Josué 3

¹ וַיַּשְׁכֵּם֩ יְהֹושֻׁ֨עַ בַּבֹּ֜קֶר וַיִּסְע֣וּ מֵֽהַשִּׁטִּ֗ים וַיָּבֹ֙אוּ֙ עַד־הַיַּרְדֵּ֔ן ה֖וּא וְכָל־בְּנֵ֣י יִשְׂרָאֵ֑ל וַיָּלִ֥נוּ שָׁ֖ם טֶ֥רֶם יַעֲבֹֽרוּ׃ wayashekem yehowshuaʿ baboqer wayiseʿu mehashiṭiym wayavoʾu ʿad־hayareden huʾ wekhal־beney yiseraʾel wayalinu sham ṭerem yaʿavoru׃

² וַיְהִ֕י מִקְצֵ֖ה שְׁלֹ֣שֶׁת יָמִ֑ים וַיַּעַבְר֥וּ הַשֹּׁטְרִ֖ים בְּקֶ֥רֶב הַֽמַּחֲנֶֽה׃ wayehiy miqetseh sheloshet yamiym wayaʿaveru hashoṭeriym beqerev hamaḥaneh׃

³ וַיְצַוּוּ֮ אֶת־הָעָ֣ם לֵאמֹר֒ כִּרְאֹֽותְכֶ֗ם אֵ֣ת אֲרֹ֤ון בְּרִית־יְהוָה֙ אֱלֹ֣הֵיכֶ֔ם וְהַכֹּֽהֲנִים֙ הַלְוִיִּ֔ם נֹשְׂאִ֖ים אֹתֹ֑ו וְאַתֶּ֗ם תִּסְעוּ֙ מִמְּקֹ֣ומְכֶ֔ם וַהֲלַכְתֶּ֖ם אַחֲרָֽיו׃ wayetsauu ʾet־haʿam leʾmor kireʾowtekhem ʾet ʾarown beriyt־yehwah ʾeloheykhem wehakohaniym halewiyim noseʾiym ʾotow weʾatem tiseʿu mimeqowmekhem wahalakhetem ʾaḥarayw׃

⁴ אַ֣ךְ ׀ רָחֹ֣וק יִהְיֶ֗ה בֵּֽינֵיכֶם֙ [וּבֵינֹו כ] (וּבֵינָ֔יו ק) כְּאַלְפַּ֥יִם אַמָּ֖ה בַּמִּדָּ֑ה אַֽל־תִּקְרְב֣וּ אֵלָ֗יו לְמַ֤עַן אֲשֶׁר־תֵּֽדְעוּ֙ אֶת־הַדֶּ֙רֶךְ֙ אֲשֶׁ֣ר תֵּֽלְכוּ־בָ֔הּ כִּ֣י לֹ֧א עֲבַרְתֶּ֛ם בַּדֶּ֖רֶךְ מִתְּמֹ֥ול שִׁלְשֹֽׁום׃ ס ʾakhe ׀ raḥowq yiheyeh beyneykhem [uveynow kh] (uveynayw q) keʾalepayim ʾamah bamidah ʾal־tiqerevu ʾelayw lemaʿan ʾasher־tedeʿu ʾet־haderekhe ʾasher telekhu־vah kiy loʾ ʿavaretem baderekhe mitemowl shileshowm׃ s

⁵ וַיֹּ֧אמֶר יְהֹושֻׁ֛עַ אֶל־הָעָ֖ם הִתְקַדָּ֑שׁוּ כִּ֣י מָחָ֗ר יַעֲשֶׂ֧ה יְהוָ֛ה בְּקִרְבְּכֶ֖ם נִפְלָאֹֽות׃ wayoʾmer yehowshuaʿ ʾel־haʿam hiteqadashu kiy maḥar yaʿaseh yehwah beqirebekhem nifelaʾowt׃

⁶ וַיֹּ֤אמֶר יְהֹושֻׁ֙עַ֙ אֶל־הַכֹּהֲנִ֣ים לֵאמֹ֔ר שְׂאוּ֙ אֶת־אֲרֹ֣ון הַבְּרִ֔ית וְעִבְר֖וּ לִפְנֵ֣י הָעָ֑ם וַיִּשְׂאוּ֙ אֶת־אֲרֹ֣ון הַבְּרִ֔ית וַיֵּלְכ֖וּ לִפְנֵ֥י הָעָֽם׃ ס wayoʾmer yehowshuaʿ ʾel־hakohaniym leʾmor seʾu ʾet־ʾarown haberiyt weʿiveru lifeney haʿam wayiseʾu ʾet־ʾarown haberiyt wayelekhu lifeney haʿam׃ s

⁷ וַיֹּ֤אמֶר יְהוָה֙ אֶל־יְהֹושֻׁ֔עַ הַיֹּ֣ום הַזֶּ֗ה אָחֵל֙ גַּדֶּלְךָ֔ בְּעֵינֵ֖י כָּל־יִשְׂרָאֵ֑ל אֲשֶׁר֙ יֵֽדְע֔וּן כִּ֗י כַּאֲשֶׁ֥ר הָיִ֛יתִי עִם־מֹשֶׁ֖ה אֶהְיֶ֥ה עִמָּֽךְ׃ wayoʾmer yehwah ʾel־yehowshuaʿ hayowm hazeh ʾaḥel gadelekha beʿeyney kal־yiseraʾel ʾasher yedeʿun kiy kaʾasher hayiytiy ʿim־mosheh ʾeheyeh ʿimakhe׃

⁸ וְאַתָּ֗ה תְּצַוֶּה֙ אֶת־הַכֹּ֣הֲנִ֔ים נֹשְׂאֵ֥י אֲרֹֽון־הַבְּרִ֖ית לֵאמֹ֑ר כְּבֹאֲכֶ֗ם עַד־קְצֵה֙ מֵ֣י הַיַּרְדֵּ֔ן בַּיַּרְדֵּ֖ן תַּעֲמֹֽדוּ׃ פ weʾatah tetsaueh ʾet־hakohaniym noseʾey ʾarown־haberiyt leʾmor kevoʾakhem ʿad־qetseh mey hayareden bayareden taʿamodu׃ f

⁹ וַיֹּ֥אמֶר יְהֹושֻׁ֖עַ אֶל־בְּנֵ֣י יִשְׂרָאֵ֑ל גֹּ֣שׁוּ הֵ֔נָּה וְשִׁמְע֕וּ אֶת־דִּבְרֵ֖י יְהוָ֥ה אֱלֹֽהֵיכֶֽם׃ wayoʾmer yehowshuaʿ ʾel־beney yiseraʾel goshu henah weshimeʿu ʾet־diverey yehwah ʾeloheykhem׃

¹⁰ וַיֹּ֣אמֶר יְהֹושֻׁ֔עַ בְּזֹאת֙ תֵּֽדְע֔וּן כִּ֛י אֵ֥ל חַ֖י בְּקִרְבְּכֶ֑ם וְהֹורֵ֣שׁ יֹורִ֣ישׁ מִ֠פְּנֵיכֶם אֶת־הַכְּנַעֲנִ֨י וְאֶת־הַחִתִּ֜י וְאֶת־הַחִוִּ֗י וְאֶת־הַפְּרִזִּי֙ וְאֶת־הַגִּרְגָּשִׁ֔י וְהָאֱמֹרִ֖י וְהַיְבוּסִֽי׃ wayoʾmer yehowshuaʿ bezoʾt tedeʿun kiy ʾel ḥay beqirebekhem wehowresh yowriysh mipeneykhem ʾet־hakenaʿaniy weʾet־haḥitiy weʾet־haḥiuiy weʾet־haperiziy weʾet־hagiregashiy wehaʾemoriy wehayevusiy׃

¹¹ הִנֵּה֙ אֲרֹ֣ון הַבְּרִ֔ית אֲדֹ֖ון כָּל־הָאָ֑רֶץ עֹבֵ֥ר לִפְנֵיכֶ֖ם בַּיַּרְדֵּֽן׃ hineh ʾarown haberiyt ʾadown kal־haʾarets ʿover lifeneykhem bayareden׃

¹² וְעַתָּ֗ה קְח֤וּ לָכֶם֙ שְׁנֵ֣י עָשָׂ֣ר אִ֔ישׁ מִשִּׁבְטֵ֖י יִשְׂרָאֵ֑ל אִישׁ־אֶחָ֥ד אִישׁ־אֶחָ֖ד לַשָּֽׁבֶט׃ weʿatah qeḥu lakhem sheney ʿasar ʾiysh mishiveṭey yiseraʾel ʾiysh־ʾeḥad ʾiysh־ʾeḥad lashaveṭ׃

¹³ וְהָיָ֡ה כְּנֹ֣וחַ כַּפֹּ֣ות רַגְלֵ֣י הַכֹּהֲנִ֡ים נֹשְׂאֵי֩ אֲרֹ֨ון יְהוָ֜ה אֲדֹ֤ון כָּל־הָאָ֙רֶץ֙ בְּמֵ֣י הַיַּרְדֵּ֔ן מֵ֤י הַיַּרְדֵּן֙ יִכָּ֣רֵת֔וּן הַמַּ֥יִם הַיֹּרְדִ֖ים מִלְמָ֑עְלָה וְיַעַמְד֖וּ נֵ֥ד אֶחָֽד׃ wehayah kenowḥa kapowt rageley hakohaniym noseʾey ʾarown yehwah ʾadown kal־haʾarets bemey hayareden mey hayareden yikaretun hamayim hayorediym milemaʿelah weyaʿamedu ned ʾeḥad׃

¹⁴ וַיְהִ֗י בִּנְסֹ֤עַ הָעָם֙ מֵאָ֣הֳלֵיהֶ֔ם לַעֲבֹ֖ר אֶת־הַיַּרְדֵּ֑ן וְהַכֹּהֲנִ֗ים נֹֽשְׂאֵ֛י הָאָרֹ֥ון הַבְּרִ֖ית לִפְנֵ֥י הָעָֽם׃ wayehiy binesoaʿ haʿam meʾaholeyhem laʿavor ʾet־hayareden wehakohaniym noseʾey haʾarown haberiyt lifeney haʿam׃

¹⁵ וּכְבֹ֞וא נֹשְׂאֵ֤י הָֽאָרֹון֙ עַד־הַיַּרְדֵּ֔ן וְרַגְלֵ֤י הַכֹּֽהֲנִים֙ נֹשְׂאֵ֣י הָֽאָרֹ֔ון נִטְבְּל֖וּ בִּקְצֵ֣ה הַמָּ֑יִם וְהַיַּרְדֵּ֗ן מָלֵא֙ עַל־כָּל־גְּדֹותָ֔יו כֹּ֖ל יְמֵ֥י קָצִֽיר׃ ukhevowʾ noseʾey haʾarown ʿad־hayareden werageley hakohaniym noseʾey haʾarown niṭebelu biqetseh hamayim wehayareden maleʾ ʿal־kal־gedowtayw kol yemey qatsiyr׃

¹⁶ וַיַּעַמְד֡וּ הַמַּיִם֩ הַיֹּרְדִ֨ים מִלְמַ֜עְלָה קָ֣מוּ נֵד־אֶחָ֗ד הַרְחֵ֨ק מְאֹ֜ד [בָאָדָם כ] (מֵֽאָדָ֤ם ק) הָעִיר֙ אֲשֶׁר֙ מִצַּ֣ד צָֽרְתָ֔ן וְהַיֹּרְדִ֗ים עַ֣ל יָ֧ם הָעֲרָבָ֛ה יָם־הַמֶּ֖לַח תַּ֣מּוּ נִכְרָ֑תוּ וְהָעָ֥ם עָבְר֖וּ נֶ֥גֶד יְרִיחֹֽו׃ wayaʿamedu hamayim hayorediym milemaʿelah qamu ned־ʾeḥad hareḥeq meʾod [vaʾadam kh] (meʾadam q) haʿiyr ʾasher mitsad tsaretan wehayorediym ʿal yam haʿaravah yam־hamelaḥ tamu nikheratu wehaʿam ʿaveru neged yeriyḥow׃

¹⁷ וַיַּעַמְד֣וּ הַכֹּהֲנִ֡ים נֹ֠שְׂאֵי הָאָרֹ֨ון בְּרִית־יְהוָ֜ה בֶּחָֽרָבָ֛ה בְּתֹ֥וךְ הַיַּרְדֵּ֖ן הָכֵ֑ן וְכָל־יִשְׂרָאֵ֗ל עֹֽבְרִים֙ בֶּחָ֣רָבָ֔ה עַ֤ד אֲשֶׁר־תַּ֙מּוּ֙ כָּל־הַגֹּ֔וי לַעֲבֹ֖ר אֶת־הַיַּרְדֵּֽן׃ wayaʿamedu hakohaniym noseʾey haʾarown beriyt־yehwah beḥaravah betowkhe hayareden hakhen wekhal־yiseraʾel ʿoveriym beḥaravah ʿad ʾasher־tamu kal־hagowy laʿavor ʾet־hayareden׃