Psaumes 59

¹ לַמְנַצֵּ֣חַ אַל־תַּשְׁחֵת֮ לְדָוִ֪ד מִ֫כְתָּ֥ם בִּשְׁלֹ֥חַ שָׁא֑וּל וַֽיִּשְׁמְר֥וּ אֶת־הַ֝בַּ֗יִת לַהֲמִיתֹֽו׃ lamenatseaḥ ʾal־tasheḥet ledawid mikhetam bisheloaḥ shaʾul wayishemeru ʾet־habayit lahamiytow׃

² הַצִּילֵ֖נִי מֵאֹיְבַ֥י ׀ אֱלֹהָ֑י מִּמִתְקֹומְמַ֥י תְּשַׂגְּבֵֽנִי׃ hatsiyleniy meʾoyevay ׀ ʾelohay mimiteqowmemay tesageveniy׃

³ הַ֭צִּילֵנִי מִפֹּ֣עֲלֵי אָ֑וֶן וּֽמֵאַנְשֵׁ֥י דָ֝מִ֗ים הֹושִׁיעֵֽנִי׃ hatsiyleniy mipoʿaley ʾawen umeʾaneshey damiym howshiyʿeniy׃

⁴ כִּ֤י הִנֵּ֪ה אָֽרְב֡וּ לְנַפְשִׁ֗י יָג֣וּרוּ עָלַ֣י עַזִ֑ים לֹא־פִשְׁעִ֖י וְלֹא־חַטָּאתִ֣י יְהוָֽה׃ kiy hineh ʾarevu lenafeshiy yaguru ʿalay ʿaziym loʾ־fisheʿiy weloʾ־ḥaṭaʾtiy yehwah׃

⁵ בְּֽלִי־עָ֭וֹן יְרוּצ֣וּן וְיִכֹּונָ֑נוּ ע֖וּרָה לִקְרָאתִ֣י וּרְאֵה׃ beliy־ʿaon yerutsun weyikownanu ʿurah liqeraʾtiy ureʾeh׃

⁶ וְאַתָּ֤ה יְהוָֽה־אֱלֹהִ֥ים ׀ צְבָאֹ֡ות אֱלֹ֘הֵ֤י יִשְׂרָאֵ֗ל הָקִ֗יצָה לִפְקֹ֥ד כָּֽל־הַגֹּויִ֑ם אַל־תָּחֹ֨ן כָּל־בֹּ֖גְדֵי אָ֣וֶן סֶֽלָה׃ weʾatah yehwah־ʾelohiym ׀ tsevaʾowt ʾelohey yiseraʾel haqiytsah lifeqod kal־hagowyim ʾal־taḥon kal־bogedey ʾawen selah׃

⁷ יָשׁ֣וּבוּ לָ֭עֶרֶב יֶהֱמ֥וּ כַכָּ֗לֶב וִיסֹ֥ובְבוּ עִֽיר׃ yashuvu laʿerev yehemu khakalev wiysowvevu ʿiyr׃

⁸ הִנֵּ֤ה ׀ יַבִּ֘יע֤וּן בְּפִיהֶ֗ם חֲ֭רָבֹות בְּשִׂפְתֹותֵיהֶ֑ם כִּי־מִ֥י שֹׁמֵֽעַ׃ hineh ׀ yabiyʿun befiyhem ḥaravowt besifetowteyhem kiy־miy shomeaʿ׃

⁹ וְאַתָּ֣ה יְ֭הוָה תִּשְׂחַק־לָ֑מֹו תִּ֝לְעַ֗ג לְכָל־גֹּויִֽם׃ weʾatah yehwah tiseḥaq־lamow tileʿag lekhal־gowyim׃

¹⁰ עֻ֭זֹּו אֵלֶ֣יךָ אֶשְׁמֹ֑רָה כִּֽי־אֱ֝לֹהִ֗ים מִשְׂגַּבִּֽי׃ ʿuzow ʾeleykha ʾeshemorah kiy־ʾelohiym misegabiy׃

¹¹ אֱלֹהֵ֣י [חַסְדֹּו כ] (חַסְדִּ֣י ק) יְקַדְּמֵ֑נִי אֱ֝לֹהִ֗ים יַרְאֵ֥נִי בְשֹׁרְרָֽי׃ ʾelohey [ḥasedow kh] (ḥasediy q) yeqademeniy ʾelohiym yareʾeniy veshoreray׃

¹² אַל־תַּהַרְגֵ֤ם ׀ פֶּֽן־יִשְׁכְּח֬וּ עַמִּ֗י הֲנִיעֵ֣מֹו בְ֭חֵילְךָ וְהֹורִידֵ֑מֹו מָֽגִנֵּ֣נוּ אֲדֹנָֽי׃ ʾal־taharegem ׀ pen־yishekeḥu ʿamiy haniyʿemow veḥeylekha wehowriydemow maginenu ʾadonay׃

¹³ חַטַּאת־פִּ֗ימֹו דְּֽבַר־שְׂפָ֫תֵ֥ימֹו וְיִלָּכְד֥וּ בִגְאֹונָ֑ם וּמֵאָלָ֖ה וּמִכַּ֣חַשׁ יְסַפֵּֽרוּ׃ ḥaṭaʾt־piymow devar־sefateymow weyilakhedu vigeʾownam umeʾalah umikaḥash yesaperu׃

¹⁴ כַּלֵּ֥ה בְחֵמָה֮ כַּלֵּ֪ה וְֽאֵ֫ינֵ֥מֹו וְֽיֵדְע֗וּ כִּֽי־אֱ֭לֹהִים מֹשֵׁ֣ל בְּיַעֲקֹ֑ב לְאַפְסֵ֖י הָאָ֣רֶץ סֶֽלָה׃ kaleh veḥemah kaleh weʾeynemow weyedeʿu kiy־ʾelohiym moshel beyaʿaqov leʾafesey haʾarets selah׃

¹⁵ וְיָשׁ֣וּבוּ לָ֭עֶרֶב יֶהֱמ֥וּ כַכָּ֗לֶב וִיסֹ֥ובְבוּ עִֽיר׃ weyashuvu laʿerev yehemu khakalev wiysowvevu ʿiyr׃

¹⁶ הֵ֭מָּה [יְנוּעוּן כ] (יְנִיע֣וּן ק) לֶאֱכֹ֑ל אִם־לֹ֥א יִ֝שְׂבְּע֗וּ וַיָּלִֽינוּ׃ hemah [yenuʿun kh] (yeniyʿun q) leʾekhol ʾim־loʾ yisebeʿu wayaliynu׃

¹⁷ וַאֲנִ֤י ׀ אָשִׁ֣יר עֻזֶּךָ֮ וַאֲרַנֵּ֥ן לַבֹּ֗קֶר חַ֫סְדֶּ֥ךָ כִּֽי־הָיִ֣יתָ מִשְׂגָּ֣ב לִ֑י וּ֝מָנֹ֗וס בְּיֹ֣ום צַר־לִֽי׃ waʾaniy ׀ ʾashiyr ʿuzekha waʾaranen laboqer ḥasedekha kiy־hayiyta misegav liy umanows beyowm tsar־liy׃

¹⁸ עֻ֭זִּי אֵלֶ֣יךָ אֲזַמֵּ֑רָה כִּֽי־אֱלֹהִ֥ים מִ֝שְׂגַּבִּ֗י אֱלֹהֵ֥י חַסְדִּֽי׃ ʿuziy ʾeleykha ʾazamerah kiy־ʾelohiym misegabiy ʾelohey ḥasediy׃