1 בַּיֹּ֣ום הַה֗וּא נָתַ֞ן הַמֶּ֤לֶךְ אֲחַשְׁוֵרֹושׁ֙ לְאֶסְתֵּ֣ר הַמַּלְכָּ֔ה אֶת־בֵּ֥ית הָמָ֖ן צֹרֵ֣ר [הַיְּהוּדִיִּים כ] (הַיְּהוּדִ֑ים ק) וּמָרְדֳּכַ֗י בָּ֚א לִפְנֵ֣י הַמֶּ֔לֶךְ כִּֽי־הִגִּ֥ידָה אֶסְתֵּ֖ר מַ֥ה הוּא־לָֽהּ׃ bayowm hahuʾ natan hamelekhe ʾaḥashewerowsh leʾeseter hamalekah ʾet־beyt haman tsorer [hayehudiyiym kh] (hayehudiym q) umaredokhay baʾ lifeney hamelekhe kiy־higiydah ʾeseter mah huʾ־lah׃
2 וַיָּ֨סַר הַמֶּ֜לֶךְ אֶת־טַבַּעְתֹּ֗ו אֲשֶׁ֤ר הֶֽעֱבִיר֙ מֵֽהָמָ֔ן וַֽיִּתְּנָ֖הּ לְמָרְדֳּכָ֑י וַתָּ֧שֶׂם אֶסְתֵּ֛ר אֶֽת־מָרְדֳּכַ֖י עַל־בֵּ֥ית הָמָֽן׃ פ wayasar hamelekhe ʾet־ṭabaʿetow ʾasher heʿeviyr mehaman wayitenah lemaredokhay watasem ʾeseter ʾet־maredokhay ʿal־beyt haman׃ f
3 וַתֹּ֣וסֶף אֶסְתֵּ֗ר וַתְּדַבֵּר֙ לִפְנֵ֣י הַמֶּ֔לֶךְ וַתִּפֹּ֖ל לִפְנֵ֣י רַגְלָ֑יו וַתֵּ֣בְךְּ וַתִּתְחַנֶּן־לֹ֗ו לְהַֽעֲבִיר֙ אֶת־רָעַת֙ הָמָ֣ן הָֽאֲגָגִ֔י וְאֵת֙ מַֽחֲשַׁבְתֹּ֔ו אֲשֶׁ֥ר חָשַׁ֖ב עַל־הַיְּהוּדִֽים׃ watowsef ʾeseter watedaber lifeney hamelekhe watipol lifeney ragelayw wateveke watiteḥanen־low lehaʿaviyr ʾet־raʿat haman haʾagagiy weʾet maḥashavetow ʾasher ḥashav ʿal־hayehudiym׃
4 וַיֹּ֤ושֶׁט הַמֶּ֙לֶךְ֙ לְאֶסְתֵּ֔ר אֵ֖ת שַׁרְבִ֣ט הַזָּהָ֑ב וַתָּ֣קָם אֶסְתֵּ֔ר וַֽתַּעֲמֹ֖ד לִפְנֵ֥י הַמֶּֽלֶךְ׃ wayowsheṭ hamelekhe leʾeseter ʾet shareviṭ hazahav wataqam ʾeseter wataʿamod lifeney hamelekhe׃
5 וַ֠תֹּאמֶר אִם־עַל־הַמֶּ֨לֶךְ טֹ֜וב וְאִם־מָצָ֧אתִי חֵ֣ן לְפָנָ֗יו וְכָשֵׁ֤ר הַדָּבָר֙ לִפְנֵ֣י הַמֶּ֔לֶךְ וְטֹובָ֥ה אֲנִ֖י בְּעֵינָ֑יו יִכָּתֵ֞ב לְהָשִׁ֣יב אֶת־הַסְּפָרִ֗ים מַחֲשֶׁ֜בֶת הָמָ֤ן בֶּֽן־הַמְּדָ֙תָא֙ הָאֲגָגִ֔י אֲשֶׁ֣ר כָּתַ֗ב לְאַבֵּד֙ אֶת־הַיְּהוּדִ֔ים אֲשֶׁ֖ר בְּכָל־מְדִינֹ֥ות הַמֶּֽלֶךְ׃ watoʾmer ʾim־ʿal־hamelekhe ṭowv weʾim־matsaʾtiy ḥen lefanayw wekhasher hadavar lifeney hamelekhe weṭowvah ʾaniy beʿeynayw yikatev lehashiyv ʾet־hasefariym maḥashevet haman ben־hamedataʾ haʾagagiy ʾasher katav leʾabed ʾet־hayehudiym ʾasher bekhal־mediynowt hamelekhe׃
6 כִּ֠י אֵיכָכָ֤ה אוּכַל֙ וְֽרָאִ֔יתִי בָּרָעָ֖ה אֲשֶׁר־יִמְצָ֣א אֶת־עַמִּ֑י וְאֵֽיכָכָ֤ה אוּכַל֙ וְֽרָאִ֔יתִי בְּאָבְדַ֖ן מֹולַדְתִּֽי׃ ס kiy ʾeykhakhah ʾukhal weraʾiytiy baraʿah ʾasher־yimetsaʾ ʾet־ʿamiy weʾeykhakhah ʾukhal weraʾiytiy beʾavedan mowladetiy׃ s
7 וַיֹּ֨אמֶר הַמֶּ֤לֶךְ אֲחַשְׁוֵרֹשׁ֙ לְאֶסְתֵּ֣ר הַמַּלְכָּ֔ה וּֽלְמָרְדֳּכַ֖י הַיְּהוּדִ֑י הִנֵּ֨ה בֵית־הָמָ֜ן נָתַ֣תִּי לְאֶסְתֵּ֗ר וְאֹתֹו֙ תָּל֣וּ עַל־הָעֵ֔ץ עַ֛ל אֲשֶׁר־שָׁלַ֥ח יָדֹ֖ו [בַּיְּהוּדִיִּים כ] (בַּיְּהוּדִֽים׃ ק) wayoʾmer hamelekhe ʾaḥashewerosh leʾeseter hamalekah ulemaredokhay hayehudiy hineh veyt־haman natatiy leʾeseter weʾotow talu ʿal־haʿets ʿal ʾasher־shalaḥ yadow [bayehudiyiym kh] (bayehudiym׃ q)
8 וְ֠אַתֶּם כִּתְב֨וּ עַל־הַיְּהוּדִ֜ים כַּטֹּ֤וב בְּעֵֽינֵיכֶם֙ בְּשֵׁ֣ם הַמֶּ֔לֶךְ וְחִתְמ֖וּ בְּטַבַּ֣עַת הַמֶּ֑לֶךְ כִּֽי־כְתָ֞ב אֲשֶׁר־נִכְתָּ֣ב בְּשֵׁם־הַמֶּ֗לֶךְ וְנַחְתֹּ֛ום בְּטַבַּ֥עַת הַמֶּ֖לֶךְ אֵ֥ין לְהָשִֽׁיב׃ weʾatem kitevu ʿal־hayehudiym kaṭowv beʿeyneykhem beshem hamelekhe weḥitemu beṭabaʿat hamelekhe kiy־khetav ʾasher־nikhetav beshem־hamelekhe wenaḥetowm beṭabaʿat hamelekhe ʾeyn lehashiyv׃
9 וַיִּקָּרְא֣וּ סֹפְרֵֽי־הַמֶּ֣לֶךְ בָּֽעֵת־הַ֠הִיא בַּחֹ֨דֶשׁ הַשְּׁלִישִׁ֜י הוּא־חֹ֣דֶשׁ סִיוָ֗ן בִּשְׁלֹושָׁ֣ה וְעֶשְׂרִים֮ בֹּו֒ וַיִּכָּתֵ֣ב כְּֽכָל־אֲשֶׁר־צִוָּ֣ה מָרְדֳּכַ֣י אֶל־הַיְּהוּדִ֡ים וְאֶ֣ל הָאֲחַשְׁדַּרְפְּנִֽים־וְהַפַּחֹות֩ וְשָׂרֵ֨י הַמְּדִינֹ֜ות אֲשֶׁ֣ר ׀ מֵהֹ֣דּוּ וְעַד־כּ֗וּשׁ שֶׁ֣בַע וְעֶשְׂרִ֤ים וּמֵאָה֙ מְדִינָ֔ה מְדִינָ֤ה וּמְדִינָה֙ כִּכְתָבָ֔הּ וְעַ֥ם וָעָ֖ם כִּלְשֹׁנֹ֑ו וְאֶ֨ל־הַיְּהוּדִ֔ים כִּכְתָבָ֖ם וְכִלְשֹׁונָֽם׃ wayiqareʾu soferey־hamelekhe baʿet־hahiyʾ baḥodesh hasheliyshiy huʾ־ḥodesh siywan bishelowshah weʿeseriym bow wayikatev kekhal־ʾasher־tsiuah maredokhay ʾel־hayehudiym weʾel haʾaḥashedarepeniym־wehapaḥowt wesarey hamediynowt ʾasher ׀ mehodu weʿad־kush shevaʿ weʿeseriym umeʾah mediynah mediynah umediynah kikhetavah weʿam waʿam kileshonow weʾel־hayehudiym kikhetavam wekhileshownam׃
10 וַיִּכְתֹּ֗ב בְּשֵׁם֙ הַמֶּ֣לֶךְ אֲחַשְׁוֵרֹ֔שׁ וַיַּחְתֹּ֖ם בְּטַבַּ֣עַת הַמֶּ֑לֶךְ וַיִּשְׁלַ֣ח סְפָרִ֡ים בְּיַד֩ הָרָצִ֨ים בַּסּוּסִ֜ים רֹכְבֵ֤י הָרֶ֙כֶשׁ֙ הָֽאֲחַשְׁתְּרָנִ֔ים בְּנֵ֖י הָֽרַמָּכִֽים׃ wayikhetov beshem hamelekhe ʾaḥashewerosh wayaḥetom beṭabaʿat hamelekhe wayishelaḥ sefariym beyad haratsiym basusiym rokhevey harekhesh haʾaḥasheteraniym beney haramakhiym׃
11 אֲשֶׁר֩ נָתַ֨ן הַמֶּ֜לֶךְ לַיְּהוּדִ֣ים ׀ אֲשֶׁ֣ר בְּכָל־עִיר־וָעִ֗יר לְהִקָּהֵל֮ וְלַעֲמֹ֣ד עַל־נַפְשָׁם֒ לְהַשְׁמִיד֩ וְלַהֲרֹ֨ג וּלְאַבֵּ֜ד אֶת־כָּל־חֵ֨יל עַ֧ם וּמְדִינָ֛ה הַצָּרִ֥ים אֹתָ֖ם טַ֣ף וְנָשִׁ֑ים וּשְׁלָלָ֖ם לָבֹֽוז׃ ʾasher natan hamelekhe layehudiym ׀ ʾasher bekhal־ʿiyr־waʿiyr lehiqahel welaʿamod ʿal־nafesham lehashemiyd welaharog uleʾabed ʾet־kal־ḥeyl ʿam umediynah hatsariym ʾotam ṭaf wenashiym ushelalam lavowz׃
12 בְּיֹ֣ום אֶחָ֔ד בְּכָל־מְדִינֹ֖ות הַמֶּ֣לֶךְ אֲחַשְׁוֵרֹ֑ושׁ בִּשְׁלֹושָׁ֥ה עָשָׂ֛ר לְחֹ֥דֶשׁ שְׁנֵים־עָשָׂ֖ר הוּא־חֹ֥דֶשׁ אֲדָֽר׃ beyowm ʾeḥad bekhal־mediynowt hamelekhe ʾaḥashewerowsh bishelowshah ʿasar leḥodesh sheneym־ʿasar huʾ־ḥodesh ʾadar׃
13 פַּתְשֶׁ֣גֶן הַכְּתָ֗ב לְהִנָּ֤תֵֽן דָּת֙ בְּכָל־מְדִינָ֣ה וּמְדִינָ֔ה גָּל֖וּי לְכָל־הָעַמִּ֑ים וְלִהְיֹ֨ות [הַיְּהוּדִיִּים כ] (הַיְּהוּדִ֤ים ק) [עֲתוּדִים כ] (עֲתִידִים֙ ק) לַיֹּ֣ום הַזֶּ֔ה לְהִנָּקֵ֖ם מֵאֹיְבֵיהֶֽם׃ pateshegen haketav lehinaten dat bekhal־mediynah umediynah galuy lekhal־haʿamiym weliheyowt [hayehudiyiym kh] (hayehudiym q) [ʿatudiym kh] (ʿatiydiym q) layowm hazeh lehinaqem meʾoyeveyhem׃
14 הָרָצִ֞ים רֹכְבֵ֤י הָרֶ֙כֶשׁ֙ הָֽאֲחַשְׁתְּרָנִ֔ים יָֽצְא֛וּ מְבֹהָלִ֥ים וּדְחוּפִ֖ים בִּדְבַ֣ר הַמֶּ֑לֶךְ וְהַדָּ֥ת נִתְּנָ֖ה בְּשׁוּשַׁ֥ן הַבִּירָֽה׃ פ haratsiym rokhevey harekhesh haʾaḥasheteraniym yatseʾu mevohaliym udeḥufiym bidevar hamelekhe wehadat nitenah beshushan habiyrah׃ f
15 וּמָרְדֳּכַ֞י יָצָ֣א ׀ מִלִּפְנֵ֣י הַמֶּ֗לֶךְ בִּלְב֤וּשׁ מַלְכוּת֙ תְּכֵ֣לֶת וָח֔וּר וַעֲטֶ֤רֶת זָהָב֙ גְּדֹולָ֔ה וְתַכְרִ֥יךְ בּ֖וּץ וְאַרְגָּמָ֑ן וְהָעִ֣יר שׁוּשָׁ֔ן צָהֲלָ֖ה וְשָׂמֵֽחָה׃ umaredokhay yatsaʾ ׀ milifeney hamelekhe bilevush malekhut tekhelet waḥur waʿaṭeret zahav gedowlah wetakheriykhe buts weʾaregaman wehaʿiyr shushan tsahalah wesameḥah׃
16 לַיְּהוּדִ֕ים הָֽיְתָ֥ה אֹורָ֖ה וְשִׂמְחָ֑ה וְשָׂשֹׂ֖ן וִיקָֽר׃ layehudiym hayetah ʾowrah wesimeḥah wesason wiyqar׃
17 וּבְכָל־מְדִינָ֨ה וּמְדִינָ֜ה וּבְכָל־עִ֣יר וָעִ֗יר מְקֹום֙ אֲשֶׁ֨ר דְּבַר־הַמֶּ֤לֶךְ וְדָתֹו֙ מַגִּ֔יעַ שִׂמְחָ֤ה וְשָׂשֹׂון֙ לַיְּהוּדִ֔ים מִשְׁתֶּ֖ה וְיֹ֣ום טֹ֑וב וְרַבִּ֞ים מֵֽעַמֵּ֤י הָאָ֙רֶץ֙ מִֽתְיַהֲדִ֔ים כִּֽי־נָפַ֥ל פַּֽחַד־הַיְּהוּדִ֖ים עֲלֵיהֶֽם׃ uvekhal־mediynah umediynah uvekhal־ʿiyr waʿiyr meqowm ʾasher devar־hamelekhe wedatow magiyʿa simeḥah wesasown layehudiym misheteh weyowm ṭowv werabiym meʿamey haʾarets miteyahadiym kiy־nafal paḥad־hayehudiym ʿaleyhem׃