1 מַשָּׂ֖א גֵּ֣יא חִזָּיֹ֑ון מַה־לָּ֣ךְ אֵפֹ֔וא כִּֽי־עָלִ֥ית כֻּלָּ֖ךְ לַגַּגֹּֽות׃ masaʾ geyʾ ḥizayown mah־lakhe ʾefowʾ kiy־ʿaliyt kulakhe lagagowt׃
2 תְּשֻׁאֹ֣ות ׀ מְלֵאָ֗ה עִ֚יר הֹֽומִיָּ֔ה קִרְיָ֖ה עַלִּיזָ֑ה חֲלָלַ֙יִךְ֙ לֹ֣א חַלְלֵי־חֶ֔רֶב וְלֹ֖א מֵתֵ֥י מִלְחָמָֽה׃ teshuʾowt ׀ meleʾah ʿiyr howmiyah qireyah ʿaliyzah ḥalalayikhe loʾ ḥaleley־ḥerev weloʾ metey mileḥamah׃
3 כָּל־קְצִינַ֥יִךְ נָֽדְדוּ־יַ֖חַד מִקֶּ֣שֶׁת אֻסָּ֑רוּ כָּל־נִמְצָאַ֙יִךְ֙ אֻסְּר֣וּ יַחְדָּ֔ו מֵרָחֹ֖וק בָּרָֽחוּ׃ kal־qetsiynayikhe nadedu־yaḥad miqeshet ʾusaru kal־nimetsaʾayikhe ʾuseru yaḥedaw meraḥowq baraḥu׃
4 עַל־כֵּ֥ן אָמַ֛רְתִּי שְׁע֥וּ מִנִּ֖י אֲמָרֵ֣ר בַּבֶּ֑כִי אַל־תָּאִ֣יצוּ לְנַֽחֲמֵ֔נִי עַל־שֹׁ֖ד בַּת־עַמִּֽי׃ ʿal־ken ʾamaretiy sheʿu miniy ʾamarer babekhiy ʾal־taʾiytsu lenaḥameniy ʿal־shod bat־ʿamiy׃
5 כִּ֣י יֹום֩ מְהוּמָ֨ה וּמְבוּסָ֜ה וּמְבוּכָ֗ה לַֽאדֹנָ֧י יְהוִ֛ה צְבָאֹ֖ות בְּגֵ֣יא חִזָּיֹ֑ון מְקַרְקַ֥ר קִ֖ר וְשֹׁ֥ועַ אֶל־הָהָֽר׃ kiy yowm mehumah umevusah umevukhah laʾdonay yehwih tsevaʾowt begeyʾ ḥizayown meqareqar qir weshowʿa ʾel־hahar׃
6 וְעֵילָם֙ נָשָׂ֣א אַשְׁפָּ֔ה בְּרֶ֥כֶב אָדָ֖ם פָּֽרָשִׁ֑ים וְקִ֥יר עֵרָ֖ה מָגֵֽן׃ weʿeylam nasaʾ ʾashepah berekhev ʾadam parashiym weqiyr ʿerah magen׃
7 וַיְהִ֥י מִבְחַר־עֲמָקַ֖יִךְ מָ֣לְאוּ רָ֑כֶב וְהַפָּ֣רָשִׁ֔ים שֹׁ֖ת שָׁ֥תוּ הַשָּֽׁעְרָה׃ wayehiy miveḥar־ʿamaqayikhe maleʾu rakhev wehaparashiym shot shatu hashaʿerah׃
8 וַיְגַ֕ל אֵ֖ת מָסַ֣ךְ יְהוּדָ֑ה וַתַּבֵּט֙ בַּיֹּ֣ום הַה֔וּא אֶל־נֶ֖שֶׁק בֵּ֥ית הַיָּֽעַר׃ wayegal ʾet masakhe yehudah watabeṭ bayowm hahuʾ ʾel־nesheq beyt hayaʿar׃
9 וְאֵ֨ת בְּקִיעֵ֧י עִיר־דָּוִ֛ד רְאִיתֶ֖ם כִּי־רָ֑בּוּ וַֽתְּקַבְּצ֔וּ אֶת־מֵ֥י הַבְּרֵכָ֖ה הַתַּחְתֹּונָֽה׃ weʾet beqiyʿey ʿiyr־dawid reʾiytem kiy־rabu wateqabetsu ʾet־mey haberekhah hataḥetownah׃
10 וְאֶת־בָּתֵּ֥י יְרוּשָׁלִַ֖ם סְפַרְתֶּ֑ם וַתִּתְֿצוּ֙ הַבָּ֣תִּ֔ים לְבַצֵּ֖ר הַחֹומָֽה׃ weʾet־batey yerushalim sefaretem watitetsu habatiym levatser haḥowmah׃
11 וּמִקְוָ֣ה ׀ עֲשִׂיתֶ֗ם בֵּ֚ין הַחֹ֣מֹתַ֔יִם לְמֵ֖י הַבְּרֵכָ֣ה הַיְשָׁנָ֑ה וְלֹ֤א הִבַּטְתֶּם֙ אֶל־עֹשֶׂ֔יהָ וְיֹצְרָ֥הּ מֵֽרָחֹ֖וק לֹ֥א רְאִיתֶֽם׃ umiqewah ׀ ʿasiytem beyn haḥomotayim lemey haberekhah hayeshanah weloʾ hibaṭetem ʾel־ʿoseyha weyotserah meraḥowq loʾ reʾiytem׃
12 וַיִּקְרָ֗א אֲדֹנָ֧י יְהוִ֛ה צְבָאֹ֖ות בַּיֹּ֣ום הַה֑וּא לִבְכִי֙ וּלְמִסְפֵּ֔ד וּלְקָרְחָ֖ה וְלַחֲגֹ֥ר שָֽׂק׃ wayiqeraʾ ʾadonay yehwih tsevaʾowt bayowm hahuʾ livekhiy ulemiseped uleqareḥah welaḥagor saq׃
13 וְהִנֵּ֣ה ׀ שָׂשֹׂ֣ון וְשִׂמְחָ֗ה הָרֹ֤ג ׀ בָּקָר֙ וְשָׁחֹ֣ט צֹ֔אן אָכֹ֥ל בָּשָׂ֖ר וְשָׁתֹ֣ות יָ֑יִן אָכֹ֣ול וְשָׁתֹ֔ו כִּ֥י מָחָ֖ר נָמֽוּת׃ wehineh ׀ sasown wesimeḥah harog ׀ baqar weshaḥoṭ tsoʾn ʾakhol basar weshatowt yayin ʾakhowl weshatow kiy maḥar namut׃
14 וְנִגְלָ֥ה בְאָזְנָ֖י יְהוָ֣ה צְבָאֹ֑ות אִם־יְ֠כֻפַּר הֶעָוֹן֙ הַזֶּ֤ה לָכֶם֙ עַד־תְּמֻת֔וּן אָמַ֛ר אֲדֹנָ֥י יְהוִ֖ה צְבָאֹֽות׃ פ wenigelah veʾazenay yehwah tsevaʾowt ʾim־yekhupar heʿaon hazeh lakhem ʿad־temutun ʾamar ʾadonay yehwih tsevaʾowt׃ f
15 כֹּ֥ה אָמַ֛ר אֲדֹנָ֥י יְהוִ֖ה צְבָאֹ֑ות לֶךְ־בֹּא֙ אֶל־הַסֹּכֵ֣ן הַזֶּ֔ה עַל־שֶׁבְנָ֖א אֲשֶׁ֥ר עַל־הַבָּֽיִת׃ koh ʾamar ʾadonay yehwih tsevaʾowt lekhe־boʾ ʾel־hasokhen hazeh ʿal־shevenaʾ ʾasher ʿal־habayit׃
16 מַה־לְּךָ֥ פֹה֙ וּמִ֣י לְךָ֣ פֹ֔ה כִּֽי־חָצַ֧בְתָּ לְּךָ֛ פֹּ֖ה קָ֑בֶר חֹצְבִ֤י מָרֹום֙ קִבְרֹ֔ו חֹקְקִ֥י בַסֶּ֖לַע מִשְׁכָּ֥ן לֹֽו׃ mah־lekha foh umiy lekha foh kiy־ḥatsaveta lekha poh qaver ḥotseviy marowm qiverow ḥoqeqiy vaselaʿ mishekan low׃
17 הִנֵּ֤ה יְהוָה֙ מְטַלְטֶלְךָ֔ טַלְטֵלָ֖ה גָּ֑בֶר וְעֹטְךָ֖ עָטֹֽה׃ hineh yehwah meṭaleṭelekha ṭaleṭelah gaver weʿoṭekha ʿaṭoh׃
18 צָנֹ֤וף יִצְנָפְךָ֙ צְנֵפָ֔ה כַּדּ֕וּר אֶל־אֶ֖רֶץ רַחֲבַ֣ת יָדָ֑יִם שָׁ֣מָּה תָמ֗וּת וְשָׁ֙מָּה֙ מַרְכְּבֹ֣ות כְּבֹודֶ֔ךָ קְלֹ֖ון בֵּ֥ית אֲדֹנֶֽיךָ׃ tsanowf yitsenafekha tsenefah kadur ʾel־ʾerets raḥavat yadayim shamah tamut weshamah marekevowt kevowdekha qelown beyt ʾadoneykha׃
19 וַהֲדַפְתִּ֖יךָ מִמַּצָּבֶ֑ךָ וּמִמַּעֲמָֽדְךָ֖ יֶהֶרְסֶֽךָ׃ wahadafetiykha mimatsavekha umimaʿamadekha yeheresekha׃
20 וְהָיָ֖ה בַּיֹּ֣ום הַה֑וּא וְקָרָ֣אתִי לְעַבְדִּ֔י לְאֶלְיָקִ֖ים בֶּן־חִלְקִיָּֽהוּ׃ wehayah bayowm hahuʾ weqaraʾtiy leʿavediy leʾeleyaqiym ben־ḥileqiyahu׃
21 וְהִלְבַּשְׁתִּ֣יו כֻּתָּנְתֶּ֗ךָ וְאַבְנֵֽטְךָ֙ אֲחַזְּקֶ֔נּוּ וּמֶֽמְשֶׁלְתְּךָ֖ אֶתֵּ֣ן בְּיָדֹ֑ו וְהָיָ֥ה לְאָ֛ב לְיֹושֵׁ֥ב יְרוּשָׁלִַ֖ם וּלְבֵ֥ית יְהוּדָֽה׃ wehilebashetiyw kutanetekha weʾaveneṭekha ʾaḥazeqenu umemesheletekha ʾeten beyadow wehayah leʾav leyowshev yerushalim uleveyt yehudah׃
22 וְנָתַתִּ֛י מַפְתֵּ֥חַ בֵּית־דָּוִ֖ד עַל־שִׁכְמֹ֑ו וּפָתַח֙ וְאֵ֣ין סֹגֵ֔ר וְסָגַ֖ר וְאֵ֥ין פֹּתֵֽחַ׃ wenatatiy mafeteaḥ beyt־dawid ʿal־shikhemow ufataḥ weʾeyn soger wesagar weʾeyn poteaḥ׃
23 וּתְקַעְתִּ֥יו יָתֵ֖ד בְּמָקֹ֣ום נֶאֱמָ֑ן וְהָיָ֛ה לְכִסֵּ֥א כָבֹ֖וד לְבֵ֥ית אָבִֽיו׃ uteqaʿetiyw yated bemaqowm neʾeman wehayah lekhiseʾ khavowd leveyt ʾaviyw׃
24 וְתָל֨וּ עָלָ֜יו כֹּ֣ל ׀ כְּבֹ֣וד בֵּית־אָבִ֗יו הַצֶּֽאֱצָאִים֙ וְהַצְּפִעֹ֔ות כֹּ֖ל כְּלֵ֣י הַקָּטָ֑ן מִכְּלֵי֙ הָֽאַגָּנֹ֔ות וְעַ֖ד כָּל־כְּלֵ֥י הַנְּבָלִֽים׃ wetalu ʿalayw kol ׀ kevowd beyt־ʾaviyw hatseʾetsaʾiym wehatsefiʿowt kol keley haqaṭan mikeley haʾaganowt weʿad kal־keley hanevaliym׃
25 בַּיֹּ֣ום הַה֗וּא נְאֻם֙ יְהוָ֣ה צְבָאֹ֔ות תָּמוּשׁ֙ הַיָּתֵ֔ד הַתְּקוּעָ֖ה בְּמָקֹ֣ום נֶאֱמָ֑ן וְנִגְדְּעָ֣ה וְנָפְלָ֗ה וְנִכְרַת֙ הַמַּשָּׂ֣א אֲשֶׁר־עָלֶ֔יהָ כִּ֥י יְהוָ֖ה דִּבֵּֽר׃ ס bayowm hahuʾ neʾum yehwah tsevaʾowt tamush hayated hatequʿah bemaqowm neʾeman wenigedeʿah wenafelah wenikherat hamasaʾ ʾasher־ʿaleyha kiy yehwah diber׃ s