2 Samuel 15

¹ וַֽיְהִי֙ מֵאַ֣חֲרֵי כֵ֔ן וַיַּ֤עַשׂ לֹו֙ אַבְשָׁלֹ֔ום מֶרְכָּבָ֖ה וְסֻסִ֑ים וַחֲמִשִּׁ֥ים אִ֖ישׁ רָצִ֥ים לְפָנָֽיו׃ wayehiy meʾaḥarey khen wayaʿas low ʾaveshalowm merekavah wesusiym waḥamishiym ʾiysh ratsiym lefanayw׃

² וְהִשְׁכִּים֙ אַבְשָׁלֹ֔ום וְעָמַ֕ד עַל־יַ֖ד דֶּ֣רֶךְ הַשָּׁ֑עַר וַיְהִ֡י כָּל־הָאִ֣ישׁ אֲשֶֽׁר־יִהְיֶה־לֹּו־רִיב֩ לָבֹ֨וא אֶל־הַמֶּ֜לֶךְ לַמִּשְׁפָּ֗ט וַיִּקְרָ֨א אַבְשָׁלֹ֤ום אֵלָיו֙ וַיֹּ֗אמֶר אֵֽי־מִזֶּ֥ה עִיר֙ אַ֔תָּה וַיֹּ֕אמֶר מֵאַחַ֥ד שִׁבְטֵֽי־יִשְׂרָאֵ֖ל עַבְדֶּֽךָ׃ wehishekiym ʾaveshalowm weʿamad ʿal־yad derekhe hashaʿar wayehiy kal־haʾiysh ʾasher־yiheyeh־low־riyv lavowʾ ʾel־hamelekhe lamishepaṭ wayiqeraʾ ʾaveshalowm ʾelayw wayoʾmer ʾey־mizeh ʿiyr ʾatah wayoʾmer meʾaḥad shiveṭey־yiseraʾel ʿavedekha׃

³ וַיֹּ֤אמֶר אֵלָיו֙ אַבְשָׁלֹ֔ום רְאֵ֥ה דְבָרֶ֖ךָ טֹובִ֣ים וּנְכֹחִ֑ים וְשֹׁמֵ֥עַ אֵין־לְךָ֖ מֵאֵ֥ת הַמֶּֽלֶךְ׃ wayoʾmer ʾelayw ʾaveshalowm reʾeh devarekha ṭowviym unekhoḥiym weshomeaʿ ʾeyn־lekha meʾet hamelekhe׃

⁴ וַיֹּ֙אמֶר֙ אַבְשָׁלֹ֔ום מִי־יְשִׂמֵ֥נִי שֹׁפֵ֖ט בָּאָ֑רֶץ וְעָלַ֗י יָבֹ֥וא כָּל־אִ֛ישׁ אֲשֶֽׁר־יִהְיֶה־לֹּו־רִ֥יב וּמִשְׁפָּ֖ט וְהִצְדַּקְתִּֽיו׃ wayoʾmer ʾaveshalowm miy־yesimeniy shofeṭ baʾarets weʿalay yavowʾ kal־ʾiysh ʾasher־yiheyeh־low־riyv umishepaṭ wehitsedaqetiyw׃

⁵ וְהָיָה֙ בִּקְרָב־אִ֔ישׁ לְהִשְׁתַּחֲוֹ֖ת לֹ֑ו וְשָׁלַ֧ח אֶת־יָדֹ֛ו וְהֶחֱזִ֥יק לֹ֖ו וְנָ֥שַׁק לֹֽו׃ wehayah biqerav־ʾiysh lehishetaḥaot low weshalaḥ ʾet־yadow weheḥeziyq low wenashaq low׃

⁶ וַיַּ֨עַשׂ אַבְשָׁלֹ֜ום כַּדָּבָ֤ר הַזֶּה֙ לְכָל־יִשְׂרָאֵ֔ל אֲשֶׁר־יָבֹ֥אוּ לַמִּשְׁפָּ֖ט אֶל־הַמֶּ֑לֶךְ וַיְגַנֵּב֙ אַבְשָׁלֹ֔ום אֶת־לֵ֖ב אַנְשֵׁ֥י יִשְׂרָאֵֽל׃ פ wayaʿas ʾaveshalowm kadavar hazeh lekhal־yiseraʾel ʾasher־yavoʾu lamishepaṭ ʾel־hamelekhe wayeganev ʾaveshalowm ʾet־lev ʾaneshey yiseraʾel׃ f

⁷ וַיְהִ֕י מִקֵּ֖ץ אַרְבָּעִ֣ים שָׁנָ֑ה וַיֹּ֤אמֶר אַבְשָׁלֹום֙ אֶל־הַמֶּ֔לֶךְ אֵ֣לֲכָה נָּ֗א וַאֲשַׁלֵּ֛ם אֶת־נִדְרִ֛י אֲשֶׁר־נָדַ֥רְתִּי לַֽיהוָ֖ה בְּחֶבְרֹֽון׃ wayehiy miqets ʾarebaʿiym shanah wayoʾmer ʾaveshalowm ʾel־hamelekhe ʾelakhah naʾ waʾashalem ʾet־nideriy ʾasher־nadaretiy layhwah beḥeverown׃

⁸ כִּי־נֵ֙דֶר֙ נָדַ֣ר עַבְדְּךָ֔ בְּשִׁבְתִּ֥י בִגְשׁ֛וּר בַּאֲרָ֖ם לֵאמֹ֑ר אִם־ [יְשִׁיב כ] (יָשֹׁ֨וב ק) יְשִׁיבֵ֤נִי יְהוָה֙ יְר֣וּשָׁלִַ֔ם וְעָבַדְתִּ֖י אֶת־יְהוָֽה׃ kiy־neder nadar ʿavedekha beshivetiy vigeshur baʾaram leʾmor ʾim־ [yeshiyv kh] (yashowv q) yeshiyveniy yehwah yerushalim weʿavadetiy ʾet־yehwah׃

⁹ וַיֹּֽאמֶר־לֹ֥ו הַמֶּ֖לֶךְ לֵ֣ךְ בְּשָׁלֹ֑ום וַיָּ֖קָם וַיֵּ֥לֶךְ חֶבְרֹֽונָה׃ פ wayoʾmer־low hamelekhe lekhe beshalowm wayaqam wayelekhe ḥeverownah׃ f

¹⁰ וַיִּשְׁלַ֤ח אַבְשָׁלֹום֙ מְרַגְּלִ֔ים בְּכָל־שִׁבְטֵ֥י יִשְׂרָאֵ֖ל לֵאמֹ֑ר כְּשָׁמְעֲכֶם֙ אֶת־קֹ֣ול הַשֹּׁפָ֔ר וַאֲמַרְתֶּ֕ם מָלַ֥ךְ אַבְשָׁלֹ֖ום בְּחֶבְרֹֽון׃ wayishelaḥ ʾaveshalowm merageliym bekhal־shiveṭey yiseraʾel leʾmor keshameʿakhem ʾet־qowl hashofar waʾamaretem malakhe ʾaveshalowm beḥeverown׃

¹¹ וְאֶת־אַבְשָׁלֹ֗ום הָלְכ֞וּ מָאתַ֤יִם אִישׁ֙ מִיר֣וּשָׁלִַ֔ם קְרֻאִ֖ים וְהֹלְכִ֣ים לְתֻמָּ֑ם וְלֹ֥א יָדְע֖וּ כָּל־דָּבָֽר׃ weʾet־ʾaveshalowm halekhu maʾtayim ʾiysh miyrushalim qeruʾiym weholekhiym letumam weloʾ yadeʿu kal־davar׃

¹² וַיִּשְׁלַ֣ח אַ֠בְשָׁלֹום אֶת־אֲחִיתֹ֨פֶל הַגִּֽילֹנִ֜י יֹועֵ֣ץ דָּוִ֗ד מֵֽעִירֹו֙ מִגִּלֹ֔ה בְּזָבְחֹ֖ו אֶת־הַזְּבָחִ֑ים וַיְהִ֤י הַקֶּ֙שֶׁר֙ אַמִּ֔ץ וְהָעָ֛ם הֹולֵ֥ךְ וָרָ֖ב אֶת־אַבְשָׁלֹֽום׃ wayishelaḥ ʾaveshalowm ʾet־ʾaḥiytofel hagiyloniy yowʿets dawid meʿiyrow migiloh bezaveḥow ʾet־hazevaḥiym wayehiy haqesher ʾamits wehaʿam howlekhe warav ʾet־ʾaveshalowm׃

¹³ וַיָּבֹא֙ הַמַּגִּ֔יד אֶל־דָּוִ֖ד לֵאמֹ֑ר הָיָ֛ה לֶב־אִ֥ישׁ יִשְׂרָאֵ֖ל אַחֲרֵ֥י אַבְשָׁלֹֽום׃ wayavoʾ hamagiyd ʾel־dawid leʾmor hayah lev־ʾiysh yiseraʾel ʾaḥarey ʾaveshalowm׃

¹⁴ וַיֹּ֣אמֶר דָּ֠וִד לְכָל־עֲבָדָ֨יו אֲשֶׁר־אִתֹּ֤ו בִירוּשָׁלִַ֙ם֙ ק֣וּמוּ וְנִבְרָ֔חָה כִּ֛י לֹא־תִֽהְיֶה־לָּ֥נוּ פְלֵיטָ֖ה מִפְּנֵ֣י אַבְשָׁלֹ֑ום מַהֲר֣וּ לָלֶ֗כֶת פֶּן־יְמַהֵ֤ר וְהִשִּׂגָ֙נוּ֙ וְהִדִּ֤יחַ עָלֵ֙ינוּ֙ אֶת־הָ֣רָעָ֔ה וְהִכָּ֥ה הָעִ֖יר לְפִי־חָֽרֶב׃ wayoʾmer dawid lekhal־ʿavadayw ʾasher־ʾitow viyrushalim qumu weniveraḥah kiy loʾ־tiheyeh־lanu feleyṭah mipeney ʾaveshalowm maharu lalekhet pen־yemaher wehisiganu wehidiyḥa ʿaleynu ʾet־haraʿah wehikah haʿiyr lefiy־ḥarev׃

¹⁵ וַיֹּאמְר֥וּ עַבְדֵֽי־הַמֶּ֖לֶךְ אֶל־הַמֶּ֑לֶךְ כְּכֹ֧ל אֲשֶׁר־יִבְחַ֛ר אֲדֹנִ֥י הַמֶּ֖לֶךְ הִנֵּ֥ה עֲבָדֶֽיךָ׃ wayoʾmeru ʿavedey־hamelekhe ʾel־hamelekhe kekhol ʾasher־yiveḥar ʾadoniy hamelekhe hineh ʿavadeykha׃

¹⁶ וַיֵּצֵ֥א הַמֶּ֛לֶךְ וְכָל־בֵּיתֹ֖ו בְּרַגְלָ֑יו וַיַּעֲזֹ֣ב הַמֶּ֗לֶךְ אֵ֣ת עֶ֧שֶׂר נָשִׁ֛ים פִּֽלַגְשִׁ֖ים לִשְׁמֹ֥ר הַבָּֽיִת׃ wayetseʾ hamelekhe wekhal־beytow beragelayw wayaʿazov hamelekhe ʾet ʿeser nashiym pilageshiym lishemor habayit׃

¹⁷ וַיֵּצֵ֥א הַמֶּ֛לֶךְ וְכָל־הָעָ֖ם בְּרַגְלָ֑יו וַיַּעַמְד֖וּ בֵּ֥ית הַמֶּרְחָֽק׃ wayetseʾ hamelekhe wekhal־haʿam beragelayw wayaʿamedu beyt hamereḥaq׃

¹⁸ וְכָל־עֲבָדָיו֙ עֹבְרִ֣ים עַל־יָדֹ֔ו וְכָל־הַכְּרֵתִ֖י וְכָל־הַפְּלֵתִ֑י וְכָֽל־הַגִּתִּ֞ים שֵׁשׁ־מֵאֹ֣ות אִ֗ישׁ אֲשֶׁר־בָּ֤אוּ בְרַגְלֹו֙ מִגַּ֔ת עֹבְרִ֖ים עַל־פְּנֵ֥י הַמֶּֽלֶךְ׃ wekhal־ʿavadayw ʿoveriym ʿal־yadow wekhal־hakeretiy wekhal־hapeletiy wekhal־hagitiym shesh־meʾowt ʾiysh ʾasher־baʾu veragelow migat ʿoveriym ʿal־peney hamelekhe׃

¹⁹ וַיֹּ֤אמֶר הַמֶּ֙לֶךְ֙ אֶל־אִתַּ֣י הַגִּתִּ֔י לָ֧מָּה תֵלֵ֛ךְ גַּם־אַתָּ֖ה אִתָּ֑נוּ שׁ֣וּב וְשֵׁ֤ב עִם־הַמֶּ֙לֶךְ֙ כִּֽי־נָכְרִ֣י אַ֔תָּה וְגַם־גֹּלֶ֥ה אַתָּ֖ה לִמְקֹומֶֽךָ׃ wayoʾmer hamelekhe ʾel־ʾitay hagitiy lamah telekhe gam־ʾatah ʾitanu shuv weshev ʿim־hamelekhe kiy־nakheriy ʾatah wegam־goleh ʾatah limeqowmekha׃

²⁰ תְּמֹ֣ול ׀ בֹּואֶ֗ךָ וְהַיֹּ֞ום [אֲנֹועֲךָ כ] (אֲנִֽיעֲךָ֤ ק) עִמָּ֙נוּ֙ לָלֶ֔כֶת וַאֲנִ֣י הֹולֵ֔ךְ עַ֥ל אֲשֶׁר־אֲנִ֖י הֹולֵ֑ךְ שׁ֣וּב וְהָשֵׁ֧ב אֶת־אַחֶ֛יךָ עִמָּ֖ךְ חֶ֥סֶד וֶאֱמֶֽת׃ temowl ׀ bowʾekha wehayowm [ʾanowʿakha kh] (ʾaniyʿakha q) ʿimanu lalekhet waʾaniy howlekhe ʿal ʾasher־ʾaniy howlekhe shuv wehashev ʾet־ʾaḥeykha ʿimakhe ḥesed weʾemet׃

²¹ וַיַּ֧עַן אִתַּ֛י אֶת־הַמֶּ֖לֶךְ וַיֹּאמַ֑ר חַי־יְהוָ֗ה וְחֵי֙ אֲדֹנִ֣י הַמֶּ֔לֶךְ כִּ֠י אִם־בִּמְקֹ֞ום אֲשֶׁ֥ר יִֽהְיֶה־שָּׁ֣ם ׀ אֲדֹנִ֣י הַמֶּ֗לֶךְ אִם־לְמָ֙וֶת֙ אִם־לְחַיִּ֔ים כִּי־שָׁ֖ם יִהְיֶ֥ה עַבְדֶּֽךָ׃ wayaʿan ʾitay ʾet־hamelekhe wayoʾmar ḥay־yehwah weḥey ʾadoniy hamelekhe kiy ʾim־bimeqowm ʾasher yiheyeh־sham ׀ ʾadoniy hamelekhe ʾim־lemawet ʾim־leḥayiym kiy־sham yiheyeh ʿavedekha׃

²² וַיֹּ֧אמֶר דָּוִ֛ד אֶל־אִתַּ֖י לֵ֣ךְ וַעֲבֹ֑ר וַֽיַּעֲבֹ֞ר אִתַּ֤י הַגִּתִּי֙ וְכָל־אֲנָשָׁ֔יו וְכָל־הַטַּ֖ף אֲשֶׁ֥ר אִתֹּֽו׃ wayoʾmer dawid ʾel־ʾitay lekhe waʿavor wayaʿavor ʾitay hagitiy wekhal־ʾanashayw wekhal־haṭaf ʾasher ʾitow׃

²³ וְכָל־הָאָ֗רֶץ בֹּוכִים֙ קֹ֣ול גָּדֹ֔ול וְכָל־הָעָ֖ם עֹֽבְרִ֑ים וְהַמֶּ֗לֶךְ עֹבֵר֙ בְּנַ֣חַל קִדְרֹ֔ון וְכָל־הָעָם֙ עֹבְרִ֔ים עַל־פְּנֵי־דֶ֖רֶךְ אֶת־הַמִּדְבָּֽר׃ wekhal־haʾarets bowkhiym qowl gadowl wekhal־haʿam ʿoveriym wehamelekhe ʿover benaḥal qiderown wekhal־haʿam ʿoveriym ʿal־peney־derekhe ʾet־hamidebar׃

²⁴ וְהִנֵּ֨ה גַם־צָדֹ֜וק וְכָֽל־הַלְוִיִּ֣ם אִתֹּ֗ו נֹֽשְׂאִים֙ אֶת־אֲרֹון֙ בְּרִ֣ית הָאֱלֹהִ֔ים וַיַּצִּ֙קוּ֙ אֶת־אֲרֹ֣ון הָאֱלֹהִ֔ים וַיַּ֖עַל אֶבְיָתָ֑ר עַד־תֹּ֥ם כָּל־הָעָ֖ם לַעֲבֹ֥ור מִן־הָעִֽיר׃ wehineh gam־tsadowq wekhal־halewiyim ʾitow noseʾiym ʾet־ʾarown beriyt haʾelohiym wayatsiqu ʾet־ʾarown haʾelohiym wayaʿal ʾeveyatar ʿad־tom kal־haʿam laʿavowr min־haʿiyr׃

²⁵ וַיֹּ֤אמֶר הַמֶּ֙לֶךְ֙ לְצָדֹ֔וק הָשֵׁ֛ב אֶת־אֲרֹ֥ון הָאֱלֹהִ֖ים הָעִ֑יר אִם־אֶמְצָ֥א חֵן֙ בְּעֵינֵ֣י יְהוָ֔ה וֶהֱשִׁבַ֕נִי וְהִרְאַ֥נִי אֹתֹ֖ו וְאֶת־נָוֵֽהוּ׃ wayoʾmer hamelekhe letsadowq hashev ʾet־ʾarown haʾelohiym haʿiyr ʾim־ʾemetsaʾ ḥen beʿeyney yehwah weheshivaniy wehireʾaniy ʾotow weʾet־nawehu׃

²⁶ וְאִם֙ כֹּ֣ה יֹאמַ֔ר לֹ֥א חָפַ֖צְתִּי בָּ֑ךְ הִנְנִ֕י יַֽעֲשֶׂה־לִּ֕י כַּאֲשֶׁ֥ר טֹ֖וב בְּעֵינָֽיו׃ ס weʾim koh yoʾmar loʾ ḥafatsetiy bakhe hineniy yaʿaseh־liy kaʾasher ṭowv beʿeynayw׃ s

²⁷ וַיֹּ֤אמֶר הַמֶּ֙לֶךְ֙ אֶל־צָדֹ֣וק הַכֹּהֵ֔ן הֲרֹואֶ֣ה אַתָּ֔ה שֻׁ֥בָה הָעִ֖יר בְּשָׁלֹ֑ום וַאֲחִימַ֨עַץ בִּנְךָ֜ וִיהֹונָתָ֧ן בֶּן־אֶבְיָתָ֛ר שְׁנֵ֥י בְנֵיכֶ֖ם אִתְּכֶֽם׃ wayoʾmer hamelekhe ʾel־tsadowq hakohen harowʾeh ʾatah shuvah haʿiyr beshalowm waʾaḥiymaʿats binekha wiyhownatan ben־ʾeveyatar sheney veneykhem ʾitekhem׃

²⁸ רְאוּ֙ אָנֹכִ֣י מִתְמַהְמֵ֔הַּ [בְּעַבְרֹות כ] (בְּעַֽרְבֹ֖ות ק) הַמִּדְבָּ֑ר עַ֣ד בֹּ֥וא דָבָ֛ר מֵעִמָּכֶ֖ם לְהַגִּ֥יד לִֽי׃ reʾu ʾanokhiy mitemahemeah [beʿaverowt kh] (beʿarevowt q) hamidebar ʿad bowʾ davar meʿimakhem lehagiyd liy׃

²⁹ וַיָּ֨שֶׁב צָדֹ֧וק וְאֶבְיָתָ֛ר אֶת־אֲרֹ֥ון הָאֱלֹהִ֖ים יְרוּשָׁלִָ֑ם וַיֵּשְׁב֖וּ שָֽׁם׃ wayashev tsadowq weʾeveyatar ʾet־ʾarown haʾelohiym yerushalim wayeshevu sham׃

³⁰ וְדָוִ֡ד עֹלֶה֩ בְמַעֲלֵ֨ה הַזֵּיתִ֜ים עֹלֶ֣ה ׀ וּבֹוכֶ֗ה וְרֹ֥אשׁ לֹו֙ חָפ֔וּי וְה֖וּא הֹלֵ֣ךְ יָחֵ֑ף וְכָל־הָעָ֣ם אֲשֶׁר־אִתֹּ֗ו חָפוּ֙ אִ֣ישׁ רֹאשֹׁ֔ו וְעָל֥וּ עָלֹ֖ה וּבָכֹֽה׃ wedawid ʿoleh vemaʿaleh hazeytiym ʿoleh ׀ uvowkheh weroʾsh low ḥafuy wehuʾ holekhe yaḥef wekhal־haʿam ʾasher־ʾitow ḥafu ʾiysh roʾshow weʿalu ʿaloh uvakhoh׃

³¹ וְדָוִד֙ הִגִּ֣יד לֵאמֹ֔ר אֲחִיתֹ֥פֶל בַּקֹּשְׁרִ֖ים עִם־אַבְשָׁלֹ֑ום וַיֹּ֣אמֶר דָּוִ֔ד סַכֶּל־נָ֛א אֶת־עֲצַ֥ת אֲחִיתֹ֖פֶל יְהוָֽה׃ wedawid higiyd leʾmor ʾaḥiytofel baqosheriym ʿim־ʾaveshalowm wayoʾmer dawid sakel־naʾ ʾet־ʿatsat ʾaḥiytofel yehwah׃

³² וַיְהִ֤י דָוִד֙ בָּ֣א עַד־הָרֹ֔אשׁ אֲשֶֽׁר־יִשְׁתַּחֲוֶ֥ה שָׁ֖ם לֵאלֹהִ֑ים וְהִנֵּ֤ה לִקְרָאתֹו֙ חוּשַׁ֣י הָאַרְכִּ֔י קָר֙וּעַ֙ כֻּתָּנְתֹּ֔ו וַאֲדָמָ֖ה עַל־רֹאשֹֽׁו׃ wayehiy dawid baʾ ʿad־haroʾsh ʾasher־yishetaḥaweh sham leʾlohiym wehineh liqeraʾtow ḥushay haʾarekiy qaruaʿ kutanetow waʾadamah ʿal־roʾshow׃

³³ וַיֹּ֥אמֶר לֹ֖ו דָּוִ֑ד אִ֚ם עָבַ֣רְתָּ אִתִּ֔י וְהָיִ֥תָ עָלַ֖י לְמַשָּֽׂא׃ wayoʾmer low dawid ʾim ʿavareta ʾitiy wehayita ʿalay lemasaʾ׃

³⁴ וְאִם־הָעִ֣יר תָּשׁ֗וּב וְאָמַרְתָּ֤ לְאַבְשָׁלֹום֙ עַבְדְּךָ֙ אֲנִ֤י הַמֶּ֙לֶךְ֙ אֶֽהְיֶ֔ה עֶ֣בֶד אָבִ֤יךָ וַֽאֲנִי֙ מֵאָ֔ז וְעַתָּ֖ה וַאֲנִ֣י עַבְדֶּ֑ךָ וְהֵפַרְתָּ֣ה לִ֔י אֵ֖ת עֲצַ֥ת אֲחִיתֹֽפֶל׃ weʾim־haʿiyr tashuv weʾamareta leʾaveshalowm ʿavedekha ʾaniy hamelekhe ʾeheyeh ʿeved ʾaviykha waʾaniy meʾaz weʿatah waʾaniy ʿavedekha wehefaretah liy ʾet ʿatsat ʾaḥiytofel׃

³⁵ וַהֲלֹ֤וא עִמְּךָ֙ שָׁ֔ם צָדֹ֥וק וְאֶבְיָתָ֖ר הַכֹּהֲנִ֑ים וְהָיָ֗ה כָּל־הַדָּבָר֙ אֲשֶׁ֤ר תִּשְׁמַע֙ מִבֵּ֣ית הַמֶּ֔לֶךְ תַּגִּ֕יד לְצָדֹ֥וק וּלְאֶבְיָתָ֖ר הַכֹּהֲנִֽים׃ wahalowʾ ʿimekha sham tsadowq weʾeveyatar hakohaniym wehayah kal־hadavar ʾasher tishemaʿ mibeyt hamelekhe tagiyd letsadowq uleʾeveyatar hakohaniym׃

³⁶ הִנֵּה־שָׁ֤ם עִמָּם֙ שְׁנֵ֣י בְנֵיהֶ֔ם אֲחִימַ֣עַץ לְצָדֹ֔וק וִיהֹונָתָ֖ן לְאֶבְיָתָ֑ר וּשְׁלַחְתֶּ֤ם בְּיָדָם֙ אֵלַ֔י כָּל־דָּבָ֖ר אֲשֶׁ֥ר תִּשְׁמָֽעוּ׃ hineh־sham ʿimam sheney veneyhem ʾaḥiymaʿats letsadowq wiyhownatan leʾeveyatar ushelaḥetem beyadam ʾelay kal־davar ʾasher tishemaʿu׃

³⁷ וַיָּבֹ֥א חוּשַׁ֛י רֵעֶ֥ה דָוִ֖ד הָעִ֑יר וְאַבְשָׁלֹ֔ם יָבֹ֖א יְרוּשָׁלִָֽם׃ wayavoʾ ḥushay reʿeh dawid haʿiyr weʾaveshalom yavoʾ yerushalim׃