2 Samuel 18

¹ וַיִּפְקֹ֣ד דָּוִ֔ד אֶת־הָעָ֖ם אֲשֶׁ֣ר אִתֹּ֑ו וַיָּ֣שֶׂם עֲלֵיהֶ֔ם שָׂרֵ֥י אֲלָפִ֖ים וְשָׂרֵ֥י מֵאֹֽות׃ wayifeqod dawid ʾet־haʿam ʾasher ʾitow wayasem ʿaleyhem sarey ʾalafiym wesarey meʾowt׃

² וַיְשַׁלַּ֨ח דָּוִ֜ד אֶת־הָעָ֗ם הַשְּׁלִשִׁ֤ית בְּיַד־יֹואָב֙ וְ֠הַשְּׁלִשִׁית בְּיַ֨ד אֲבִישַׁ֤י בֶּן־צְרוּיָה֙ אֲחִ֣י יֹואָ֔ב וְהַ֨שְּׁלִשִׁ֔ת בְּיַ֖ד אִתַּ֣י הַגִּתִּ֑י ס וַיֹּ֤אמֶר הַמֶּ֙לֶךְ֙ אֶל־הָעָ֔ם יָצֹ֥א אֵצֵ֛א גַּם־אֲנִ֖י עִמָּכֶֽם׃ wayeshalaḥ dawid ʾet־haʿam hashelishiyt beyad־yowʾav wehashelishiyt beyad ʾaviyshay ben־tseruyah ʾaḥiy yowʾav wehashelishit beyad ʾitay hagitiy s wayoʾmer hamelekhe ʾel־haʿam yatsoʾ ʾetseʾ gam־ʾaniy ʿimakhem׃

³ וַיֹּ֨אמֶר הָעָ֜ם לֹ֣א תֵצֵ֗א כִּי֩ אִם־נֹ֨ס נָנ֜וּס לֹא־יָשִׂ֧ימוּ אֵלֵ֣ינוּ לֵ֗ב וְאִם־יָמֻ֤תוּ חֶצְיֵ֙נוּ֙ לֹֽא־יָשִׂ֤ימוּ אֵלֵ֙ינוּ֙ לֵ֔ב כִּֽי־עַתָּ֥ה כָמֹ֖נוּ עֲשָׂרָ֣ה אֲלָפִ֑ים וְעַתָּ֣ה טֹ֔וב כִּי־תִֽהְיֶה־לָּ֥נוּ מֵעִ֖יר [לַעְזִיר כ] (לַעְזֹֽור׃ ק) ס wayoʾmer haʿam loʾ tetseʾ kiy ʾim־nos nanus loʾ־yasiymu ʾeleynu lev weʾim־yamutu ḥetseyenu loʾ־yasiymu ʾeleynu lev kiy־ʿatah khamonu ʿasarah ʾalafiym weʿatah ṭowv kiy־tiheyeh־lanu meʿiyr [laʿeziyr kh] (laʿezowr׃ q) s

⁴ וַיֹּ֤אמֶר אֲלֵיהֶם֙ הַמֶּ֔לֶךְ אֲשֶׁר־יִיטַ֥ב בְּעֵינֵיכֶ֖ם אֶעֱשֶׂ֑ה וַיַּעֲמֹ֤ד הַמֶּ֙לֶךְ֙ אֶל־יַ֣ד הַשַּׁ֔עַר וְכָל־הָעָם֙ יָֽצְא֔וּ לְמֵאֹ֖ות וְלַאֲלָפִֽים׃ wayoʾmer ʾaleyhem hamelekhe ʾasher־yiyṭav beʿeyneykhem ʾeʿeseh wayaʿamod hamelekhe ʾel־yad hashaʿar wekhal־haʿam yatseʾu lemeʾowt welaʾalafiym׃

⁵ וַיְצַ֣ו הַמֶּ֡לֶךְ אֶת־יֹ֠ואָב וְאֶת־אֲבִישַׁ֤י וְאֶת־אִתַּי֙ לֵאמֹ֔ר לְאַט־לִ֖י לַנַּ֣עַר לְאַבְשָׁלֹ֑ום וְכָל־הָעָ֣ם שָׁמְע֗וּ בְּצַוֹּ֥ת הַמֶּ֛לֶךְ אֶת־כָּל־הַשָּׂרִ֖ים עַל־דְּבַ֥ר אַבְשָׁלֹֽום׃ wayetsaw hamelekhe ʾet־yowʾav weʾet־ʾaviyshay weʾet־ʾitay leʾmor leʾaṭ־liy lanaʿar leʾaveshalowm wekhal־haʿam shameʿu betsaot hamelekhe ʾet־kal־hasariym ʿal־devar ʾaveshalowm׃

⁶ וַיֵּצֵ֥א הָעָ֛ם הַשָּׂדֶ֖ה לִקְרַ֣את יִשְׂרָאֵ֑ל וַתְּהִ֥י הַמִּלְחָמָ֖ה בְּיַ֥עַר אֶפְרָֽיִם׃ wayetseʾ haʿam hasadeh liqeraʾt yiseraʾel watehiy hamileḥamah beyaʿar ʾeferayim׃

⁷ וַיִּנָּ֤גְפוּ שָׁם֙ עַ֣ם יִשְׂרָאֵ֔ל לִפְנֵ֖י עַבְדֵ֣י דָוִ֑ד וַתְּהִי־שָׁ֞ם הַמַּגֵּפָ֧ה גְדֹולָ֛ה בַּיֹּ֥ום הַה֖וּא עֶשְׂרִ֥ים אָֽלֶף׃ wayinagefu sham ʿam yiseraʾel lifeney ʿavedey dawid watehiy־sham hamagefah gedowlah bayowm hahuʾ ʿeseriym ʾalef׃

⁸ וַתְּהִי־שָׁ֧ם הַמִּלְחָמָ֛ה [נָפֹצֵית כ] (נָפֹ֖צֶת ק) עַל־פְּנֵ֣י כָל־הָאָ֑רֶץ וַיֶּ֤רֶב הַיַּ֙עַר֙ לֶאֱכֹ֣ל בָּעָ֔ם מֵאֲשֶׁ֥ר אָכְלָ֛ה הַחֶ֖רֶב בַּיֹּ֥ום הַהֽוּא׃ watehiy־sham hamileḥamah [nafotseyt kh] (nafotset q) ʿal־peney khal־haʾarets wayerev hayaʿar leʾekhol baʿam meʾasher ʾakhelah haḥerev bayowm hahuʾ׃

⁹ וַיִּקָּרֵא֙ אַבְשָׁלֹ֔ום לִפְנֵ֖י עַבְדֵ֣י דָוִ֑ד וְאַבְשָׁלֹ֞ום רֹכֵ֣ב עַל־הַפֶּ֗רֶד וַיָּבֹ֣א הַפֶּ֡רֶד תַּ֣חַת שֹׂובֶךְ֩ הָאֵלָ֨ה הַגְּדֹולָ֜ה וַיֶּחֱזַ֧ק רֹאשֹׁ֣ו בָאֵלָ֗ה וַיֻּתַּן֙ בֵּ֤ין הַשָּׁמַ֙יִם֙ וּבֵ֣ין הָאָ֔רֶץ וְהַפֶּ֥רֶד אֲשֶׁר־תַּחְתָּ֖יו עָבָֽר׃ wayiqareʾ ʾaveshalowm lifeney ʿavedey dawid weʾaveshalowm rokhev ʿal־hapered wayavoʾ hapered taḥat sowvekhe haʾelah hagedowlah wayeḥezaq roʾshow vaʾelah wayutan beyn hashamayim uveyn haʾarets wehapered ʾasher־taḥetayw ʿavar׃

¹⁰ וַיַּרְא֙ אִ֣ישׁ אֶחָ֔ד וַיַּגֵּ֖ד לְיֹואָ֑ב וַיֹּ֗אמֶר הִנֵּה֙ רָאִ֣יתִי אֶת־אַבְשָׁלֹ֔ם תָּל֖וּי בָּאֵלָֽה׃ wayareʾ ʾiysh ʾeḥad wayaged leyowʾav wayoʾmer hineh raʾiytiy ʾet־ʾaveshalom taluy baʾelah׃

¹¹ וַיֹּ֣אמֶר יֹואָ֗ב לָאִישׁ֙ הַמַּגִּ֣יד לֹ֔ו וְהִנֵּ֣ה רָאִ֔יתָ וּמַדּ֛וּעַ לֹֽא־הִכִּיתֹ֥ו שָׁ֖ם אָ֑רְצָה וְעָלַ֗י לָ֤תֶת לְךָ֙ עֲשָׂ֣רָה כֶ֔סֶף וַחֲגֹרָ֖ה אֶחָֽת׃ wayoʾmer yowʾav laʾiysh hamagiyd low wehineh raʾiyta umaduaʿ loʾ־hikiytow sham ʾaretsah weʿalay latet lekha ʿasarah khesef waḥagorah ʾeḥat׃

¹² וַיֹּ֤אמֶר הָאִישׁ֙ אֶל־יֹואָ֔ב [וְלֹא כ] (וְל֨וּא ק) אָנֹכִ֜י שֹׁקֵ֤ל עַל־כַּפַּי֙ אֶ֣לֶף כֶּ֔סֶף לֹֽא־אֶשְׁלַ֥ח יָדִ֖י אֶל־בֶּן־הַמֶּ֑לֶךְ כִּ֣י בְאָזְנֵ֜ינוּ צִוָּ֣ה הַמֶּ֗לֶךְ אֹ֠תְךָ וְאֶת־אֲבִישַׁ֤י וְאֶת־אִתַּי֙ לֵאמֹ֔ר שִׁמְרוּ־מִ֕י בַּנַּ֖עַר בְּאַבְשָׁלֹֽום׃ wayoʾmer haʾiysh ʾel־yowʾav [weloʾ kh] (weluʾ q) ʾanokhiy shoqel ʿal־kapay ʾelef kesef loʾ־ʾeshelaḥ yadiy ʾel־ben־hamelekhe kiy veʾazeneynu tsiuah hamelekhe ʾotekha weʾet־ʾaviyshay weʾet־ʾitay leʾmor shimeru־miy banaʿar beʾaveshalowm׃

¹³ אֹֽו־עָשִׂ֤יתִי [בְנַפְשֹׁו כ] (בְנַפְשִׁי֙ ק) שֶׁ֔קֶר וְכָל־דָּבָ֖ר לֹא־יִכָּחֵ֣ד מִן־הַמֶּ֑לֶךְ וְאַתָּ֖ה תִּתְיַצֵּ֥ב מִנֶּֽגֶד׃ ʾow־ʿasiytiy [venafeshow kh] (venafeshiy q) sheqer wekhal־davar loʾ־yikaḥed min־hamelekhe weʾatah titeyatsev mineged׃

¹⁴ וַיֹּ֣אמֶר יֹואָ֔ב לֹא־כֵ֖ן אֹחִ֣ילָה לְפָנֶ֑יךָ וַיִּקַּח֩ שְׁלֹשָׁ֨ה שְׁבָטִ֜ים בְּכַפֹּ֗ו וַיִּתְקָעֵם֙ בְּלֵ֣ב אַבְשָׁלֹ֔ום עֹודֶ֥נּוּ חַ֖י בְּלֵ֥ב הָאֵלָֽה׃ wayoʾmer yowʾav loʾ־khen ʾoḥiylah lefaneykha wayiqaḥ sheloshah shevaṭiym bekhapow wayiteqaʿem belev ʾaveshalowm ʿowdenu ḥay belev haʾelah׃

¹⁵ וַיָּסֹ֙בּוּ֙ עֲשָׂרָ֣ה נְעָרִ֔ים נֹשְׂאֵ֖י כְּלֵ֣י יֹואָ֑ב וַיַּכּ֥וּ אֶת־אַבְשָׁלֹ֖ום וַיְמִיתֻֽהוּ׃ wayasobu ʿasarah neʿariym noseʾey keley yowʾav wayaku ʾet־ʾaveshalowm wayemiytuhu׃

¹⁶ וַיִּתְקַ֤ע יֹואָב֙ בַּשֹּׁפָ֔ר וַיָּ֣שָׁב הָעָ֔ם מִרְדֹ֖ף אַחֲרֵ֣י יִשְׂרָאֵ֑ל כִּֽי־חָשַׂ֥ךְ יֹואָ֖ב אֶת־הָעָֽם׃ wayiteqaʿ yowʾav bashofar wayashav haʿam miredof ʾaḥarey yiseraʾel kiy־ḥasakhe yowʾav ʾet־haʿam׃

¹⁷ וַיִּקְח֣וּ אֶת־אַבְשָׁלֹ֗ום וַיַּשְׁלִ֨יכוּ אֹתֹ֤ו בַיַּ֙עַר֙ אֶל־הַפַּ֣חַת הַגָּדֹ֔ול וַיַּצִּ֧בוּ עָלָ֛יו גַּל־אֲבָנִ֖ים גָּדֹ֣ול מְאֹ֑ד וְכָל־יִשְׂרָאֵ֔ל נָ֖סוּ אִ֥ישׁ [לְאֹהֵלֹו כ] (לְאֹהָלָֽיו׃ ק) ס wayiqeḥu ʾet־ʾaveshalowm wayasheliykhu ʾotow vayaʿar ʾel־hapaḥat hagadowl wayatsivu ʿalayw gal־ʾavaniym gadowl meʾod wekhal־yiseraʾel nasu ʾiysh [leʾohelow kh] (leʾohalayw׃ q) s

¹⁸ וְאַבְשָׁלֹ֣ם לָקַ֗ח וַיַּצֶּב־לֹ֤ו [בְחַיָו כ] (בְחַיָּיו֙ ק) אֶת־מַצֶּ֙בֶת֙ אֲשֶׁ֣ר בְּעֵֽמֶק־הַמֶּ֔לֶךְ כִּ֤י אָמַר֙ אֵֽין־לִ֣י בֵ֔ן בַּעֲב֖וּר הַזְכִּ֣יר שְׁמִ֑י וַיִּקְרָ֤א לַמַּצֶּ֙בֶת֙ עַל־שְׁמֹ֔ו וַיִּקָּ֤רֵא לָהּ֙ יַ֣ד אַבְשָׁלֹ֔ם עַ֖ד הַיֹּ֥ום הַזֶּֽה׃ ס weʾaveshalom laqaḥ wayatsev־low [veḥayaw kh] (veḥayayw q) ʾet־matsevet ʾasher beʿemeq־hamelekhe kiy ʾamar ʾeyn־liy ven baʿavur hazekiyr shemiy wayiqeraʾ lamatsevet ʿal־shemow wayiqareʾ lah yad ʾaveshalom ʿad hayowm hazeh׃ s

¹⁹ וַאֲחִימַ֤עַץ בֶּן־צָדֹוק֙ אָמַ֔ר אָר֣וּצָה נָּ֔א וַאֲבַשְּׂרָ֖ה אֶת־הַמֶּ֑לֶךְ כִּי־שְׁפָטֹ֥ו יְהוָ֖ה מִיַּ֥ד אֹיְבָֽיו׃ waʾaḥiymaʿats ben־tsadowq ʾamar ʾarutsah naʾ waʾavaserah ʾet־hamelekhe kiy־shefaṭow yehwah miyad ʾoyevayw׃

²⁰ וַיֹּ֧אמֶר לֹ֣ו יֹואָ֗ב לֹא֩ אִ֨ישׁ בְּשֹׂרָ֤ה אַתָּה֙ הַיֹּ֣ום הַזֶּ֔ה וּבִשַּׂרְתָּ֖ בְּיֹ֣ום אַחֵ֑ר וְהַיֹּ֤ום הַזֶּה֙ לֹ֣א תְבַשֵּׂ֔ר כִּֽי־ [עַל־ כ] (עַל־כֵּ֥ן ק) בֶּן־הַמֶּ֖לֶךְ מֵֽת׃ wayoʾmer low yowʾav loʾ ʾiysh besorah ʾatah hayowm hazeh uvisareta beyowm ʾaḥer wehayowm hazeh loʾ tevaser kiy־ [ʿal־ kh] (ʿal־ken q) ben־hamelekhe met׃

²¹ וַיֹּ֤אמֶר יֹואָב֙ לַכּוּשִׁ֔י לֵ֛ךְ הַגֵּ֥ד לַמֶּ֖לֶךְ אֲשֶׁ֣ר רָאִ֑יתָה וַיִּשְׁתַּ֧חוּ כוּשִׁ֛י לְיֹואָ֖ב וַיָּרֹֽץ׃ wayoʾmer yowʾav lakushiy lekhe haged lamelekhe ʾasher raʾiytah wayishetaḥu khushiy leyowʾav wayarots׃

²² וַיֹּ֨סֶף עֹ֜וד אֲחִימַ֤עַץ בֶּן־צָדֹוק֙ וַיֹּ֣אמֶר אֶל־יֹואָ֔ב וִ֣יהִי מָ֔ה אָרֻֽצָה־נָּ֥א גַם־אָ֖נִי אַחֲרֵ֣י הַכּוּשִׁ֑י וַיֹּ֣אמֶר יֹואָ֗ב לָֽמָּה־זֶּ֞ה אַתָּ֥ה רָץ֙ בְּנִ֔י וּלְכָ֖ה אֵין־בְּשֹׂורָ֥ה מֹצֵֽאת׃ wayosef ʿowd ʾaḥiymaʿats ben־tsadowq wayoʾmer ʾel־yowʾav wiyhiy mah ʾarutsah־naʾ gam־ʾaniy ʾaḥarey hakushiy wayoʾmer yowʾav lamah־zeh ʾatah rats beniy ulekhah ʾeyn־besowrah motseʾt׃

²³ וִיהִי־מָ֣ה אָר֔וּץ וַיֹּ֥אמֶר לֹ֖ו ר֑וּץ וַיָּ֤רָץ אֲחִימַ֙עַץ֙ דֶּ֣רֶךְ הַכִּכָּ֔ר וַֽיַּעֲבֹ֖ר אֶת־הַכּוּשִֽׁי׃ wiyhiy־mah ʾaruts wayoʾmer low ruts wayarats ʾaḥiymaʿats derekhe hakikar wayaʿavor ʾet־hakushiy׃

²⁴ וְדָוִ֥ד יֹושֵׁ֖ב בֵּין־שְׁנֵ֣י הַשְּׁעָרִ֑ים וַיֵּ֨לֶךְ הַצֹּפֶ֜ה אֶל־גַּ֤ג הַשַּׁ֙עַר֙ אֶל־הַ֣חֹומָ֔ה וַיִּשָּׂ֤א אֶת־עֵינָיו֙ וַיַּ֔רְא וְהִנֵּה־אִ֖ישׁ רָ֥ץ לְבַדֹּֽו׃ wedawid yowshev beyn־sheney hasheʿariym wayelekhe hatsofeh ʾel־gag hashaʿar ʾel־haḥowmah wayisaʾ ʾet־ʿeynayw wayareʾ wehineh־ʾiysh rats levadow׃

²⁵ וַיִּקְרָ֤א הַצֹּפֶה֙ וַיַּגֵּ֣ד לַמֶּ֔לֶךְ וַיֹּ֣אמֶר הַמֶּ֔לֶךְ אִם־לְבַדֹּ֖ו בְּשֹׂורָ֣ה בְּפִ֑יו וַיֵּ֥לֶךְ הָלֹ֖וךְ וְקָרֵֽב׃ wayiqeraʾ hatsofeh wayaged lamelekhe wayoʾmer hamelekhe ʾim־levadow besowrah befiyw wayelekhe halowkhe weqarev׃

²⁶ וַיַּ֣רְא הַצֹּפֶה֮ אִישׁ־אַחֵ֣ר רָץ֒ וַיִּקְרָ֤א הַצֹּפֶה֙ אֶל־הַשֹּׁעֵ֔ר וַיֹּ֕אמֶר הִנֵּה־אִ֖ישׁ רָ֣ץ לְבַדֹּ֑ו וַיֹּ֥אמֶר הַמֶּ֖לֶךְ גַּם־זֶ֥ה מְבַשֵּֽׂר׃ wayareʾ hatsofeh ʾiysh־ʾaḥer rats wayiqeraʾ hatsofeh ʾel־hashoʿer wayoʾmer hineh־ʾiysh rats levadow wayoʾmer hamelekhe gam־zeh mevaser׃

²⁷ וַיֹּ֙אמֶר֙ הַצֹּפֶ֔ה אֲנִ֤י רֹאֶה֙ אֶת־מְרוּצַ֣ת הָרִאשֹׁ֔ון כִּמְרֻצַ֖ת אֲחִימַ֣עַץ בֶּן־צָדֹ֑וק וַיֹּ֤אמֶר הַמֶּ֙לֶךְ֙ אִֽישׁ־טֹ֣וב זֶ֔ה וְאֶל־בְּשֹׂורָ֥ה טֹובָ֖ה יָבֹֽוא׃ wayoʾmer hatsofeh ʾaniy roʾeh ʾet־merutsat hariʾshown kimerutsat ʾaḥiymaʿats ben־tsadowq wayoʾmer hamelekhe ʾiysh־ṭowv zeh weʾel־besowrah ṭowvah yavowʾ׃

²⁸ וַיִּקְרָ֣א אֲחִימַ֗עַץ וַיֹּ֤אמֶר אֶל־הַמֶּ֙לֶךְ֙ שָׁלֹ֔ום וַיִּשְׁתַּ֧חוּ לַמֶּ֛לֶךְ לְאַפָּ֖יו אָ֑רְצָה ס וַיֹּ֗אמֶר בָּרוּךְ֙ יְהוָ֣ה אֱלֹהֶ֔יךָ אֲשֶׁ֤ר סִגַּר֙ אֶת־הָ֣אֲנָשִׁ֔ים אֲשֶׁר־נָשְׂא֥וּ אֶת־יָדָ֖ם בַּֽאדֹנִ֥י הַמֶּֽלֶךְ׃ wayiqeraʾ ʾaḥiymaʿats wayoʾmer ʾel־hamelekhe shalowm wayishetaḥu lamelekhe leʾapayw ʾaretsah s wayoʾmer barukhe yehwah ʾeloheykha ʾasher sigar ʾet־haʾanashiym ʾasher־naseʾu ʾet־yadam baʾdoniy hamelekhe׃

²⁹ וַיֹּ֣אמֶר הַמֶּ֔לֶךְ שָׁלֹ֥ום לַנַּ֖עַר לְאַבְשָׁלֹ֑ום וַיֹּ֣אמֶר אֲחִימַ֡עַץ רָאִיתִי֩ הֶהָמֹ֨ון הַגָּדֹ֜ול לִ֠שְׁלֹחַ אֶת־עֶ֨בֶד הַמֶּ֤לֶךְ יֹואָב֙ וְאֶת־עַבְדֶּ֔ךָ וְלֹ֥א יָדַ֖עְתִּי מָֽה׃ wayoʾmer hamelekhe shalowm lanaʿar leʾaveshalowm wayoʾmer ʾaḥiymaʿats raʾiytiy hehamown hagadowl lisheloaḥ ʾet־ʿeved hamelekhe yowʾav weʾet־ʿavedekha weloʾ yadaʿetiy mah׃

³⁰ וַיֹּ֣אמֶר הַמֶּ֔לֶךְ סֹ֖ב הִתְיַצֵּ֣ב כֹּ֑ה וַיִּסֹּ֖ב וַֽיַּעֲמֹֽד׃ wayoʾmer hamelekhe sov hiteyatsev koh wayisov wayaʿamod׃

³¹ וְהִנֵּ֥ה הַכּוּשִׁ֖י בָּ֑א וַיֹּ֣אמֶר הַכּוּשִׁ֗י יִתְבַּשֵּׂר֙ אֲדֹנִ֣י הַמֶּ֔לֶךְ כִּֽי־שְׁפָטְךָ֤ יְהוָה֙ הַיֹּ֔ום מִיַּ֖ד כָּל־הַקָּמִ֥ים עָלֶֽיךָ׃ ס wehineh hakushiy baʾ wayoʾmer hakushiy yitebaser ʾadoniy hamelekhe kiy־shefaṭekha yehwah hayowm miyad kal־haqamiym ʿaleykha׃ s

³² וַיֹּ֤אמֶר הַמֶּ֙לֶךְ֙ אֶל־הַכּוּשִׁ֔י הֲשָׁלֹ֥ום לַנַּ֖עַר לְאַבְשָׁלֹ֑ום וַיֹּ֣אמֶר הַכּוּשִׁ֗י יִהְי֤וּ כַנַּ֙עַר֙ אֹֽיְבֵי֙ אֲדֹנִ֣י הַמֶּ֔לֶךְ וְכֹ֛ל אֲשֶׁר־קָ֥מוּ עָלֶ֖יךָ לְרָעָֽה׃ ס wayoʾmer hamelekhe ʾel־hakushiy hashalowm lanaʿar leʾaveshalowm wayoʾmer hakushiy yiheyu khanaʿar ʾoyevey ʾadoniy hamelekhe wekhol ʾasher־qamu ʿaleykha leraʿah׃ s