Osée 5

¹ שִׁמְעוּ־זֹ֨את הַכֹּהֲנִ֜ים וְהַקְשִׁ֣יבוּ ׀ בֵּ֣ית יִשְׂרָאֵ֗ל וּבֵ֤ית הַמֶּ֙לֶךְ֙ הַאֲזִ֔ינוּ כִּ֥י לָכֶ֖ם הַמִּשְׁפָּ֑ט כִּֽי־פַח֙ הֱיִיתֶ֣ם לְמִצְפָּ֔ה וְרֶ֖שֶׁת פְּרוּשָׂ֥ה עַל־תָּבֹֽור׃ shimeʿu־zoʾt hakohaniym wehaqeshiyvu ׀ beyt yiseraʾel uveyt hamelekhe haʾaziynu kiy lakhem hamishepaṭ kiy־faḥ heyiytem lemitsepah wereshet perusah ʿal־tavowr׃

² וְשַׁחֲטָ֥ה שֵׂטִ֖ים הֶעְמִ֑יקוּ וַאֲנִ֖י מוּסָ֥ר לְכֻלָּֽם׃ weshaḥaṭah seṭiym heʿemiyqu waʾaniy musar lekhulam׃

³ אֲנִי֙ יָדַ֣עְתִּי אֶפְרַ֔יִם וְיִשְׂרָאֵ֖ל לֹֽא־נִכְחַ֣ד מִמֶּ֑נִּי כִּ֤י עַתָּה֙ הִזְנֵ֣יתָ אֶפְרַ֔יִם נִטְמָ֖א יִשְׂרָאֵֽל׃ ʾaniy yadaʿetiy ʾeferayim weyiseraʾel loʾ־nikheḥad mimeniy kiy ʿatah hizeneyta ʾeferayim niṭemaʾ yiseraʾel׃

⁴ לֹ֤א יִתְּנוּ֙ מַ֣עַלְלֵיהֶ֔ם לָשׁ֖וּב אֶל־אֱלֹֽהֵיהֶ֑ם כִּ֣י ר֤וּחַ זְנוּנִים֙ בְּקִרְבָּ֔ם וְאֶת־יְהוָ֖ה לֹ֥א יָדָֽעוּ׃ loʾ yitenu maʿaleleyhem lashuv ʾel־ʾeloheyhem kiy ruaḥ zenuniym beqirebam weʾet־yehwah loʾ yadaʿu׃

⁵ וְעָנָ֥ה גְאֹֽון־יִשְׂרָאֵ֖ל בְּפָנָ֑יו וְיִשְׂרָאֵ֣ל וְאֶפְרַ֗יִם יִכָּֽשְׁלוּ֙ בַּעֲוֹנָ֔ם כָּשַׁ֥ל גַּם־יְהוּדָ֖ה עִמָּֽם׃ weʿanah geʾown־yiseraʾel befanayw weyiseraʾel weʾeferayim yikashelu baʿaonam kashal gam־yehudah ʿimam׃

⁶ בְּצֹאנָ֣ם וּבִבְקָרָ֗ם יֵֽלְכ֛וּ לְבַקֵּ֥שׁ אֶת־יְהוָ֖ה וְלֹ֣א יִמְצָ֑אוּ חָלַ֖ץ מֵהֶֽם׃ betsoʾnam uviveqaram yelekhu levaqesh ʾet־yehwah weloʾ yimetsaʾu ḥalats mehem׃

⁷ בַּיהוָ֣ה בָּגָ֔דוּ כִּֽי־בָנִ֥ים זָרִ֖ים יָלָ֑דוּ עַתָּ֛ה יֹאכְלֵ֥ם חֹ֖דֶשׁ אֶת־חֶלְקֵיהֶֽם׃ ס bayhwah bagadu kiy־vaniym zariym yaladu ʿatah yoʾkhelem ḥodesh ʾet־ḥeleqeyhem׃ s

⁸ תִּקְע֤וּ שֹׁופָר֙ בַּגִּבְעָ֔ה חֲצֹצְרָ֖ה בָּרָמָ֑ה הָרִ֙יעוּ֙ בֵּ֣ית אָ֔וֶן אַחֲרֶ֖יךָ בִּנְיָמִֽין׃ tiqeʿu showfar bagiveʿah ḥatsotserah baramah hariyʿu beyt ʾawen ʾaḥareykha bineyamiyn׃

⁹ אֶפְרַ֙יִם֙ לְשַׁמָּ֣ה תִֽהְיֶ֔ה בְּיֹ֖ום תֹּֽוכֵחָ֑ה בְּשִׁבְטֵי֙ יִשְׂרָאֵ֔ל הֹודַ֖עְתִּי נֶאֱמָנָֽה׃ ʾeferayim leshamah tiheyeh beyowm towkheḥah beshiveṭey yiseraʾel howdaʿetiy neʾemanah׃

¹⁰ הָיוּ֙ שָׂרֵ֣י יְהוּדָ֔ה כְּמַסִּיגֵ֖י גְּב֑וּל עֲלֵיהֶ֕ם אֶשְׁפֹּ֥וךְ כַּמַּ֖יִם עֶבְרָתִֽי׃ hayu sarey yehudah kemasiygey gevul ʿaleyhem ʾeshepowkhe kamayim ʿeveratiy׃

¹¹ עָשׁ֥וּק אֶפְרַ֖יִם רְצ֣וּץ מִשְׁפָּ֑ט כִּ֣י הֹואִ֔יל הָלַ֖ךְ אַחֲרֵי־צָֽו׃ ʿashuq ʾeferayim retsuts mishepaṭ kiy howʾiyl halakhe ʾaḥarey־tsaw׃

¹² וַאֲנִ֥י כָעָ֖שׁ לְאֶפְרָ֑יִם וְכָרָקָ֖ב לְבֵ֥ית יְהוּדָֽה׃ waʾaniy khaʿash leʾeferayim wekharaqav leveyt yehudah׃

¹³ וַיַּ֨רְא אֶפְרַ֜יִם אֶת־חָלְיֹ֗ו וִֽיהוּדָה֙ אֶת־מְזֹרֹ֔ו וַיֵּ֤לֶךְ אֶפְרַ֙יִם֙ אֶל־אַשּׁ֔וּר וַיִּשְׁלַ֖ח אֶל־מֶ֣לֶךְ יָרֵ֑ב וְה֗וּא לֹ֤א יוּכַל֙ לִרְפֹּ֣א לָכֶ֔ם וְלֹֽא־יִגְהֶ֥ה מִכֶּ֖ם מָזֹֽור׃ wayareʾ ʾeferayim ʾet־ḥaleyow wiyhudah ʾet־mezorow wayelekhe ʾeferayim ʾel־ʾashur wayishelaḥ ʾel־melekhe yarev wehuʾ loʾ yukhal lirepoʾ lakhem weloʾ־yigeheh mikem mazowr׃

¹⁴ כִּ֣י אָנֹכִ֤י כַשַּׁ֙חַל֙ לְאֶפְרַ֔יִם וְכַכְּפִ֖יר לְבֵ֣ית יְהוּדָ֑ה אֲנִ֨י אֲנִ֤י אֶטְרֹף֙ וְאֵלֵ֔ךְ אֶשָּׂ֖א וְאֵ֥ין מַצִּֽיל׃ kiy ʾanokhiy khashaḥal leʾeferayim wekhakefiyr leveyt yehudah ʾaniy ʾaniy ʾeṭerof weʾelekhe ʾesaʾ weʾeyn matsiyl׃

¹⁵ אֵלֵ֤ךְ אָשׁ֙וּבָה֙ אֶל־מְקֹומִ֔י עַ֥ד אֲשֶֽׁר־יֶאְשְׁמ֖וּ וּבִקְשׁ֣וּ פָנָ֑י בַּצַּ֥ר לָהֶ֖ם יְשַׁחֲרֻֽנְנִי׃ ʾelekhe ʾashuvah ʾel־meqowmiy ʿad ʾasher־yeʾeshemu uviqeshu fanay batsar lahem yeshaḥaruneniy׃