1 הֹ֚וי אֲרִיאֵ֣ל אֲרִיאֵ֔ל קִרְיַ֖ת חָנָ֣ה דָוִ֑ד סְפ֥וּ שָׁנָ֛ה עַל־שָׁנָ֖ה חַגִּ֥ים יִנְקֹֽפוּ׃ howy ʾariyʾel ʾariyʾel qireyat ḥanah dawid sefu shanah ʿal־shanah ḥagiym yineqofu׃
2 וַהֲצִיקֹ֖ותִי לַֽאֲרִיאֵ֑ל וְהָיְתָ֤ה תַֽאֲנִיָּה֙ וַֽאֲנִיָּ֔ה וְהָ֥יְתָה לִּ֖י כַּאֲרִיאֵֽל׃ wahatsiyqowtiy laʾariyʾel wehayetah taʾaniyah waʾaniyah wehayetah liy kaʾariyʾel׃
3 וְחָנִ֥יתִי כַדּ֖וּר עָלָ֑יִךְ וְצַרְתִּ֤י עָלַ֙יִךְ֙ מֻצָּ֔ב וַהֲקִֽימֹתִ֥י עָלַ֖יִךְ מְצֻרֹֽת׃ weḥaniytiy khadur ʿalayikhe wetsaretiy ʿalayikhe mutsav wahaqiymotiy ʿalayikhe metsurot׃
4 וְשָׁפַלְתְּ֙ מֵאֶ֣רֶץ תְּדַבֵּ֔רִי וּמֵֽעָפָ֖ר תִּשַּׁ֣ח אִמְרָתֵ֑ךְ וְֽ֠הָיָה כְּאֹ֤וב מֵאֶ֙רֶץ֙ קֹולֵ֔ךְ וּמֵעָפָ֖ר אִמְרָתֵ֥ךְ תְּצַפְצֵֽף׃ weshafalete meʾerets tedaberiy umeʿafar tishaḥ ʾimeratekhe wehayah keʾowv meʾerets qowlekhe umeʿafar ʾimeratekhe tetsafetsef׃
5 וְהָיָ֛ה כְּאָבָ֥ק דַּ֖ק הֲמֹ֣ון זָרָ֑יִךְ וּכְמֹ֤ץ עֹבֵר֙ הֲמֹ֣ון עָֽרִיצִ֔ים וְהָיָ֖ה לְפֶ֥תַע פִּתְאֹֽם׃ wehayah keʾavaq daq hamown zarayikhe ukhemots ʿover hamown ʿariytsiym wehayah lefetaʿ piteʾom׃
6 מֵעִ֨ם יְהוָ֤ה צְבָאֹות֙ תִּפָּקֵ֔ד בְּרַ֥עַם וּבְרַ֖עַשׁ וְקֹ֣ול גָּדֹ֑ול סוּפָה֙ וּסְעָרָ֔ה וְלַ֖הַב אֵ֥שׁ אֹוכֵלָֽה׃ meʿim yehwah tsevaʾowt tipaqed beraʿam uveraʿash weqowl gadowl sufah useʿarah welahav ʾesh ʾowkhelah׃
7 וְהָיָ֗ה כַּֽחֲלֹום֙ חֲזֹ֣ון לַ֔יְלָה הֲמֹון֙ כָּל־הַגֹּויִ֔ם הַצֹּבְאִ֖ים עַל־אֲרִיאֵ֑ל וְכָל־צֹבֶ֙יהָ֙ וּמְצֹ֣דָתָ֔הּ וְהַמְּצִיקִ֖ים לָֽהּ׃ wehayah kaḥalowm ḥazown layelah hamown kal־hagowyim hatsoveʾiym ʿal־ʾariyʾel wekhal־tsoveyha umetsodatah wehametsiyqiym lah׃
8 וְהָיָ֡ה כַּאֲשֶׁר֩ יַחֲלֹ֨ם הָרָעֵ֜ב וְהִנֵּ֣ה אֹוכֵ֗ל וְהֵקִיץ֮ וְרֵיקָ֣ה נַפְשֹׁו֒ וְכַאֲשֶׁ֨ר יַחֲלֹ֤ם הַצָּמֵא֙ וְהִנֵּ֣ה שֹׁתֶ֔ה וְהֵקִיץ֙ וְהִנֵּ֣ה עָיֵ֔ף וְנַפְשֹׁ֖ו שֹׁוקֵקָ֑ה כֵּ֣ן יִֽהְיֶ֗ה הֲמֹון֙ כָּל־הַגֹּויִ֔ם הַצֹּבְאִ֖ים עַל־הַ֥ר צִיֹּֽון׃ ס wehayah kaʾasher yaḥalom haraʿev wehineh ʾowkhel weheqiyts wereyqah nafeshow wekhaʾasher yaḥalom hatsameʾ wehineh shoteh weheqiyts wehineh ʿayef wenafeshow showqeqah ken yiheyeh hamown kal־hagowyim hatsoveʾiym ʿal־har tsiyown׃ s
9 הִתְמַהְמְה֣וּ וּתְמָ֔הוּ הִשְׁתַּֽעַשְׁע֖וּ וָשֹׁ֑עוּ שָֽׁכְר֣וּ וְלֹא־יַ֔יִן נָע֖וּ וְלֹ֥א שֵׁכָֽר׃ hitemahemehu utemahu hishetaʿasheʿu washoʿu shakheru weloʾ־yayin naʿu weloʾ shekhar׃
10 כִּֽי־נָסַ֨ךְ עֲלֵיכֶ֤ם יְהוָה֙ ר֣וּחַ תַּרְדֵּמָ֔ה וַיְעַצֵּ֖ם אֶת־עֵֽינֵיכֶ֑ם אֶת־הַנְּבִיאִ֛ים וְאֶת־רָאשֵׁיכֶ֥ם הַחֹזִ֖ים כִּסָּֽה׃ kiy־nasakhe ʿaleykhem yehwah ruaḥ taredemah wayeʿatsem ʾet־ʿeyneykhem ʾet־haneviyʾiym weʾet־raʾsheykhem haḥoziym kisah׃
11 וַתְּהִ֨י לָכֶ֜ם חָז֣וּת הַכֹּ֗ל כְּדִבְרֵי֮ הַסֵּ֣פֶר הֶֽחָתוּם֒ אֲשֶֽׁר־יִתְּנ֣וּ אֹתֹ֗ו אֶל־יֹודֵ֥עַ [הַסֵּפֶר כ] (סֵ֛פֶר ק) לֵאמֹ֖ר קְרָ֣א נָא־זֶ֑ה וְאָמַר֙ לֹ֣א אוּכַ֔ל כִּ֥י חָת֖וּם הֽוּא׃ watehiy lakhem ḥazut hakol kediverey hasefer heḥatum ʾasher־yitenu ʾotow ʾel־yowdeaʿ [hasefer kh] (sefer q) leʾmor qeraʾ naʾ־zeh weʾamar loʾ ʾukhal kiy ḥatum huʾ׃
12 וְנִתַּ֣ן הַסֵּ֗פֶר עַל֩ אֲשֶׁ֨ר לֹֽא־יָדַ֥ע סֵ֛פֶר לֵאמֹ֖ר קְרָ֣א נָא־זֶ֑ה וְאָמַ֕ר לֹ֥א יָדַ֖עְתִּי סֵֽפֶר׃ ס wenitan hasefer ʿal ʾasher loʾ־yadaʿ sefer leʾmor qeraʾ naʾ־zeh weʾamar loʾ yadaʿetiy sefer׃ s
13 וַיֹּ֣אמֶר אֲדֹנָ֗י יַ֚עַן כִּ֤י נִגַּשׁ֙ הָעָ֣ם הַזֶּ֔ה בְּפִ֤יו וּבִשְׂפָתָיו֙ כִּבְּד֔וּנִי וְלִבֹּ֖ו רִחַ֣ק מִמֶּ֑נִּי וַתְּהִ֤י יִרְאָתָם֙ אֹתִ֔י מִצְוַ֥ת אֲנָשִׁ֖ים מְלֻמָּדָֽה׃ wayoʾmer ʾadonay yaʿan kiy nigash haʿam hazeh befiyw uvisefatayw kibeduniy welibow riḥaq mimeniy watehiy yireʾatam ʾotiy mitsewat ʾanashiym melumadah׃
14 לָכֵ֗ן הִנְנִ֥י יֹוסִ֛ף לְהַפְלִ֥יא אֶת־הָֽעָם־הַזֶּ֖ה הַפְלֵ֣א וָפֶ֑לֶא וְאָֽבְדָה֙ חָכְמַ֣ת חֲכָמָ֔יו וּבִינַ֥ת נְבֹנָ֖יו תִּסְתַּתָּֽר׃ ס lakhen hineniy yowsif lehafeliyʾ ʾet־haʿam־hazeh hafeleʾ wafeleʾ weʾavedah ḥakhemat ḥakhamayw uviynat nevonayw tisetatar׃ s
15 הֹ֛וי הַמַּעֲמִיקִ֥ים מֵֽיהוָ֖ה לַסְתִּ֣ר עֵצָ֑ה וְהָיָ֤ה בְמַחְשָׁךְ֙ מַֽעֲשֵׂיהֶ֔ם וַיֹּ֣אמְר֔וּ מִ֥י רֹאֵ֖נוּ וּמִ֥י יֹודְעֵֽנוּ׃ howy hamaʿamiyqiym meyhwah lasetir ʿetsah wehayah vemaḥeshakhe maʿaseyhem wayoʾmeru miy roʾenu umiy yowdeʿenu׃
16 הַ֨פְכְּכֶ֔ם אִם־כְּחֹ֥מֶר הַיֹּצֵ֖ר יֵֽחָשֵׁ֑ב כִּֽי־יֹאמַ֨ר מַעֲשֶׂ֤ה לְעֹשֵׂ֙הוּ֙ לֹ֣א עָשָׂ֔נִי וְיֵ֛צֶר אָמַ֥ר לְיֹוצְרֹ֖ו לֹ֥א הֵבִֽין׃ hafekekhem ʾim־keḥomer hayotser yeḥashev kiy־yoʾmar maʿaseh leʿosehu loʾ ʿasaniy weyetser ʾamar leyowtserow loʾ heviyn׃
17 הֲלֹוא־עֹוד֙ מְעַ֣ט מִזְעָ֔ר וְשָׁ֥ב לְבָנֹ֖ון לַכַּרְמֶ֑ל וְהַכַּרְמֶ֖ל לַיַּ֥עַר יֵחָשֵֽׁב׃ halowʾ־ʿowd meʿaṭ mizeʿar weshav levanown lakaremel wehakaremel layaʿar yeḥashev׃
18 וְשָׁמְע֧וּ בַיֹּום־הַה֛וּא הַחֵרְשִׁ֖ים דִּבְרֵי־סֵ֑פֶר וּמֵאֹ֣פֶל וּמֵחֹ֔שֶׁךְ עֵינֵ֥י עִוְרִ֖ים תִּרְאֶֽינָה׃ weshameʿu vayowm־hahuʾ haḥereshiym diverey־sefer umeʾofel umeḥoshekhe ʿeyney ʿiweriym tireʾeynah׃
19 וְיָסְפ֧וּ עֲנָוִ֛ים בַּֽיהוָ֖ה שִׂמְחָ֑ה וְאֶבְיֹונֵ֣י אָדָ֔ם בִּקְדֹ֥ושׁ יִשְׂרָאֵ֖ל יָגִֽילוּ׃ weyasefu ʿanawiym bayhwah simeḥah weʾeveyowney ʾadam biqedowsh yiseraʾel yagiylu׃
20 כִּֽי־אָפֵ֥ס עָרִ֖יץ וְכָ֣לָה לֵ֑ץ וְנִכְרְת֖וּ כָּל־שֹׁ֥קְדֵי אָֽוֶן׃ kiy־ʾafes ʿariyts wekhalah lets wenikheretu kal־shoqedey ʾawen׃
21 מַחֲטִיאֵ֤י אָדָם֙ בְּדָבָ֔ר וְלַמֹּוכִ֥יחַ בַּשַּׁ֖עַר יְקֹשׁ֑וּן וַיַּטּ֥וּ בַתֹּ֖הוּ צַדִּֽיק׃ ס maḥaṭiyʾey ʾadam bedavar welamowkhiyḥa bashaʿar yeqoshun wayaṭu vatohu tsadiyq׃ s
22 לָכֵ֗ן כֹּֽה־אָמַ֤ר יְהוָה֙ אֶל־בֵּ֣ית יַֽעֲקֹ֔ב אֲשֶׁ֥ר פָּדָ֖ה אֶת־אַבְרָהָ֑ם לֹֽא־עַתָּ֤ה יֵבֹושׁ֙ יַֽעֲקֹ֔ב וְלֹ֥א עַתָּ֖ה פָּנָ֥יו יֶחֱוָֽרוּ׃ lakhen koh־ʾamar yehwah ʾel־beyt yaʿaqov ʾasher padah ʾet־ʾaveraham loʾ־ʿatah yevowsh yaʿaqov weloʾ ʿatah panayw yeḥewaru׃
23 כִּ֣י בִ֠רְאֹתֹו יְלָדָ֞יו מַעֲשֵׂ֥ה יָדַ֛י בְּקִרְבֹּ֖ו יַקְדִּ֣ישֽׁוּ שְׁמִ֑י וְהִקְדִּ֙ישׁוּ֙ אֶת־קְדֹ֣ושׁ יַֽעֲקֹ֔ב וְאֶת־אֱלֹהֵ֥י יִשְׂרָאֵ֖ל יַעֲרִֽיצוּ׃ kiy vireʾotow yeladayw maʿaseh yaday beqirebow yaqediyshu shemiy wehiqediyshu ʾet־qedowsh yaʿaqov weʾet־ʾelohey yiseraʾel yaʿariytsu׃
24 וְיָדְע֥וּ תֹֽעֵי־ר֖וּחַ בִּינָ֑ה וְרֹוגְנִ֖ים יִלְמְדוּ־לֶֽקַח׃ weyadeʿu toʿey־ruaḥ biynah werowgeniym yilemedu־leqaḥ׃