2 Samuel 10

¹ וַֽיְהִי֙ אַֽחֲרֵי־כֵ֔ן וַיָּ֕מָת מֶ֖לֶךְ בְּנֵ֣י עַמֹּ֑ון וַיִּמְלֹ֛ךְ חָנ֥וּן בְּנֹ֖ו תַּחְתָּֽיו׃ wayehiy ʾaḥarey־khen wayamat melekhe beney ʿamown wayimelokhe ḥanun benow taḥetayw׃

² וַיֹּ֨אמֶר דָּוִ֜ד אֶעֱשֶׂה־חֶ֣סֶד ׀ עִם־חָנ֣וּן בֶּן־נָחָ֗שׁ כַּאֲשֶׁר֩ עָשָׂ֨ה אָבִ֤יו עִמָּדִי֙ חֶ֔סֶד וַיִּשְׁלַ֨ח דָּוִ֧ד לְנַחֲמֹ֛ו בְּיַד־עֲבָדָ֖יו אֶל־אָבִ֑יו וַיָּבֹ֙אוּ֙ עַבְדֵ֣י דָוִ֔ד אֶ֖רֶץ בְּנֵ֥י עַמֹּֽון׃ wayoʾmer dawid ʾeʿeseh־ḥesed ׀ ʿim־ḥanun ben־naḥash kaʾasher ʿasah ʾaviyw ʿimadiy ḥesed wayishelaḥ dawid lenaḥamow beyad־ʿavadayw ʾel־ʾaviyw wayavoʾu ʿavedey dawid ʾerets beney ʿamown׃

³ וַיֹּאמְרוּ֩ שָׂרֵ֨י בְנֵֽי־עַמֹּ֜ון אֶל־חָנ֣וּן אֲדֹֽנֵיהֶ֗ם הַֽמְכַבֵּ֨ד דָּוִ֤ד אֶת־אָבִ֙יךָ֙ בְּעֵינֶ֔יךָ כִּֽי־שָׁלַ֥ח לְךָ֖ מְנַֽחֲמִ֑ים הֲ֠לֹוא בַּעֲב֞וּר חֲקֹ֤ור אֶת־הָעִיר֙ וּלְרַגְּלָ֣הּ וּלְהָפְכָ֔הּ שָׁלַ֥ח דָּוִ֛ד אֶת־עֲבָדָ֖יו אֵלֶֽיךָ׃ wayoʾmeru sarey veney־ʿamown ʾel־ḥanun ʾadoneyhem hamekhabed dawid ʾet־ʾaviykha beʿeyneykha kiy־shalaḥ lekha menaḥamiym halowʾ baʿavur ḥaqowr ʾet־haʿiyr uleragelah ulehafekhah shalaḥ dawid ʾet־ʿavadayw ʾeleykha׃

⁴ וַיִּקַּ֨ח חָנ֜וּן אֶת־עַבְדֵ֣י דָוִ֗ד וַיְגַלַּח֙ אֶת־חֲצִ֣י זְקָנָ֔ם וַיִּכְרֹ֧ת אֶת־מַדְוֵיהֶ֛ם בַּחֵ֖צִי עַ֣ד שְׁתֹֽותֵיהֶ֑ם וַֽיְשַׁלְּחֵֽם׃ wayiqaḥ ḥanun ʾet־ʿavedey dawid wayegalaḥ ʾet־ḥatsiy zeqanam wayikherot ʾet־madeweyhem baḥetsiy ʿad shetowteyhem wayeshaleḥem׃

⁵ וַיַּגִּ֤דוּ לְדָוִד֙ וַיִּשְׁלַ֣ח לִקְרָאתָ֔ם כִּֽי־הָי֥וּ הָאֲנָשִׁ֖ים נִכְלָמִ֣ים מְאֹ֑ד וַיֹּ֤אמֶר הַמֶּ֙לֶךְ֙ שְׁב֣וּ בִֽירֵחֹ֔ו עַד־יְצַמַּ֥ח זְקַנְכֶ֖ם וְשַׁבְתֶּֽם׃ wayagidu ledawid wayishelaḥ liqeraʾtam kiy־hayu haʾanashiym nikhelamiym meʾod wayoʾmer hamelekhe shevu viyreḥow ʿad־yetsamaḥ zeqanekhem weshavetem׃

⁶ וַיִּרְאוּ֙ בְּנֵ֣י עַמֹּ֔ון כִּ֥י נִבְאֲשׁ֖וּ בְּדָוִ֑ד וַיִּשְׁלְח֣וּ בְנֵֽי־עַמֹּ֡ון וַיִּשְׂכְּרוּ֩ אֶת־אֲרַ֨ם בֵּית־רְחֹ֜וב וְאֶת־אֲרַ֣ם צֹובָ֗א עֶשְׂרִ֥ים אֶ֙לֶף֙ רַגְלִ֔י וְאֶת־מֶ֤לֶךְ מַֽעֲכָה֙ אֶ֣לֶף אִ֔ישׁ וְאִ֣ישׁ טֹ֔וב שְׁנֵים־עָשָׂ֥ר אֶ֖לֶף אִֽישׁ׃ wayireʾu beney ʿamown kiy niveʾashu bedawid wayisheleḥu veney־ʿamown wayisekeru ʾet־ʾaram beyt־reḥowv weʾet־ʾaram tsowvaʾ ʿeseriym ʾelef rageliy weʾet־melekhe maʿakhah ʾelef ʾiysh weʾiysh ṭowv sheneym־ʿasar ʾelef ʾiysh׃

⁷ וַיִּשְׁמַ֖ע דָּוִ֑ד וַיִּשְׁלַח֙ אֶת־יֹואָ֔ב וְאֵ֥ת כָּל־הַצָּבָ֖א הַגִּבֹּרִֽים׃ wayishemaʿ dawid wayishelaḥ ʾet־yowʾav weʾet kal־hatsavaʾ hagiboriym׃

⁸ וַיֵּֽצְאוּ֙ בְּנֵ֣י עַמֹּ֔ון וַיַּעַרְכ֥וּ מִלְחָמָ֖ה פֶּ֣תַח הַשָּׁ֑עַר וַאֲרַ֨ם צֹובָ֤א וּרְחֹוב֙ וְאִֽישׁ־טֹ֣וב וּמַֽעֲכָ֔ה לְבַדָּ֖ם בַּשָּׂדֶֽה׃ wayetseʾu beney ʿamown wayaʿarekhu mileḥamah petaḥ hashaʿar waʾaram tsowvaʾ ureḥowv weʾiysh־ṭowv umaʿakhah levadam basadeh׃

⁹ וַיַּ֣רְא יֹואָ֗ב כִּֽי־הָיְתָ֤ה אֵלָיו֙ פְּנֵ֣י הַמִּלְחָמָ֔ה מִפָּנִ֖ים וּמֵֽאָחֹ֑ור וַיִּבְחַ֗ר מִכֹּל֙ בְּחוּרֵ֣י [בְּיִשְׂרָאֵל כ] (יִשְׂרָאֵ֔ל ק) וַֽיַּעֲרֹ֖ךְ לִקְרַ֥את אֲרָֽם׃ wayareʾ yowʾav kiy־hayetah ʾelayw peney hamileḥamah mipaniym umeʾaḥowr wayiveḥar mikol beḥurey [beyiseraʾel kh] (yiseraʾel q) wayaʿarokhe liqeraʾt ʾaram׃

¹⁰ וְאֵת֙ יֶ֣תֶר הָעָ֔ם נָתַ֕ן בְּיַ֖ד אַבְשַׁ֣י אָחִ֑יו וַֽיַּעֲרֹ֕ךְ לִקְרַ֖את בְּנֵ֥י עַמֹּֽון׃ weʾet yeter haʿam natan beyad ʾaveshay ʾaḥiyw wayaʿarokhe liqeraʾt beney ʿamown׃

¹¹ וַיֹּ֗אמֶר אִם־תֶּחֱזַ֤ק אֲרָם֙ מִמֶּ֔נִּי וְהָיִ֥תָה לִּ֖י לִֽישׁוּעָ֑ה וְאִם־בְּנֵ֤י עַמֹּון֙ יֶחֱזְק֣וּ מִמְּךָ֔ וְהָלַכְתִּ֖י לְהֹושִׁ֥יעַֽ לָֽךְ׃ wayoʾmer ʾim־teḥezaq ʾaram mimeniy wehayitah liy liyshuʿah weʾim־beney ʿamown yeḥezequ mimekha wehalakhetiy lehowshiyʿa lakhe׃

¹² חֲזַ֤ק וְנִתְחַזַּק֙ בְּעַד־עַמֵּ֔נוּ וּבְעַ֖ד עָרֵ֣י אֱלֹהֵ֑ינוּ וַֽיהוָ֔ה יַעֲשֶׂ֥ה הַטֹּ֖וב בְּעֵינָֽיו׃ ḥazaq weniteḥazaq beʿad־ʿamenu uveʿad ʿarey ʾeloheynu wayhwah yaʿaseh haṭowv beʿeynayw׃

¹³ וַיִּגַּ֣שׁ יֹואָ֗ב וְהָעָם֙ אֲשֶׁ֣ר עִמֹּ֔ו לַמִּלְחָמָ֖ה בַּֽאֲרָ֑ם וַיָּנֻ֖סוּ מִפָּנָֽיו׃ wayigash yowʾav wehaʿam ʾasher ʿimow lamileḥamah baʾaram wayanusu mipanayw׃

¹⁴ וּבְנֵ֨י עַמֹּ֤ון רָאוּ֙ כִּי־נָ֣ס אֲרָ֔ם וַיָּנֻ֙סוּ֙ מִפְּנֵ֣י אֲבִישַׁ֔י וַיָּבֹ֖אוּ הָעִ֑יר וַיָּ֣שָׁב יֹואָ֗ב מֵעַל֙ בְּנֵ֣י עַמֹּ֔ון וַיָּבֹ֖א יְרוּשָׁלִָֽם׃ uveney ʿamown raʾu kiy־nas ʾaram wayanusu mipeney ʾaviyshay wayavoʾu haʿiyr wayashav yowʾav meʿal beney ʿamown wayavoʾ yerushalim׃

¹⁵ וַיַּ֣רְא אֲרָ֔ם כִּ֥י נִגַּ֖ף לִפְנֵ֣י יִשְׂרָאֵ֑ל וַיֵּאָסְפ֖וּ יָֽחַד׃ wayareʾ ʾaram kiy nigaf lifeney yiseraʾel wayeʾasefu yaḥad׃

¹⁶ וַיִּשְׁלַ֣ח הֲדַדְעֶ֗זֶר וַיֹּצֵ֤א אֶת־אֲרָם֙ אֲשֶׁר֙ מֵעֵ֣בֶר הַנָּהָ֔ר וַיָּבֹ֖אוּ חֵילָ֑ם וְשֹׁובַ֛ךְ שַׂר־צְבָ֥א הֲדַדְעֶ֖זֶר לִפְנֵיהֶֽם׃ wayishelaḥ hadadeʿezer wayotseʾ ʾet־ʾaram ʾasher meʿever hanahar wayavoʾu ḥeylam weshowvakhe sar־tsevaʾ hadadeʿezer lifeneyhem׃

¹⁷ וַיֻּגַּ֣ד לְדָוִ֗ד ס וַיֶּאֱסֹ֤ף אֶת־כָּל־יִשְׂרָאֵל֙ וַיַּעֲבֹ֣ר אֶת־הַיַּרְדֵּ֔ן וַיָּבֹ֖א חֵלָ֑אמָה וַיַּעַרְכ֤וּ אֲרָם֙ לִקְרַ֣את דָּוִ֔ד וַיִּלָּחֲמ֖וּ עִמֹּֽו׃ wayugad ledawid s wayeʾesof ʾet־kal־yiseraʾel wayaʿavor ʾet־hayareden wayavoʾ ḥelaʾmah wayaʿarekhu ʾaram liqeraʾt dawid wayilaḥamu ʿimow׃

¹⁸ וַיָּ֣נָס אֲרָם֮ מִפְּנֵ֣י יִשְׂרָאֵל֒ וַיַּהֲרֹ֨ג דָּוִ֜ד מֵאֲרָ֗ם שְׁבַ֤ע מֵאֹות֙ רֶ֔כֶב וְאַרְבָּעִ֥ים אֶ֖לֶף פָּרָשִׁ֑ים וְאֵ֨ת שֹׁובַ֧ךְ שַׂר־צְבָאֹ֛ו הִכָּ֖ה וַיָּ֥מָת שָֽׁם׃ wayanas ʾaram mipeney yiseraʾel wayaharog dawid meʾaram shevaʿ meʾowt rekhev weʾarebaʿiym ʾelef parashiym weʾet showvakhe sar־tsevaʾow hikah wayamat sham׃

¹⁹ וַיִּרְא֨וּ כָֽל־הַמְּלָכִ֜ים עַבְדֵ֣י הֲדַדְעֶ֗זֶר כִּ֤י נִגְּפוּ֙ לִפְנֵ֣י יִשְׂרָאֵ֔ל וַיַּשְׁלִ֥מוּ אֶת־יִשְׂרָאֵ֖ל וַיַּֽעַבְד֑וּם וַיִּֽרְא֣וּ אֲרָ֔ם לְהֹושִׁ֥יעַ עֹ֖וד אֶת־בְּנֵ֥י עַמֹּֽון׃ פ wayireʾu khal־hamelakhiym ʿavedey hadadeʿezer kiy nigefu lifeney yiseraʾel wayashelimu ʾet־yiseraʾel wayaʿavedum wayireʾu ʾaram lehowshiyʿa ʿowd ʾet־beney ʿamown׃ f