2 Samuel 5

¹ וַיָּבֹ֜אוּ כָּל־שִׁבְטֵ֧י יִשְׂרָאֵ֛ל אֶל־דָּוִ֖ד חֶבְרֹ֑ונָה וַיֹּאמְר֣וּ לֵאמֹ֔ר הִנְנ֛וּ עַצְמְךָ֥ וּֽבְשָׂרְךָ֖ אֲנָֽחְנוּ׃ wayavoʾu kal־shiveṭey yiseraʾel ʾel־dawid ḥeverownah wayoʾmeru leʾmor hinenu ʿatsemekha uvesarekha ʾanaḥenu׃

² גַּם־אֶתְמֹ֣ול גַּם־שִׁלְשֹׁ֗ום בִּהְיֹ֨ות שָׁא֥וּל מֶ֙לֶךְ֙ עָלֵ֔ינוּ אַתָּ֗ה [הָיִיתָה כ] (הָיִ֛יתָ ק) [מֹוצִיא כ] (הַמֹּוצִ֥יא ק) [וְהַמֵּבִי כ] (וְהַמֵּבִ֖יא ק) אֶת־יִשְׂרָאֵ֑ל וַיֹּ֨אמֶר יְהוָ֜ה לְךָ֗ אַתָּ֨ה תִרְעֶ֤ה אֶת־עַמִּי֙ אֶת־יִשְׂרָאֵ֔ל וְאַתָּ֛ה תִּהְיֶ֥ה לְנָגִ֖יד עַל־יִשְׂרָאֵֽל׃ gam־ʾetemowl gam־shileshowm biheyowt shaʾul melekhe ʿaleynu ʾatah [hayiytah kh] (hayiyta q) [mowtsiyʾ kh] (hamowtsiyʾ q) [wehameviy kh] (wehameviyʾ q) ʾet־yiseraʾel wayoʾmer yehwah lekha ʾatah tireʿeh ʾet־ʿamiy ʾet־yiseraʾel weʾatah tiheyeh lenagiyd ʿal־yiseraʾel׃

³ וַ֠יָּבֹאוּ כָּל־זִקְנֵ֨י יִשְׂרָאֵ֤ל אֶל־הַמֶּ֙לֶךְ֙ חֶבְרֹ֔ונָה וַיִּכְרֹ֣ת לָהֶם֩ הַמֶּ֨לֶךְ דָּוִ֥ד בְּרִ֛ית בְּחֶבְרֹ֖ון לִפְנֵ֣י יְהוָ֑ה וַיִּמְשְׁח֧וּ אֶת־דָּוִ֛ד לְמֶ֖לֶךְ עַל־יִשְׂרָאֵֽל׃ פ wayavoʾu kal־ziqeney yiseraʾel ʾel־hamelekhe ḥeverownah wayikherot lahem hamelekhe dawid beriyt beḥeverown lifeney yehwah wayimesheḥu ʾet־dawid lemelekhe ʿal־yiseraʾel׃ f

⁴ בֶּן־שְׁלֹשִׁ֥ים שָׁנָ֛ה דָּוִ֖ד בְּמָלְכֹ֑ו אַרְבָּעִ֥ים שָׁנָ֖ה מָלָֽךְ׃ ben־sheloshiym shanah dawid bemalekhow ʾarebaʿiym shanah malakhe׃

⁵ בְּחֶבְרֹון֙ מָלַ֣ךְ עַל־יְהוּדָ֔ה שֶׁ֥בַע שָׁנִ֖ים וְשִׁשָּׁ֣ה חֳדָשִׁ֑ים וּבִירוּשָׁלִַ֣ם מָלַ֗ךְ שְׁלֹשִׁ֤ים וְשָׁלֹשׁ֙ שָׁנָ֔ה עַ֥ל כָּל־יִשְׂרָאֵ֖ל וִיהוּדָֽה׃ beḥeverown malakhe ʿal־yehudah shevaʿ shaniym weshishah ḥodashiym uviyrushalim malakhe sheloshiym weshalosh shanah ʿal kal־yiseraʾel wiyhudah׃

⁶ וַיֵּ֨לֶךְ הַמֶּ֤לֶךְ וַֽאֲנָשָׁיו֙ יְר֣וּשָׁלִַ֔ם אֶל־הַיְבֻסִ֖י יֹושֵׁ֣ב הָאָ֑רֶץ וַיֹּ֨אמֶר לְדָוִ֤ד לֵאמֹר֙ לֹא־תָבֹ֣וא הֵ֔נָּה כִּ֣י אִם־הֱסִֽירְךָ֗ הַעִוְרִ֤ים וְהַפִּסְחִים֙ לֵאמֹ֔ר לֹֽא־יָבֹ֥וא דָוִ֖ד הֵֽנָּה׃ wayelekhe hamelekhe waʾanashayw yerushalim ʾel־hayevusiy yowshev haʾarets wayoʾmer ledawid leʾmor loʾ־tavowʾ henah kiy ʾim־hesiyrekha haʿiweriym wehapiseḥiym leʾmor loʾ־yavowʾ dawid henah׃

⁷ וַיִּלְכֹּ֣ד דָּוִ֔ד אֵ֖ת מְצֻדַ֣ת צִיֹּ֑ון הִ֖יא עִ֥יר דָּוִֽד׃ wayilekod dawid ʾet metsudat tsiyown hiyʾ ʿiyr dawid׃

⁸ וַיֹּ֨אמֶר דָּוִ֜ד בַּיֹּ֣ום הַה֗וּא כָּל־מַכֵּ֤ה יְבֻסִי֙ וְיִגַּ֣ע בַּצִּנֹּ֔ור וְאֶת־הַפִּסְחִים֙ וְאֶת־הַ֣עִוְרִ֔ים [שְׂנֹאו כ] (שְׂנֻאֵ֖י ק) נֶ֣פֶשׁ דָּוִ֑ד עַל־כֵּן֙ יֹֽאמְר֔וּ עִוֵּ֣ר וּפִסֵּ֔חַ לֹ֥א יָבֹ֖וא אֶל־הַבָּֽיִת׃ wayoʾmer dawid bayowm hahuʾ kal־makeh yevusiy weyigaʿ batsinowr weʾet־hapiseḥiym weʾet־haʿiweriym [senoʾw kh] (senuʾey q) nefesh dawid ʿal־ken yoʾmeru ʿiuer ufiseaḥ loʾ yavowʾ ʾel־habayit׃

⁹ וַיֵּ֤שֶׁב דָּוִד֙ בַּמְּצֻדָ֔ה וַיִּקְרָא־לָ֖הּ עִ֣יר דָּוִ֑ד וַיִּ֤בֶן דָּוִד֙ סָבִ֔יב מִן־הַמִּלֹּ֖וא וָבָֽיְתָה׃ wayeshev dawid bametsudah wayiqeraʾ־lah ʿiyr dawid wayiven dawid saviyv min־hamilowʾ wavayetah׃

¹⁰ וַיֵּ֥לֶךְ דָּוִ֖ד הָלֹ֣וךְ וְגָדֹ֑ול וַיהוָ֛ה אֱלֹהֵ֥י צְבָאֹ֖ות עִמֹּֽו׃ פ wayelekhe dawid halowkhe wegadowl wayhwah ʾelohey tsevaʾowt ʿimow׃ f

¹¹ וַ֠יִּשְׁלַח חִירָ֨ם מֶֽלֶךְ־צֹ֥ר מַלְאָכִים֮ אֶל־דָּוִד֒ וַעֲצֵ֣י אֲרָזִ֔ים וְחָרָשֵׁ֣י עֵ֔ץ וְחָֽרָשֵׁ֖י אֶ֣בֶן קִ֑יר וַיִּבְנֽוּ־בַ֖יִת לְדָוִֽד׃ wayishelaḥ ḥiyram melekhe־tsor maleʾakhiym ʾel־dawid waʿatsey ʾaraziym weḥarashey ʿets weḥarashey ʾeven qiyr wayivenu־vayit ledawid׃

¹² וַיֵּ֣דַע דָּוִ֔ד כִּֽי־הֱכִינֹ֧ו יְהוָ֛ה לְמֶ֖לֶךְ עַל־יִשְׂרָאֵ֑ל וְכִי֙ נִשֵּׂ֣א מַמְלַכְתֹּ֔ו בַּעֲב֖וּר עַמֹּ֥ו יִשְׂרָאֵֽל׃ ס wayedaʿ dawid kiy־hekhiynow yehwah lemelekhe ʿal־yiseraʾel wekhiy niseʾ mamelakhetow baʿavur ʿamow yiseraʾel׃ s

¹³ וַיִּקַּח֩ דָּוִ֨ד עֹ֜וד פִּֽלַגְשִׁ֤ים וְנָשִׁים֙ מִיר֣וּשָׁלִַ֔ם אַחֲרֵ֖י בֹּאֹ֣ו מֵחֶבְרֹ֑ון וַיִּוָּ֥לְדוּ עֹ֛וד לְדָוִ֖ד בָּנִ֥ים וּבָנֹֽות׃ wayiqaḥ dawid ʿowd pilageshiym wenashiym miyrushalim ʾaḥarey boʾow meḥeverown wayiualedu ʿowd ledawid baniym uvanowt׃

¹⁴ וְאֵ֗לֶּה שְׁמֹ֛ות הַיִּלֹּדִ֥ים לֹ֖ו בִּירוּשָׁלִָ֑ם שַׁמּ֣וּעַ וְשֹׁובָ֔ב וְנָתָ֖ן וּשְׁלֹמֹֽה׃ weʾeleh shemowt hayilodiym low biyrushalim shamuaʿ weshowvav wenatan ushelomoh׃

¹⁵ וְיִבְחָ֥ר וֶאֱלִישׁ֖וּעַ וְנֶ֥פֶג וְיָפִֽיעַ׃ weyiveḥar weʾeliyshuaʿ wenefeg weyafiyʿa׃

¹⁶ וֶאֱלִישָׁמָ֥ע וְאֶלְיָדָ֖ע וֶאֱלִיפָֽלֶט׃ פ weʾeliyshamaʿ weʾeleyadaʿ weʾeliyfaleṭ׃ f

¹⁷ וַיִּשְׁמְע֣וּ פְלִשְׁתִּ֗ים כִּי־מָשְׁח֨וּ אֶת־דָּוִ֤ד לְמֶ֙לֶךְ֙ עַל־יִשְׂרָאֵ֔ל וַיַּעֲל֥וּ כָל־פְּלִשְׁתִּ֖ים לְבַקֵּ֣שׁ אֶת־דָּוִ֑ד וַיִּשְׁמַ֣ע דָּוִ֔ד וַיֵּ֖רֶד אֶל־הַמְּצוּדָֽה׃ wayishemeʿu felishetiym kiy־masheḥu ʾet־dawid lemelekhe ʿal־yiseraʾel wayaʿalu khal־pelishetiym levaqesh ʾet־dawid wayishemaʿ dawid wayered ʾel־hametsudah׃

¹⁸ וּפְלִשְׁתִּ֖ים בָּ֑אוּ וַיִּנָּטְשׁ֖וּ בְּעֵ֥מֶק רְפָאִֽים׃ ufelishetiym baʾu wayinaṭeshu beʿemeq refaʾiym׃

¹⁹ וַיִּשְׁאַ֨ל דָּוִ֤ד בַּֽיהוָה֙ לֵאמֹ֔ר הַאֶֽעֱלֶה֙ אֶל־פְּלִשְׁתִּ֔ים הֲתִתְּנֵ֖ם בְּיָדִ֑י וַיֹּ֨אמֶר יְהוָ֤ה אֶל־דָּוִד֙ עֲלֵ֔ה כִּֽי־נָתֹ֥ן אֶתֵּ֛ן אֶת־הַפְּלִשְׁתִּ֖ים בְּיָדֶֽךָ׃ wayisheʾal dawid bayhwah leʾmor haʾeʿeleh ʾel־pelishetiym hatitenem beyadiy wayoʾmer yehwah ʾel־dawid ʿaleh kiy־naton ʾeten ʾet־hapelishetiym beyadekha׃

²⁰ וַיָּבֹ֨א דָוִ֥ד בְּבַֽעַל־פְּרָצִים֮ וַיַּכֵּ֣ם שָׁ֣ם דָּוִד֒ וַיֹּ֕אמֶר פָּרַ֨ץ יְהוָ֧ה אֶת־אֹיְבַ֛י לְפָנַ֖י כְּפֶ֣רֶץ מָ֑יִם עַל־כֵּ֗ן קָרָ֛א שֵֽׁם־הַמָּקֹ֥ום הַה֖וּא בַּ֥עַל פְּרָצִֽים׃ wayavoʾ dawid bevaʿal־peratsiym wayakem sham dawid wayoʾmer parats yehwah ʾet־ʾoyevay lefanay keferets mayim ʿal־ken qaraʾ shem־hamaqowm hahuʾ baʿal peratsiym׃

²¹ וַיַּעַזְבוּ־שָׁ֖ם אֶת־עֲצַבֵּיהֶ֑ם וַיִּשָּׂאֵ֥ם דָּוִ֖ד וַאֲנָשָֽׁיו׃ פ wayaʿazevu־sham ʾet־ʿatsabeyhem wayisaʾem dawid waʾanashayw׃ f

²² וַיֹּסִ֥פוּ עֹ֛וד פְּלִשְׁתִּ֖ים לַֽעֲלֹ֑ות וַיִּנָּֽטְשׁ֖וּ בְּעֵ֥מֶק רְפָאִֽים׃ wayosifu ʿowd pelishetiym laʿalowt wayinaṭeshu beʿemeq refaʾiym׃

²³ וַיִּשְׁאַ֤ל דָּוִד֙ בַּֽיהוָ֔ה וַיֹּ֖אמֶר לֹ֣א תַעֲלֶ֑ה הָסֵב֙ אֶל־אַ֣חֲרֵיהֶ֔ם וּבָ֥אתָ לָהֶ֖ם מִמּ֥וּל בְּכָאִֽים׃ wayisheʾal dawid bayhwah wayoʾmer loʾ taʿaleh hasev ʾel־ʾaḥareyhem uvaʾta lahem mimul bekhaʾiym׃

²⁴ וִ֠יהִי [בְּשָׁמְעֲךָ כ] (כְּֽשָׁמְעֲךָ֞ ק) אֶת־קֹ֧ול צְעָדָ֛ה בְּרָאשֵׁ֥י הַבְּכָאִ֖ים אָ֣ז תֶּחֱרָ֑ץ כִּ֣י אָ֗ז יָצָ֤א יְהוָה֙ לְפָנֶ֔יךָ לְהַכֹּ֖ות בְּמַחֲנֵ֥ה פְלִשְׁתִּֽים׃ wiyhiy [beshameʿakha kh] (keshameʿakha q) ʾet־qowl tseʿadah beraʾshey habekhaʾiym ʾaz teḥerats kiy ʾaz yatsaʾ yehwah lefaneykha lehakowt bemaḥaneh felishetiym׃

²⁵ וַיַּ֤עַשׂ דָּוִד֙ כֵּ֔ן כַּאֲשֶׁ֥ר צִוָּ֖הוּ יְהוָ֑ה וַיַּךְ֙ אֶת־פְּלִשְׁתִּ֔ים מִגֶּ֖בַע עַד־בֹּאֲךָ֥ גָֽזֶר׃ פ wayaʿas dawid ken kaʾasher tsiuahu yehwah wayakhe ʾet־pelishetiym migevaʿ ʿad־boʾakha gazer׃ f