1 בְּרֵאשִׁ֗ית מַמְלְכ֛וּת יְהֹויָקִ֥ים בֶּן־יֹאשִׁיָּ֖הוּ מֶ֣לֶךְ יְהוּדָ֑ה הָיָה֙ הַדָּבָ֣ר הַזֶּ֔ה מֵאֵ֥ת יְהוָ֖ה לֵאמֹֽר׃ bereʾshiyt mamelekhut yehowyaqiym ben־yoʾshiyahu melekhe yehudah hayah hadavar hazeh meʾet yehwah leʾmor׃
2 כֹּ֣ה ׀ אָמַ֣ר יְהוָ֗ה עֲמֹד֮ בַּחֲצַ֣ר בֵּית־יְהוָה֒ וְדִבַּרְתָּ֞ עַל־כָּל־עָרֵ֣י יְהוּדָ֗ה הַבָּאִים֙ לְהִשְׁתַּחֲוֹ֣ת בֵּית־יְהוָ֔ה אֵ֚ת כָּל־הַדְּבָרִ֔ים אֲשֶׁ֥ר צִוִּיתִ֖יךָ לְדַבֵּ֣ר אֲלֵיהֶ֑ם אַל־תִּגְרַ֖ע דָּבָֽר׃ koh ׀ ʾamar yehwah ʿamod baḥatsar beyt־yehwah wedibareta ʿal־kal־ʿarey yehudah habaʾiym lehishetaḥaot beyt־yehwah ʾet kal־hadevariym ʾasher tsiuiytiykha ledaber ʾaleyhem ʾal־tigeraʿ davar׃
3 אוּלַ֣י יִשְׁמְע֔וּ וְיָשֻׁ֕בוּ אִ֖ישׁ מִדַּרְכֹּ֣ו הָרָעָ֑ה וְנִחַמְתִּ֣י אֶל־הָרָעָ֗ה אֲשֶׁ֨ר אָנֹכִ֤י חֹשֵׁב֙ לַעֲשֹׂ֣ות לָהֶ֔ם מִפְּנֵ֖י רֹ֥עַ מַעַלְלֵיהֶֽם׃ ʾulay yishemeʿu weyashuvu ʾiysh midarekow haraʿah weniḥametiy ʾel־haraʿah ʾasher ʾanokhiy ḥoshev laʿasowt lahem mipeney roaʿ maʿaleleyhem׃
4 וְאָמַרְתָּ֣ אֲלֵיהֶ֔ם כֹּ֖ה אָמַ֣ר יְהוָ֑ה אִם־לֹ֤א תִשְׁמְעוּ֙ אֵלַ֔י לָלֶ֙כֶת֙ בְּתֹ֣ורָתִ֔י אֲשֶׁ֥ר נָתַ֖תִּי לִפְנֵיכֶֽם׃ weʾamareta ʾaleyhem koh ʾamar yehwah ʾim־loʾ tishemeʿu ʾelay lalekhet betowratiy ʾasher natatiy lifeneykhem׃
5 לִשְׁמֹ֗עַ עַל־דִּבְרֵ֨י עֲבָדַ֣י הַנְּבִאִ֔ים אֲשֶׁ֥ר אָנֹכִ֖י שֹׁלֵ֣חַ אֲלֵיכֶ֑ם וְהַשְׁכֵּ֥ם וְשָׁלֹ֖חַ וְלֹ֥א שְׁמַעְתֶּֽם׃ lishemoaʿ ʿal־diverey ʿavaday haneviʾiym ʾasher ʾanokhiy sholeaḥ ʾaleykhem wehashekem weshaloaḥ weloʾ shemaʿetem׃
6 וְנָתַתִּ֛י אֶת־הַבַּ֥יִת הַזֶּ֖ה כְּשִׁלֹ֑ה וְאֶת־הָעִ֤יר [הַזֹּאתָה כ] (הַזֹּאת֙ ק) אֶתֵּ֣ן לִקְלָלָ֔ה לְכֹ֖ל גֹּויֵ֥י הָאָֽרֶץ׃ ס wenatatiy ʾet־habayit hazeh keshiloh weʾet־haʿiyr [hazoʾtah kh] (hazoʾt q) ʾeten liqelalah lekhol gowyey haʾarets׃ s
7 וַֽיִּשְׁמְע֛וּ הַכֹּהֲנִ֥ים וְהַנְּבִאִ֖ים וְכָל־הָעָ֑ם אֶֽת־יִרְמְיָ֔הוּ מְדַבֵּ֛ר אֶת־הַדְּבָרִ֥ים הָאֵ֖לֶּה בְּבֵ֥ית יְהוָֽה׃ wayishemeʿu hakohaniym wehaneviʾiym wekhal־haʿam ʾet־yiremeyahu medaber ʾet־hadevariym haʾeleh beveyt yehwah׃
8 וַיְהִ֣י ׀ כְּכַלֹּ֣ות יִרְמְיָ֗הוּ לְדַבֵּר֙ אֵ֣ת כָּל־אֲשֶׁר־צִוָּ֣ה יְהוָ֔ה לְדַבֵּ֖ר אֶל־כָּל־הָעָ֑ם וַיִּתְפְּשׂ֨וּ אֹתֹ֜ו הַכֹּהֲנִ֧ים וְהַנְּבִאִ֛ים וְכָל־הָעָ֥ם לֵאמֹ֖ר מֹ֥ות תָּמֽוּת׃ wayehiy ׀ kekhalowt yiremeyahu ledaber ʾet kal־ʾasher־tsiuah yehwah ledaber ʾel־kal־haʿam wayitepesu ʾotow hakohaniym wehaneviʾiym wekhal־haʿam leʾmor mowt tamut׃
9 מַדּוּעַ֩ נִבֵּ֨יתָ בְשֵׁם־יְהוָ֜ה לֵאמֹ֗ר כְּשִׁלֹו֙ יִֽהְיֶה֙ הַבַּ֣יִת הַזֶּ֔ה וְהָעִ֥יר הַזֹּ֛את תֶּחֱרַ֖ב מֵאֵ֣ין יֹושֵׁ֑ב וַיִּקָּהֵ֧ל כָּל־הָעָ֛ם אֶֽל־יִרְמְיָ֖הוּ בְּבֵ֥ית יְהוָֽה׃ maduaʿ nibeyta veshem־yehwah leʾmor keshilow yiheyeh habayit hazeh wehaʿiyr hazoʾt teḥerav meʾeyn yowshev wayiqahel kal־haʿam ʾel־yiremeyahu beveyt yehwah׃
10 וַֽיִּשְׁמְע֣וּ ׀ שָׂרֵ֣י יְהוּדָ֗ה אֵ֚ת הַדְּבָרִ֣ים הָאֵ֔לֶּה וַיַּעֲל֥וּ מִבֵּית־הַמֶּ֖לֶךְ בֵּ֣ית יְהוָ֑ה וַיֵּֽשְׁב֛וּ בְּפֶ֥תַח שַֽׁעַר־יְהוָ֖ה הֶחָדָֽשׁ׃ ס wayishemeʿu ׀ sarey yehudah ʾet hadevariym haʾeleh wayaʿalu mibeyt־hamelekhe beyt yehwah wayeshevu befetaḥ shaʿar־yehwah heḥadash׃ s
11 וַיֹּ֨אמְר֜וּ הַכֹּהֲנִ֤ים וְהַנְּבִאִים֙ אֶל־הַשָּׂרִ֔ים וְאֶל־כָּל־הָעָ֖ם לֵאמֹ֑ר מִשְׁפַּט־מָ֙וֶת֙ לָאִ֣ישׁ הַזֶּ֔ה כִּ֤י נִבָּא֙ אֶל־הָעִ֣יר הַזֹּ֔את כַּאֲשֶׁ֥ר שְׁמַעְתֶּ֖ם בְּאָזְנֵיכֶֽם׃ wayoʾmeru hakohaniym wehaneviʾiym ʾel־hasariym weʾel־kal־haʿam leʾmor mishepaṭ־mawet laʾiysh hazeh kiy nibaʾ ʾel־haʿiyr hazoʾt kaʾasher shemaʿetem beʾazeneykhem׃
12 וַיֹּ֤אמֶר יִרְמְיָ֙הוּ֙ אֶל־כָּל־הַשָּׂרִ֔ים וְאֶל־כָּל־הָעָ֖ם לֵאמֹ֑ר יְהוָ֣ה שְׁלָחַ֗נִי לְהִנָּבֵ֞א אֶל־הַבַּ֤יִת הַזֶּה֙ וְאֶל־הָעִ֣יר הַזֹּ֔את אֵ֥ת כָּל־הַדְּבָרִ֖ים אֲשֶׁ֥ר שְׁמַעְתֶּֽם׃ wayoʾmer yiremeyahu ʾel־kal־hasariym weʾel־kal־haʿam leʾmor yehwah shelaḥaniy lehinaveʾ ʾel־habayit hazeh weʾel־haʿiyr hazoʾt ʾet kal־hadevariym ʾasher shemaʿetem׃
13 וְעַתָּ֗ה הֵיטִ֤יבוּ דַרְכֵיכֶם֙ וּמַ֣עַלְלֵיכֶ֔ם וְשִׁמְע֕וּ בְּקֹ֖ול יְהוָ֣ה אֱלֹהֵיכֶ֑ם וְיִנָּחֵ֣ם יְהוָ֔ה אֶל־הָ֣רָעָ֔ה אֲשֶׁ֥ר דִּבֶּ֖ר עֲלֵיכֶֽם׃ weʿatah heyṭiyvu darekheykhem umaʿaleleykhem weshimeʿu beqowl yehwah ʾeloheykhem weyinaḥem yehwah ʾel־haraʿah ʾasher diber ʿaleykhem׃
14 וַאֲנִ֖י הִנְנִ֣י בְיֶדְכֶ֑ם עֲשׂוּ־לִ֛י כַּטֹּ֥וב וְכַיָּשָׁ֖ר בְּעֵינֵיכֶֽם׃ waʾaniy hineniy veyedekhem ʿasu־liy kaṭowv wekhayashar beʿeyneykhem׃
15 אַ֣ךְ ׀ יָדֹ֣עַ תֵּדְע֗וּ כִּ֣י אִם־מְמִתִ֣ים אַתֶּם֮ אֹתִי֒ כִּי־דָ֣ם נָקִ֗י אַתֶּם֙ נֹתְנִ֣ים עֲלֵיכֶ֔ם וְאֶל־הָעִ֥יר הַזֹּ֖את וְאֶל־יֹשְׁבֶ֑יהָ כִּ֣י בֶאֱמֶ֗ת שְׁלָחַ֤נִי יְהוָה֙ עֲלֵיכֶ֔ם לְדַבֵּר֙ בְּאָזְנֵיכֶ֔ם אֵ֥ת כָּל־הַדְּבָרִ֖ים הָאֵֽלֶּה׃ ס ʾakhe ׀ yadoaʿ tedeʿu kiy ʾim־memitiym ʾatem ʾotiy kiy־dam naqiy ʾatem noteniym ʿaleykhem weʾel־haʿiyr hazoʾt weʾel־yosheveyha kiy veʾemet shelaḥaniy yehwah ʿaleykhem ledaber beʾazeneykhem ʾet kal־hadevariym haʾeleh׃ s
16 וַיֹּאמְר֤וּ הַשָּׂרִים֙ וְכָל־הָעָ֔ם אֶל־הַכֹּהֲנִ֖ים וְאֶל־הַנְּבִיאִ֑ים אֵין־לָאִ֤ישׁ הַזֶּה֙ מִשְׁפַּט־מָ֔וֶת כִּ֗י בְּשֵׁ֛ם יְהוָ֥ה אֱלֹהֵ֖ינוּ דִּבֶּ֥ר אֵלֵֽינוּ׃ wayoʾmeru hasariym wekhal־haʿam ʾel־hakohaniym weʾel־haneviyʾiym ʾeyn־laʾiysh hazeh mishepaṭ־mawet kiy beshem yehwah ʾeloheynu diber ʾeleynu׃
17 וַיָּקֻ֣מוּ אֲנָשִׁ֔ים מִזִּקְנֵ֖י הָאָ֑רֶץ וַיֹּ֣אמְר֔וּ אֶל־כָּל־קְהַ֥ל הָעָ֖ם לֵאמֹֽר׃ wayaqumu ʾanashiym miziqeney haʾarets wayoʾmeru ʾel־kal־qehal haʿam leʾmor׃
18 [מִיכָיָהּ כ] (מִיכָה֙ ק) הַמֹּ֣ורַשְׁתִּ֔י הָיָ֣ה נִבָּ֔א בִּימֵ֖י חִזְקִיָּ֣הוּ מֶֽלֶךְ־יְהוּדָ֑ה וַיֹּ֣אמֶר אֶל־כָּל־עַם֩ יְהוּדָ֨ה לֵאמֹ֜ר כֹּֽה־אָמַ֣ר ׀ יְהוָ֣ה צְבָאֹ֗ות צִיֹּ֞ון שָׂדֶ֤ה תֵֽחָרֵשׁ֙ וִירוּשָׁלַ֙יִם֙ עִיִּ֣ים תִּֽהְיֶ֔ה וְהַ֥ר הַבַּ֖יִת לְבָמֹ֥ות יָֽעַר׃ [miykhayah kh] (miykhah q) hamowrashetiy hayah nibaʾ biymey ḥizeqiyahu melekhe־yehudah wayoʾmer ʾel־kal־ʿam yehudah leʾmor koh־ʾamar ׀ yehwah tsevaʾowt tsiyown sadeh teḥaresh wiyrushalayim ʿiyiym tiheyeh wehar habayit levamowt yaʿar׃
19 הֶהָמֵ֣ת הֱ֠מִתֻהוּ חִזְקִיָּ֨הוּ מֶֽלֶךְ־יְהוּדָ֜ה וְכָל־יְהוּדָ֗ה הֲלֹא֮ יָרֵ֣א אֶת־יְהוָה֒ וַיְחַל֙ אֶת־פְּנֵ֣י יְהוָ֔ה וַיִּנָּ֣חֶם יְהוָ֔ה אֶל־הָרָעָ֖ה אֲשֶׁר־דִּבֶּ֣ר עֲלֵיהֶ֑ם וַאֲנַ֗חְנוּ עֹשִׂ֛ים רָעָ֥ה גְדֹולָ֖ה עַל־נַפְשֹׁותֵֽינוּ׃ hehamet hemituhu ḥizeqiyahu melekhe־yehudah wekhal־yehudah haloʾ yareʾ ʾet־yehwah wayeḥal ʾet־peney yehwah wayinaḥem yehwah ʾel־haraʿah ʾasher־diber ʿaleyhem waʾanaḥenu ʿosiym raʿah gedowlah ʿal־nafeshowteynu׃
20 וְגַם־אִ֗ישׁ הָיָ֤ה מִתְנַבֵּא֙ בְּשֵׁ֣ם יְהוָ֔ה אֽוּרִיָּ֙הוּ֙ בֶּֽן־שְׁמַעְיָ֔הוּ מִקִּרְיַ֖ת הַיְּעָרִ֑ים וַיִּנָּבֵ֞א עַל־הָעִ֤יר הַזֹּאת֙ וְעַל־הָאָ֣רֶץ הַזֹּ֔את כְּכֹ֖ל דִּבְרֵ֥י יִרְמְיָֽהוּ׃ wegam־ʾiysh hayah mitenabeʾ beshem yehwah ʾuriyahu ben־shemaʿeyahu miqireyat hayeʿariym wayinaveʾ ʿal־haʿiyr hazoʾt weʿal־haʾarets hazoʾt kekhol diverey yiremeyahu׃
21 וַיִּשְׁמַ֣ע הַמֶּֽלֶךְ־יְ֠הֹויָקִים וְכָל־גִּבֹּורָ֤יו וְכָל־הַשָּׂרִים֙ אֶת־דְּבָרָ֔יו וַיְבַקֵּ֥שׁ הַמֶּ֖לֶךְ הֲמִיתֹ֑ו וַיִּשְׁמַ֤ע אוּרִיָּ֙הוּ֙ וַיִּרָ֔א וַיִּבְרַ֖ח וַיָּבֹ֥א מִצְרָֽיִם׃ wayishemaʿ hamelekhe־yehowyaqiym wekhal־gibowrayw wekhal־hasariym ʾet־devarayw wayevaqesh hamelekhe hamiytow wayishemaʿ ʾuriyahu wayiraʾ wayiveraḥ wayavoʾ mitserayim׃
22 וַיִּשְׁלַ֞ח הַמֶּ֧לֶךְ יְהֹויָקִ֛ים אֲנָשִׁ֖ים מִצְרָ֑יִם אֵ֣ת אֶלְנָתָ֧ן בֶּן־עַכְבֹּ֛ור וַאֲנָשִׁ֥ים אִתֹּ֖ו אֶל־מִצְרָֽיִם׃ wayishelaḥ hamelekhe yehowyaqiym ʾanashiym mitserayim ʾet ʾelenatan ben־ʿakhebowr waʾanashiym ʾitow ʾel־mitserayim׃
23 וַיֹּוצִ֨יאוּ אֶת־אוּרִיָּ֜הוּ מִמִּצְרַ֗יִם וַיְבִאֻ֙הוּ֙ אֶל־הַמֶּ֣לֶךְ יְהֹויָקִ֔ים וַיַּכֵּ֖הוּ בֶּחָ֑רֶב וַיַּשְׁלֵךְ֙ אֶת־נִבְלָתֹ֔ו אֶל־קִבְרֵ֖י בְּנֵ֥י הָעָֽם׃ wayowtsiyʾu ʾet־ʾuriyahu mimitserayim wayeviʾuhu ʾel־hamelekhe yehowyaqiym wayakehu beḥarev wayashelekhe ʾet־nivelatow ʾel־qiverey beney haʿam׃
24 אַ֗ךְ יַ֚ד אֲחִיקָ֣ם בֶּן־שָׁפָ֔ן הָיְתָ֖ה אֶֽת־יִרְמְיָ֑הוּ לְבִלְתִּ֛י תֵּת־אֹתֹ֥ו בְיַד־הָעָ֖ם לַהֲמִיתֹֽו׃ פ ʾakhe yad ʾaḥiyqam ben־shafan hayetah ʾet־yiremeyahu leviletiy tet־ʾotow veyad־haʿam lahamiytow׃ f