Deutéronome 1

¹ אֵ֣לֶּה הַדְּבָרִ֗ים אֲשֶׁ֨ר דִּבֶּ֤ר מֹשֶׁה֙ אֶל־כָּל־יִשְׂרָאֵ֔ל בְּעֵ֖בֶר הַיַּרְדֵּ֑ן בַּמִּדְבָּ֡ר בָּֽעֲרָבָה֩ מֹ֨ול ס֜וּף בֵּֽין־פָּארָ֧ן וּבֵֽין־תֹּ֛פֶל וְלָבָ֥ן וַחֲצֵרֹ֖ת וְדִ֥י זָהָֽב׃ ʾeleh hadevariym ʾasher diber mosheh ʾel־kal־yiseraʾel beʿever hayareden bamidebar baʿaravah mowl suf beyn־paʾran uveyn־tofel welavan waḥatserot wediy zahav׃

² אַחַ֨ד עָשָׂ֥ר יֹום֙ מֵֽחֹרֵ֔ב דֶּ֖רֶךְ הַר־שֵׂעִ֑יר עַ֖ד קָדֵ֥שׁ בַּרְנֵֽעַ׃ ʾaḥad ʿasar yowm meḥorev derekhe har־seʿiyr ʿad qadesh bareneaʿ׃

³ וַיְהִי֙ בְּאַרְבָּעִ֣ים שָׁנָ֔ה בְּעַשְׁתֵּֽי־עָשָׂ֥ר חֹ֖דֶשׁ בְּאֶחָ֣ד לַחֹ֑דֶשׁ דִּבֶּ֤ר מֹשֶׁה֙ אֶל־בְּנֵ֣י יִשְׂרָאֵ֔ל כְּ֠כֹל אֲשֶׁ֨ר צִוָּ֧ה יְהוָ֛ה אֹתֹ֖ו אֲלֵהֶֽם׃ wayehiy beʾarebaʿiym shanah beʿashetey־ʿasar ḥodesh beʾeḥad laḥodesh diber mosheh ʾel־beney yiseraʾel kekhol ʾasher tsiuah yehwah ʾotow ʾalehem׃

⁴ אַחֲרֵ֣י הַכֹּתֹ֗ו אֵ֚ת סִיחֹן֙ מֶ֣לֶךְ הָֽאֱמֹרִ֔י אֲשֶׁ֥ר יֹושֵׁ֖ב בְּחֶשְׁבֹּ֑ון וְאֵ֗ת עֹ֚וג מֶ֣לֶךְ הַבָּשָׁ֔ן אֲשֶׁר־יֹושֵׁ֥ב בְּעַשְׁתָּרֹ֖ת בְּאֶדְרֶֽעִי׃ ʾaḥarey hakotow ʾet siyḥon melekhe haʾemoriy ʾasher yowshev beḥeshebown weʾet ʿowg melekhe habashan ʾasher־yowshev beʿashetarot beʾedereʿiy׃

⁵ בְּעֵ֥בֶר הַיַּרְדֵּ֖ן בְּאֶ֣רֶץ מֹואָ֑ב הֹואִ֣יל מֹשֶׁ֔ה בֵּאֵ֛ר אֶת־הַתֹּורָ֥ה הַזֹּ֖את לֵאמֹֽר׃ beʿever hayareden beʾerets mowʾav howʾiyl mosheh beʾer ʾet־hatowrah hazoʾt leʾmor׃

⁶ יְהוָ֧ה אֱלֹהֵ֛ינוּ דִּבֶּ֥ר אֵלֵ֖ינוּ בְּחֹרֵ֣ב לֵאמֹ֑ר רַב־לָכֶ֥ם שֶׁ֖בֶת בָּהָ֥ר הַזֶּֽה׃ yehwah ʾeloheynu diber ʾeleynu beḥorev leʾmor rav־lakhem shevet bahar hazeh׃

⁷ פְּנ֣וּ ׀ וּסְע֣וּ לָכֶ֗ם וּבֹ֨אוּ הַ֥ר הָֽאֱמֹרִי֮ וְאֶל־כָּל־שְׁכֵנָיו֒ בָּעֲרָבָ֥ה בָהָ֛ר וּבַשְּׁפֵלָ֥ה וּבַנֶּ֖גֶב וּבְחֹ֣וף הַיָּ֑ם אֶ֤רֶץ הַֽכְּנַעֲנִי֙ וְהַלְּבָנֹ֔ון עַד־הַנָּהָ֥ר הַגָּדֹ֖ל נְהַר־פְּרָֽת׃ penu ׀ useʿu lakhem uvoʾu har haʾemoriy weʾel־kal־shekhenayw baʿaravah vahar uvashefelah uvanegev uveḥowf hayam ʾerets hakenaʿaniy wehalevanown ʿad־hanahar hagadol nehar־perat׃

⁸ רְאֵ֛ה נָתַ֥תִּי לִפְנֵיכֶ֖ם אֶת־הָאָ֑רֶץ בֹּ֚אוּ וּרְשׁ֣וּ אֶת־הָאָ֔רֶץ אֲשֶׁ֣ר נִשְׁבַּ֣ע יְ֠הוָה לַאֲבֹ֨תֵיכֶ֜ם לְאַבְרָהָ֨ם לְיִצְחָ֤ק וּֽלְיַעֲקֹב֙ לָתֵ֣ת לָהֶ֔ם וּלְזַרְעָ֖ם אַחֲרֵיהֶֽם׃ reʾeh natatiy lifeneykhem ʾet־haʾarets boʾu ureshu ʾet־haʾarets ʾasher nishebaʿ yehwah laʾavoteykhem leʾaveraham leyitseḥaq uleyaʿaqov latet lahem ulezareʿam ʾaḥareyhem׃

⁹ וָאֹמַ֣ר אֲלֵכֶ֔ם בָּעֵ֥ת הַהִ֖וא לֵאמֹ֑ר לֹא־אוּכַ֥ל לְבַדִּ֖י שְׂאֵ֥ת אֶתְכֶֽם׃ waʾomar ʾalekhem baʿet hahiwʾ leʾmor loʾ־ʾukhal levadiy seʾet ʾetekhem׃

¹⁰ יְהוָ֥ה אֱלֹהֵיכֶ֖ם הִרְבָּ֣ה אֶתְכֶ֑ם וְהִנְּכֶ֣ם הַיֹּ֔ום כְּכֹוכְבֵ֥י הַשָּׁמַ֖יִם לָרֹֽב׃ yehwah ʾeloheykhem hirebah ʾetekhem wehinekhem hayowm kekhowkhevey hashamayim larov׃

¹¹ יְהוָ֞ה אֱלֹהֵ֣י אֲבֹֽותֵכֶ֗ם יֹסֵ֧ף עֲלֵיכֶ֛ם כָּכֶ֖ם אֶ֣לֶף פְּעָמִ֑ים וִיבָרֵ֣ךְ אֶתְכֶ֔ם כַּאֲשֶׁ֖ר דִּבֶּ֥ר לָכֶֽם׃ yehwah ʾelohey ʾavowtekhem yosef ʿaleykhem kakhem ʾelef peʿamiym wiyvarekhe ʾetekhem kaʾasher diber lakhem׃

¹² אֵיכָ֥ה אֶשָּׂ֖א לְבַדִּ֑י טָרְחֲכֶ֥ם וּמַֽשַּׂאֲכֶ֖ם וְרִֽיבְכֶֽם׃ ʾeykhah ʾesaʾ levadiy ṭareḥakhem umasaʾakhem weriyvekhem׃

¹³ הָב֣וּ לָ֠כֶם אֲנָשִׁ֨ים חֲכָמִ֧ים וּנְבֹנִ֛ים וִידֻעִ֖ים לְשִׁבְטֵיכֶ֑ם וַאֲשִׂימֵ֖ם בְּרָאשֵׁיכֶֽם׃ havu lakhem ʾanashiym ḥakhamiym unevoniym wiyduʿiym leshiveṭeykhem waʾasiymem beraʾsheykhem׃

¹⁴ וַֽתַּעֲנ֖וּ אֹתִ֑י וַתֹּ֣אמְר֔וּ טֹֽוב־הַדָּבָ֥ר אֲשֶׁר־דִּבַּ֖רְתָּ לַעֲשֹֽׂות׃ wataʿanu ʾotiy watoʾmeru ṭowv־hadavar ʾasher־dibareta laʿasowt׃

¹⁵ וָאֶקַּ֞ח אֶת־רָאשֵׁ֣י שִׁבְטֵיכֶ֗ם אֲנָשִׁ֤ים חֲכָמִים֙ וִֽידֻעִ֔ים וָאֶתֵּ֥ן אֹתָ֛ם רָאשִׁ֖ים עֲלֵיכֶ֑ם שָׂרֵ֨י אֲלָפִ֜ים וְשָׂרֵ֣י מֵאֹ֗ות וְשָׂרֵ֤י חֲמִשִּׁים֙ וְשָׂרֵ֣י עֲשָׂרֹ֔ת וְשֹׁטְרִ֖ים לְשִׁבְטֵיכֶֽם׃ waʾeqaḥ ʾet־raʾshey shiveṭeykhem ʾanashiym ḥakhamiym wiyduʿiym waʾeten ʾotam raʾshiym ʿaleykhem sarey ʾalafiym wesarey meʾowt wesarey ḥamishiym wesarey ʿasarot weshoṭeriym leshiveṭeykhem׃

¹⁶ וָאֲצַוֶּה֙ אֶת־שֹׁ֣פְטֵיכֶ֔ם בָּעֵ֥ת הַהִ֖וא לֵאמֹ֑ר שָׁמֹ֤עַ בֵּין־אֲחֵיכֶם֙ וּשְׁפַטְתֶּ֣ם צֶ֔דֶק בֵּֽין־אִ֥ישׁ וּבֵין־אָחִ֖יו וּבֵ֥ין גֵּרֹֽו׃ waʾatsaueh ʾet־shofeṭeykhem baʿet hahiwʾ leʾmor shamoaʿ beyn־ʾaḥeykhem ushefaṭetem tsedeq beyn־ʾiysh uveyn־ʾaḥiyw uveyn gerow׃

¹⁷ לֹֽא־תַכִּ֨ירוּ פָנִ֜ים בַּמִּשְׁפָּ֗ט כַּקָּטֹ֤ן כַּגָּדֹל֙ תִּשְׁמָע֔וּן לֹ֤א תָג֙וּרוּ֙ מִפְּנֵי־אִ֔ישׁ כִּ֥י הַמִּשְׁפָּ֖ט לֵאלֹהִ֣ים ה֑וּא וְהַדָּבָר֙ אֲשֶׁ֣ר יִקְשֶׁ֣ה מִכֶּ֔ם תַּקְרִב֥וּן אֵלַ֖י וּשְׁמַעְתִּֽיו׃ loʾ־takiyru faniym bamishepaṭ kaqaṭon kagadol tishemaʿun loʾ taguru mipeney־ʾiysh kiy hamishepaṭ leʾlohiym huʾ wehadavar ʾasher yiqesheh mikem taqerivun ʾelay ushemaʿetiyw׃

¹⁸ וָאֲצַוֶּ֥ה אֶתְכֶ֖ם בָּעֵ֣ת הַהִ֑וא אֵ֥ת כָּל־הַדְּבָרִ֖ים אֲשֶׁ֥ר תַּעֲשֽׂוּן׃ waʾatsaueh ʾetekhem baʿet hahiwʾ ʾet kal־hadevariym ʾasher taʿasun׃

¹⁹ וַנִּסַּ֣ע מֵחֹרֵ֗ב וַנֵּ֡לֶךְ אֵ֣ת כָּל־הַמִּדְבָּ֣ר הַגָּדֹול֩ וְהַנֹּורָ֨א הַה֜וּא אֲשֶׁ֣ר רְאִיתֶ֗ם דֶּ֚רֶךְ הַ֣ר הָֽאֱמֹרִ֔י כַּאֲשֶׁ֥ר צִוָּ֛ה יְהוָ֥ה אֱלֹהֵ֖ינוּ אֹתָ֑נוּ וַנָּבֹ֕א עַ֖ד קָדֵ֥שׁ בַּרְנֵֽעַ׃ wanisaʿ meḥorev wanelekhe ʾet kal־hamidebar hagadowl wehanowraʾ hahuʾ ʾasher reʾiytem derekhe har haʾemoriy kaʾasher tsiuah yehwah ʾeloheynu ʾotanu wanavoʾ ʿad qadesh bareneaʿ׃

²⁰ וָאֹמַ֖ר אֲלֵכֶ֑ם בָּאתֶם֙ עַד־הַ֣ר הָאֱמֹרִ֔י אֲשֶׁר־יְהוָ֥ה אֱלֹהֵ֖ינוּ נֹתֵ֥ן לָֽנוּ׃ waʾomar ʾalekhem baʾtem ʿad־har haʾemoriy ʾasher־yehwah ʾeloheynu noten lanu׃

²¹ רְ֠אֵה נָתַ֨ן יְהוָ֧ה אֱלֹהֶ֛יךָ לְפָנֶ֖יךָ אֶת־הָאָ֑רֶץ עֲלֵ֣ה רֵ֗שׁ כַּאֲשֶׁר֩ דִּבֶּ֨ר יְהוָ֜ה אֱלֹהֵ֤י אֲבֹתֶ֙יךָ֙ לָ֔ךְ אַל־תִּירָ֖א וְאַל־תֵּחָֽת׃ reʾeh natan yehwah ʾeloheykha lefaneykha ʾet־haʾarets ʿaleh resh kaʾasher diber yehwah ʾelohey ʾavoteykha lakhe ʾal־tiyraʾ weʾal־teḥat׃

²² וַתִּקְרְב֣וּן אֵלַי֮ כֻּלְּכֶם֒ וַתֹּאמְר֗וּ נִשְׁלְחָ֤ה אֲנָשִׁים֙ לְפָנֵ֔ינוּ וְיַחְפְּרוּ־לָ֖נוּ אֶת־הָאָ֑רֶץ וְיָשִׁ֤בוּ אֹתָ֙נוּ֙ דָּבָ֔ר אֶת־הַדֶּ֙רֶךְ֙ אֲשֶׁ֣ר נַעֲלֶה־בָּ֔הּ וְאֵת֙ הֶֽעָרִ֔ים אֲשֶׁ֥ר נָבֹ֖א אֲלֵיהֶֽן׃ watiqerevun ʾelay kulekhem watoʾmeru nisheleḥah ʾanashiym lefaneynu weyaḥeperu־lanu ʾet־haʾarets weyashivu ʾotanu davar ʾet־haderekhe ʾasher naʿaleh־bah weʾet heʿariym ʾasher navoʾ ʾaleyhen׃

²³ וַיִּיטַ֥ב בְּעֵינַ֖י הַדָּבָ֑ר וָאֶקַּ֤ח מִכֶּם֙ שְׁנֵ֣ים עָשָׂ֣ר אֲנָשִׁ֔ים אִ֥ישׁ אֶחָ֖ד לַשָּֽׁבֶט׃ wayiyṭav beʿeynay hadavar waʾeqaḥ mikem sheneym ʿasar ʾanashiym ʾiysh ʾeḥad lashaveṭ׃

²⁴ וַיִּפְנוּ֙ וַיַּעֲל֣וּ הָהָ֔רָה וַיָּבֹ֖אוּ עַד־נַ֣חַל אֶשְׁכֹּ֑ל וַֽיְרַגְּל֖וּ אֹתָֽהּ׃ wayifenu wayaʿalu haharah wayavoʾu ʿad־naḥal ʾeshekol wayeragelu ʾotah׃

²⁵ וַיִּקְח֤וּ בְיָדָם֙ מִפְּרִ֣י הָאָ֔רֶץ וַיֹּורִ֖דוּ אֵלֵ֑ינוּ וַיָּשִׁ֨בוּ אֹתָ֤נוּ דָבָר֙ וַיֹּ֣אמְר֔וּ טֹובָ֣ה הָאָ֔רֶץ אֲשֶׁר־יְהוָ֥ה אֱלֹהֵ֖ינוּ נֹתֵ֥ן לָֽנוּ׃ wayiqeḥu veyadam miperiy haʾarets wayowridu ʾeleynu wayashivu ʾotanu davar wayoʾmeru ṭowvah haʾarets ʾasher־yehwah ʾeloheynu noten lanu׃

²⁶ וְלֹ֥א אֲבִיתֶ֖ם לַעֲלֹ֑ת וַתַּמְר֕וּ אֶת־פִּ֥י יְהוָ֖ה אֱלֹהֵיכֶֽם׃ weloʾ ʾaviytem laʿalot watameru ʾet־piy yehwah ʾeloheykhem׃

²⁷ וַתֵּרָגְנ֤וּ בְאָהֳלֵיכֶם֙ וַתֹּ֣אמְר֔וּ בְּשִׂנְאַ֤ת יְהוָה֙ אֹתָ֔נוּ הֹוצִיאָ֖נוּ מֵאֶ֣רֶץ מִצְרָ֑יִם לָתֵ֥ת אֹתָ֛נוּ בְּיַ֥ד הָאֱמֹרִ֖י לְהַשְׁמִידֵֽנוּ׃ wateragenu veʾaholeykhem watoʾmeru besineʾat yehwah ʾotanu howtsiyʾanu meʾerets mitserayim latet ʾotanu beyad haʾemoriy lehashemiydenu׃

²⁸ אָנָ֣ה ׀ אֲנַ֣חְנוּ עֹלִ֗ים אַחֵינוּ֩ הֵמַ֨סּוּ אֶת־לְבָבֵ֜נוּ לֵאמֹ֗ר עַ֣ם גָּדֹ֤ול וָרָם֙ מִמֶּ֔נּוּ עָרִ֛ים גְּדֹלֹ֥ת וּבְצוּרֹ֖ת בַּשָּׁמָ֑יִם וְגַם־בְּנֵ֥י עֲנָקִ֖ים רָאִ֥ינוּ שָֽׁם׃ ʾanah ׀ ʾanaḥenu ʿoliym ʾaḥeynu hemasu ʾet־levavenu leʾmor ʿam gadowl waram mimenu ʿariym gedolot uvetsurot bashamayim wegam־beney ʿanaqiym raʾiynu sham׃

²⁹ וָאֹמַ֖ר אֲלֵכֶ֑ם לֹא־תַֽעַרְצ֥וּן וְֽלֹא־תִֽירְא֖וּן מֵהֶֽם׃ waʾomar ʾalekhem loʾ־taʿaretsun weloʾ־tiyreʾun mehem׃

³⁰ יְהוָ֤ה אֱלֹֽהֵיכֶם֙ הַהֹלֵ֣ךְ לִפְנֵיכֶ֔ם ה֖וּא יִלָּחֵ֣ם לָכֶ֑ם כְּ֠כֹל אֲשֶׁ֨ר עָשָׂ֧ה אִתְּכֶ֛ם בְּמִצְרַ֖יִם לְעֵינֵיכֶֽם׃ yehwah ʾeloheykhem haholekhe lifeneykhem huʾ yilaḥem lakhem kekhol ʾasher ʿasah ʾitekhem bemitserayim leʿeyneykhem׃

³¹ וּבַמִּדְבָּר֙ אֲשֶׁ֣ר רָאִ֔יתָ אֲשֶׁ֤ר נְשָׂאֲךָ֙ יְהוָ֣ה אֱלֹהֶ֔יךָ כַּאֲשֶׁ֥ר יִשָּׂא־אִ֖ישׁ אֶת־בְּנֹ֑ו בְּכָל־הַדֶּ֙רֶךְ֙ אֲשֶׁ֣ר הֲלַכְתֶּ֔ם עַד־בֹּאֲכֶ֖ם עַד־הַמָּקֹ֥ום הַזֶּֽה׃ uvamidebar ʾasher raʾiyta ʾasher nesaʾakha yehwah ʾeloheykha kaʾasher yisaʾ־ʾiysh ʾet־benow bekhal־haderekhe ʾasher halakhetem ʿad־boʾakhem ʿad־hamaqowm hazeh׃

³² וּבַדָּבָ֖ר הַזֶּ֑ה אֵֽינְכֶם֙ מַאֲמִינִ֔ם בַּיהוָ֖ה אֱלֹהֵיכֶֽם׃ uvadavar hazeh ʾeynekhem maʾamiynim bayhwah ʾeloheykhem׃

³³ הַהֹלֵ֨ךְ לִפְנֵיכֶ֜ם בַּדֶּ֗רֶךְ לָת֥וּר לָכֶ֛ם מָקֹ֖ום לַֽחֲנֹֽתְכֶ֑ם בָּאֵ֣שׁ ׀ לַ֗יְלָה לַרְאֹֽתְכֶם֙ בַּדֶּ֙רֶךְ֙ אֲשֶׁ֣ר תֵּֽלְכוּ־בָ֔הּ וּבֶעָנָ֖ן יֹומָֽם׃ haholekhe lifeneykhem baderekhe latur lakhem maqowm laḥanotekhem baʾesh ׀ layelah lareʾotekhem baderekhe ʾasher telekhu־vah uveʿanan yowmam׃

³⁴ וַיִּשְׁמַ֥ע יְהוָ֖ה אֶת־קֹ֣ול דִּבְרֵיכֶ֑ם וַיִּקְצֹ֖ף וַיִּשָּׁבַ֥ע לֵאמֹֽר׃ wayishemaʿ yehwah ʾet־qowl divereykhem wayiqetsof wayishavaʿ leʾmor׃

³⁵ אִם־יִרְאֶ֥ה אִישׁ֙ בָּאֲנָשִׁ֣ים הָאֵ֔לֶּה הַדֹּ֥ור הָרָ֖ע הַזֶּ֑ה אֵ֚ת הָאָ֣רֶץ הַטֹּובָ֔ה אֲשֶׁ֣ר נִשְׁבַּ֔עְתִּי לָתֵ֖ת לַאֲבֹתֵיכֶֽם׃ ʾim־yireʾeh ʾiysh baʾanashiym haʾeleh hadowr haraʿ hazeh ʾet haʾarets haṭowvah ʾasher nishebaʿetiy latet laʾavoteykhem׃

³⁶ זֽוּלָתִ֞י כָּלֵ֤ב בֶּן־יְפֻנֶּה֙ ה֣וּא יִרְאֶ֔נָּה וְלֹֽו־אֶתֵּ֧ן אֶת־הָאָ֛רֶץ אֲשֶׁ֥ר דָּֽרַךְ־בָּ֖הּ וּלְבָנָ֑יו יַ֕עַן אֲשֶׁ֥ר מִלֵּ֖א אַחֲרֵ֥י יְהוָֽה׃ zulatiy kalev ben־yefuneh huʾ yireʾenah welow־ʾeten ʾet־haʾarets ʾasher darakhe־bah ulevanayw yaʿan ʾasher mileʾ ʾaḥarey yehwah׃

³⁷ גַּם־בִּי֙ הִתְאַנַּ֣ף יְהוָ֔ה בִּגְלַלְכֶ֖ם לֵאמֹ֑ר גַּם־אַתָּ֖ה לֹא־תָבֹ֥א שָֽׁם׃ gam־biy hiteʾanaf yehwah bigelalekhem leʾmor gam־ʾatah loʾ־tavoʾ sham׃

³⁸ יְהֹושֻׁ֤עַ בִּן־נוּן֙ הָעֹמֵ֣ד לְפָנֶ֔יךָ ה֖וּא יָ֣בֹא שָׁ֑מָּה אֹתֹ֣ו חַזֵּ֔ק כִּי־ה֖וּא יַנְחִלֶ֥נָּה אֶת־יִשְׂרָאֵֽל׃ yehowshuaʿ bin־nun haʿomed lefaneykha huʾ yavoʾ shamah ʾotow ḥazeq kiy־huʾ yaneḥilenah ʾet־yiseraʾel׃

³⁹ וְטַפְּכֶם֩ אֲשֶׁ֨ר אֲמַרְתֶּ֜ם לָבַ֣ז יִהְיֶ֗ה וּ֠בְנֵיכֶם אֲשֶׁ֨ר לֹא־יָדְע֤וּ הַיֹּום֙ טֹ֣וב וָרָ֔ע הֵ֖מָּה יָבֹ֣אוּ שָׁ֑מָּה וְלָהֶ֣ם אֶתְּנֶ֔נָּה וְהֵ֖ם יִירָשֽׁוּהָ׃ weṭapekhem ʾasher ʾamaretem lavaz yiheyeh uveneykhem ʾasher loʾ־yadeʿu hayowm ṭowv waraʿ hemah yavoʾu shamah welahem ʾetenenah wehem yiyrashuah׃

⁴⁰ וְאַתֶּ֖ם פְּנ֣וּ לָכֶ֑ם וּסְע֥וּ הַמִּדְבָּ֖רָה דֶּ֥רֶךְ יַם־סֽוּף׃ weʾatem penu lakhem useʿu hamidebarah derekhe yam־suf׃

⁴¹ וַֽתַּעֲנ֣וּ ׀ וַתֹּאמְר֣וּ אֵלַ֗י חָטָאנוּ֮ לַֽיהוָה֒ אֲנַ֤חְנוּ נַעֲלֶה֙ וְנִלְחַ֔מְנוּ כְּכֹ֥ל אֲשֶׁר־צִוָּ֖נוּ יְהוָ֣ה אֱלֹהֵ֑ינוּ וַֽתַּחְגְּר֗וּ אִ֚ישׁ אֶת־כְּלֵ֣י מִלְחַמְתֹּ֔ו וַתָּהִ֖ינוּ לַעֲלֹ֥ת הָהָֽרָה׃ wataʿanu ׀ watoʾmeru ʾelay ḥaṭaʾnu layhwah ʾanaḥenu naʿaleh wenileḥamenu kekhol ʾasher־tsiuanu yehwah ʾeloheynu wataḥegeru ʾiysh ʾet־keley mileḥametow watahiynu laʿalot haharah׃

⁴² וַיֹּ֨אמֶר יְהוָ֜ה אֵלַ֗י אֱמֹ֤ר לָהֶם֙ לֹ֤א תַֽעֲלוּ֙ וְלֹא־תִלָּ֣חֲמ֔וּ כִּ֥י אֵינֶ֖נִּי בְּקִרְבְּכֶ֑ם וְלֹא֙ תִּנָּֽגְפ֔וּ לִפְנֵ֖י אֹיְבֵיכֶֽם׃ wayoʾmer yehwah ʾelay ʾemor lahem loʾ taʿalu weloʾ־tilaḥamu kiy ʾeyneniy beqirebekhem weloʾ tinagefu lifeney ʾoyeveykhem׃

⁴³ וָאֲדַבֵּ֥ר אֲלֵיכֶ֖ם וְלֹ֣א שְׁמַעְתֶּ֑ם וַתַּמְרוּ֙ אֶת־פִּ֣י יְהוָ֔ה וַתָּזִ֖דוּ וַתַּעֲל֥וּ הָהָֽרָה׃ waʾadaber ʾaleykhem weloʾ shemaʿetem watameru ʾet־piy yehwah watazidu wataʿalu haharah׃

⁴⁴ וַיֵּצֵ֨א הָאֱמֹרִ֜י הַיֹּשֵׁ֨ב בָּהָ֤ר הַהוּא֙ לִקְרַאתְכֶ֔ם וַיִּרְדְּפ֣וּ אֶתְכֶ֔ם כַּאֲשֶׁ֥ר תַּעֲשֶׂ֖ינָה הַדְּבֹרִ֑ים וַֽיַּכְּת֥וּ אֶתְכֶ֛ם בְּשֵׂעִ֖יר עַד־חָרְמָֽה׃ wayetseʾ haʾemoriy hayoshev bahar hahuʾ liqeraʾtekhem wayiredefu ʾetekhem kaʾasher taʿaseynah hadevoriym wayaketu ʾetekhem beseʿiyr ʿad־ḥaremah׃

⁴⁵ וַתָּשֻׁ֥בוּ וַתִּבְכּ֖וּ לִפְנֵ֣י יְהוָ֑ה וְלֹֽא־שָׁמַ֤ע יְהוָה֙ בְּקֹ֣לְכֶ֔ם וְלֹ֥א הֶאֱזִ֖ין אֲלֵיכֶֽם׃ watashuvu wativeku lifeney yehwah weloʾ־shamaʿ yehwah beqolekhem weloʾ heʾeziyn ʾaleykhem׃

⁴⁶ וַתֵּשְׁב֥וּ בְקָדֵ֖שׁ יָמִ֣ים רַבִּ֑ים כַּיָּמִ֖ים אֲשֶׁ֥ר יְשַׁבְתֶּֽם׃ wateshevu veqadesh yamiym rabiym kayamiym ʾasher yeshavetem׃