1 וַיֹּ֤אמֶר יְהוָה֙ אֶל־מֹשֶׁ֔ה אֱמֹ֥ר אֶל־הַכֹּהֲנִ֖ים בְּנֵ֣י אַהֲרֹ֑ן וְאָמַרְתָּ֣ אֲלֵהֶ֔ם לְנֶ֥פֶשׁ לֹֽא־יִטַּמָּ֖א בְּעַמָּֽיו׃ wayoʾmer yehwah ʾel־mosheh ʾemor ʾel־hakohaniym beney ʾaharon weʾamareta ʾalehem lenefesh loʾ־yiṭamaʾ beʿamayw׃
2 כִּ֚י אִם־לִשְׁאֵרֹ֔ו הַקָּרֹ֖ב אֵלָ֑יו לְאִמֹּ֣ו וּלְאָבִ֔יו וְלִבְנֹ֥ו וּלְבִתֹּ֖ו וּלְאָחִֽיו׃ kiy ʾim־lisheʾerow haqarov ʾelayw leʾimow uleʾaviyw welivenow ulevitow uleʾaḥiyw׃
3 וְלַאֲחֹתֹ֤ו הַבְּתוּלָה֙ הַקְּרֹובָ֣ה אֵלָ֔יו אֲשֶׁ֥ר לֹֽא־הָיְתָ֖ה לְאִ֑ישׁ לָ֖הּ יִטַּמָּֽא׃ welaʾaḥotow habetulah haqerowvah ʾelayw ʾasher loʾ־hayetah leʾiysh lah yiṭamaʾ׃
4 לֹ֥א יִטַּמָּ֖א בַּ֣עַל בְּעַמָּ֑יו לְהֵ֖חַלֹּֽו׃ loʾ yiṭamaʾ baʿal beʿamayw leheḥalow׃
5 לֹֽא־ [יִקְרְחָה כ] (יִקְרְח֤וּ ק) קָרְחָה֙ בְּרֹאשָׁ֔ם וּפְאַ֥ת זְקָנָ֖ם לֹ֣א יְגַלֵּ֑חוּ וּבִ֨בְשָׂרָ֔ם לֹ֥א יִשְׂרְט֖וּ שָׂרָֽטֶת׃ loʾ־ [yiqereḥah kh] (yiqereḥu q) qareḥah beroʾsham ufeʾat zeqanam loʾ yegaleḥu uvivesaram loʾ yisereṭu saraṭet׃
6 קְדֹשִׁ֤ים יִהְיוּ֙ לֵאלֹ֣הֵיהֶ֔ם וְלֹ֣א יְחַלְּל֔וּ שֵׁ֖ם אֱלֹהֵיהֶ֑ם כִּי֩ אֶת־אִשֵּׁ֨י יְהוָ֜ה לֶ֧חֶם אֱלֹהֵיהֶ֛ם הֵ֥ם מַקְרִיבִ֖ם וְהָ֥יוּ קֹֽדֶשׁ׃ qedoshiym yiheyu leʾloheyhem weloʾ yeḥalelu shem ʾeloheyhem kiy ʾet־ʾishey yehwah leḥem ʾeloheyhem hem maqeriyvim wehayu qodesh׃
7 אִשָּׁ֨ה זֹנָ֤ה וַחֲלָלָה֙ לֹ֣א יִקָּ֔חוּ וְאִשָּׁ֛ה גְּרוּשָׁ֥ה מֵאִישָׁ֖הּ לֹ֣א יִקָּ֑חוּ כִּֽי־קָדֹ֥שׁ ה֖וּא לֵאלֹהָֽיו׃ ʾishah zonah waḥalalah loʾ yiqaḥu weʾishah gerushah meʾiyshah loʾ yiqaḥu kiy־qadosh huʾ leʾlohayw׃
8 וְקִדַּשְׁתֹּ֔ו כִּֽי־אֶת־לֶ֥חֶם אֱלֹהֶ֖יךָ ה֣וּא מַקְרִ֑יב קָדֹשׁ֙ יִֽהְיֶה־לָּ֔ךְ כִּ֣י קָדֹ֔ושׁ אֲנִ֥י יְהוָ֖ה מְקַדִּשְׁכֶֽם׃ weqidashetow kiy־ʾet־leḥem ʾeloheykha huʾ maqeriyv qadosh yiheyeh־lakhe kiy qadowsh ʾaniy yehwah meqadishekhem׃
9 וּבַת֙ אִ֣ישׁ כֹּהֵ֔ן כִּ֥י תֵחֵ֖ל לִזְנֹ֑ות אֶת־אָבִ֙יהָ֙ הִ֣יא מְחַלֶּ֔לֶת בָּאֵ֖שׁ תִּשָּׂרֵֽף׃ ס uvat ʾiysh kohen kiy teḥel lizenowt ʾet־ʾaviyha hiyʾ meḥalelet baʾesh tisaref׃ s
10 וְהַכֹּהֵן֩ הַגָּדֹ֨ול מֵאֶחָ֜יו אֲֽשֶׁר־יוּצַ֥ק עַל־רֹאשֹׁ֣ו ׀ שֶׁ֤מֶן הַמִּשְׁחָה֙ וּמִלֵּ֣א אֶת־יָדֹ֔ו לִלְבֹּ֖שׁ אֶת־הַבְּגָדִ֑ים אֶת־רֹאשֹׁו֙ לֹ֣א יִפְרָ֔ע וּבְגָדָ֖יו לֹ֥א יִפְרֹֽם׃ wehakohen hagadowl meʾeḥayw אsher־yutsaq ʿal־roʾshow ׀ shemen hamisheḥah umileʾ ʾet־yadow lilebosh ʾet־habegadiym ʾet־roʾshow loʾ yiferaʿ uvegadayw loʾ yiferom׃
11 וְעַ֛ל כָּל־נַפְשֹׁ֥ת מֵ֖ת לֹ֣א יָבֹ֑א לְאָבִ֥יו וּלְאִמֹּ֖ו לֹ֥א יִטַּמָּֽא׃ weʿal kal־nafeshot met loʾ yavoʾ leʾaviyw uleʾimow loʾ yiṭamaʾ׃
12 וּמִן־הַמִּקְדָּשׁ֙ לֹ֣א יֵצֵ֔א וְלֹ֣א יְחַלֵּ֔ל אֵ֖ת מִקְדַּ֣שׁ אֱלֹהָ֑יו כִּ֡י נֵ֠זֶר שֶׁ֣מֶן מִשְׁחַ֧ת אֱלֹהָ֛יו עָלָ֖יו אֲנִ֥י יְהוָֽה׃ umin־hamiqedash loʾ yetseʾ weloʾ yeḥalel ʾet miqedash ʾelohayw kiy nezer shemen misheḥat ʾelohayw ʿalayw ʾaniy yehwah׃
13 וְה֕וּא אִשָּׁ֥ה בִבְתוּלֶ֖יהָ יִקָּֽח׃ wehuʾ ʾishah vivetuleyha yiqaḥ׃
14 אַלְמָנָ֤ה וּגְרוּשָׁה֙ וַחֲלָלָ֣ה זֹנָ֔ה אֶת־אֵ֖לֶּה לֹ֣א יִקָּ֑ח כִּ֛י אִם־בְּתוּלָ֥ה מֵעַמָּ֖יו יִקַּ֥ח אִשָּֽׁה׃ ʾalemanah ugerushah waḥalalah zonah ʾet־ʾeleh loʾ yiqaḥ kiy ʾim־betulah meʿamayw yiqaḥ ʾishah׃
15 וְלֹֽא־יְחַלֵּ֥ל זַרְעֹ֖ו בְּעַמָּ֑יו כִּ֛י אֲנִ֥י יְהוָ֖ה מְקַדְּשֹֽׁו׃ פ weloʾ־yeḥalel zareʿow beʿamayw kiy ʾaniy yehwah meqadeshow׃ f
16 וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ wayedaber yehwah ʾel־mosheh leʾmor׃
17 דַּבֵּ֥ר אֶֽל־אַהֲרֹ֖ן לֵאמֹ֑ר אִ֣ישׁ מִֽזַּרְעֲךָ֞ לְדֹרֹתָ֗ם אֲשֶׁ֨ר יִהְיֶ֥ה בֹו֙ מ֔וּם לֹ֣א יִקְרַ֔ב לְהַקְרִ֖יב לֶ֥חֶם אֱלֹהָֽיו׃ daber ʾel־ʾaharon leʾmor ʾiysh mizareʿakha ledorotam ʾasher yiheyeh vow mum loʾ yiqerav lehaqeriyv leḥem ʾelohayw׃
18 כִּ֥י כָל־אִ֛ישׁ אֲשֶׁר־בֹּ֥ו מ֖וּם לֹ֣א יִקְרָ֑ב אִ֤ישׁ עִוֵּר֙ אֹ֣ו פִסֵּ֔חַ אֹ֥ו חָרֻ֖ם אֹ֥ו שָׂרֽוּעַ׃ kiy khal־ʾiysh ʾasher־bow mum loʾ yiqerav ʾiysh ʿiuer ʾow fiseaḥ ʾow ḥarum ʾow saruaʿ׃
19 אֹ֣ו אִ֔ישׁ אֲשֶׁר־יִהְיֶ֥ה בֹ֖ו שֶׁ֣בֶר רָ֑גֶל אֹ֖ו שֶׁ֥בֶר יָֽד׃ ʾow ʾiysh ʾasher־yiheyeh vow shever ragel ʾow shever yad׃
20 אֹֽו־גִבֵּ֣ן אֹו־דַ֔ק אֹ֖ו תְּבַלֻּ֣ל בְּעֵינֹ֑ו אֹ֤ו גָרָב֙ אֹ֣ו יַלֶּ֔פֶת אֹ֖ו מְרֹ֥וחַ אָֽשֶׁךְ׃ ʾow־giben ʾow־daq ʾow tevalul beʿeynow ʾow garav ʾow yalefet ʾow merowḥa ʾashekhe׃
21 כָּל־אִ֞ישׁ אֲשֶׁר־בֹּ֣ו מ֗וּם מִזֶּ֙רַע֙ אַהֲרֹ֣ן הַכֹּהֵ֔ן לֹ֣א יִגַּ֔שׁ לְהַקְרִ֖יב אֶת־אִשֵּׁ֣י יְהוָ֑ה מ֣וּם בֹּ֔ו אֵ֚ת לֶ֣חֶם אֱלֹהָ֔יו לֹ֥א יִגַּ֖שׁ לְהַקְרִֽיב׃ kal־ʾiysh ʾasher־bow mum mizeraʿ ʾaharon hakohen loʾ yigash lehaqeriyv ʾet־ʾishey yehwah mum bow ʾet leḥem ʾelohayw loʾ yigash lehaqeriyv׃
22 לֶ֣חֶם אֱלֹהָ֔יו מִקָּדְשֵׁ֖י הַקֳּדָשִׁ֑ים וּמִן־הַקֳּדָשִׁ֖ים יֹאכֵֽל׃ leḥem ʾelohayw miqadeshey haqodashiym umin־haqodashiym yoʾkhel׃
23 אַ֣ךְ אֶל־הַפָּרֹ֜כֶת לֹ֣א יָבֹ֗א וְאֶל־הַמִּזְבֵּ֛חַ לֹ֥א יִגַּ֖שׁ כִּֽי־מ֣וּם בֹּ֑ו וְלֹ֤א יְחַלֵּל֙ אֶת־מִקְדָּשַׁ֔י כִּ֛י אֲנִ֥י יְהוָ֖ה מְקַדְּשָֽׁם׃ ʾakhe ʾel־haparokhet loʾ yavoʾ weʾel־hamizebeaḥ loʾ yigash kiy־mum bow weloʾ yeḥalel ʾet־miqedashay kiy ʾaniy yehwah meqadesham׃
24 וַיְדַבֵּ֣ר מֹשֶׁ֔ה אֶֽל־אַהֲרֹ֖ן וְאֶל־בָּנָ֑יו וְאֶֽל־כָּל־בְּנֵ֖י יִשְׂרָאֵֽל׃ פ wayedaber mosheh ʾel־ʾaharon weʾel־banayw weʾel־kal־beney yiseraʾel׃ f