ר אֹתָ֡ם בְּיַ֣ד סִֽיסְרָא֩ שַׂר־צְבָ֨א חָצֹ֜ור וּבְיַד־פְּלִשְׁתִּ֗ים וּבְיַד֙ מֶ֣לֶךְ מֹואָ֔ב וַיִּֽלָּחֲמ֖וּ בָּֽם׃ wayishekeḥu ʾet־yehwah ʾeloheyhem wayimekor ʾotam beyad siyseraʾ sar־tsevaʾ ḥatsowr uveyad־pelishetiym uveyad melekhe mowʾav wayilaḥamu bam׃
10 וַיִּזְעֲק֤וּ אֶל־יְהוָה֙ [וַיֹּאמֶר כ] (וַיֹּאמְר֣וּ ק) חָטָ֔אנוּ כִּ֤י עָזַ֙בְנוּ֙ אֶת־יְהוָ֔ה וַנַּעֲבֹ֥ד אֶת־הַבְּעָלִ֖ים וְאֶת־הָעַשְׁתָּרֹ֑ות וְעַתָּ֗ה הַצִּילֵ֛נוּ מִיַּ֥ד אֹיְבֵ֖ינוּ וְנַעַבְדֶֽךָּ׃ wayizeʿaqu ʾel־yehwah [wayoʾmer kh] (wayoʾmeru q) ḥaṭaʾnu kiy ʿazavenu ʾet־yehwah wanaʿavod ʾet־habeʿaliym weʾet־haʿashetarowt weʿatah hatsiylenu miyad ʾoyeveynu wenaʿavedeka׃
11 וַיִּשְׁלַ֤ח יְהוָה֙ אֶת־יְרֻבַּ֣עַל וְאֶת־בְּדָ֔ן וְאֶת־יִפְתָּ֖ח וְאֶת־שְׁמוּאֵ֑ל וַיַּצֵּ֨ל אֶתְכֶ֜ם מִיַּ֤ד אֹֽיְבֵיכֶם֙ מִסָּבִ֔יב וַתֵּשְׁב֖וּ בֶּֽטַח׃ wayishelaḥ yehwah ʾet־yerubaʿal weʾet־bedan weʾet־yifetaḥ weʾet־shemuʾel wayatsel ʾetekhem miyad ʾoyeveykhem misaviyv wateshevu beṭaḥ׃
12 וַתִּרְא֗וּ כִּֽי־נָחָ֞שׁ מֶ֣לֶךְ בְּנֵֽי־עַמֹּון֮ בָּ֣א עֲלֵיכֶם֒ וַתֹּ֣אמְרוּ לִ֔י לֹ֕א כִּי־מֶ֖לֶךְ יִמְלֹ֣ךְ עָלֵ֑ינוּ וַיהוָ֥ה אֱלֹהֵיכֶ֖ם מַלְכְּכֶֽם׃ watireʾu kiy־naḥash melekhe beney־ʿamown baʾ ʿaleykhem watoʾmeru liy loʾ kiy־melekhe yimelokhe ʿaleynu wayhwah ʾeloheykhem malekekhem׃
13 וְעַתָּ֗ה הִנֵּ֥ה הַמֶּ֛לֶךְ אֲשֶׁ֥ר בְּחַרְתֶּ֖ם אֲשֶׁ֣ר שְׁאֶלְתֶּ֑ם וְהִנֵּ֨ה נָתַ֧ן יְהוָ֛ה עֲלֵיכֶ֖ם מֶֽלֶךְ׃ weʿatah hineh hamelekhe ʾasher beḥaretem ʾasher sheʾeletem wehineh natan yehwah ʿaleykhem melekhe׃
14 אִם־תִּֽירְא֣וּ אֶת־יְהוָ֗ה וַעֲבַדְתֶּ֤ם אֹתֹו֙ וּשְׁמַעְתֶּ֣ם בְּקֹלֹ֔ו וְלֹ֥א תַמְר֖וּ אֶת־פִּ֣י יְהוָ֑ה וִהְיִתֶ֣ם גַּם־אַתֶּ֗ם וְגַם־הַמֶּ֙לֶךְ֙ אֲשֶׁ֣ר מָלַ֣ךְ עֲלֵיכֶ֔ם אַחַ֖ר יְהוָ֥ה אֱלֹהֵיכֶֽם׃ ʾim־tiyreʾu ʾet־yehwah waʿavadetem ʾotow ushemaʿetem beqolow weloʾ tameru ʾet־piy yehwah wiheyitem gam־ʾatem wegam־hamelekhe ʾasher malakhe ʿaleykhem ʾaḥar yehwah ʾeloheykhem׃
15 וְאִם־לֹ֤א תִשְׁמְעוּ֙ בְּקֹ֣ול יְהוָ֔ה וּמְרִיתֶ֖ם אֶת־פִּ֣י יְהוָ֑ה וְהָיְתָ֧ה יַד־יְהוָ֛ה בָּכֶ֖ם וּבַאֲבֹתֵיכֶֽם׃ weʾim־loʾ tishemeʿu beqowl yehwah umeriytem ʾet־piy yehwah wehayetah yad־yehwah bakhem uvaʾavoteykhem׃
16 גַּם־עַתָּה֙ הִתְיַצְּב֣וּ וּרְא֔וּ אֶת־הַדָּבָ֥ר הַגָּדֹ֖ול הַזֶּ֑ה אֲשֶׁ֣ר יְהוָ֔ה עֹשֶׂ֖ה לְעֵינֵיכֶֽם׃ gam־ʿatah hiteyatsevu ureʾu ʾet־hadavar hagadowl hazeh ʾasher yehwah ʿoseh leʿeyneykhem׃
17 הֲלֹ֤וא קְצִיר־חִטִּים֙ הַיֹּ֔ום אֶקְרָא֙ אֶל־יְהוָ֔ה וְיִתֵּ֥ן קֹלֹ֖ות וּמָטָ֑ר וּדְע֣וּ וּרְא֗וּ כִּֽי־רָעַתְכֶ֤ם רַבָּה֙ אֲשֶׁ֤ר עֲשִׂיתֶם֙ בְּעֵינֵ֣י יְהוָ֔ה לִשְׁאֹ֥ול לָכֶ֖ם מֶֽלֶךְ׃ ס halowʾ qetsiyr־ḥiṭiym hayowm ʾeqeraʾ ʾel־yehwah weyiten qolowt umaṭar udeʿu ureʾu kiy־raʿatekhem rabah ʾasher ʿasiytem beʿeyney yehwah lisheʾowl lakhem melekhe׃ s
18 וַיִּקְרָ֤א שְׁמוּאֵל֙ אֶל־יְהוָ֔ה וַיִּתֵּ֧ן יְהוָ֛ה קֹלֹ֥ת וּמָטָ֖ר בַּיֹּ֣ום הַה֑וּא וַיִּירָ֨א כָל־הָעָ֥ם מְאֹ֛ד אֶת־יְהוָ֖ה וְאֶת־שְׁמוּאֵֽל׃ wayiqeraʾ shemuʾel ʾel־yehwah wayiten yehwah qolot umaṭar bayowm hahuʾ wayiyraʾ khal־haʿam meʾod ʾet־yehwah weʾet־shemuʾel׃
19 וַיֹּאמְר֨וּ כָל־הָעָ֜ם אֶל־שְׁמוּאֵ֗ל הִתְפַּלֵּ֧ל בְּעַד־עֲבָדֶ֛יךָ אֶל־יְהוָ֥ה אֱלֹהֶ֖יךָ וְאַל־נָמ֑וּת כִּֽי־יָסַ֤פְנוּ עַל־כָּל־חַטֹּאתֵ֙ינוּ֙ רָעָ֔ה לִשְׁאֹ֥ל לָ֖נוּ מֶֽלֶךְ׃ ס wayoʾmeru khal־haʿam ʾel־shemuʾel hitepalel beʿad־ʿavadeykha ʾel־yehwah ʾeloheykha weʾal־namut kiy־yasafenu ʿal־kal־ḥaṭoʾteynu raʿah lisheʾol lanu melekhe׃ s
20 וַיֹּ֨אמֶר שְׁמוּאֵ֤ל אֶל־הָעָם֙ אַל־תִּירָ֔אוּ אַתֶּ֣ם עֲשִׂיתֶ֔ם אֵ֥ת כָּל־הָרָעָ֖ה הַזֹּ֑את אַ֗ךְ אַל־תָּס֙וּרוּ֙ מֵאַחֲרֵ֣י יְהוָ֔ה וַעֲבַדְתֶּ֥ם אֶת־יְהוָ֖ה בְּכָל־לְבַבְכֶֽם׃ wayoʾmer shemuʾel ʾel־haʿam ʾal־tiyraʾu ʾatem ʿasiytem ʾet kal־haraʿah hazoʾt ʾakhe ʾal־tasuru meʾaḥarey yehwah waʿavadetem ʾet־yehwah bekhal־levavekhem׃
21 וְלֹ֖א תָּס֑וּרוּ כִּ֣י ׀ אַחֲרֵ֣י הַתֹּ֗הוּ אֲשֶׁ֧ר לֹֽא־יֹועִ֛ילוּ וְלֹ֥א יַצִּ֖ילוּ כִּי־תֹ֥הוּ הֵֽמָּה׃ weloʾ tasuru kiy ׀ ʾaḥarey hatohu ʾasher loʾ־yowʿiylu weloʾ yatsiylu kiy־tohu hemah׃
22 כִּ֠י לֹֽא־יִטֹּ֤שׁ יְהוָה֙ אֶת־עַמֹּ֔ו בַּעֲב֖וּר שְׁמֹ֣ו הַגָּדֹ֑ול כִּ֚י הֹואִ֣יל יְהוָ֔ה לַעֲשֹׂ֥ות אֶתְכֶ֛ם לֹ֖ו לְעָֽם׃ kiy loʾ־yiṭosh yehwah ʾet־ʿamow baʿavur shemow hagadowl kiy howʾiyl yehwah laʿasowt ʾetekhem low leʿam׃
23 גַּ֣ם אָנֹכִ֗י חָלִ֤ילָה לִּי֙ מֵחֲטֹ֣א לַֽיהוָ֔ה מֵחֲדֹ֖ל לְהִתְפַּלֵּ֣ל בַּעַדְכֶ֑ם וְהֹורֵיתִ֣י אֶתְכֶ֔ם בְּדֶ֥רֶךְ הַטֹּובָ֖ה וְהַיְשָׁרָֽה׃ gam ʾanokhiy ḥaliylah liy meḥaṭoʾ layhwah meḥadol lehitepalel baʿadekhem wehowreytiy ʾetekhem bederekhe haṭowvah wehayesharah׃
24 אַ֣ךְ ׀ יְר֣אוּ אֶת־יְהוָ֗ה וַעֲבַדְתֶּ֥ם אֹתֹ֛ו בֶּאֱמֶ֖ת בְּכָל־לְבַבְכֶ֑ם כִּ֣י רְא֔וּ אֵ֥ת אֲשֶׁר־הִגְדִּ֖ל עִמָּכֶֽם׃ ʾakhe ׀ yerʾu ʾet־yehwah waʿavadetem ʾotow beʾemet bekhal־levavekhem kiy reʾu ʾet ʾasher־higedil ʿimakhem׃
25 וְאִם־הָרֵ֖עַ תָּרֵ֑עוּ גַּם־אַתֶּ֥ם גַּֽם־מַלְכְּכֶ֖ם תִּסָּפֽוּ׃ פ weʾim־hareaʿ tareʿu gam־ʾatem gam־malekekhem tisafu׃ f