Nombres 1

¹ וַיְדַבֵּ֨ר יְהוָ֧ה אֶל־מֹשֶׁ֛ה בְּמִדְבַּ֥ר סִינַ֖י בְּאֹ֣הֶל מֹועֵ֑ד בְּאֶחָד֩ לַחֹ֨דֶשׁ הַשֵּׁנִ֜י בַּשָּׁנָ֣ה הַשֵּׁנִ֗ית לְצֵאתָ֛ם מֵאֶ֥רֶץ מִצְרַ֖יִם לֵאמֹֽר׃ wayedaber yehwah ʾel־mosheh bemidebar siynay beʾohel mowʿed beʾeḥad laḥodesh hasheniy bashanah hasheniyt letseʾtam meʾerets mitserayim leʾmor׃

² שְׂא֗וּ אֶת־רֹאשׁ֙ כָּל־עֲדַ֣ת בְּנֵֽי־יִשְׂרָאֵ֔ל לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֔ות כָּל־זָכָ֖ר לְגֻלְגְּלֹתָֽם׃ seʾu ʾet־roʾsh kal־ʿadat beney־yiseraʾel lemishepeḥotam leveyt ʾavotam bemisepar shemowt kal־zakhar legulegelotam׃

³ מִבֶּ֨ן עֶשְׂרִ֤ים שָׁנָה֙ וָמַ֔עְלָה כָּל־יֹצֵ֥א צָבָ֖א בְּיִשְׂרָאֵ֑ל תִּפְקְד֥וּ אֹתָ֛ם לְצִבְאֹתָ֖ם אַתָּ֥ה וְאַהֲרֹֽן׃ miben ʿeseriym shanah wamaʿelah kal־yotseʾ tsavaʾ beyiseraʾel tifeqedu ʾotam letsiveʾotam ʾatah weʾaharon׃

⁴ וְאִתְּכֶ֣ם יִהְי֔וּ אִ֥ישׁ אִ֖ישׁ לַמַּטֶּ֑ה אִ֛ישׁ רֹ֥אשׁ לְבֵית־אֲבֹתָ֖יו הֽוּא׃ weʾitekhem yiheyu ʾiysh ʾiysh lamaṭeh ʾiysh roʾsh leveyt־ʾavotayw huʾ׃

⁵ וְאֵ֙לֶּה֙ שְׁמֹ֣ות הָֽאֲנָשִׁ֔ים אֲשֶׁ֥ר יַֽעַמְד֖וּ אִתְּכֶ֑ם לִרְאוּבֵ֕ן אֱלִיצ֖וּר בֶּן־שְׁדֵיאֽוּר׃ weʾeleh shemowt haʾanashiym ʾasher yaʿamedu ʾitekhem lireʾuven ʾeliytsur ben־shedeyʾur׃

⁶ לְשִׁמְעֹ֕ון שְׁלֻמִיאֵ֖ל בֶּן־צוּרִֽישַׁדָּֽי׃ leshimeʿown shelumiyʾel ben־tsuriyshaday׃

⁷ לִֽיהוּדָ֕ה נַחְשֹׁ֖ון בֶּן־עַמִּינָדָֽב׃ liyhudah naḥeshown ben־ʿamiynadav׃

⁸ לְיִ֨שָּׂשכָ֔ר נְתַנְאֵ֖ל בֶּן־צוּעָֽר׃ leyisashkhar netaneʾel ben־tsuʿar׃

⁹ לִזְבוּלֻ֕ן אֱלִיאָ֖ב בֶּן־חֵלֹֽן׃ lizevulun ʾeliyʾav ben־ḥelon׃

¹⁰ לִבְנֵ֣י יֹוסֵ֔ף לְאֶפְרַ֕יִם אֱלִישָׁמָ֖ע בֶּן־עַמִּיה֑וּד לִמְנַשֶּׁ֕ה גַּמְלִיאֵ֖ל בֶּן־פְּדָהצֽוּר׃ liveney yowsef leʾeferayim ʾeliyshamaʿ ben־ʿamiyhud limenasheh gameliyʾel ben־pedahtsur׃

¹¹ לְבִ֨נְיָמִ֔ן אֲבִידָ֖ן בֶּן־גִּדְעֹנִֽי׃ levineyamin ʾaviydan ben־gideʿoniy׃

¹² לְדָ֕ן אֲחִיעֶ֖זֶר בֶּן־עַמִּֽישַׁדָּֽי׃ ledan ʾaḥiyʿezer ben־ʿamiyshaday׃

¹³ לְאָשֵׁ֕ר פַּגְעִיאֵ֖ל בֶּן־עָכְרָֽן׃ leʾasher pageʿiyʾel ben־ʿakheran׃

¹⁴ לְגָ֕ד אֶלְיָסָ֖ף בֶּן־דְּעוּאֵֽל׃ legad ʾeleyasaf ben־deʿuʾel׃

¹⁵ לְנַ֨פְתָּלִ֔י אֲחִירַ֖ע בֶּן־עֵינָֽן׃ lenafetaliy ʾaḥiyraʿ ben־ʿeynan׃

¹⁶ אֵ֚לֶּה [קְרִיאֵי כ] (קְרוּאֵ֣י ק) הָעֵדָ֔ה נְשִׂיאֵ֖י מַטֹּ֣ות אֲבֹותָ֑ם רָאשֵׁ֛י אַלְפֵ֥י יִשְׂרָאֵ֖ל הֵֽם׃ ʾeleh [qeriyʾey kh] (qeruʾey q) haʿedah nesiyʾey maṭowt ʾavowtam raʾshey ʾalefey yiseraʾel hem׃

¹⁷ וַיִּקַּ֥ח מֹשֶׁ֖ה וְאַהֲרֹ֑ן אֵ֚ת הָאֲנָשִׁ֣ים הָאֵ֔לֶּה אֲשֶׁ֥ר נִקְּב֖וּ בְּשֵׁמֹֽות׃ wayiqaḥ mosheh weʾaharon ʾet haʾanashiym haʾeleh ʾasher niqevu beshemowt׃

¹⁸ וְאֵ֨ת כָּל־הָעֵדָ֜ה הִקְהִ֗ילוּ בְּאֶחָד֙ לַחֹ֣דֶשׁ הַשֵּׁנִ֔י וַיִּתְיַֽלְד֥וּ עַל־מִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ות מִבֶּ֨ן עֶשְׂרִ֥ים שָׁנָ֛ה וָמַ֖עְלָה לְגֻלְגְּלֹתָֽם׃ weʾet kal־haʿedah hiqehiylu beʾeḥad laḥodesh hasheniy wayiteyaledu ʿal־mishepeḥotam leveyt ʾavotam bemisepar shemowt miben ʿeseriym shanah wamaʿelah legulegelotam׃

¹⁹ כַּאֲשֶׁ֛ר צִוָּ֥ה יְהוָ֖ה אֶת־מֹשֶׁ֑ה וַֽיִּפְקְדֵ֖ם בְּמִדְבַּ֥ר סִינָֽי׃ פ kaʾasher tsiuah yehwah ʾet־mosheh wayifeqedem bemidebar siynay׃ f

²⁰ וַיִּהְי֤וּ בְנֵֽי־רְאוּבֵן֙ בְּכֹ֣ר יִשְׂרָאֵ֔ל תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֤ר שֵׁמֹות֙ לְגֻלְגְּלֹתָ֔ם כָּל־זָכָ֗ר מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ wayiheyu veney־reʾuven bekhor yiseraʾel towledotam lemishepeḥotam leveyt ʾavotam bemisepar shemowt legulegelotam kal־zakhar miben ʿeseriym shanah wamaʿelah kol yotseʾ tsavaʾ׃

²¹ פְּקֻדֵיהֶ֖ם לְמַטֵּ֣ה רְאוּבֵ֑ן שִׁשָּׁ֧ה וְאַרְבָּעִ֛ים אֶ֖לֶף וַחֲמֵ֥שׁ מֵאֹֽות׃ פ pequdeyhem lemaṭeh reʾuven shishah weʾarebaʿiym ʾelef waḥamesh meʾowt׃ f

²² לִבְנֵ֣י שִׁמְעֹ֔ון תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם פְּקֻדָ֗יו בְּמִסְפַּ֤ר שֵׁמֹות֙ לְגֻלְגְּלֹתָ֔ם כָּל־זָכָ֗ר מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney shimeʿown towledotam lemishepeḥotam leveyt ʾavotam pequdayw bemisepar shemowt legulegelotam kal־zakhar miben ʿeseriym shanah wamaʿelah kol yotseʾ tsavaʾ׃

²³ פְּקֻדֵיהֶ֖ם לְמַטֵּ֣ה שִׁמְעֹ֑ון תִּשְׁעָ֧ה וַחֲמִשִּׁ֛ים אֶ֖לֶף וּשְׁלֹ֥שׁ מֵאֹֽות׃ פ pequdeyhem lemaṭeh shimeʿown tisheʿah waḥamishiym ʾelef ushelosh meʾowt׃ f

²⁴ לִבְנֵ֣י גָ֔ד תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ות מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney gad towledotam lemishepeḥotam leveyt ʾavotam bemisepar shemowt miben ʿeseriym shanah wamaʿelah kol yotseʾ tsavaʾ׃

²⁵ פְּקֻדֵיהֶ֖ם לְמַטֵּ֣ה גָ֑ד חֲמִשָּׁ֤ה וְאַרְבָּעִים֙ אֶ֔לֶף וְשֵׁ֥שׁ מֵאֹ֖ות וַחֲמִשִּֽׁים׃ פ pequdeyhem lemaṭeh gad ḥamishah weʾarebaʿiym ʾelef weshesh meʾowt waḥamishiym׃ f

²⁶ לִבְנֵ֣י יְהוּדָ֔ה תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney yehudah towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

²⁷ פְּקֻדֵיהֶ֖ם לְמַטֵּ֣ה יְהוּדָ֑ה אַרְבָּעָ֧ה וְשִׁבְעִ֛ים אֶ֖לֶף וְשֵׁ֥שׁ מֵאֹֽות׃ פ pequdeyhem lemaṭeh yehudah ʾarebaʿah weshiveʿiym ʾelef weshesh meʾowt׃ f

²⁸ לִבְנֵ֣י יִשָּׂשכָ֔ר תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney yisashkhar towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

²⁹ פְּקֻדֵיהֶ֖ם לְמַטֵּ֣ה יִשָּׂשכָ֑ר אַרְבָּעָ֧ה וַחֲמִשִּׁ֛ים אֶ֖לֶף וְאַרְבַּ֥ע מֵאֹֽות׃ פ pequdeyhem lemaṭeh yisashkhar ʾarebaʿah waḥamishiym ʾelef weʾarebaʿ meʾowt׃ f

³⁰ לִבְנֵ֣י זְבוּלֻ֔ן תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney zevulun towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

³¹ פְּקֻדֵיהֶ֖ם לְמַטֵּ֣ה זְבוּלֻ֑ן שִׁבְעָ֧ה וַחֲמִשִּׁ֛ים אֶ֖לֶף וְאַרְבַּ֥ע מֵאֹֽות׃ פ pequdeyhem lemaṭeh zevulun shiveʿah waḥamishiym ʾelef weʾarebaʿ meʾowt׃ f

³² לִבְנֵ֤י יֹוסֵף֙ לִבְנֵ֣י אֶפְרַ֔יִם תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney yowsef liveney ʾeferayim towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

³³ פְּקֻדֵיהֶ֖ם לְמַטֵּ֣ה אֶפְרָ֑יִם אַרְבָּעִ֥ים אֶ֖לֶף וַחֲמֵ֥שׁ מֵאֹֽות׃ פ pequdeyhem lemaṭeh ʾeferayim ʾarebaʿiym ʾelef waḥamesh meʾowt׃ f

³⁴ לִבְנֵ֣י מְנַשֶּׁ֔ה תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ות מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney menasheh towledotam lemishepeḥotam leveyt ʾavotam bemisepar shemowt miben ʿeseriym shanah wamaʿelah kol yotseʾ tsavaʾ׃

³⁵ פְּקֻדֵיהֶ֖ם לְמַטֵּ֣ה מְנַשֶּׁ֑ה שְׁנַ֧יִם וּשְׁלֹשִׁ֛ים אֶ֖לֶף וּמָאתָֽיִם׃ פ pequdeyhem lemaṭeh menasheh shenayim usheloshiym ʾelef umaʾtayim׃ f

³⁶ לִבְנֵ֣י בִנְיָמִ֔ן תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney vineyamin towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

³⁷ פְּקֻדֵיהֶ֖ם לְמַטֵּ֣ה בִנְיָמִ֑ן חֲמִשָּׁ֧ה וּשְׁלֹשִׁ֛ים אֶ֖לֶף וְאַרְבַּ֥ע מֵאֹֽות׃ פ pequdeyhem lemaṭeh vineyamin ḥamishah usheloshiym ʾelef weʾarebaʿ meʾowt׃ f

³⁸ לִבְנֵ֣י דָ֔ן תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney dan towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

³⁹ פְּקֻדֵיהֶ֖ם לְמַטֵּ֣ה דָ֑ן שְׁנַ֧יִם וְשִׁשִּׁ֛ים אֶ֖לֶף וּשְׁבַ֥ע מֵאֹֽות׃ פ pequdeyhem lemaṭeh dan shenayim weshishiym ʾelef ushevaʿ meʾowt׃ f

⁴⁰ לִבְנֵ֣י אָשֵׁ֔ר תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ liveney ʾasher towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

⁴¹ פְּקֻדֵיהֶ֖ם לְמַטֵּ֣ה אָשֵׁ֑ר אֶחָ֧ד וְאַרְבָּעִ֛ים אֶ֖לֶף וַחֲמֵ֥שׁ מֵאֹֽות׃ פ pequdeyhem lemaṭeh ʾasher ʾeḥad weʾarebaʿiym ʾelef waḥamesh meʾowt׃ f

⁴² בְּנֵ֣י נַפְתָּלִ֔י תֹּולְדֹתָ֥ם לְמִשְׁפְּחֹתָ֖ם לְבֵ֣ית אֲבֹתָ֑ם בְּמִסְפַּ֣ר שֵׁמֹ֗ת מִבֶּ֨ן עֶשְׂרִ֤ים שָׁנָה֙ וָמַ֔עְלָה כֹּ֖ל יֹצֵ֥א צָבָֽא׃ beney nafetaliy towledotam lemishepeḥotam leveyt ʾavotam bemisepar shemot miben ʿeseriym shanah wamaʿelah kol yotseʾ tsavaʾ׃

⁴³ פְּקֻדֵיהֶ֖ם לְמַטֵּ֣ה נַפְתָּלִ֑י שְׁלֹשָׁ֧ה וַחֲמִשִּׁ֛ים אֶ֖לֶף וְאַרְבַּ֥ע מֵאֹֽות׃ פ pequdeyhem lemaṭeh nafetaliy sheloshah waḥamishiym ʾelef weʾarebaʿ meʾowt׃ f

⁴⁴ אֵ֣לֶּה הַפְּקֻדִ֡ים אֲשֶׁר֩ פָּקַ֨ד מֹשֶׁ֤ה וְאַהֲרֹן֙ וּנְשִׂיאֵ֣י יִשְׂרָאֵ֔ל שְׁנֵ֥ים עָשָׂ֖ר אִ֑ישׁ אִישׁ־אֶחָ֥ד לְבֵית־אֲבֹתָ֖יו הָיֽוּ׃ ʾeleh hapequdiym ʾasher paqad mosheh weʾaharon unesiyʾey yiseraʾel sheneym ʿasar ʾiysh ʾiysh־ʾeḥad leveyt־ʾavotayw hayu׃

⁴⁵ וַיִּֽהְי֛וּ כָּל־פְּקוּדֵ֥י בְנֵֽי־יִשְׂרָאֵ֖ל לְבֵ֣ית אֲבֹתָ֑ם מִבֶּ֨ן עֶשְׂרִ֤ים שָׁנָה֙ וָמַ֔עְלָה כָּל־יֹצֵ֥א צָבָ֖א בְּיִשְׂרָאֵֽל׃ wayiheyu kal־pequdey veney־yiseraʾel leveyt ʾavotam miben ʿeseriym shanah wamaʿelah kal־yotseʾ tsavaʾ beyiseraʾel׃

⁴⁶ וַיִּֽהְיוּ֙ כָּל־הַפְּקֻדִ֔ים שֵׁשׁ־מֵאֹ֥ות אֶ֖לֶף וּשְׁלֹ֣שֶׁת אֲלָפִ֑ים וַחֲמֵ֥שׁ מֵאֹ֖ות וַחֲמִשִּֽׁים׃ wayiheyu kal־hapequdiym shesh־meʾowt ʾelef usheloshet ʾalafiym waḥamesh meʾowt waḥamishiym׃

⁴⁷ וְהַלְוִיִּ֖ם לְמַטֵּ֣ה אֲבֹתָ֑ם לֹ֥א הָתְפָּקְד֖וּ בְּתֹוכָֽם׃ פ wehalewiyim lemaṭeh ʾavotam loʾ hatepaqedu betowkham׃ f

⁴⁸ וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃ wayedaber yehwah ʾel־mosheh leʾmor׃

⁴⁹ אַ֣ךְ אֶת־מַטֵּ֤ה לֵוִי֙ לֹ֣א תִפְקֹ֔ד וְאֶת־רֹאשָׁ֖ם לֹ֣א תִשָּׂ֑א בְּתֹ֖וךְ בְּנֵ֥י יִשְׂרָאֵֽל׃ ʾakhe ʾet־maṭeh lewiy loʾ tifeqod weʾet־roʾsham loʾ tisaʾ betowkhe beney yiseraʾel׃

⁵⁰ וְאַתָּ֡ה הַפְקֵ֣ד אֶת־הַלְוִיִּם֩ עַל־מִשְׁכַּ֨ן הָעֵדֻ֜ת וְעַ֣ל כָּל־כֵּלָיו֮ וְעַ֣ל כָּל־אֲשֶׁר־לֹו֒ הֵ֜מָּה יִשְׂא֤וּ אֶת־הַמִּשְׁכָּן֙ וְאֶת־כָּל־כֵּלָ֔יו וְהֵ֖ם יְשָׁרְתֻ֑הוּ וְסָבִ֥יב לַמִּשְׁכָּ֖ן יַחֲנֽוּ׃ weʾatah hafeqed ʾet־halewiyim ʿal־mishekan haʿedut weʿal kal־kelayw weʿal kal־ʾasher־low hemah yiseʾu ʾet־hamishekan weʾet־kal־kelayw wehem yesharetuhu wesaviyv lamishekan yaḥanu׃

⁵¹ וּבִנְסֹ֣עַ הַמִּשְׁכָּ֗ן יֹורִ֤ידוּ אֹתֹו֙ הַלְוִיִּ֔ם וּבַחֲנֹת֙ הַמִּשְׁכָּ֔ן יָקִ֥ימוּ אֹתֹ֖ו הַלְוִיִּ֑ם וְהַזָּ֥ר הַקָּרֵ֖ב יוּמָֽת׃ uvinesoaʿ hamishekan yowriydu ʾotow halewiyim uvaḥanot hamishekan yaqiymu ʾotow halewiyim wehazar haqarev yumat׃

⁵² וְחָנ֖וּ בְּנֵ֣י יִשְׂרָאֵ֑ל אִ֧ישׁ עַֽל־מַחֲנֵ֛הוּ וְאִ֥ישׁ עַל־דִּגְלֹ֖ו לְצִבְאֹתָֽם׃ weḥanu beney yiseraʾel ʾiysh ʿal־maḥanehu weʾiysh ʿal־digelow letsiveʾotam׃

⁵³ וְהַלְוִיִּ֞ם יַחֲנ֤וּ סָבִיב֙ לְמִשְׁכַּ֣ן הָעֵדֻ֔ת וְלֹֽא־יִהְיֶ֣ה קֶ֔צֶף עַל־עֲדַ֖ת בְּנֵ֣י יִשְׂרָאֵ֑ל וְשָׁמְרוּ֙ הַלְוִיִּ֔ם אֶת־מִשְׁמֶ֖רֶת מִשְׁכַּ֥ן הָעֵדֽוּת׃ wehalewiyim yaḥanu saviyv lemishekan haʿedut weloʾ־yiheyeh qetsef ʿal־ʿadat beney yiseraʾel weshameru halewiyim ʾet־mishemeret mishekan haʿedut׃

⁵⁴ וַֽיַּעֲשׂ֖וּ בְּנֵ֣י יִשְׂרָאֵ֑ל כְּ֠כֹל אֲשֶׁ֨ר צִוָּ֧ה יְהוָ֛ה אֶת־מֹשֶׁ֖ה כֵּ֥ן עָשֽׂוּ׃ פ wayaʿasu beney yiseraʾel kekhol ʾasher tsiuah yehwah ʾet־mosheh ken ʿasu׃ f