Job 19

¹ וַיַּ֥עַן אִיֹּ֗וב וַיֹּאמַֽר׃ wayaʿan ʾiyowv wayoʾmar׃

² עַד־אָ֭נָה תֹּוגְי֣וּן נַפְשִׁ֑י וּֽתְדַכְּאוּנַ֥נִי בְמִלִּֽים׃ ʿad־ʾanah towgeyun nafeshiy utedakeʾunaniy vemiliym׃

³ זֶ֤ה עֶ֣שֶׂר פְּ֭עָמִים תַּכְלִימ֑וּנִי לֹֽא־תֵ֝בֹ֗שׁוּ תַּהְכְּרוּ־לִֽי׃ zeh ʿeser peʿamiym takheliymuniy loʾ־tevoshu tahekeru־liy׃

⁴ וְאַף־אָמְנָ֥ם שָׁגִ֑יתִי אִ֝תִּ֗י תָּלִ֥ין מְשׁוּגָתִֽי׃ weʾaf־ʾamenam shagiytiy ʾitiy taliyn meshugatiy׃

⁵ אִם־אָ֭מְנָם עָלַ֣י תַּגְדִּ֑ילוּ וְתֹוכִ֥יחוּ עָ֝לַ֗י חֶרְפָּתִּֽי ׃ ʾim־ʾamenam ʿalay tagediylu wetowkhiyḥu ʿalay ḥerepatiy ׃

⁶ דְּֽעוּ־אֵ֭פֹו כִּי־אֱלֹ֣והַּ עִוְּתָ֑נִי וּ֝מְצוּדֹ֗ו עָלַ֥י הִקִּֽיף׃ deʿu־ʾefow kiy־ʾelowha ʿiuetaniy umetsudow ʿalay hiqiyf׃

⁷ הֵ֤ן אֶצְעַ֣ק חָ֭מָס וְלֹ֣א אֵעָנֶ֑ה אֲ֝שַׁוַּ֗ע וְאֵ֣ין מִשְׁפָּֽט׃ hen ʾetseʿaq ḥamas weloʾ ʾeʿaneh ʾashauaʿ weʾeyn mishepaṭ׃

⁸ אָרְחִ֣י גָ֭דַר וְלֹ֣א אֶעֱבֹ֑ור וְעַ֥ל נְ֝תִיבֹותַ֗י חֹ֣שֶׁךְ יָשִֽׂים׃ ʾareḥiy gadar weloʾ ʾeʿevowr weʿal netiyvowtay ḥoshekhe yasiym׃

⁹ כְּ֭בֹודִי מֵעָלַ֣י הִפְשִׁ֑יט וַ֝יָּ֗סַר עֲטֶ֣רֶת רֹאשִֽׁי׃ kevowdiy meʿalay hifeshiyṭ wayasar ʿaṭeret roʾshiy׃

¹⁰ יִתְּצֵ֣נִי סָ֭בִיב וָאֵלַ֑ךְ וַיַּסַּ֥ע כָּ֝עֵ֗ץ תִּקְוָתִֽי׃ yitetseniy saviyv waʾelakhe wayasaʿ kaʿets tiqewatiy׃

¹¹ וַיַּ֣חַר עָלַ֣י אַפֹּ֑ו וַיַּחְשְׁבֵ֖נִי לֹ֣ו כְצָרָֽיו׃ wayaḥar ʿalay ʾapow wayaḥesheveniy low khetsarayw׃

¹² יַ֤חַד ׀ יָ֘בֹ֤אוּ גְדוּדָ֗יו וַיָּסֹ֣לּוּ עָלַ֣י דַּרְכָּ֑ם וַיַּחֲנ֖וּ סָבִ֣יב לְאָהֳלִֽי׃ yaḥad ׀ yavoʾu gedudayw wayasolu ʿalay darekam wayaḥanu saviyv leʾaholiy׃

¹³ אַ֭חַי מֵעָלַ֣י הִרְחִ֑יק וְ֝יֹדְעַ֗י אַךְ־זָ֥רוּ מִמֶּֽנִּי׃ ʾaḥay meʿalay hireḥiyq weyodeʿay ʾakhe־zaru mimeniy׃

¹⁴ חָדְל֥וּ קְרֹובָ֑י וּֽמְיֻדָּעַ֥י שְׁכֵחֽוּנִי׃ ḥadelu qerowvay umeyudaʿay shekheḥuniy׃

¹⁵ גָּ֘רֵ֤י בֵיתִ֣י וְ֭אַמְהֹתַי לְזָ֣ר תַּחְשְׁבֻ֑נִי נָ֝כְרִ֗י הָיִ֥יתִי בְעֵינֵיהֶֽם׃ garey veytiy weʾamehotay lezar taḥeshevuniy nakheriy hayiytiy veʿeyneyhem׃

¹⁶ לְעַבְדִּ֣י קָ֭רָאתִי וְלֹ֣א יַעֲנֶ֑ה בְּמֹו־פִ֝֗י אֶתְחַנֶּן־לֹֽו׃ leʿavediy qaraʾtiy weloʾ yaʿaneh bemow־fiy ʾeteḥanen־low׃

¹⁷ ר֭וּחִֽי זָ֣רָה לְאִשְׁתִּ֑י וְ֝חַנֹּתִ֗י לִבְנֵ֥י בִטְנִֽי׃ ruḥiy zarah leʾishetiy weḥanotiy liveney viṭeniy׃

¹⁸ גַּם־עֲ֭וִילִים מָ֣אֲסוּ בִ֑י אָ֝ק֗וּמָה וַיְדַבְּרוּ־בִֽי׃ gam־ʿawiyliym maʾasu viy ʾaqumah wayedaberu־viy׃

¹⁹ תִּֽ֭עֲבוּנִי כָּל־מְתֵ֣י סֹודִ֑י וְזֶֽה־אָ֝הַ֗בְתִּי נֶהְפְּכוּ־בִֽי׃ tiʿavuniy kal־metey sowdiy wezeh־ʾahavetiy nehepekhu־viy׃

²⁰ בְּעֹורִ֣י וּ֭בִבְשָׂרִי דָּבְקָ֣ה עַצְמִ֑י וָ֝אֶתְמַלְּטָ֗ה בְּעֹ֣ור שִׁנָּֽי׃ beʿowriy uvivesariy daveqah ʿatsemiy waʾetemaleṭah beʿowr shinay׃

²¹ חָנֻּ֬נִי חָנֻּ֣נִי אַתֶּ֣ם רֵעָ֑י כִּ֥י יַד־אֱ֝לֹ֗והַּ נָ֣גְעָה בִּֽי׃ ḥanuniy ḥanuniy ʾatem reʿay kiy yad־ʾelowha nageʿah biy׃

²² לָ֭מָּה תִּרְדְּפֻ֣נִי כְמֹו־אֵ֑ל וּ֝מִבְּשָׂרִ֗י לֹ֣א תִשְׂבָּֽעוּ׃ lamah tiredefuniy khemow־ʾel umibesariy loʾ tisebaʿu׃

²³ מִֽי־יִתֵּ֣ן אֵ֭פֹו וְיִכָּתְב֣וּן מִלָּ֑י מִֽי־יִתֵּ֖ן בַּסֵּ֣פֶר וְיֻחָֽקוּ׃ miy־yiten ʾefow weyikatevun milay miy־yiten basefer weyuḥaqu׃

²⁴ בְּעֵט־בַּרְזֶ֥ל וְעֹפָ֑רֶת לָ֝עַ֗ד בַּצּ֥וּר יֵחָצְבֽוּן׃ beʿeṭ־barezel weʿofaret laʿad batsur yeḥatsevun׃

²⁵ וַאֲנִ֣י יָ֭דַעְתִּי גֹּ֣אֲלִי חָ֑י וְ֝אַחֲרֹ֗ון עַל־עָפָ֥ר יָקֽוּם׃ waʾaniy yadaʿetiy goʾaliy ḥay weʾaḥarown ʿal־ʿafar yaqum׃

²⁶ וְאַחַ֣ר עֹ֖ורִֽי נִקְּפוּ־זֹ֑את וּ֝מִבְּשָׂרִ֗י אֶֽחֱזֶ֥ה אֱלֹֽוהַּ׃ weʾaḥar ʿowriy niqefu־zoʾt umibesariy ʾeḥezeh ʾelowha׃

²⁷ אֲשֶׁ֤ר אֲנִ֨י ׀ אֶֽחֱזֶה־לִּ֗י וְעֵינַ֣י רָא֣וּ וְלֹא־זָ֑ר כָּל֖וּ כִלְיֹתַ֣י בְּחֵקִֽי׃ ʾasher ʾaniy ׀ ʾeḥezeh־liy weʿeynay raʾu weloʾ־zar kalu khileyotay beḥeqiy׃

²⁸ כִּ֣י תֹ֖אמְרוּ מַה־נִּרְדָּף־לֹ֑ו וְשֹׁ֥רֶשׁ דָּ֝בָ֗ר נִמְצָא־בִֽי׃ kiy toʾmeru mah־niredaf־low weshoresh davar nimetsaʾ־viy׃

²⁹ גּ֤וּרוּ לָכֶ֨ם ׀ מִפְּנֵי־חֶ֗רֶב כִּֽי־חֵ֭מָה עֲוֹנֹ֣ות חָ֑רֶב לְמַ֖עַן תֵּדְע֣וּן [שַׁדִּין כ] (שַׁדּֽוּן׃ ק) ס guru lakhem ׀ mipeney־ḥerev kiy־ḥemah ʿaonowt ḥarev lemaʿan tedeʿun [shadiyn kh] (shadun׃ q) s