1 לַמְנַצֵּ֥חַ עַֽל־ [יְדִיתוּן כ] (יְדוּת֗וּן ק) לְאָסָ֥ף מִזְמֹֽור׃ lamenatseaḥ ʿal־ [yediytun kh] (yedutun q) leʾasaf mizemowr׃
2 קֹולִ֣י אֶל־אֱלֹהִ֣ים וְאֶצְעָ֑קָה קֹולִ֥י אֶל־אֱ֝לֹהִ֗ים וְהַאֲזִ֥ין אֵלָֽי׃ qowliy ʾel־ʾelohiym weʾetseʿaqah qowliy ʾel־ʾelohiym wehaʾaziyn ʾelay׃
3 בְּיֹ֥ום צָרָתִי֮ אֲדֹנָ֪י דָּ֫רָ֥שְׁתִּי יָדִ֤י ׀ לַ֣יְלָה נִ֭גְּרָה וְלֹ֣א תָפ֑וּג מֵאֲנָ֖ה הִנָּחֵ֣ם נַפְשִֽׁי׃ beyowm tsaratiy ʾadonay darashetiy yadiy ׀ layelah nigerah weloʾ tafug meʾanah hinaḥem nafeshiy׃
4 אֶזְכְּרָ֣ה אֱלֹהִ֣ים וְאֶֽהֱמָיָ֑ה אָשִׂ֓יחָה ׀ וְתִתְעַטֵּ֖ף רוּחִ֣י סֶֽלָה׃ ʾezekerah ʾelohiym weʾehemayah ʾasiyḥah ׀ wetiteʿaṭef ruḥiy selah׃
5 אָ֭חַזְתָּ שְׁמֻרֹ֣ות עֵינָ֑י נִ֝פְעַ֗מְתִּי וְלֹ֣א אֲדַבֵּֽר׃ ʾaḥazeta shemurowt ʿeynay nifeʿametiy weloʾ ʾadaber׃
6 חִשַּׁ֣בְתִּי יָמִ֣ים מִקֶּ֑דֶם נֹ֗ות עֹולָמִֽים׃ ḥishavetiy yamiym miqedem nowt ʿowlamiym׃
7 אֶֽזְכְּרָ֥ה נְגִינָתִ֗י בַּ֫לָּ֥יְלָה עִם־לְבָבִ֥י אָשִׂ֑יחָה וַיְחַפֵּ֥שׂ רוּחִֽי׃ ʾezekerah negiynatiy balayelah ʿim־levaviy ʾasiyḥah wayeḥapes ruḥiy׃
8 הַֽ֭לְעֹולָמִים יִזְנַ֥ח ׀ אֲדֹנָ֑י וְלֹֽא־יֹסִ֖יף לִרְצֹ֣ות עֹֽוד׃ haleʿowlamiym yizenaḥ ׀ ʾadonay weloʾ־yosiyf liretsowt ʿowd׃
9 הֶאָפֵ֣ס לָנֶ֣צַח חַסְדֹּ֑ו גָּ֥מַר אֹ֝֗מֶר לְדֹ֣ר וָדֹֽר׃ heʾafes lanetsaḥ ḥasedow gamar ʾomer ledor wador׃
10 הֲשָׁכַ֣ח חַנֹּ֣ות אֵ֑ל אִם־קָפַ֥ץ בְּ֝אַ֗ף רַחֲמָ֥יו סֶֽלָה׃ hashakhaḥ ḥanowt ʾel ʾim־qafats beʾaf raḥamayw selah׃
11 וָ֭אֹמַר חַלֹּ֣ותִי הִ֑יא נֹ֗ות יְמִ֣ין עֶלְיֹֽון׃ waʾomar ḥalowtiy hiyʾ nowt yemiyn ʿeleyown׃
12 [אַזְכִּיר כ] (אֶזְכֹּ֥ור ק) מַֽעַלְלֵי־יָ֑הּ כִּֽי־אֶזְכְּרָ֖ה מִקֶּ֣דֶם פִּלְאֶֽךָ׃ [ʾazekiyr kh] (ʾezekowr q) maʿaleley־yah kiy־ʾezekerah miqedem pileʾekha׃
13 וְהָגִ֥יתִי בְכָל־פָּעֳלֶ֑ךָ וּֽבַעֲלִ֖ילֹותֶ֣יךָ אָשִֽׂיחָה׃ wehagiytiy vekhal־paʿolekha uvaʿaliylowteykha ʾasiyḥah׃
14 אֱ֭לֹהִים בַּקֹּ֣דֶשׁ דַּרְכֶּ֑ךָ מִי־אֵ֥ל גָּ֝דֹ֗ול כֵּֽאלֹהִֽים׃ ʾelohiym baqodesh darekekha miy־ʾel gadowl keʾlohiym׃
15 אַתָּ֣ה הָ֭אֵל עֹ֣שֵׂה פֶ֑לֶא הֹודַ֖עְתָּ בָעַמִּ֣ים עֻזֶּֽךָ׃ ʾatah haʾel ʿoseh feleʾ howdaʿeta vaʿamiym ʿuzekha׃
16 גָּאַ֣לְתָּ בִּזְרֹ֣ועַ עַמֶּ֑ךָ בְּנֵי־יַעֲקֹ֖ב וְיֹוסֵ֣ף סֶֽלָה׃ gaʾaleta bizerowʿa ʿamekha beney־yaʿaqov weyowsef selah׃
17 רָ֘א֤וּךָ מַּ֨יִם ׀ אֱֽלֹהִ֗ים רָא֣וּךָ מַּ֣יִם יָחִ֑ילוּ אַ֝֗ף יִרְגְּז֥וּ תְהֹמֹֽות׃ raʾukha mayim ׀ אlohiym raʾukha mayim yaḥiylu ʾaf yiregezu tehomowt׃
18 זֹ֤רְמוּ מַ֨יִם ׀ עָבֹ֗ות קֹ֖ול נָתְנ֣וּ שְׁחָקִ֑ים אַף־חֲ֝צָצֶ֗יךָ יִתְהַלָּֽכוּ׃ zoremu mayim ׀ ʿavowt qowl natenu sheḥaqiym ʾaf־ḥatsatseykha yitehalakhu׃
19 קֹ֤ול רַעַמְךָ֨ ׀ בַּגַּלְגַּ֗ל הֵאִ֣ירוּ בְרָקִ֣ים תֵּבֵ֑ל רָגְזָ֖ה וַתִּרְעַ֣שׁ הָאָֽרֶץ׃ qowl raʿamekha ׀ bagalegal heʾiyru veraqiym tevel ragezah watireʿash haʾarets׃
20 בַּיָּ֤ם דַּרְכֶּ֗ךָ [וּשְׁבִילֶיךָ כ] (וּֽ֭שְׁבִֽילְךָ ק) בְּמַ֣יִם רַבִּ֑ים וְ֝עִקְּבֹותֶ֗יךָ לֹ֣א נֹדָֽעוּ׃ bayam darekekha [usheviyleykha kh] (usheviylekha q) bemayim rabiym weʿiqevowteykha loʾ nodaʿu׃
21 נָחִ֣יתָ כַצֹּ֣אן עַמֶּ֑ךָ בְּֽיַד־מֹשֶׁ֥ה וְאַהֲרֹֽן׃ naḥiyta khatsoʾn ʿamekha beyad־mosheh weʾaharon׃