Amos 3

¹ שִׁמְע֞וּ אֶת־הַדָּבָ֣ר הַזֶּ֗ה אֲשֶׁ֨ר דִּבֶּ֧ר יְהוָ֛ה עֲלֵיכֶ֖ם בְּנֵ֣י יִשְׂרָאֵ֑ל עַ֚ל כָּל־הַמִּשְׁפָּחָ֔ה אֲשֶׁ֧ר הֶעֱלֵ֛יתִי מֵאֶ֥רֶץ מִצְרַ֖יִם לֵאמֹֽר׃ shimeʿu ʾet־hadavar hazeh ʾasher diber yehwah ʿaleykhem beney yiseraʾel ʿal kal־hamishepaḥah ʾasher heʿeleytiy meʾerets mitserayim leʾmor׃

² רַ֚ק אֶתְכֶ֣ם יָדַ֔עְתִּי מִכֹּ֖ל מִשְׁפְּחֹ֣ות הָאֲדָמָ֑ה עַל־כֵּן֙ אֶפְקֹ֣ד עֲלֵיכֶ֔ם אֵ֖ת כָּל־עֲוֹנֹֽתֵיכֶֽם׃ raq ʾetekhem yadaʿetiy mikol mishepeḥowt haʾadamah ʿal־ken ʾefeqod ʿaleykhem ʾet kal־ʿaonoteykhem׃

³ הֲיֵלְכ֥וּ שְׁנַ֖יִם יַחְדָּ֑ו בִּלְתִּ֖י אִם־נֹועָֽדוּ׃ hayelekhu shenayim yaḥedaw biletiy ʾim־nowʿadu׃

⁴ הֲיִשְׁאַ֤ג אַרְיֵה֙ בַּיַּ֔עַר וְטֶ֖רֶף אֵ֣ין לֹ֑ו הֲיִתֵּ֨ן כְּפִ֤יר קֹולֹו֙ מִמְּעֹ֣נָתֹ֔ו בִּלְתִּ֖י אִם־לָכָֽד׃ hayisheʾag ʾareyeh bayaʿar weṭeref ʾeyn low hayiten kefiyr qowlow mimeʿonatow biletiy ʾim־lakhad׃

⁵ הֲתִפֹּ֤ל צִפֹּור֙ עַל־פַּ֣ח הָאָ֔רֶץ וּמֹוקֵ֖שׁ אֵ֣ין לָ֑הּ הֲיַֽעֲלֶה־פַּח֙ מִן־הָ֣אֲדָמָ֔ה וְלָכֹ֖וד לֹ֥א יִלְכֹּֽוד׃ hatipol tsipowr ʿal־paḥ haʾarets umowqesh ʾeyn lah hayaʿaleh־paḥ min־haʾadamah welakhowd loʾ yilekowd׃

⁶ אִם־יִתָּקַ֤ע שֹׁופָר֙ בְּעִ֔יר וְעָ֖ם לֹ֣א יֶחֱרָ֑דוּ אִם־תִּהְיֶ֤ה רָעָה֙ בְּעִ֔יר וַיהוָ֖ה לֹ֥א עָשָֽׂה׃ ʾim־yitaqaʿ showfar beʿiyr weʿam loʾ yeḥeradu ʾim־tiheyeh raʿah beʿiyr wayhwah loʾ ʿasah׃

⁷ כִּ֣י לֹ֧א יַעֲשֶׂ֛ה אֲדֹנָ֥י יְהוִ֖ה דָּבָ֑ר כִּ֚י אִם־גָּלָ֣ה סֹודֹ֔ו אֶל־עֲבָדָ֖יו הַנְּבִיאִֽים׃ kiy loʾ yaʿaseh ʾadonay yehwih davar kiy ʾim־galah sowdow ʾel־ʿavadayw haneviyʾiym׃

⁸ אַרְיֵ֥ה שָׁאָ֖ג מִ֣י לֹ֣א יִירָ֑א אֲדֹנָ֤י יְהוִה֙ דִּבֶּ֔ר מִ֖י לֹ֥א יִנָּבֵֽא׃ ʾareyeh shaʾag miy loʾ yiyraʾ ʾadonay yehwih diber miy loʾ yinaveʾ׃

⁹ הַשְׁמִ֙יעוּ֙ עַל־אַרְמְנֹ֣ות בְּאַשְׁדֹּ֔וד וְעַֽל־אַרְמְנֹ֖ות בְּאֶ֣רֶץ מִצְרָ֑יִם וְאִמְר֗וּ הֵאָֽסְפוּ֙ עַל־הָרֵ֣י שֹׁמְרֹ֔ון וּרְא֞וּ מְהוּמֹ֤ת רַבֹּות֙ בְּתֹוכָ֔הּ וַעֲשׁוּקִ֖ים בְּקִרְבָּֽהּ׃ hashemiyʿu ʿal־ʾaremenowt beʾashedowd weʿal־ʾaremenowt beʾerets mitserayim weʾimeru heʾasefu ʿal־harey shomerown ureʾu mehumot rabowt betowkhah waʿashuqiym beqirebah׃

¹⁰ וְלֹֽא־יָדְע֥וּ עֲשֹׂות־נְכֹחָ֖ה נְאֻם־יְהוָ֑ה הָאֹֽוצְרִ֛ים חָמָ֥ס וָשֹׁ֖ד בְּאַרְמְנֹֽותֵיהֶֽם׃ פ weloʾ־yadeʿu ʿasowt־nekhoḥah neʾum־yehwah haʾowtseriym ḥamas washod beʾaremenowteyhem׃ f

¹¹ לָכֵ֗ן כֹּ֤ה אָמַר֙ אֲדֹנָ֣י יְהוִ֔ה צַ֖ר וּסְבִ֣יב הָאָ֑רֶץ וְהֹורִ֤ד מִמֵּךְ֙ עֻזֵּ֔ךְ וְנָבֹ֖זּוּ אַרְמְנֹותָֽיִךְ׃ lakhen koh ʾamar ʾadonay yehwih tsar useviyv haʾarets wehowrid mimekhe ʿuzekhe wenavozu ʾaremenowtayikhe׃

¹² כֹּה֮ אָמַ֣ר יְהוָה֒ כַּאֲשֶׁר֩ יַצִּ֨יל הָרֹעֶ֜ה מִפִּ֧י הָאֲרִ֛י שְׁתֵּ֥י כְרָעַ֖יִם אֹ֣ו בְדַל־אֹ֑זֶן כֵּ֣ן יִנָּצְל֞וּ בְּנֵ֣י יִשְׂרָאֵ֗ל הַיֹּֽשְׁבִים֙ בְּשֹׁ֣מְרֹ֔ון בִּפְאַ֥ת מִטָּ֖ה וּבִדְמֶ֥שֶׁק עָֽרֶשׂ׃ koh ʾamar yehwah kaʾasher yatsiyl haroʿeh mipiy haʾariy shetey kheraʿayim ʾow vedal־ʾozen ken yinatselu beney yiseraʾel hayosheviym beshomerown bifeʾat miṭah uvidemesheq ʿares׃

¹³ שִׁמְע֥וּ וְהָעִ֖ידוּ בְּבֵ֣ית יַֽעֲקֹ֑ב נְאֻם־אֲדֹנָ֥י יְהוִ֖ה אֱלֹהֵ֥י הַצְּבָאֹֽות׃ shimeʿu wehaʿiydu beveyt yaʿaqov neʾum־ʾadonay yehwih ʾelohey hatsevaʾowt׃

¹⁴ כִּ֗י בְּיֹ֛ום פָּקְדִ֥י פִשְׁעֵֽי־יִשְׂרָאֵ֖ל עָלָ֑יו וּפָֽקַדְתִּי֙ עַל־מִזְבְּחֹ֣ות בֵּֽית־אֵ֔ל וְנִגְדְּעוּ֙ קַרְנֹ֣ות הַמִּזְבֵּ֔חַ וְנָפְל֖וּ לָאָֽרֶץ׃ kiy beyowm paqediy fisheʿey־yiseraʾel ʿalayw ufaqadetiy ʿal־mizebeḥowt beyt־ʾel wenigedeʿu qarenowt hamizebeaḥ wenafelu laʾarets׃

¹⁵ וְהִכֵּיתִ֥י בֵית־הַחֹ֖רֶף עַל־בֵּ֣ית הַקָּ֑יִץ וְאָבְד֞וּ בָּתֵּ֣י הַשֵּׁ֗ן וְסָפ֛וּ בָּתִּ֥ים רַבִּ֖ים נְאֻם־יְהוָֽה׃ ס wehikeytiy veyt־haḥoref ʿal־beyt haqayits weʾavedu batey hashen wesafu batiym rabiym neʾum־yehwah׃ s