2 Samuel 3

¹ וַתְּהִ֤י הַמִּלְחָמָה֙ אֲרֻכָּ֔ה בֵּ֚ין בֵּ֣ית שָׁא֔וּל וּבֵ֖ין בֵּ֣ית דָּוִ֑ד וְדָוִד֙ הֹלֵ֣ךְ וְחָזֵ֔ק וּבֵ֥ית שָׁא֖וּל הֹלְכִ֥ים וְדַלִּֽים׃ ס watehiy hamileḥamah ʾarukah beyn beyt shaʾul uveyn beyt dawid wedawid holekhe weḥazeq uveyt shaʾul holekhiym wedaliym׃ s

² [וַיֵּלְדוּ כ] (וַיִּוָּלְד֧וּ ק) לְדָוִ֛ד בָּנִ֖ים בְּחֶבְרֹ֑ון וַיְהִ֤י בְכֹורֹו֙ אַמְנֹ֔ון לַאֲחִינֹ֖עַם הַיִּזְרְעֵאלִֽת׃ [wayeledu kh] (wayiualedu q) ledawid baniym beḥeverown wayehiy vekhowrow ʾamenown laʾaḥiynoʿam hayizereʿeʾlit׃

³ וּמִשְׁנֵ֣הוּ כִלְאָ֔ב [לַאֲבִיגֵל כ] (לַאֲֽבִיגַ֕יִל ק) אֵ֖שֶׁת נָבָ֣ל הַֽכַּרְמְלִ֑י וְהַשְּׁלִשִׁי֙ אַבְשָׁלֹ֣ום בֶּֽן־מַעֲכָ֔ה בַּת־תַּלְמַ֖י מֶ֥לֶךְ גְּשֽׁוּר׃ umishenehu khileʾav [laʾaviygel kh] (laʾaviygayil q) ʾeshet naval hakaremeliy wehashelishiy ʾaveshalowm ben־maʿakhah bat־talemay melekhe geshur׃

⁴ וְהָרְבִיעִ֖י אֲדֹנִיָּ֣ה בֶן־חַגִּ֑ית וְהַחֲמִישִׁ֖י שְׁפַטְיָ֥ה בֶן־אֲבִיטָֽל׃ wehareviyʿiy ʾadoniyah ven־ḥagiyt wehaḥamiyshiy shefaṭeyah ven־ʾaviyṭal׃

⁵ וְהַשִּׁשִּׁ֣י יִתְרְעָ֔ם לְעֶגְלָ֖ה אֵ֣שֶׁת דָּוִ֑ד אֵ֛לֶּה יֻלְּד֥וּ לְדָוִ֖ד בְּחֶבְרֹֽון׃ פ wehashishiy yitereʿam leʿegelah ʾeshet dawid ʾeleh yuledu ledawid beḥeverown׃ f

⁶ וַיְהִ֗י בִּֽהְיֹות֙ הַמִּלְחָמָ֔ה בֵּ֚ין בֵּ֣ית שָׁא֔וּל וּבֵ֖ין בֵּ֣ית דָּוִ֑ד וְאַבְנֵ֛ר הָיָ֥ה מִתְחַזֵּ֖ק בְּבֵ֥ית שָׁאֽוּל׃ wayehiy biheyowt hamileḥamah beyn beyt shaʾul uveyn beyt dawid weʾavener hayah miteḥazeq beveyt shaʾul׃

⁷ וּלְשָׁא֣וּל פִּלֶ֔גֶשׁ וּשְׁמָ֖הּ רִצְפָּ֣ה בַת־אַיָּ֑ה וַיֹּ֙אמֶר֙ אֶל־אַבְנֵ֔ר מַדּ֥וּעַ בָּ֖אתָה אֶל־פִּילֶ֥גֶשׁ אָבִֽי׃ uleshaʾul pilegesh ushemah ritsepah vat־ʾayah wayoʾmer ʾel־ʾavener maduaʿ baʾtah ʾel־piylegesh ʾaviy׃

⁸ וַיִּחַר֩ לְאַבְנֵ֨ר מְאֹ֜ד עַל־דִּבְרֵ֣י אִֽישׁ־בֹּ֗שֶׁת וַיֹּ֙אמֶר֙ הֲרֹ֨אשׁ כֶּ֥לֶב אָנֹ֘כִי֮ אֲשֶׁ֣ר לִֽיהוּדָה֒ הַיֹּ֨ום אֶֽעֱשֶׂה־חֶ֜סֶד עִם־בֵּ֣ית ׀ שָׁא֣וּל אָבִ֗יךָ אֶל־אֶחָיו֙ וְאֶל־מֵ֣רֵעֵ֔הוּ וְלֹ֥א הִמְצִיתִ֖ךָ בְּיַד־דָּוִ֑ד וַתִּפְקֹ֥ד עָלַ֛י עֲוֹ֥ן הָאִשָּׁ֖ה הַיֹּֽום׃ wayiḥar leʾavener meʾod ʿal־diverey ʾiysh־boshet wayoʾmer haroʾsh kelev ʾanokhiy ʾasher liyhudah hayowm ʾeʿeseh־ḥesed ʿim־beyt ׀ shaʾul ʾaviykha ʾel־ʾeḥayw weʾel־mereʿehu weloʾ himetsiytikha beyad־dawid watifeqod ʿalay ʿaon haʾishah hayowm׃

⁹ כֹּֽה־יַעֲשֶׂ֤ה אֱלֹהִים֙ לְאַבְנֵ֔ר וְכֹ֖ה יֹסִ֣יף לֹ֑ו כִּ֗י כַּאֲשֶׁ֨ר נִשְׁבַּ֤ע יְהוָה֙ לְדָוִ֔ד כִּֽי־כֵ֖ן אֶֽעֱשֶׂה־לֹּֽו׃ koh־yaʿaseh ʾelohiym leʾavener wekhoh yosiyf low kiy kaʾasher nishebaʿ yehwah ledawid kiy־khen ʾeʿeseh־low׃

¹⁰ לְהַֽעֲבִ֥יר הַמַּמְלָכָ֖ה מִבֵּ֣ית שָׁא֑וּל וּלְהָקִ֞ים אֶת־כִּסֵּ֣א דָוִ֗ד עַל־יִשְׂרָאֵל֙ וְעַל־יְהוּדָ֔ה מִדָּ֖ן וְעַד־בְּאֵ֥ר שָֽׁבַע׃ lehaʿaviyr hamamelakhah mibeyt shaʾul ulehaqiym ʾet־kiseʾ dawid ʿal־yiseraʾel weʿal־yehudah midan weʿad־beʾer shavaʿ׃

¹¹ וְלֹֽא־יָכֹ֣ל עֹ֔וד לְהָשִׁ֥יב אֶת־אַבְנֵ֖ר דָּבָ֑ר מִיִּרְאָתֹ֖ו אֹתֹֽו׃ ס weloʾ־yakhol ʿowd lehashiyv ʾet־ʾavener davar miyireʾatow ʾotow׃ s

¹² וַיִּשְׁלַח֩ אַבְנֵ֨ר מַלְאָכִ֧ים ׀ אֶל־דָּוִ֛ד [תַּחַתֹו כ] (תַּחְתָּ֥יו ק) לֵאמֹ֖ר לְמִי־אָ֑רֶץ לֵאמֹ֗ר כָּרְתָ֤ה בְרִֽיתְךָ֙ אִתִּ֔י וְהִנֵּה֙ יָדִ֣י עִמָּ֔ךְ לְהָסֵ֥ב אֵלֶ֖יךָ אֶת־כָּל־יִשְׂרָאֵֽל׃ wayishelaḥ ʾavener maleʾakhiym ׀ ʾel־dawid [taḥatow kh] (taḥetayw q) leʾmor lemiy־ʾarets leʾmor karetah veriytekha ʾitiy wehineh yadiy ʿimakhe lehasev ʾeleykha ʾet־kal־yiseraʾel׃

¹³ וַיֹּ֣אמֶר טֹ֔וב אֲנִ֕י אֶכְרֹ֥ת אִתְּךָ֖ בְּרִ֑ית אַ֣ךְ דָּבָ֣ר אֶחָ֡ד אָנֹכִי֩ שֹׁאֵ֨ל מֵאִתְּךָ֤ לֵאמֹר֙ לֹא־תִרְאֶ֣ה אֶת־פָּנַ֔י כִּ֣י ׀ אִם־לִפְנֵ֣י הֱבִיאֲךָ֗ אֵ֚ת מִיכַ֣ל בַּת־שָׁא֔וּל בְּבֹאֲךָ֖ לִרְאֹ֥ות אֶת־פָּנָֽי׃ ס wayoʾmer ṭowv ʾaniy ʾekherot ʾitekha beriyt ʾakhe davar ʾeḥad ʾanokhiy shoʾel meʾitekha leʾmor loʾ־tireʾeh ʾet־panay kiy ׀ ʾim־lifeney heviyʾakha ʾet miykhal bat־shaʾul bevoʾakha lireʾowt ʾet־panay׃ s

¹⁴ וַיִּשְׁלַ֤ח דָּוִד֙ מַלְאָכִ֔ים אֶל־אִֽישׁ־בֹּ֥שֶׁת בֶּן־שָׁא֖וּל לֵאמֹ֑ר תְּנָ֤ה אֶת־אִשְׁתִּי֙ אֶת־מִיכַ֔ל אֲשֶׁר֙ אֵרַ֣שְׂתִּי לִ֔י בְּמֵאָ֖ה עָרְלֹ֥ות פְּלִשְׁתִּֽים׃ wayishelaḥ dawid maleʾakhiym ʾel־ʾiysh־boshet ben־shaʾul leʾmor tenah ʾet־ʾishetiy ʾet־miykhal ʾasher ʾerasetiy liy bemeʾah ʿarelowt pelishetiym׃

¹⁵ וַיִּשְׁלַח֙ אִ֣ישׁ בֹּ֔שֶׁת וַיִּקָּחֶ֖הָ מֵ֣עִֽם אִ֑ישׁ מֵעִ֖ם פַּלְטִיאֵ֥ל בֶּן־ [לוּשׁ כ] (לָֽיִשׁ׃ ק) wayishelaḥ ʾiysh boshet wayiqaḥeah meʿim ʾiysh meʿim paleṭiyʾel ben־ [lush kh] (layish׃ q)

¹⁶ וַיֵּ֨לֶךְ אִתָּ֜הּ אִישָׁ֗הּ הָלֹ֧וךְ וּבָכֹ֛ה אַחֲרֶ֖יהָ עַד־בַּֽחֻרִ֑ים וַיֹּ֨אמֶר אֵלָ֥יו אַבְנֵ֛ר לֵ֥ךְ שׁ֖וּב וַיָּשֹֽׁב׃ wayelekhe ʾitah ʾiyshah halowkhe uvakhoh ʾaḥareyha ʿad־baḥuriym wayoʾmer ʾelayw ʾavener lekhe shuv wayashov׃

¹⁷ וּדְבַר־אַבְנֵ֣ר הָיָ֔ה עִם־זִקְנֵ֥י יִשְׂרָאֵ֖ל לֵאמֹ֑ר גַּם־תְּמֹול֙ גַּם־שִׁלְשֹׁ֔ם הֱיִיתֶ֞ם מְבַקְשִׁ֧ים אֶת־דָּוִ֛ד לְמֶ֖לֶךְ עֲלֵיכֶֽם׃ udevar־ʾavener hayah ʿim־ziqeney yiseraʾel leʾmor gam־temowl gam־shileshom heyiytem mevaqeshiym ʾet־dawid lemelekhe ʿaleykhem׃

¹⁸ וְעַתָּ֖ה עֲשׂ֑וּ כִּ֣י יְהוָ֗ה אָמַ֤ר אֶל־דָּוִד֙ לֵאמֹ֔ר בְּיַ֣ד ׀ דָּוִ֣ד עַבְדִּ֗י הֹושִׁ֜יעַ אֶת־עַמִּ֤י יִשְׂרָאֵל֙ מִיַּ֣ד פְּלִשְׁתִּ֔ים וּמִיַּ֖ד כָּל־אֹיְבֵיהֶֽם׃ weʿatah ʿasu kiy yehwah ʾamar ʾel־dawid leʾmor beyad ׀ dawid ʿavediy howshiyʿa ʾet־ʿamiy yiseraʾel miyad pelishetiym umiyad kal־ʾoyeveyhem׃

¹⁹ וַיְדַבֵּ֥ר גַּם־אַבְנֵ֖ר בְּאָזְנֵ֣י בִנְיָמִ֑ין וַיֵּ֣לֶךְ גַּם־אַבְנֵ֗ר לְדַבֵּ֞ר בְּאָזְנֵ֤י דָוִד֙ בְּחֶבְרֹ֔ון אֵ֤ת כָּל־אֲשֶׁר־טֹוב֙ בְּעֵינֵ֣י יִשְׂרָאֵ֔ל וּבְעֵינֵ֖י כָּל־בֵּ֥ית בִּנְיָמִֽן׃ wayedaber gam־ʾavener beʾazeney vineyamiyn wayelekhe gam־ʾavener ledaber beʾazeney dawid beḥeverown ʾet kal־ʾasher־ṭowv beʿeyney yiseraʾel uveʿeyney kal־beyt bineyamin׃

²⁰ וַיָּבֹ֨א אַבְנֵ֤ר אֶל־דָּוִד֙ חֶבְרֹ֔ון וְאִתֹּ֖ו עֶשְׂרִ֣ים אֲנָשִׁ֑ים וַיַּ֨עַשׂ דָּוִ֧ד לְאַבְנֵ֛ר וְלַאֲנָשִׁ֥ים אֲשֶׁר־אִתֹּ֖ו מִשְׁתֶּֽה׃ wayavoʾ ʾavener ʾel־dawid ḥeverown weʾitow ʿeseriym ʾanashiym wayaʿas dawid leʾavener welaʾanashiym ʾasher־ʾitow misheteh׃

²¹ וַיֹּ֣אמֶר אַבְנֵ֣ר אֶל־דָּוִ֡ד אָק֣וּמָה ׀ וְֽאֵלֵ֡כָה וְאֶקְבְּצָה֩ אֶל־אֲדֹנִ֨י הַמֶּ֜לֶךְ אֶת־כָּל־יִשְׂרָאֵ֗ל וְיִכְרְת֤וּ אִתְּךָ֙ בְּרִ֔ית וּמָ֣לַכְתָּ֔ בְּכֹ֥ל אֲשֶׁר־תְּאַוֶּ֖ה נַפְשֶׁ֑ךָ וַיְּשַׁלַּ֥ח דָּוִ֛ד אֶת־אַבְנֵ֖ר וַיֵּ֥לֶךְ בְּשָׁלֹֽום׃ wayoʾmer ʾavener ʾel־dawid ʾaqumah ׀ weʾelekhah weʾeqebetsah ʾel־ʾadoniy hamelekhe ʾet־kal־yiseraʾel weyikheretu ʾitekha beriyt umalakheta bekhol ʾasher־teʾaueh nafeshekha wayeshalaḥ dawid ʾet־ʾavener wayelekhe beshalowm׃

²² וְהִנֵּה֩ עַבְדֵ֨י דָוִ֤ד וְיֹואָב֙ בָּ֣א מֵֽהַגְּד֔וּד וְשָׁלָ֥ל רָ֖ב עִמָּ֣ם הֵבִ֑יאוּ וְאַבְנֵ֗ר אֵינֶ֤נּוּ עִם־דָּוִד֙ בְּחֶבְרֹ֔ון כִּ֥י שִׁלְּחֹ֖ו וַיֵּ֥לֶךְ בְּשָׁלֹֽום׃ wehineh ʿavedey dawid weyowʾav baʾ mehagedud weshalal rav ʿimam heviyʾu weʾavener ʾeynenu ʿim־dawid beḥeverown kiy shileḥow wayelekhe beshalowm׃

²³ וְיֹואָ֛ב וְכָל־הַצָּבָ֥א אֲשֶׁר־אִתֹּ֖ו בָּ֑אוּ וַיַּגִּ֤דוּ לְיֹואָב֙ לֵאמֹ֔ר בָּֽא־אַבְנֵ֤ר בֶּן־נֵר֙ אֶל־הַמֶּ֔לֶךְ וַֽיְשַׁלְּחֵ֖הוּ וַיֵּ֥לֶךְ בְּשָׁלֹֽום׃ weyowʾav wekhal־hatsavaʾ ʾasher־ʾitow baʾu wayagidu leyowʾav leʾmor baʾ־ʾavener ben־ner ʾel־hamelekhe wayeshaleḥehu wayelekhe beshalowm׃

²⁴ וַיָּבֹ֤א יֹואָב֙ אֶל־הַמֶּ֔לֶךְ וַיֹּ֖אמֶר מֶ֣ה עָשִׂ֑יתָה הִנֵּה־בָ֤א אַבְנֵר֙ אֵלֶ֔יךָ לָמָּה־זֶּ֥ה שִׁלַּחְתֹּ֖ו וַיֵּ֥לֶךְ הָלֹֽוךְ׃ wayavoʾ yowʾav ʾel־hamelekhe wayoʾmer meh ʿasiytah hineh־vaʾ ʾavener ʾeleykha lamah־zeh shilaḥetow wayelekhe halowkhe׃

²⁵ יָדַ֙עְתָּ֙ אֶת־אַבְנֵ֣ר בֶּן־נֵ֔ר כִּ֥י לְפַתֹּתְךָ֖ בָּ֑א וְלָדַ֜עַת אֶת־מֹוצָֽאֲךָ֙ וְאֶת־ [מִבֹואֶךָ כ] (מֹ֣ובָאֶ֔ךָ ק) וְלָדַ֕עַת אֵ֛ת כָּל־אֲשֶׁ֥ר אַתָּ֖ה עֹשֶֽׂה׃ yadaʿeta ʾet־ʾavener ben־ner kiy lefatotekha baʾ weladaʿat ʾet־mowtsaʾakha weʾet־ [mivowʾekha kh] (mowvaʾekha q) weladaʿat ʾet kal־ʾasher ʾatah ʿoseh׃

²⁶ וַיֵּצֵ֤א יֹואָב֙ מֵעִ֣ם דָּוִ֔ד וַיִּשְׁלַ֤ח מַלְאָכִים֙ אַחֲרֵ֣י אַבְנֵ֔ר וַיָּשִׁ֥בוּ אֹתֹ֖ו מִבֹּ֣ור הַסִּרָ֑ה וְדָוִ֖ד לֹ֥א יָדָֽע׃ wayetseʾ yowʾav meʿim dawid wayishelaḥ maleʾakhiym ʾaḥarey ʾavener wayashivu ʾotow mibowr hasirah wedawid loʾ yadaʿ׃

²⁷ וַיָּ֤שָׁב אַבְנֵר֙ חֶבְרֹ֔ון וַיַּטֵּ֤הוּ יֹואָב֙ אֶל־תֹּ֣וךְ הַשַּׁ֔עַר לְדַּבֵּ֥ר אִתֹּ֖ו בַּשֶּׁ֑לִי וַיַּכֵּ֤הוּ שָׁם֙ הַחֹ֔מֶשׁ וַיָּ֕מָת בְּדַ֖ם עֲשָׂה־אֵ֥ל אָחִֽיו׃ wayashav ʾavener ḥeverown wayaṭehu yowʾav ʾel־towkhe hashaʿar ledaber ʾitow basheliy wayakehu sham haḥomesh wayamat bedam ʿasah־ʾel ʾaḥiyw׃

²⁸ וַיִּשְׁמַ֤ע דָּוִד֙ מֵאַ֣חֲרֵי כֵ֔ן וַיֹּ֗אמֶר נָקִ֨י אָנֹכִ֧י וּמַמְלַכְתִּ֛י מֵעִ֥ם יְהוָ֖ה עַד־עֹולָ֑ם מִדְּמֵ֖י אַבְנֵ֥ר בֶּן־נֵֽר׃ wayishemaʿ dawid meʾaḥarey khen wayoʾmer naqiy ʾanokhiy umamelakhetiy meʿim yehwah ʿad־ʿowlam midemey ʾavener ben־ner׃

²⁹ יָחֻ֙לוּ֙ עַל־רֹ֣אשׁ יֹואָ֔ב וְאֶ֖ל כָּל־בֵּ֣ית אָבִ֑יו וְֽאַל־יִכָּרֵ֣ת מִבֵּ֣ית יֹואָ֡ב זָ֠ב וּמְצֹרָ֞ע וּמַחֲזִ֥יק בַּפֶּ֛לֶךְ וְנֹפֵ֥ל בַּחֶ֖רֶב וַחֲסַר־לָֽחֶם׃ yaḥulu ʿal־roʾsh yowʾav weʾel kal־beyt ʾaviyw weʾal־yikaret mibeyt yowʾav zav umetsoraʿ umaḥaziyq bapelekhe wenofel baḥerev waḥasar־laḥem׃

³⁰ וְיֹואָב֙ וַאֲבִישַׁ֣י אָחִ֔יו הָרְג֖וּ לְאַבְנֵ֑ר עַל֩ אֲשֶׁ֨ר הֵמִ֜ית אֶת־עֲשָׂהאֵ֧ל אֲחִיהֶ֛ם בְּגִבְעֹ֖ון בַּמִּלְחָמָֽה׃ פ weyowʾav waʾaviyshay ʾaḥiyw haregu leʾavener ʿal ʾasher hemiyt ʾet־ʿasahʾel ʾaḥiyhem begiveʿown bamileḥamah׃ f

³¹ וַיֹּאמֶר֩ דָּוִ֨ד אֶל־יֹואָ֜ב וְאֶל־כָּל־הָעָ֣ם אֲשֶׁר־אִתֹּ֗ו קִרְע֤וּ בִגְדֵיכֶם֙ וְחִגְר֣וּ שַׂקִּ֔ים וְסִפְד֖וּ לִפְנֵ֣י אַבְנֵ֑ר וְהַמֶּ֣לֶךְ דָּוִ֔ד הֹלֵ֖ךְ אַחֲרֵ֥י הַמִּטָּֽה׃ wayoʾmer dawid ʾel־yowʾav weʾel־kal־haʿam ʾasher־ʾitow qireʿu vigedeykhem weḥigeru saqiym wesifedu lifeney ʾavener wehamelekhe dawid holekhe ʾaḥarey hamiṭah׃

³² וַיִּקְבְּר֥וּ אֶת־אַבְנֵ֖ר בְּחֶבְרֹ֑ון וַיִשָּׂ֧א הַמֶּ֣לֶךְ אֶת־קֹולֹ֗ו וַיֵּבְךְּ֙ אֶל־קֶ֣בֶר אַבְנֵ֔ר וַיִּבְכּ֖וּ כָּל־הָעָֽם׃ פ wayiqeberu ʾet־ʾavener beḥeverown wayisaʾ hamelekhe ʾet־qowlow wayeveke ʾel־qever ʾavener wayiveku kal־haʿam׃ f

³³ וַיְקֹנֵ֥ן הַמֶּ֛לֶךְ אֶל־אַבְנֵ֖ר וַיֹּאמַ֑ר הַכְּמֹ֥ות נָבָ֖ל יָמ֥וּת אַבְנֵֽר׃ wayeqonen hamelekhe ʾel־ʾavener wayoʾmar hakemowt naval yamut ʾavener׃

³⁴ יָדֶ֣ךָ לֹֽא־אֲסֻרֹ֗ות וְרַגְלֶ֙יךָ֙ לֹא־לִנְחֻשְׁתַּ֣יִם הֻגָּ֔שׁוּ כִּנְפֹ֛ול לִפְנֵ֥י בְנֵֽי־עַוְלָ֖ה נָפָ֑לְתָּ וַיֹּסִ֥פוּ כָל־הָעָ֖ם לִבְכֹּ֥ות עָלָֽיו׃ yadekha loʾ־ʾasurowt werageleykha loʾ־lineḥushetayim hugashu kinefowl lifeney veney־ʿawelah nafaleta wayosifu khal־haʿam livekowt ʿalayw׃

³⁵ וַיָּבֹ֣א כָל־הָעָ֗ם לְהַבְרֹ֧ות אֶת־דָּוִ֛ד לֶ֖חֶם בְּעֹ֣וד הַיֹּ֑ום וַיִּשָּׁבַ֨ע דָּוִ֜ד לֵאמֹ֗ר כֹּ֣ה יַעֲשֶׂה־לִּ֤י אֱלֹהִים֙ וְכֹ֣ה יֹסִ֔יף כִּ֣י אִם־לִפְנֵ֧י בֹֽוא־הַשֶּׁ֛מֶשׁ אֶטְעַם־לֶ֖חֶם אֹ֥ו כָל־מְאֽוּמָה׃ wayavoʾ khal־haʿam lehaverowt ʾet־dawid leḥem beʿowd hayowm wayishavaʿ dawid leʾmor koh yaʿaseh־liy ʾelohiym wekhoh yosiyf kiy ʾim־lifeney vowʾ־hashemesh ʾeṭeʿam־leḥem ʾow khal־meʾumah׃

³⁶ וְכָל־הָעָ֣ם הִכִּ֔ירוּ וַיִּיטַ֖ב בְּעֵֽינֵיהֶ֑ם כְּכֹל֙ אֲשֶׁ֣ר עָשָׂ֣ה הַמֶּ֔לֶךְ בְּעֵינֵ֥י כָל־הָעָ֖ם טֹֽוב׃ wekhal־haʿam hikiyru wayiyṭav beʿeyneyhem kekhol ʾasher ʿasah hamelekhe beʿeyney khal־haʿam ṭowv׃

³⁷ וַיֵּדְע֧וּ כָל־הָעָ֛ם וְכָל־יִשְׂרָאֵ֖ל בַּיֹּ֣ום הַה֑וּא כִּ֣י לֹ֤א הָיְתָה֙ מֵֽהַמֶּ֔לֶךְ לְהָמִ֖ית אֶת־אַבְנֵ֥ר בֶּן־נֵֽר׃ פ wayedeʿu khal־haʿam wekhal־yiseraʾel bayowm hahuʾ kiy loʾ hayetah mehamelekhe lehamiyt ʾet־ʾavener ben־ner׃ f

³⁸ וַיֹּ֥אמֶר הַמֶּ֖לֶךְ אֶל־עֲבָדָ֑יו הֲלֹ֣וא תֵדְע֔וּ כִּי־שַׂ֣ר וְגָדֹ֗ול נָפַ֛ל הַיֹּ֥ום הַזֶּ֖ה בְּיִשְׂרָאֵֽל׃ wayoʾmer hamelekhe ʾel־ʿavadayw halowʾ tedeʿu kiy־sar wegadowl nafal hayowm hazeh beyiseraʾel׃

³⁹ וְאָנֹכִ֨י הַיֹּ֥ום רַךְ֙ וּמָשׁ֣וּחַ מֶ֔לֶךְ וְהָאֲנָשִׁ֥ים הָאֵ֛לֶּה בְּנֵ֥י צְרוּיָ֖ה קָשִׁ֣ים מִמֶּ֑נִּי יְשַׁלֵּ֧ם יְהוָ֛ה לְעֹשֵׂ֥ה הָרָעָ֖ה כְּרָעָתֹֽו׃ פ weʾanokhiy hayowm rakhe umashuaḥ melekhe wehaʾanashiym haʾeleh beney tseruyah qashiym mimeniy yeshalem yehwah leʿoseh haraʿah keraʿatow׃ f