1 וַֽיִּגְּשׁוּ֙ כָּל־שָׂרֵ֣י הַחֲיָלִ֔ים וְיֹֽוחָנָן֙ בֶּן־קָרֵ֔חַ וִֽיזַנְיָ֖ה בֶּן־הֹושַֽׁעְיָ֑ה וְכָל־הָעָ֖ם מִקָּטֹ֥ן וְעַד־גָּדֹֽול׃ wayigeshu kal־sarey haḥayaliym weyowḥanan ben־qareaḥ wiyzaneyah ben־howshaʿeyah wekhal־haʿam miqaṭon weʿad־gadowl׃
2 וַיֹּאמְר֞וּ אֶֽל־יִרְמְיָ֣הוּ הַנָּבִ֗יא תִּפָּל־נָ֤א תְחִנָּתֵ֙נוּ֙ לְפָנֶ֔יךָ וְהִתְפַּלֵּ֤ל בַּעֲדֵ֙נוּ֙ אֶל־יְהוָ֣ה אֱלֹהֶ֔יךָ בְּעַ֖ד כָּל־הַשְּׁאֵרִ֣ית הַזֹּ֑את כִּֽי־נִשְׁאַ֤רְנוּ מְעַט֙ מֵֽהַרְבֵּ֔ה כַּאֲשֶׁ֥ר עֵינֶ֖יךָ רֹאֹ֥ות אֹתָֽנוּ׃ wayoʾmeru ʾel־yiremeyahu hanaviyʾ tipal־naʾ teḥinatenu lefaneykha wehitepalel baʿadenu ʾel־yehwah ʾeloheykha beʿad kal־hasheʾeriyt hazoʾt kiy־nisheʾarenu meʿaṭ meharebeh kaʾasher ʿeyneykha roʾowt ʾotanu׃
3 וְיַגֶּד־לָ֙נוּ֙ יְהוָ֣ה אֱלֹהֶ֔יךָ אֶת־הַדֶּ֖רֶךְ אֲשֶׁ֣ר נֵֽלֶךְ־בָּ֑הּ וְאֶת־הַדָּבָ֖ר אֲשֶׁ֥ר נַעֲשֶֽׂה׃ weyaged־lanu yehwah ʾeloheykha ʾet־haderekhe ʾasher nelekhe־bah weʾet־hadavar ʾasher naʿaseh׃
4 וַיֹּ֨אמֶר אֲלֵיהֶ֜ם יִרְמְיָ֤הוּ הַנָּבִיא֙ שָׁמַ֔עְתִּי הִנְנִ֧י מִתְפַּלֵּ֛ל אֶל־יְהוָ֥ה אֱלֹהֵיכֶ֖ם כְּדִבְרֵיכֶ֑ם וְֽהָיָ֡ה כָּֽל־הַדָּבָר֩ אֲשֶׁר־יַעֲנֶ֨ה יְהוָ֤ה אֶתְכֶם֙ אַגִּ֣יד לָכֶ֔ם לֹֽא־אֶמְנַ֥ע מִכֶּ֖ם דָּבָֽר׃ wayoʾmer ʾaleyhem yiremeyahu hanaviyʾ shamaʿetiy hineniy mitepalel ʾel־yehwah ʾeloheykhem kedivereykhem wehayah kal־hadavar ʾasher־yaʿaneh yehwah ʾetekhem ʾagiyd lakhem loʾ־ʾemenaʿ mikem davar׃
5 וְהֵ֙מָּה֙ אָמְר֣וּ אֶֽל־יִרְמְיָ֔הוּ יְהִ֤י יְהוָה֙ בָּ֔נוּ לְעֵ֖ד אֱמֶ֣ת וְנֶאֱמָ֑ן אִם־לֹ֡א כְּֽכָל־הַ֠דָּבָר אֲשֶׁ֨ר יִֽשְׁלָחֲךָ֜ יְהוָ֧ה אֱלֹהֶ֛יךָ אֵלֵ֖ינוּ כֵּ֥ן נַעֲשֶֽׂה׃ wehemah ʾameru ʾel־yiremeyahu yehiy yehwah banu leʿed ʾemet weneʾeman ʾim־loʾ kekhal־hadavar ʾasher yishelaḥakha yehwah ʾeloheykha ʾeleynu ken naʿaseh׃
6 אִם־טֹ֣וב וְאִם־רָ֔ע בְּקֹ֣ול ׀ יְהוָ֣ה אֱלֹהֵ֗ינוּ אֲשֶׁ֨ר [אֲנוּ כ] (אֲנַ֜חְנוּ ק) שֹׁלְחִ֥ים אֹתְךָ֛ אֵלָ֖יו נִשְׁמָ֑ע לְמַ֙עַן֙ אֲשֶׁ֣ר יִֽיטַב־לָ֔נוּ כִּ֣י נִשְׁמַ֔ע בְּקֹ֖ול יְהוָ֥ה אֱלֹהֵֽינוּ׃ ס ʾim־ṭowv weʾim־raʿ beqowl ׀ yehwah ʾeloheynu ʾasher [ʾanu kh] (ʾanaḥenu q) sholeḥiym ʾotekha ʾelayw nishemaʿ lemaʿan ʾasher yiyṭav־lanu kiy nishemaʿ beqowl yehwah ʾeloheynu׃ s
7 וַיְהִ֕י מִקֵּ֖ץ עֲשֶׂ֣רֶת יָמִ֑ים וַיְהִ֥י דְבַר־יְהוָ֖ה אֶֽל־יִרְמְיָֽהוּ׃ wayehiy miqets ʿaseret yamiym wayehiy devar־yehwah ʾel־yiremeyahu׃
8 וַיִּקְרָ֗א אֶל־יֹֽוחָנָן֙ בֶּן־קָרֵ֔חַ וְאֶ֛ל כָּל־שָׂרֵ֥י הַחֲיָלִ֖ים אֲשֶׁ֣ר אִתֹּ֑ו וּלְכָ֨ל־הָעָ֔ם לְמִקָּטֹ֥ן וְעַד־גָּדֹֽול׃ wayiqeraʾ ʾel־yowḥanan ben־qareaḥ weʾel kal־sarey haḥayaliym ʾasher ʾitow ulekhal־haʿam lemiqaṭon weʿad־gadowl׃
9 וַיֹּ֣אמֶר אֲלֵיהֶ֔ם כֹּֽה־אָמַ֥ר יְהוָ֖ה אֱלֹהֵ֣י יִשְׂרָאֵ֑ל אֲשֶׁ֨ר שְׁלַחְתֶּ֤ם אֹתִי֙ אֵלָ֔יו לְהַפִּ֥יל תְּחִנַּתְכֶ֖ם לְפָנָֽיו׃ wayoʾmer ʾaleyhem koh־ʾamar yehwah ʾelohey yiseraʾel ʾasher shelaḥetem ʾotiy ʾelayw lehapiyl teḥinatekhem lefanayw׃
10 אִם־שֹׁ֤וב תֵּֽשְׁבוּ֙ בָּאָ֣רֶץ הַזֹּ֔את וּבָנִ֤יתִי אֶתְכֶם֙ וְלֹ֣א אֶהֱרֹ֔ס וְנָטַעְתִּ֥י אֶתְכֶ֖ם וְלֹ֣א אֶתֹּ֑ושׁ כִּ֤י נִחַ֙מְתִּי֙ אֶל־הָ֣רָעָ֔ה אֲשֶׁ֥ר עָשִׂ֖יתִי לָכֶֽם׃ ʾim־showv teshevu baʾarets hazoʾt uvaniytiy ʾetekhem weloʾ ʾeheros wenaṭaʿetiy ʾetekhem weloʾ ʾetowsh kiy niḥametiy ʾel־haraʿah ʾasher ʿasiytiy lakhem׃
11 אַל־תִּֽירְא֗וּ מִפְּנֵי֙ מֶ֣לֶךְ בָּבֶ֔ל אֲשֶׁר־אַתֶּ֥ם יְרֵאִ֖ים מִפָּנָ֑יו אַל־תִּֽירְא֤וּ מִמֶּ֙נּוּ֙ נְאֻם־יְהוָ֔ה כִּֽי־אִתְּכֶ֣ם אָ֔נִי לְהֹושִׁ֧יעַ אֶתְכֶ֛ם וּלְהַצִּ֥יל אֶתְכֶ֖ם מִיָּדֹֽו׃ ʾal־tiyreʾu mipeney melekhe bavel ʾasher־ʾatem yereʾiym mipanayw ʾal־tiyreʾu mimenu neʾum־yehwah kiy־ʾitekhem ʾaniy lehowshiyʿa ʾetekhem ulehatsiyl ʾetekhem miyadow׃
12 וְאֶתֵּ֥ן לָכֶ֛ם רַחֲמִ֖ים וְרִחַ֣ם אֶתְכֶ֑ם וְהֵשִׁ֥יב אֶתְכֶ֖ם אֶל־אַדְמַתְכֶֽם׃ weʾeten lakhem raḥamiym weriḥam ʾetekhem weheshiyv ʾetekhem ʾel־ʾadematekhem׃
13 וְאִם־אֹמְרִ֣ים אַתֶּ֔ם לֹ֥א נֵשֵׁ֖ב בָּאָ֣רֶץ הַזֹּ֑את לְבִלְתִּ֣י שְׁמֹ֔עַ בְּקֹ֖ול יְהוָ֥ה אֱלֹהֵיכֶֽם׃ weʾim־ʾomeriym ʾatem loʾ neshev baʾarets hazoʾt leviletiy shemoaʿ beqowl yehwah ʾeloheykhem׃
14 לֵאמֹ֗ר לֹ֚א כִּ֣י אֶ֤רֶץ מִצְרַ֙יִם֙ נָבֹ֔וא אֲשֶׁ֤ר לֹֽא־נִרְאֶה֙ מִלְחָמָ֔ה וְקֹ֥ול שֹׁופָ֖ר לֹ֣א נִשְׁמָ֑ע וְלַלֶּ֥חֶם לֹֽא־נִרְעָ֖ב וְשָׁ֥ם נֵשֵֽׁב׃ leʾmor loʾ kiy ʾerets mitserayim navowʾ ʾasher loʾ־nireʾeh mileḥamah weqowl showfar loʾ nishemaʿ welaleḥem loʾ־nireʿav wesham neshev׃
15 וְעַתָּ֕ה לָכֵ֛ן שִׁמְע֥וּ דְבַר־יְהוָ֖ה שְׁאֵרִ֣ית יְהוּדָ֑ה כֹּֽה־אָמַר֩ יְהוָ֨ה צְבָאֹ֜ות אֱלֹהֵ֣י יִשְׂרָאֵ֗ל אִם־אַ֠תֶּם שֹׂ֣ום תְּשִׂמ֤וּן פְּנֵיכֶם֙ לָבֹ֣א מִצְרַ֔יִם וּבָאתֶ֖ם לָג֥וּר שָֽׁם׃ weʿatah lakhen shimeʿu devar־yehwah sheʾeriyt yehudah koh־ʾamar yehwah tsevaʾowt ʾelohey yiseraʾel ʾim־ʾatem sowm tesimun peneykhem lavoʾ mitserayim uvaʾtem lagur sham׃
16 וְהָיְתָ֣ה הַחֶ֗רֶב אֲשֶׁ֤ר אַתֶּם֙ יְרֵאִ֣ים מִמֶּ֔נָּה שָׁ֛ם תַּשִּׂ֥יג אֶתְכֶ֖ם בְּאֶ֣רֶץ מִצְרָ֑יִם וְהָרָעָ֞ב אֲשֶׁר־אַתֶּ֣ם ׀ דֹּאֲגִ֣ים מִמֶּ֗נּוּ שָׁ֣ם יִדְבַּ֧ק אַחֲרֵיכֶ֛ם מִצְרַ֖יִם וְשָׁ֥ם תָּמֻֽתוּ׃ wehayetah haḥerev ʾasher ʾatem yereʾiym mimenah sham tasiyg ʾetekhem beʾerets mitserayim weharaʿav ʾasher־ʾatem ׀ doʾagiym mimenu sham yidebaq ʾaḥareykhem mitserayim wesham tamutu׃
17 וְיִֽהְי֣וּ כָל־הָאֲנָשִׁ֗ים אֲשֶׁר־שָׂ֨מוּ אֶת־פְּנֵיהֶ֜ם לָבֹ֤וא מִצְרַ֙יִם֙ לָג֣וּר שָׁ֔ם יָמ֕וּתוּ בַּחֶ֖רֶב בָּרָעָ֣ב וּבַדָּ֑בֶר וְלֹֽא־יִהְיֶ֤ה לָהֶם֙ שָׂרִ֣יד וּפָלִ֔יט מִפְּנֵי֙ הָֽרָעָ֔ה אֲשֶׁ֥ר אֲנִ֖י מֵבִ֥יא עֲלֵיהֶֽם׃ ס weyiheyu khal־haʾanashiym ʾasher־samu ʾet־peneyhem lavowʾ mitserayim lagur sham yamutu baḥerev baraʿav uvadaver weloʾ־yiheyeh lahem sariyd ufaliyṭ mipeney haraʿah ʾasher ʾaniy meviyʾ ʿaleyhem׃ s
18 כִּי֩ כֹ֨ה אָמַ֜ר יְהוָ֣ה צְבָאֹות֮ אֱלֹהֵ֣י יִשְׂרָאֵל֒ כַּאֲשֶׁר֩ נִתַּ֨ךְ אַפִּ֜י וַחֲמָתִ֗י עַל־יֹֽשְׁבֵי֙ יְר֣וּשָׁלִַ֔ם כֵּ֣ן תִּתַּ֤ךְ חֲמָתִי֙ עֲלֵיכֶ֔ם בְּבֹאֲכֶ֖ם מִצְרָ֑יִם וִהְיִיתֶ֞ם לְאָלָ֤ה וּלְשַׁמָּה֙ וְלִקְלָלָ֣ה וּלְחֶרְפָּ֔ה וְלֹֽא־תִרְא֣וּ עֹ֔וד אֶת־הַמָּקֹ֖ום הַזֶּֽה׃ kiy khoh ʾamar yehwah tsevaʾowt ʾelohey yiseraʾel kaʾasher nitakhe ʾapiy waḥamatiy ʿal־yoshevey yerushalim ken titakhe ḥamatiy ʿaleykhem bevoʾakhem mitserayim wiheyiytem leʾalah uleshamah weliqelalah uleḥerepah weloʾ־tireʾu ʿowd ʾet־hamaqowm hazeh׃
19 דִּבֶּ֨ר יְהוָ֤ה עֲלֵיכֶם֙ שְׁאֵרִ֣ית יְהוּדָ֔ה אַל־תָּבֹ֖אוּ מִצְרָ֑יִם יָדֹ֙עַ֙ תֵּֽדְע֔וּ כִּי־הַעִידֹ֥תִי בָכֶ֖ם הַיֹּֽום׃ diber yehwah ʿaleykhem sheʾeriyt yehudah ʾal־tavoʾu mitserayim yadoaʿ tedeʿu kiy־haʿiydotiy vakhem hayowm׃
20 כִּ֣י [הִתְעֵתֶים כ] (הִתְעֵיתֶם֮ ק) בְּנַפְשֹֽׁותֵיכֶם֒ כִּֽי־אַתֶּ֞ם שְׁלַחְתֶּ֣ם אֹתִ֗י אֶל־יְהוָ֤ה אֱלֹֽהֵיכֶם֙ לֵאמֹ֔ר הִתְפַּלֵּ֣ל בַּעֲדֵ֔נוּ אֶל־יְהוָ֖ה אֱלֹהֵ֑ינוּ וּכְכֹל֩ אֲשֶׁ֨ר יֹאמַ֜ר יְהוָ֧ה אֱלֹהֵ֛ינוּ כֵּ֥ן הַגֶּד־לָ֖נוּ וְעָשִֽׂינוּ׃ kiy [hiteʿeteym kh] (hiteʿeytem q) benafeshowteykhem kiy־ʾatem shelaḥetem ʾotiy ʾel־yehwah ʾeloheykhem leʾmor hitepalel baʿadenu ʾel־yehwah ʾeloheynu ukhekhol ʾasher yoʾmar yehwah ʾeloheynu ken haged־lanu weʿasiynu׃
21 וָאַגִּ֥ד לָכֶ֖ם הַיֹּ֑ום וְלֹ֣א שְׁמַעְתֶּ֗ם בְּקֹול֙ יְהוָ֣ה אֱלֹֽהֵיכֶ֔ם וּלְכֹ֖ל אֲשֶׁר־שְׁלָחַ֥נִי אֲלֵיכֶֽם׃ waʾagid lakhem hayowm weloʾ shemaʿetem beqowl yehwah ʾeloheykhem ulekhol ʾasher־shelaḥaniy ʾaleykhem׃
22 וְעַתָּה֙ יָדֹ֣עַ תֵּֽדְע֔וּ כִּ֗י בַּחֶ֛רֶב בָּרָעָ֥ב וּבַדֶּ֖בֶר תָּמ֑וּתוּ בַּמָּקֹום֙ אֲשֶׁ֣ר חֲפַצְתֶּ֔ם לָבֹ֖וא לָג֥וּר שָֽׁם׃ ס weʿatah yadoaʿ tedeʿu kiy baḥerev baraʿav uvadever tamutu bamaqowm ʾasher ḥafatsetem lavowʾ lagur sham׃ s