1 וַיְדַבֵּ֧ר יְהוָ֛ה אֶל־מֹשֶׁ֥ה וְאֶֽל־אַהֲרֹ֖ן לֵאמֹ֥ר אֲלֵהֶֽם׃ wayedaber yehwah ʾel־mosheh weʾel־ʾaharon leʾmor ʾalehem׃
2 דַּבְּר֛וּ אֶל־בְּנֵ֥י יִשְׂרָאֵ֖ל לֵאמֹ֑ר זֹ֤את הַֽחַיָּה֙ אֲשֶׁ֣ר תֹּאכְל֔וּ מִכָּל־הַבְּהֵמָ֖ה אֲשֶׁ֥ר עַל־הָאָֽרֶץ׃ daberu ʾel־beney yiseraʾel leʾmor zoʾt haḥayah ʾasher toʾkhelu mikal־habehemah ʾasher ʿal־haʾarets׃
3 כֹּ֣ל ׀ מַפְרֶ֣סֶת פַּרְסָ֗ה וְשֹׁסַ֤עַת שֶׁ֙סַע֙ פְּרָסֹ֔ת מַעֲלַ֥ת גֵּרָ֖ה בַּבְּהֵמָ֑ה אֹתָ֖הּ תֹּאכֵֽלוּ׃ kol ׀ mafereset paresah weshosaʿat shesaʿ perasot maʿalat gerah babehemah ʾotah toʾkhelu׃
4 אַ֤ךְ אֶת־זֶה֙ לֹ֣א תֹֽאכְל֔וּ מִֽמַּעֲלֵי֙ הַגֵּרָ֔ה וּמִמַּפְרִיסֵ֖י הַפַּרְסָ֑ה אֶֽת־הַ֠גָּמָל כִּֽי־מַעֲלֵ֨ה גֵרָ֜ה ה֗וּא וּפַרְסָה֙ אֵינֶ֣נּוּ מַפְרִ֔יס טָמֵ֥א ה֖וּא לָכֶֽם׃ ʾakhe ʾet־zeh loʾ toʾkhelu mimaʿaley hagerah umimaferiysey haparesah ʾet־hagamal kiy־maʿaleh gerah huʾ ufaresah ʾeynenu maferiys ṭameʾ huʾ lakhem׃
5 וְאֶת־הַשָּׁפָ֗ן כִּֽי־מַעֲלֵ֤ה גֵרָה֙ ה֔וּא וּפַרְסָ֖ה לֹ֣א יַפְרִ֑יס טָמֵ֥א ה֖וּא לָכֶֽם׃ weʾet־hashafan kiy־maʿaleh gerah huʾ ufaresah loʾ yaferiys ṭameʾ huʾ lakhem׃
6 וְאֶת־הָאַרְנֶ֗בֶת כִּֽי־מַעֲלַ֤ת גֵּרָה֙ הִ֔וא וּפַרְסָ֖ה לֹ֣א הִפְרִ֑יסָה טְמֵאָ֥ה הִ֖וא לָכֶֽם׃ weʾet־haʾarenevet kiy־maʿalat gerah hiwʾ ufaresah loʾ hiferiysah ṭemeʾah hiwʾ lakhem׃
7 וְאֶת־הַ֠חֲזִיר כִּֽי־מַפְרִ֨יס פַּרְסָ֜ה ה֗וּא וְשֹׁסַ֥ע שֶׁ֙סַע֙ פַּרְסָ֔ה וְה֖וּא גֵּרָ֣ה לֹֽא־יִגָּ֑ר טָמֵ֥א ה֖וּא לָכֶֽם׃ weʾet־haḥaziyr kiy־maferiys paresah huʾ weshosaʿ shesaʿ paresah wehuʾ gerah loʾ־yigar ṭameʾ huʾ lakhem׃
8 מִבְּשָׂרָם֙ לֹ֣א תֹאכֵ֔לוּ וּבְנִבְלָתָ֖ם לֹ֣א תִגָּ֑עוּ טְמֵאִ֥ים הֵ֖ם לָכֶֽם׃ mibesaram loʾ toʾkhelu uvenivelatam loʾ tigaʿu ṭemeʾiym hem lakhem׃
9 אֶת־זֶה֙ תֹּֽאכְל֔וּ מִכֹּ֖ל אֲשֶׁ֣ר בַּמָּ֑יִם כֹּ֣ל אֲשֶׁר־לֹו֩ סְנַפִּ֨יר וְקַשְׂקֶ֜שֶׂת בַּמַּ֗יִם בַּיַּמִּ֛ים וּבַנְּחָלִ֖ים אֹתָ֥ם תֹּאכֵֽלוּ׃ ʾet־zeh toʾkhelu mikol ʾasher bamayim kol ʾasher־low senapiyr weqaseqeset bamayim bayamiym uvaneḥaliym ʾotam toʾkhelu׃
10 וְכֹל֩ אֲשֶׁ֨ר אֵֽין־לֹ֜ו סְנַפִּ֣יר וְקַשְׂקֶ֗שֶׂת בַּיַּמִּים֙ וּבַנְּחָלִ֔ים מִכֹּל֙ שֶׁ֣רֶץ הַמַּ֔יִם וּמִכֹּ֛ל נֶ֥פֶשׁ הַחַיָּ֖ה אֲשֶׁ֣ר בַּמָּ֑יִם שֶׁ֥קֶץ הֵ֖ם לָכֶֽם׃ wekhol ʾasher ʾeyn־low senapiyr weqaseqeset bayamiym uvaneḥaliym mikol sherets hamayim umikol nefesh haḥayah ʾasher bamayim sheqets hem lakhem׃
11 וְשֶׁ֖קֶץ יִהְי֣וּ לָכֶ֑ם מִבְּשָׂרָם֙ לֹ֣א תֹאכֵ֔לוּ וְאֶת־נִבְלָתָ֖ם תְּשַׁקֵּֽצוּ׃ wesheqets yiheyu lakhem mibesaram loʾ toʾkhelu weʾet־nivelatam teshaqetsu׃
12 כֹּ֣ל אֲשֶׁ֥ר אֵֽין־לֹ֛ו סְנַפִּ֥יר וְקַשְׂקֶ֖שֶׂת בַּמָּ֑יִם שֶׁ֥קֶץ ה֖וּא לָכֶֽם׃ kol ʾasher ʾeyn־low senapiyr weqaseqeset bamayim sheqets huʾ lakhem׃
13 וְאֶת־אֵ֙לֶּה֙ תְּשַׁקְּצ֣וּ מִן־הָעֹ֔וף לֹ֥א יֵאָכְל֖וּ שֶׁ֣קֶץ הֵ֑ם אֶת־הַנֶּ֙שֶׁר֙ וְאֶת־הַפֶּ֔רֶס וְאֵ֖ת הָעָזְנִיָּֽה׃ weʾet־ʾeleh teshaqetsu min־haʿowf loʾ yeʾakhelu sheqets hem ʾet־hanesher weʾet־haperes weʾet haʿazeniyah׃
14 וְאֶת־הַ֨דָּאָ֔ה וְאֶת־הָאַיָּ֖ה לְמִינָֽהּ׃ weʾet־hadaʾah weʾet־haʾayah lemiynah׃
15 אֵ֥ת כָּל־עֹרֵ֖ב לְמִינֹֽו׃ ʾet kal־ʿorev lemiynow׃
16 וְאֵת֙ בַּ֣ת הַֽיַּעֲנָ֔ה וְאֶת־הַתַּחְמָ֖ס וְאֶת־הַשָּׁ֑חַף וְאֶת־הַנֵּ֖ץ לְמִינֵֽהוּ׃ weʾet bat hayaʿanah weʾet־hataḥemas weʾet־hashaḥaf weʾet־hanets lemiynehu׃
17 וְאֶת־הַכֹּ֥וס וְאֶת־הַשָּׁלָ֖ךְ וְאֶת־הַיַּנְשֽׁוּף׃ weʾet־hakows weʾet־hashalakhe weʾet־hayaneshuf׃
18 וְאֶת־הַתִּנְשֶׁ֥מֶת וְאֶת־הַקָּאָ֖ת וְאֶת־הָרָחָֽם׃ weʾet־hatineshemet weʾet־haqaʾat weʾet־haraḥam׃
19 וְאֵת֙ הַחֲסִידָ֔ה הָאֲנָפָ֖ה לְמִינָ֑הּ וְאֶת־הַדּוּכִיפַ֖ת וְאֶת־הָעֲטַלֵּֽף׃ weʾet haḥasiydah haʾanafah lemiynah weʾet־hadukhiyfat weʾet־haʿaṭalef׃
20 כֹּ֚ל שֶׁ֣רֶץ הָעֹ֔וף הַהֹלֵ֖ךְ עַל־אַרְבַּ֑ע שֶׁ֥קֶץ ה֖וּא לָכֶֽם׃ ס kol sherets haʿowf haholekhe ʿal־ʾarebaʿ sheqets huʾ lakhem׃ s
21 אַ֤ךְ אֶת־זֶה֙ תֹּֽאכְל֔וּ מִכֹּל֙ שֶׁ֣רֶץ הָעֹ֔וף הַהֹלֵ֖ךְ עַל־אַרְבַּ֑ע אֲשֶׁר־ [לֹא כ] (לֹ֤ו ק) כְרָעַ֙יִם֙ מִמַּ֣עַל לְרַגְלָ֔יו לְנַתֵּ֥ר בָּהֵ֖ן עַל־הָאָֽרֶץ׃ ʾakhe ʾet־zeh toʾkhelu mikol sherets haʿowf haholekhe ʿal־ʾarebaʿ ʾasher־ [loʾ kh] (low q) kheraʿayim mimaʿal leragelayw lenater bahen ʿal־haʾarets׃
22 אֶת־אֵ֤לֶּה מֵהֶם֙ תֹּאכֵ֔לוּ אֶת־הָֽאַרְבֶּ֣ה לְמִינֹ֔ו וְאֶת־הַסָּלְעָ֖ם לְמִינֵ֑הוּ וְאֶת־הַחַרְגֹּ֣ל לְמִינֵ֔הוּ וְאֶת־הֶחָגָ֖ב לְמִינֵֽהוּ׃ ʾet־ʾeleh mehem toʾkhelu ʾet־haʾarebeh lemiynow weʾet־hasaleʿam lemiynehu weʾet־haḥaregol lemiynehu weʾet־heḥagav lemiynehu׃
23 וְכֹל֙ שֶׁ֣רֶץ הָעֹ֔וף אֲשֶׁר־לֹ֖ו אַרְבַּ֣ע רַגְלָ֑יִם שֶׁ֥קֶץ ה֖וּא לָכֶֽם׃ wekhol sherets haʿowf ʾasher־low ʾarebaʿ ragelayim sheqets huʾ lakhem׃
24 וּלְאֵ֖לֶּה תִּטַּמָּ֑אוּ כָּל־הַנֹּגֵ֥עַ בְּנִבְלָתָ֖ם יִטְמָ֥א עַד־הָעָֽרֶב׃ uleʾeleh tiṭamaʾu kal־hanogeaʿ benivelatam yiṭemaʾ ʿad־haʿarev׃
25 וְכָל־הַנֹּשֵׂ֖א מִנִּבְלָתָ֑ם יְכַבֵּ֥ס בְּגָדָ֖יו וְטָמֵ֥א עַד־הָעָֽרֶב׃ wekhal־hanoseʾ minivelatam yekhabes begadayw weṭameʾ ʿad־haʿarev׃
26 לְֽכָל־הַבְּהֵמָ֡ה אֲשֶׁ֣ר הִוא֩ מַפְרֶ֨סֶת פַּרְסָ֜ה וְשֶׁ֣סַע ׀ אֵינֶ֣נָּה שֹׁסַ֗עַת וְגֵרָה֙ אֵינֶ֣נָּה מַעֲלָ֔ה טְמֵאִ֥ים הֵ֖ם לָכֶ֑ם כָּל־הַנֹּגֵ֥עַ בָּהֶ֖ם יִטְמָֽא׃ lekhal־habehemah ʾasher hiwʾ mafereset paresah weshesaʿ ׀ ʾeynenah shosaʿat wegerah ʾeynenah maʿalah ṭemeʾiym hem lakhem kal־hanogeaʿ bahem yiṭemaʾ׃
27 וְכֹ֣ל ׀ הֹולֵ֣ךְ עַל־כַּפָּ֗יו בְּכָל־הַֽחַיָּה֙ הַהֹלֶ֣כֶת עַל־אַרְבַּ֔ע טְמֵאִ֥ים הֵ֖ם לָכֶ֑ם כָּל־הַנֹּגֵ֥עַ בְּנִבְלָתָ֖ם יִטְמָ֥א עַד־הָעָֽרֶב׃ wekhol ׀ howlekhe ʿal־kapayw bekhal־haḥayah haholekhet ʿal־ʾarebaʿ ṭemeʾiym hem lakhem kal־hanogeaʿ benivelatam yiṭemaʾ ʿad־haʿarev׃
28 וְהַנֹּשֵׂא֙ אֶת־נִבְלָתָ֔ם יְכַבֵּ֥ס בְּגָדָ֖יו וְטָמֵ֣א עַד־הָעָ֑רֶב טְמֵאִ֥ים הֵ֖מָּה לָכֶֽם׃ ס wehanoseʾ ʾet־nivelatam yekhabes begadayw weṭameʾ ʿad־haʿarev ṭemeʾiym hemah lakhem׃ s
29 וְזֶ֤ה לָכֶם֙ הַטָּמֵ֔א בַּשֶּׁ֖רֶץ הַשֹּׁרֵ֣ץ עַל־הָאָ֑רֶץ הַחֹ֥לֶד וְהָעַכְבָּ֖ר וְהַצָּ֥ב לְמִינֵֽהוּ׃ wezeh lakhem haṭameʾ basherets hashorets ʿal־haʾarets haḥoled wehaʿakhebar wehatsav lemiynehu׃
30 וְהָאֲנָקָ֥ה וְהַכֹּ֖חַ וְהַלְּטָאָ֑ה וְהַחֹ֖מֶט וְהַתִּנְשָֽׁמֶת׃ wehaʾanaqah wehakoaḥ wehaleṭaʾah wehaḥomeṭ wehatineshamet׃
31 אֵ֛לֶּה הַטְּמֵאִ֥ים לָכֶ֖ם בְּכָל־הַשָּׁ֑רֶץ כָּל־הַנֹּגֵ֧עַ בָּהֶ֛ם בְּמֹתָ֖ם יִטְמָ֥א עַד־הָעָֽרֶב׃ ʾeleh haṭemeʾiym lakhem bekhal־hasharets kal־hanogeaʿ bahem bemotam yiṭemaʾ ʿad־haʿarev׃
32 וְכֹ֣ל אֲשֶׁר־יִפֹּל־עָלָיו֩ מֵהֶ֨ם ׀ בְּמֹתָ֜ם יִטְמָ֗א מִכָּל־כְּלִי־עֵץ֙ אֹ֣ו בֶ֤גֶד אֹו־עֹור֙ אֹ֣ו שָׂ֔ק כָּל־כְּלִ֕י אֲשֶׁר־יֵעָשֶׂ֥ה מְלָאכָ֖ה בָּהֶ֑ם בַּמַּ֧יִם יוּבָ֛א וְטָמֵ֥א עַד־הָעֶ֖רֶב וְטָהֵֽר׃ wekhol ʾasher־yipol־ʿalayw mehem ׀ bemotam yiṭemaʾ mikal־keliy־ʿets ʾow veged ʾow־ʿowr ʾow saq kal־keliy ʾasher־yeʿaseh melaʾkhah bahem bamayim yuvaʾ weṭameʾ ʿad־haʿerev weṭaher׃
33 וְכָל־כְּלִי־חֶ֔רֶשׂ אֲשֶׁר־יִפֹּ֥ל מֵהֶ֖ם אֶל־תֹּוכֹ֑ו כֹּ֣ל אֲשֶׁ֧ר בְּתֹוכֹ֛ו יִטְמָ֖א וְאֹתֹ֥ו תִשְׁבֹּֽרוּ׃ wekhal־keliy־ḥeres ʾasher־yipol mehem ʾel־towkhow kol ʾasher betowkhow yiṭemaʾ weʾotow tisheboru׃
34 מִכָּל־הָאֹ֜כֶל אֲשֶׁ֣ר יֵאָכֵ֗ל אֲשֶׁ֨ר יָבֹ֥וא עָלָ֛יו מַ֖יִם יִטְמָ֑א וְכָל־מַשְׁקֶה֙ אֲשֶׁ֣ר יִשָּׁתֶ֔ה בְּכָל־כְּלִ֖י יִטְמָֽא׃ mikal־haʾokhel ʾasher yeʾakhel ʾasher yavowʾ ʿalayw mayim yiṭemaʾ wekhal־masheqeh ʾasher yishateh bekhal־keliy yiṭemaʾ׃
35 וְ֠כֹל אֲשֶׁר־יִפֹּ֨ל מִנִּבְלָתָ֥ם ׀ עָלָיו֮ יִטְמָא֒ תַּנּ֧וּר וְכִירַ֛יִם יֻתָּ֖ץ טְמֵאִ֣ים הֵ֑ם וּטְמֵאִ֖ים יִהְי֥וּ לָכֶֽם׃ wekhol ʾasher־yipol minivelatam ׀ ʿalayw yiṭemaʾ tanur wekhiyrayim yutats ṭemeʾiym hem uṭemeʾiym yiheyu lakhem׃
36 אַ֣ךְ מַעְיָ֥ן וּבֹ֛ור מִקְוֵה־מַ֖יִם יִהְיֶ֣ה טָהֹ֑ור וְנֹגֵ֥עַ בְּנִבְלָתָ֖ם יִטְמָֽא׃ ʾakhe maʿeyan uvowr miqeweh־mayim yiheyeh ṭahowr wenogeaʿ benivelatam yiṭemaʾ׃
37 וְכִ֤י יִפֹּל֙ מִנִּבְלָתָ֔ם עַל־כָּל־זֶ֥רַע זֵר֖וּעַ אֲשֶׁ֣ר יִזָּרֵ֑עַ טָהֹ֖ור הֽוּא׃ wekhiy yipol minivelatam ʿal־kal־zeraʿ zeruaʿ ʾasher yizareaʿ ṭahowr huʾ׃
38 וְכִ֤י יֻתַּן־מַ֙יִם֙ עַל־זֶ֔רַע וְנָפַ֥ל מִנִּבְלָתָ֖ם עָלָ֑יו טָמֵ֥א ה֖וּא לָכֶֽם׃ ס wekhiy yutan־mayim ʿal־zeraʿ wenafal minivelatam ʿalayw ṭameʾ huʾ lakhem׃ s
39 וְכִ֤י יָמוּת֙ מִן־הַבְּהֵמָ֔ה אֲשֶׁר־הִ֥יא לָכֶ֖ם לְאָכְלָ֑ה הַנֹּגֵ֥עַ בְּנִבְלָתָ֖הּ יִטְמָ֥א עַד־הָעָֽרֶב׃ wekhiy yamut min־habehemah ʾasher־hiyʾ lakhem leʾakhelah hanogeaʿ benivelatah yiṭemaʾ ʿad־haʿarev׃
40 וְהָֽאֹכֵל֙ מִנִּבְלָתָ֔הּ יְכַבֵּ֥ס בְּגָדָ֖יו וְטָמֵ֣א עַד־הָעָ֑רֶב וְהַנֹּשֵׂא֙ אֶת־נִבְלָתָ֔הּ יְכַבֵּ֥ס בְּגָדָ֖יו וְטָמֵ֥א עַד־הָעָֽרֶב׃ wehaʾokhel minivelatah yekhabes begadayw weṭameʾ ʿad־haʿarev wehanoseʾ ʾet־nivelatah yekhabes begadayw weṭameʾ ʿad־haʿarev׃
41 וְכָל־הַשֶּׁ֖רֶץ הַשֹּׁרֵ֣ץ עַל־הָאָ֑רֶץ שֶׁ֥קֶץ ה֖וּא לֹ֥א יֵאָכֵֽל׃ wekhal־hasherets hashorets ʿal־haʾarets sheqets huʾ loʾ yeʾakhel׃
42 כֹּל֩ הֹולֵ֨ךְ עַל־גָּחֹ֜ון וְכֹ֣ל ׀ הֹולֵ֣ךְ עַל־אַרְבַּ֗ע עַ֚ד כָּל־מַרְבֵּ֣ה רַגְלַ֔יִם לְכָל־הַשֶּׁ֖רֶץ הַשֹּׁרֵ֣ץ עַל־הָאָ֑רֶץ לֹ֥א תֹאכְל֖וּם כִּי־שֶׁ֥קֶץ הֵֽם׃ kol howlekhe ʿal־gaḥown wekhol ׀ howlekhe ʿal־ʾarebaʿ ʿad kal־marebeh ragelayim lekhal־hasherets hashorets ʿal־haʾarets loʾ toʾkhelum kiy־sheqets hem׃
43 אַל־תְּשַׁקְּצוּ֙ אֶת־נַפְשֹׁ֣תֵיכֶ֔ם בְּכָל־הַשֶּׁ֖רֶץ הַשֹּׁרֵ֑ץ וְלֹ֤א תִֽטַּמְּאוּ֙ בָּהֶ֔ם וְנִטְמֵתֶ֖ם בָּֽם׃ ʾal־teshaqetsu ʾet־nafeshoteykhem bekhal־hasherets hashorets weloʾ tiṭameʾu bahem weniṭemetem bam׃
44 כִּ֣י אֲנִ֣י יְהוָה֮ אֱלֹֽהֵיכֶם֒ וְהִתְקַדִּשְׁתֶּם֙ וִהְיִיתֶ֣ם קְדֹשִׁ֔ים כִּ֥י קָדֹ֖ושׁ אָ֑נִי וְלֹ֤א תְטַמְּאוּ֙ אֶת־נַפְשֹׁ֣תֵיכֶ֔ם בְּכָל־הַשֶּׁ֖רֶץ הָרֹמֵ֥שׂ עַל־הָאָֽרֶץ׃ kiy ʾaniy yehwah ʾeloheykhem wehiteqadishetem wiheyiytem qedoshiym kiy qadowsh ʾaniy weloʾ teṭameʾu ʾet־nafeshoteykhem bekhal־hasherets haromes ʿal־haʾarets׃
45 כִּ֣י ׀ אֲנִ֣י יְהוָ֗ה הַֽמַּעֲלֶ֤ה אֶתְכֶם֙ מֵאֶ֣רֶץ מִצְרַ֔יִם לִהְיֹ֥ת לָכֶ֖ם לֵאלֹהִ֑ים וִהְיִיתֶ֣ם קְדֹשִׁ֔ים כִּ֥י קָדֹ֖ושׁ אָֽנִי׃ kiy ׀ ʾaniy yehwah hamaʿaleh ʾetekhem meʾerets mitserayim liheyot lakhem leʾlohiym wiheyiytem qedoshiym kiy qadowsh ʾaniy׃
46 זֹ֣את תֹּורַ֤ת הַבְּהֵמָה֙ וְהָעֹ֔וף וְכֹל֙ נֶ֣פֶשׁ הַֽחַיָּ֔ה הָרֹמֶ֖שֶׂת בַּמָּ֑יִם וּלְכָל־נֶ֖פֶשׁ הַשֹּׁרֶ֥צֶת עַל־הָאָֽרֶץ׃ zoʾt towrat habehemah wehaʿowf wekhol nefesh haḥayah haromeset bamayim ulekhal־nefesh hashoretset ʿal־haʾarets׃
47 לְהַבְדִּ֕יל בֵּ֥ין הַטָּמֵ֖א וּבֵ֣ין הַטָּהֹ֑ר וּבֵ֤ין הַֽחַיָּה֙ הַֽנֶּאֱכֶ֔לֶת וּבֵין֙ הַֽחַיָּ֔ה אֲשֶׁ֖ר לֹ֥א תֵאָכֵֽל׃ פ lehavediyl beyn haṭameʾ uveyn haṭahor uveyn haḥayah haneʾekhelet uveyn haḥayah ʾasher loʾ teʾakhel׃ f