1 הַדָּבָ֛ר אֲשֶׁר־הָיָ֥ה אֶֽל־יִרְמְיָ֖הוּ מֵאֵ֣ת יְהוָ֑ה בִּימֵ֨י יְהֹויָקִ֧ים בֶּן־יֹאשִׁיָּ֛הוּ מֶ֥לֶךְ יְהוּדָ֖ה לֵאמֹֽר׃ hadavar ʾasher־hayah ʾel־yiremeyahu meʾet yehwah biymey yehowyaqiym ben־yoʾshiyahu melekhe yehudah leʾmor׃
2 הָלֹוךְ֮ אֶל־בֵּ֣ית הָרֵכָבִים֒ וְדִבַּרְתָּ֣ אֹותָ֔ם וַהֲבִֽאֹותָם֙ בֵּ֣ית יְהוָ֔ה אֶל־אַחַ֖ת הַלְּשָׁכֹ֑ות וְהִשְׁקִיתָ֥ אֹותָ֖ם יָֽיִן׃ halowkhe ʾel־beyt harekhaviym wedibareta ʾowtam wahaviʾowtam beyt yehwah ʾel־ʾaḥat haleshakhowt wehisheqiyta ʾowtam yayin׃
3 וָאֶקַּ֞ח אֶת־יַאֲזַנְיָ֤ה בֶֽן־יִרְמְיָ֙הוּ֙ בֶּן־חֲבַצִּנְיָ֔ה וְאֶת־אֶחָ֖יו וְאֶת־כָּל־בָּנָ֑יו וְאֵ֖ת כָּל־בֵּ֥ית הָרֵכָבִֽים׃ waʾeqaḥ ʾet־yaʾazaneyah ven־yiremeyahu ben־ḥavatsineyah weʾet־ʾeḥayw weʾet־kal־banayw weʾet kal־beyt harekhaviym׃
4 וָאָבִ֤א אֹתָם֙ בֵּ֣ית יְהוָ֔ה אֶל־לִשְׁכַּ֗ת בְּנֵ֛י חָנָ֥ן בֶּן־יִגְדַּלְיָ֖הוּ אִ֣ישׁ הָאֱלֹהִ֑ים אֲשֶׁר־אֵ֙צֶל֙ לִשְׁכַּ֣ת הַשָּׂרִ֔ים אֲשֶׁ֣ר מִמַּ֗עַל לְלִשְׁכַּ֛ת מַעֲשֵׂיָ֥הוּ בֶן־שַׁלֻּ֖ם שֹׁמֵ֥ר הַסַּֽף׃ waʾaviʾ ʾotam beyt yehwah ʾel־lishekat beney ḥanan ben־yigedaleyahu ʾiysh haʾelohiym ʾasher־ʾetsel lishekat hasariym ʾasher mimaʿal lelishekat maʿaseyahu ven־shalum shomer hasaf׃
5 וָאֶתֵּ֞ן לִפְנֵ֣י ׀ בְּנֵ֣י בֵית־הָרֵכָבִ֗ים גְּבִעִ֛ים מְלֵאִ֥ים יַ֖יִן וְכֹסֹ֑ות וָאֹמַ֥ר אֲלֵיהֶ֖ם שְׁתוּ־יָֽיִן׃ waʾeten lifeney ׀ beney veyt־harekhaviym geviʿiym meleʾiym yayin wekhosowt waʾomar ʾaleyhem shetu־yayin׃
6 וַיֹּאמְר֖וּ לֹ֣א נִשְׁתֶּה־יָּ֑יִן כִּי֩ יֹונָדָ֨ב בֶּן־רֵכָ֜ב אָבִ֗ינוּ צִוָּ֤ה עָלֵ֙ינוּ֙ לֵאמֹ֔ר לֹ֧א תִשְׁתּוּ־יַ֛יִן אַתֶּ֥ם וּבְנֵיכֶ֖ם עַד־עֹולָֽם׃ wayoʾmeru loʾ nisheteh־yayin kiy yownadav ben־rekhav ʾaviynu tsiuah ʿaleynu leʾmor loʾ tishetu־yayin ʾatem uveneykhem ʿad־ʿowlam׃
7 וּבַ֣יִת לֹֽא־תִבְנ֗וּ וְזֶ֤רַע לֹֽא־תִזְרָ֙עוּ֙ וְכֶ֣רֶם לֹֽא־תִטָּ֔עוּ וְלֹ֥א יִֽהְיֶ֖ה לָכֶ֑ם כִּ֠י בָּאֳהָלִ֤ים תֵּֽשְׁבוּ֙ כָּל־יְמֵיכֶ֔ם לְמַ֨עַן תִּֽחְי֜וּ יָמִ֤ים רַבִּים֙ עַל־פְּנֵ֣י הָאֲדָמָ֔ה אֲשֶׁ֥ר אַתֶּ֖ם גָּרִ֥ים שָֽׁם׃ uvayit loʾ־tivenu wezeraʿ loʾ־tizeraʿu wekherem loʾ־tiṭaʿu weloʾ yiheyeh lakhem kiy baʾohaliym teshevu kal־yemeykhem lemaʿan tiḥeyu yamiym rabiym ʿal־peney haʾadamah ʾasher ʾatem gariym sham׃
8 וַנִּשְׁמַ֗ע בְּקֹ֨ול יְהֹונָדָ֤ב בֶּן־רֵכָב֙ אָבִ֔ינוּ לְכֹ֖ל אֲשֶׁ֣ר צִוָּ֑נוּ לְבִלְתִּ֤י שְׁתֹֽות־יַ֙יִן֙ כָּל־יָמֵ֔ינוּ אֲנַ֣חְנוּ נָשֵׁ֔ינוּ בָּנֵ֖ינוּ וּבְנֹתֵֽינוּ׃ wanishemaʿ beqowl yehownadav ben־rekhav ʾaviynu lekhol ʾasher tsiuanu leviletiy shetowt־yayin kal־yameynu ʾanaḥenu nasheynu baneynu uvenoteynu׃
9 וּלְבִלְתִּ֛י בְּנֹ֥ות בָּתִּ֖ים לְשִׁבְתֵּ֑נוּ וְכֶ֧רֶם וְשָׂדֶ֛ה וָזֶ֖רַע לֹ֥א יִֽהְיֶה־לָּֽנוּ׃ uleviletiy benowt batiym leshivetenu wekherem wesadeh wazeraʿ loʾ yiheyeh־lanu׃
10 וַנֵּ֖שֶׁב בָּֽאֳהָלִ֑ים וַנִּשְׁמַ֣ע וַנַּ֔עַשׂ כְּכֹ֥ל אֲשֶׁר־צִוָּ֖נוּ יֹונָדָ֥ב אָבִֽינוּ׃ waneshev baʾohaliym wanishemaʿ wanaʿas kekhol ʾasher־tsiuanu yownadav ʾaviynu׃
11 וַיְהִ֗י בַּעֲלֹ֨ות נְבוּכַדְרֶאצַּ֥ר מֶֽלֶךְ־בָּבֶל֮ אֶל־הָאָרֶץ֒ וַנֹּ֗אמֶר בֹּ֚אוּ וְנָבֹ֣וא יְרוּשָׁלִַ֔ם מִפְּנֵי֙ חֵ֣יל הַכַּשְׂדִּ֔ים וּמִפְּנֵ֖י חֵ֣יל אֲרָ֑ם וַנֵּ֖שֶׁב בִּירוּשָׁלִָֽם׃ פ wayehiy baʿalowt nevukhadereʾtsar melekhe־bavel ʾel־haʾarets wanoʾmer boʾu wenavowʾ yerushalim mipeney ḥeyl hakasediym umipeney ḥeyl ʾaram waneshev biyrushalim׃ f
12 וַֽיְהִי֙ דְּבַר־יְהוָ֔ה אֶֽל־יִרְמְיָ֖הוּ לֵאמֹֽר׃ wayehiy devar־yehwah ʾel־yiremeyahu leʾmor׃
13 כֹּֽה־אָמַ֞ר יְהוָ֤ה צְבָאֹות֙ אֱלֹהֵ֣י יִשְׂרָאֵ֔ל הָלֹ֤ךְ וְאָֽמַרְתָּ֙ לְאִ֣ישׁ יְהוּדָ֔ה וּלְיֹֽושְׁבֵ֖י יְרֽוּשָׁלִָ֑ם הֲלֹ֨וא תִקְח֥וּ מוּסָ֛ר לִשְׁמֹ֥עַ אֶל־דְּבָרַ֖י נְאֻם־יְהוָֽה׃ koh־ʾamar yehwah tsevaʾowt ʾelohey yiseraʾel halokhe weʾamareta leʾiysh yehudah uleyowshevey yerushalim halowʾ tiqeḥu musar lishemoaʿ ʾel־devaray neʾum־yehwah׃
14 הוּקַ֡ם אֶת־דִּבְרֵ֣י יְהֹונָדָ֣ב בֶּן־רֵ֠כָב אֲשֶׁר־צִוָּ֨ה אֶת־בָּנָ֜יו לְבִלְתִּ֣י שְׁתֹֽות־יַ֗יִן וְלֹ֤א שָׁתוּ֙ עַד־הַיֹּ֣ום הַזֶּ֔ה כִּ֣י שָֽׁמְע֔וּ אֵ֖ת מִצְוַ֣ת אֲבִיהֶ֑ם וְאָ֨נֹכִ֜י דִּבַּ֤רְתִּי אֲלֵיכֶם֙ הַשְׁכֵּ֣ם וְדַבֵּ֔ר וְלֹ֥א שְׁמַעְתֶּ֖ם אֵלָֽי׃ huqam ʾet־diverey yehownadav ben־rekhav ʾasher־tsiuah ʾet־banayw leviletiy shetowt־yayin weloʾ shatu ʿad־hayowm hazeh kiy shameʿu ʾet mitsewat ʾaviyhem weʾanokhiy dibaretiy ʾaleykhem hashekem wedaber weloʾ shemaʿetem ʾelay׃
15 וָאֶשְׁלַ֣ח אֲלֵיכֶ֣ם אֶת־כָּל־עֲבָדַ֣י הַנְּבִאִ֣ים ׀ הַשְׁכֵּ֣ים וְשָׁלֹ֣חַ ׀ לֵאמֹ֡ר שֻׁבוּ־נָ֡א אִישׁ֩ מִדַּרְכֹּ֨ו הָרָעָ֜ה וְהֵיטִ֣יבוּ מַֽעַלְלֵיכֶ֗ם וְאַל־תֵּ֨לְכ֜וּ אַחֲרֵ֨י אֱלֹהִ֤ים אֲחֵרִים֙ לְעָבְדָ֔ם וּשְׁבוּ֙ אֶל־הָ֣אֲדָמָ֔ה אֲשֶׁר־נָתַ֥תִּי לָכֶ֖ם וְלַאֲבֹֽתֵיכֶ֑ם וְלֹ֤א הִטִּיתֶם֙ אֶֽת־אָזְנְכֶ֔ם וְלֹ֥א שְׁמַעְתֶּ֖ם אֵלָֽי׃ waʾeshelaḥ ʾaleykhem ʾet־kal־ʿavaday haneviʾiym ׀ hashekeym weshaloaḥ ׀ leʾmor shuvu־naʾ ʾiysh midarekow haraʿah weheyṭiyvu maʿaleleykhem weʾal־telekhu ʾaḥarey ʾelohiym ʾaḥeriym leʿavedam ushevu ʾel־haʾadamah ʾasher־natatiy lakhem welaʾavoteykhem weloʾ hiṭiytem ʾet־ʾazenekhem weloʾ shemaʿetem ʾelay׃
16 כִּ֣י הֵקִ֗ימוּ בְּנֵי֙ יְהֹונָדָ֣ב בֶּן־רֵכָ֔ב אֶת־מִצְוַ֥ת אֲבִיהֶ֖ם אֲשֶׁ֣ר צִוָּ֑ם וְהָעָ֣ם הַזֶּ֔ה לֹ֥א שָׁמְע֖וּ אֵלָֽי׃ ס kiy heqiymu beney yehownadav ben־rekhav ʾet־mitsewat ʾaviyhem ʾasher tsiuam wehaʿam hazeh loʾ shameʿu ʾelay׃ s
17 לָ֠כֵן כֹּֽה־אָמַ֨ר יְהוָ֜ה אֱלֹהֵ֤י צְבָאֹות֙ אֱלֹהֵ֣י יִשְׂרָאֵ֔ל הִנְנִ֧י מֵבִ֣יא אֶל־יְהוּדָ֗ה וְאֶ֤ל כָּל־יֹֽושְׁבֵי֙ יְר֣וּשָׁלִַ֔ם אֵ֚ת כָּל־הָ֣רָעָ֔ה אֲשֶׁ֥ר דִּבַּ֖רְתִּי עֲלֵיהֶ֑ם יַ֣עַן דִּבַּ֤רְתִּי אֲלֵיהֶם֙ וְלֹ֣א שָׁמֵ֔עוּ וָאֶקְרָ֥א לָהֶ֖ם וְלֹ֥א עָנֽוּ׃ lakhen koh־ʾamar yehwah ʾelohey tsevaʾowt ʾelohey yiseraʾel hineniy meviyʾ ʾel־yehudah weʾel kal־yowshevey yerushalim ʾet kal־haraʿah ʾasher dibaretiy ʿaleyhem yaʿan dibaretiy ʾaleyhem weloʾ shameʿu waʾeqeraʾ lahem weloʾ ʿanu׃
18 וּלְבֵ֨ית הָרֵכָבִ֜ים אָמַ֣ר יִרְמְיָ֗הוּ כֹּֽה־אָמַ֞ר יְהוָ֤ה צְבָאֹות֙ אֱלֹהֵ֣י יִשְׂרָאֵ֔ל יַ֚עַן אֲשֶׁ֣ר שְׁמַעְתֶּ֔ם עַל־מִצְוַ֖ת יְהֹונָדָ֣ב אֲבִיכֶ֑ם וַֽתִּשְׁמְרוּ֙ אֶת־כָּל־מִצְוֹתָ֔יו וַֽתַּעֲשׂ֔וּ כְּכֹ֥ל אֲשֶׁר־צִוָּ֖ה אֶתְכֶֽם׃ ס uleveyt harekhaviym ʾamar yiremeyahu koh־ʾamar yehwah tsevaʾowt ʾelohey yiseraʾel yaʿan ʾasher shemaʿetem ʿal־mitsewat yehownadav ʾaviykhem watishemeru ʾet־kal־mitseotayw wataʿasu kekhol ʾasher־tsiuah ʾetekhem׃ s
19 לָכֵ֗ן כֹּ֥ה אָמַ֛ר יְהוָ֥ה צְבָאֹ֖ות אֱלֹהֵ֣י יִשְׂרָאֵ֑ל לֹֽא־יִכָּרֵ֨ת אִ֜ישׁ לְיֹונָדָ֧ב בֶּן־רֵכָ֛ב עֹמֵ֥ד לְפָנַ֖י כָּל־הַיָּמִֽים׃ פ lakhen koh ʾamar yehwah tsevaʾowt ʾelohey yiseraʾel loʾ־yikaret ʾiysh leyownadav ben־rekhav ʿomed lefanay kal־hayamiym׃ f